"GƏLƏRSƏN
- GÖRƏRSƏN" qalası
Şəki
tarixinə ötəri bir nəzər
Şəki rayonu (1968-ci ilədək
Nuxa) 1930-cu ildə təşkil olunmuşdur. 1963-cü ildə
rayon ləğv edilərək ərazisi Vartaşen (indiki
Oğuz) rayonuna verilmiş, 1965-ci ildə isə yenidən
müstəqil rayon statusu almışdır. Rayon
şimal-şərqdə Rusiyanın Dağıstan MR ilə
həmsərhəddir. Şəhərin ərazisi dəniz səviyyəsindən
500-850 metr hündürlükdə yerləşir. Baş
Qafqaz silsiləsinin qarlı zirvələrinin yüksəkliyi
bəzi yerlərdə 3000-3500 metrə çatır.
Dağlarda Yura, Təbaşir, dağ ətəklərində
Neogen və Antropogen çöküntüləri
yayılmışdır.
Şəki
Azərbaycanın tarixi şəhərlərindən və ən
qədim mədəniyyət mərkəzlərindən
biridir. Şəhər və rayon ərazisi tarixi abidələr
və qalalarla zəngindir. Şəki Xan sarayı,
Aşağı Karvansara, Yuxarı Karvansara, Kiş məbədi
və s. təkcə bu diyarın deyil, bütün Şərqin
ən möhtəşəm abidələrindəndir.
Vaxtilə
Şəkidə məşhur sənətkarlar məhəlləsi
mövcud olmuşdur. Bu sənətkarların
yaratdıqları dulusçuluq, zərgərlik,
şüşə və metal məmulatları, ipək
parça və xam ipək məhsulları dünyanın əksər
ölkələrinə və şəhərlərinə
ixrac edilmişdir. Buranın əhalisi həmçinin ticarət,
bağçılıq, tütünçülük və
sair işlərdə məşğul olub.
Şəki
haqqında ərəb, fars, türk, gürcü mənbələrində,
həmçinin rus və orta əsr Avropa müəlliflərinin
əsərlərində geniş məlumatlar verilir. Təkzibedilməz
tarixi və arxeoloji faktlarla sübut edilmişdir ki, Şəkinin
əsası eramızdan əvvəl VII əsrdə qoyulub. Azərbaycanın
mərkəzi şəhərlərindən biri kimi
tanınmış Şəki tarixən vilayət, knyazlıq,
əmirlik və nəhayət xanlıq mərkəzi kimi
mövcud olub. Bu il şəhərin əsasının
qoyulmasının 2700 illiyi təntənə ilə qeyd edilib.
Qüdrətdən səngərli,
qalalı dağlar...
Başı
buludları dələn dağlarımız, səfalı
yaylaqlarımız zaman-zaman qürur mənbəyimiz olmaqla bərabər,
həm də babalarımızın isti yuvası,
sığınacaq yeri, yadelli işğalçıların
hücumlarına sinə gərən sipər, müdafiə
istehkamlarımız olmuşlar. Ulularımız
sıldırım qayalı, dərin yarğanlı belə
dağlarda möhtəşəm qalalar quraraq, elin-obanın
ağır günlərində bu tərlan oylaqlarında at
minib, qılınc oynadıb, qalxan gəzdirib, yağı
düşmənə qan udduraraq, arxa-dayaq olublar yurd yerlərimizə.
Odlar yurdu Azərbaycan azadlıq uğrunda döyüşlərdə
odürəkli oğullarına, qızlarına
arxalandığı kimi, vüqarlı dağlarına, odlu məbədlərinə,
onların etibarına da bir o qədər güvənib. Onlar
da kürək-kürəyə, çiyin-çiyinə
dayanaraq azman sədlər kimi gecəli-gündüzlü
keşiyini çəkibdir, doğma yurdumuzun. Qala
divarlarında tikilən mazqal və bürclərdən qalaya
yaxınlaşmaq istəyən düşmənə daş, ox,
nizə yağdırıb, od ələyiblər.
Qədim
tarixi qaynaqlardan məlum olur ki, o taylı-bu taylı doğma
Azərbaycanımızın elə bir guşəsi, elə
bir bölgəsi olmayıb ki, orada başı göylərə
ucalan möhtəşəm qalalara, bürc, qüllə,
istehkamlara, onların qalıqlarına rast gəlinməsin. Əlincəqala,
Çıraqqala, Bəzz qalası, Girdman qalası,
Cavanşir qalası, Ərk qalası, Zərdüşt
qalası, Qız qalaları, Dərbənd qalası,
Abşeron qalaları, Fit qalası, Qəhqəhə
qalası, Pəri qalası, Gülüstan qalası,
Koroğlu qalası, Əsgəran qalası və s. Dizləri
bükülməz bahadırlarımızdan yadigar qalan belə
qalalardan biri də "Gələrsən-Görərsən"
qalasıdır.
Bu
qala bizim qala,
Həmişə
bizim qala.
Tikmədim
özüm qalam,
Tikdim
ki, izim qala.
"Gələrsən-Görərsən"
qalası (Bəzi mənbələrdə "Gəl-Gör-Get
qalası" kimi qeyd olunur) Şəkinin Kiş kəndinin
şimal-şərqində, Kiş çayının
qollarından biri olan Damarçın çayının sol
sahilində, Qaratəpə dağının üzərində
yerləşir. Qaratəpə dağının arxasında isə
yüksək dağlar sıralanır. Qalanın belə bir
yerdə salınmasının əsas məqsədi odur ki,
sıldırım olduğuna görə qalaya öndən,
arxadan və çay tərəfdən hücum etmək
mümkün deyil. Qala ilə Kiş kəndi arasındakı ərazi
Qala düzü də adlanır. O da maraqlıdır ki, rus
yazıçısı Lev Tolstoyun məşhur "Hacı
Murad" povestinin qəhrəmanlarının başına gələn
hadisələrin də məhz bu qalada cərəyan etdiyi
bildirilir. "Gələrsən-Görərsən"
qalası sındırılmış çay
daşlarından inşa edilmiş və divarlarının
qalınlığı bəzi yerlərdə 2,7 metrə
çatan qala hündür bürclərlə (7 metr) əhatə
olunub. Şəki şəhərinin özü qala divarları
ilə əhatə olunmadığından, düşmən
hücumu zamanı əhali "Gələrsən-Görərsən"
qalasına sığınırdı. Vaxtilə qalanın
möhkəm bəndi, sıldırım dağlarla əhatələnməsi,
azman bürclərə və qüllələrə malik
olması təkcə şəhər əhalisinin təhlükəsizliyini
qorumur, həm də özünəməxsus təbiətə
malik bu yurdda namus və qeyrət rəmzi kimi qürurla
dayanırdı.
Qalanı
seyr etdikcə qandan-qadadan, amansız savaş və
qovğalardan xəbər verən ötən çağlar
gözümüz qarşısında canlanır. At
dırnaqlarının şimşək kimi çaxan
taqqıltısı titrədərdi bu dağları. Adama elə
gəlir ki, keçmiş hadisələrin dilsiz şahidi olan
bu qalanın möhkəm divarları, uca bürcləri, nəhəng
qüllələri, möhtəşəm istehkamları
öz əzmi ilə yenilmək, əyilmək bilməyən ərənlərdi,
ana yurdun keşiyində dayanıb, onu yadellilərdən qoruyur.
Qalada
əsaslı arxeoloji işlər aparılmasa da, müəyyən
vaxtlarda axtarışlar nəticəsində buradan müxtəlif
maddi-mədəniyyət nümunələri-bişmiş kərpicdən
və çay daşlarından tikilmiş yaşayış
evlərinin qalıqları, təsərrüfat quyuları,
saxsı qab qırıqları, hovuz, inşaat materialları və
s. aşkar olunub. Qalanın coğrafi mövqeyi, möhkəm
divarları və sıldırım olması onu sarsılmaz
müdafiə istehkamına çevirib.
Qalanın
müdafiə məqsədilə tikildiyini qeyd edən görkəmli
maarif xadimi Rəşid bəy Əfəndiyev şəkililərin
düşmən təhlükəsi zamanı "Gələrsən-Görərsən"
qalasına sığındığını qeyd edir. Şəki
xanlarının nəslindən olan Azərbaycan tarixçisi
Kərim ağa Fateh "Şəki xanlarının müxtəsər
tarixi" əsərində qalanın möhkəmliyindən
bəhs edərək yazırdı: "Gələrsən-Görərsən"
qalası çox hündür və möhkəm olmasına
görə heç kim tərəfindən alına bilməmişdir".
XIX əsrin görkəmli Azərbaycan tarixçisi Abbasqulu
ağa Bakıxanov da "Gülüstani-İrəm" əsərində
böyük ustalıqla tikilmiş bu qalanın möhkəm və
alınmaz olduğunu qeyd etmişdir.
Bilinməyir yaşın sənin,
Nələr çəkmiş başın sənin
Qalanın
neçənci əsrdə və kim tərəfindən
tikildiyi barədə dəqiq məlumat yoxdur. Bəzi müəlliflər
onun tarixini XVI əsrə aid etsələr də, bir sıra mənbələr
abidənin daha əvvəlki dövrlərdə inşa
edildiyini xəbər verir. Məsələn, ərəb
müəllifi İbn Ərəbşahın
yazdığına görə, 28 iyul 1402-ci il tarixdə
baş vermiş məşhur Ankara döyüşündən
Qarabağa geri dönən Əmir Teymur yolüstü iki
istehkamı bir müddət mühasirədə saxlayıb və
nəhayət, onları ələ keçirib. Bunlardan biri
"Mağaralıq" deyilən yer, digəri isə "Gəl-Gör-Get"
qalası olub. Ehtimal etmək mümkündür ki, həmin
"Gəl-Gör-Get" qalası indi xarabalığı
Şəki rayonunun Kiş kəndindən 1 km şimalda olan
"Gələrsən-Görərsən"
qalasıdır. Qalanın İbn Ərəbşah tərəfindən
verilmiş təsviri də məhz "Gələrsən-Görərsən"
qalasına uyğun gəlir.
Digər
tarixi qaynaqlara əsaslanan tədqiqatçılar da "Gələrsən-Görərsən"
qalasının hələ XVI yüzilliyin əvvəllərində
müdafiə istehkamı kimi istifadə edildiyini, digərləri
isə onun daha qədimdən məlum olduğunu söyləyirlər.
1524-cü ildə Şəki hakimi, yerli feodal Dərviş Məhəmməd
xan Səfəvi hökmdarı I Təhmasibin Şirvana
hücumu zamanı öz döyüşçü dəstələri
ilə Şirvanşaha kömək edib. Məşhur Azərbaycan
tarixçisi Həsən bəy Rumlu "Əhsən-üt-tarix"
əsərində 1551-ci ildə Təhmasibin Şəkiyə
hücumu zamanı Dərviş Məhəmməd xanın
"Gələrsən-Görərsən" qalasında
möhkəmləndiyni təsvir edib.
Bəs
görəsən, qalanın adı öz mənşəyini
haradan götürüb? "Gələrsən-Görərsən"
adı qalaya hansı tarixi hadisələrlə əlaqədar
verilib?
Tarixçilərin
verdiyi məlumata görə, 1743-cü ildə Nadir şah
böyük qüvvə toplayıb, təpədən
dırnağa qədər silahlanmış 30 minlik nizami
qoşunu ilə Şəkiyə yürüş edib. Düzənlikdə
açıq savaşda onunla bacara bilməyəcəyini dərk
edən Şəki vilayətinin hakimi Hacı Çələbi
xan qalaya sığınaraq müqavimət göstərməyi
qərara alıb. Nadir şah Hacı Çələbi xana məktub
yazaraq qalanın təslim edilməsini tələb etmiş, əks
halda torpağını yerlə-yeksan edəcəyini,
qaladakıların hamısını qılıncdan
keçirəcəyini bəyan edib. Qalanın igid müdafiəçiləri
isə ona açıq cavab verərək "Gələrsən,
görərsən" - deyiblər.
"Gələrsən-Görərsən"
qalasında baş vermiş bu hadisə ilə bağlı
başqa variantlar da vardır. Həmin variantların birində
nəql olunur ki, XVIII əsrin əvvəllərində Şəki
xanı Hacı Çələbi xan Nadir şahın
nümayəndəsi Məlik Nəcəfin xalqı
soymasına və incitməsinə imkan vermirdi. Məlik Nəcəf
bu barədə Nadir şaha şikayət edir. Şah da
Hacı Çələbini yanına çağırıb
ona xəbərdarlıq edir. Hacı Çələbi Məlik
Nəcəfə mane olmayacağı barədə şaha
söz verir, lakin Şəkiyə qayıdan kimi onu öldürtdürür.
Bundan qəzəblənən Nadir şah böyük bir
qoşunla Şəkiyə hücum edir. Nadir şahın
Hacı Çələbinin yanına gələn nümayəndəsi
bildirir: "Şah buyurur ki, qoy könüllü surətdə
mənə təslim olsun. Əks təqdirdə o,
başını harada gizlədər". Hacı Çələbi
də elçiyə belə cavab verir: "Şahınıza
deyin ki, gələrsən, görərsən, mən
başımı harada gizlədərəm". Deyilənə
görə, elə o vaxtdan da qala "Gələrsən-görərsən"
adlanır.
Digər
oxşar rəvayətdə qeyd olunur ki, Nadir şahla Hacı
Çələbi xanın üzbəüz duran
qoşunları uzaqdan-uzağa,
qışqıra-qışqıra danışa bilirlərmiş.
Bir dəfə Nadir şah özü danışığa
girir və şəkililərdən soruşur: "O necə
qaladır ki, onu almaq olmur?". Ona belə cavab verirlər:
"Gələrsən-Görərsən". Deyilənə
görə, elə o vaxtdan qala belə adlanıb. Bütün
bunlardan sonra Nadir şahın qoşunları hücuma
başlayır. Lakin qalanın müdafiəçilərinə
qarşı döyüşlərdə heç bir müvəffəqiyyət
qazanmayan şah geri çəkilməyə məcbur olur. Həmin
hadisələrin canlı şahidi olmuş Rusiyanın Nadir
şahın yanındakı rezidenti V.Bratişşev
özünün 1744-cü il 13 aprel tarixli məlumatlarında
yazırdı: "Keçən günlərdə şah
Şəki sınağına yaxınlaşdı və
üç gün orada daynıb piyadaların iştirakı
ilə böyük hücuma başladı. Lakin... müqabil tərəf
müqavimət göstərdiyindən, ancaq 46 adam
öldürüldü və əsir götürüldü, başqa
müvəffəqiyyət qazana bilmədi. Bunun əksinə,
iranlıların tələfatı daha çox idi, onların
yüzdən artıq adamı öldürülmüş və
bir neçəsi yaralanmışdı". Beləliklə,
şəkililərin inadlı müqaviməti nəticəsində
Nadir şah mühasirədən əl çəkməyə
məcbur olmuşdu.
Lakin
müəyyən müddət sonra Nadir şah yenidən qala
üzərinə hücuma keçir. Əhali
işğalçılara qarşı mübarizəyə
qalxır və düşmənə ciddi müqavimət
göstərir. Şahın dəliqanlı atlıları nə
qədər canfəşanlıq etsələr də, qala
divarlarına yaxın düşə bilmirlər. Qala divarlarına
çatanların başına hər tərəfdən
çay daşları yağdırır, yanar qətran
tökürdülər. Qətranlı məşəllərin
tüstüsündən "Gələrsən-Görərsən"
qalası duman içində görünməz olmuşdu.
Düşmənin nərdivan daşıyan
döyüşçüləri su doldurulmuş xəndəklərdə
ilişib qalırdılar.
Şəkililər
azadlıq uğrunda döyüşlərində həmişə
od ürəkli oğullarına arxalandıqları kimi,
kişi qeyrətli sonalarına - igid qızlarına da güvəniblər.
Çünki qızlar da çəpər, sipər olublar
doğma el-obaya. "Aslanın erkəyi-dişisi olmaz" -
deyiblər müdrüklərimiz. Şəkililər
üç il aclıq və çətinliklərə məruz
qalsalar da, "Gələrsən-Görərsən"
qalasını təslim etməmiş, düşməni əldən
salandək vuruşmuşlar. Yenə də heç bir müvəffəqiyyət
qazanmayan şah ordusu kor-peşman geri dönmüşdü.
(ardı var)
Tofiq BABAYEV,
Tahir ŞAHBAZOV,
AMEA Arxeologiya və Etnoqrafiya
İnstitutunun aparıcı elmi
işçiləri,
tarix üzrə fəlsəfə
doktorları
Xalq qəzeti.- 2012.- 4 noyabr.- S. 7.