Dağlıq Qarabağ münaqişəsi istənilən halda Azərbaycanın ərazi bütövlüyü çərçivəsində həll olunacaq

... Azərbaycan sülhsevər dövlətdir. Biz çalışırıq ki, məsələ sülh yolu ilə həll olunsun. Ancaq onu da bilirik ki, hər il və hər ay bizi qələbəyə yaxınlaşdırır. Hər il və hər ay Azərbaycan daha da güclü, Ermənistan daha da gücsüz olur.

İlham ƏLİYEV,

Azərbaycan Respublikasının Prezidenti

Dövlət başçımızın həm ölkə daxilindəki müxtəlif tədbirlərdəki nitqlərində, həm də beynəlxalq təşkilatların tribunasından çıxış edərkən Ermənistan - Azərbaycan, Dağlıq Qarabağ münaqişəsinin ədalətli şəkildə həll edilməsi üçün göstərdiyi qətiyyət dünya ictimaiyyətinin gözü qarşısında və maraq dairəsindədir. Azərbaycan Prezidenti dövlətin bu məsələyə dair mövqeyini həm işğalçı ölkənin rəhbərləri ilə, həm vasitəçi ölkələrin rəsmiləri ilə, həm də beynəlxalq təşkilatlarda müzakirələr zamanı çox konkret şəkildə ifadə edir: "Bu münaqişə Azərbaycanın ərazi bütövlüyünün bərpası şərtiylə həll olunacaqdır".

Xarici ekspertlər İlham Əliyevin bu qətiyyəti barədə söz açarkən daha çox bir arqumenti əsas kimi önə çəkirlər: "O, təkcə dövlət başçısının deyil, 50 milyonluq bir xalqın ürək sözlərini dilə gətirdiyinə görə qətiyyətli və güclüdür". Tamamilə haqlı yanaşmadır. Çünki bu günkü Azərbaycan iqtidarı sözün həqiqi mənasında Azərbaycan xalqının mənafelərini və mövqeyini ifadə edir. Özü də təkcə Dağlıq Qarabağ münaqişəsinin həlli üçün aparılan danışıqlarda deyil, bütün məsələlərdə. Prezident İlham Əliyevin Dağlıq Qarabağ münaqişəsinin həlli barədə Nazirlər Kabinetinin sonuncu iclasında söylədiyi fikirlər isə xalqımızın bütün zümrələrində və hətta, fərdində böyük məmnunluq hisləri yaratdı.

Söhbət dövlət başçımızın Nazirlər Kabinetinin 2011-ci ilin sosial-iqtisadi inkişafının yekunlarına və 2012-ci ildə qarşıda duran vəzifələrə həsr olunmuş 16 yanvar tarixli geniş iclasındakı giriş nitqindən gedir. Geridə qalan ildə qazandığımız sosial-iqtisadi göstəricilərin ölkəmizin ümumi inkişafından xəbər verdiyini söyləyən Prezident qeyd etdi ki, bütün bunlar bizim dövlətimizi qüdrətləndirir. Dövlət qüdrətləndikdə isə ölkəmizin yeganə problemi olan Ermənistan - Azərbaycan, Dağlıq Qarabağ münaqişəsinin ədalətli şəkildə həlli üçün lazım olan zəmin yaranır. 2011-ci ildə münaqişənin həlli istiqamətində konkret olaraq heç bir müsbət nəticənin olmadığını söyləyən Prezident əlavə etdi ki, ötən il bu məsələyə dair beynəlxalq qüvvələrin münasibətində müsbət hallar qeydə alınmışdır: "Biz bunu inkar edə bilmərik. Deyə bilərəm ki, onlardan ən önəmlisi odur ki, üç həmsədr ölkə status-kvonun qəbuledilməz olduğunu bəyan etmişdir. Bu, birinci bəyanatdır, yəni bundan əvvəlki illərdə belə bəyanatar verilmirdi. Bu bəyanat ədalətli bəyanatdır. Əlbəttə ki, status-kvo dəyişdirilməlidir".

Yeri gəlmişkən, xatırladaq ki, dövlət başçımız beynəlxalq qüvələrin, xüsusən, münaqişənin həlli üçün yaradılmış Minsk qrupu həmsədrlərinin həmin bəyanatını təqdir etsə də, adı çəkilən ünvanlara bir xəbərdarlıq göndərməyi də vacib sayır: "Əgər bu bəyanatdan sonra həmsədr ölkələrin konkret təklifləri, addımları, hərəkətləri olarsa, münaqişəni tezliklə həll etmək mümkün olacaqdır. Əgər bu bəyanat sadəcə olaraq bəyanat kimi qalacaqsa, onda danışıqların perspektivi ümidverici olmayacaqdır".

Azərbaycan Prezidentinin həmin xəbərdarlığı özündə nələri ehtiva edir? Biz ötən yazılarımızda həm yerli, həm də əcnəbi ekspertlərə, xüsusən, Avropa konfliktoloqlarına istinadən yazmışdıq ki, Dağlıq Qarabağ münaqişəsinin həll edilməmiş qalması hamıdan çox Ermənistanın zərərinədir. Buradakı "hamı" sözünün cümlədəki çəkisinə də xüsusi diqqət yetirilməlidir. Çünki bu münaqişənin həllinin uzanması ümumilikdə regionun hərtərəfli inkişafına maneçilik törədir, münaqişənin hərb yolu ilə həll olunacağı təqdirdə Avropanın enerji təhlükəsizliyinin təmin olunmasında müəyyən problemlər yarana bilər və sairə. Təbii ki, ən çox zərərdidə olan isə Ermənistandır. Heç kəsə sirr deyil ki, Avropada bəzi qüvvələr hələ də Ermənistanı iqtisadi böhran girdabından çıxartmağa çalışırlar və onların fikrincə bu istiqamətdə ən uğurlu addım Türkiyə və Azərbaycanla iqtisadi əməkdaşlığın bərpa edilməsidir. Bu məsələdə Ankaranın və Bakının mövqeyi isə artıq hamıya məlumdur. Odur ki, Prezident İlham Əliyev həmsədrləri verdikləri bəyanatı reallaşadırmağa çağırır: "Əks təqdirdə danışıqların perspektivi ümidverici olmayacaqdır".

Azərbaycan Prezidenti xatırladır ki, ATƏT-in xarici işlər nazirlərinin 2009-cu ilin sonunda keçirilən toplantısında münaqişənin həlli ilə bağlı tərəflərə təkliflər verilib və Azərbaycan həmin təkliflərə razılığını bildirib. Orada göstərilir ki, Azərbaycanın ərazi bütövlüyü şübhə altına alınmır, azərbaycanlı məcburi köçkünlər işğal olunmuş bütün torpaqlara qayıdırlar və gələcəkdə Dağlıq Qarabağın statusu haqqında qeyri-müəyyən vaxtda təkliflər irəli sürülür və sairə. Prezident təkrar edir ki, münaqişə ancaq və ancaq bu şərtlər çərçivəsində həll oluna bilər: "Əsas məsələ ondan ibarətdir ki, Azərbaycan dövlətinin razılığı olmadan Dağlıq Qarabağa heç bir status verilə bilməz. Bu da təbiidir ki, Azərbaycan dövləti və xalqı heç vaxt Dağlıq Qarabağın Azərbaycandan kənarda heç bir statusuna razılıq verə bilməz və verməyəcəkdir. Prinsiplər bundan ibarətdir. Biz danışıqları bu prinsiplər əsasında davam etdirməyə hazırıq..."

Azərbaycan Prezidenti beynəlxalq aləmi təmsil edən kütləvi informasiya vasitələrinin diqqət mərkəzində olan toplantıda respublikamızın hərbi xərclərinin məbləğini və ordu quruculuğunda əldə etdiyimiz nailiyyətləri yada salmağı da vacib sayır: "2011-ci ildə hərbi məsələlərə 3 milyard 413 milyon dollar xərclənmişdir, 2012-ci ildə 3 milyard 477 milyon... Biz bölgədə ən güclü orduya malikik... 600-ə yaxın çeşiddə hərbi məhsul istehsal edirik. Yəni bu gün Azərbaycan ordusu böyük qüvvədir və biz bu qüvvədən lazım olan halda istifadə edə bilərik və edəcəyik".

İşğalçı ölkədə Azərbaycanın hərbi qüdrəti barədə məlumatları kifayət qədər dərindən təhlil etməyə çalışır və təlaş keçirdiklərini gizlədə bilmirlər. Ancaq heç bir təlaş ermənilərə Azərbaycanın imkanlarına cavab vermək üçün çıxış yolu göstərmir. Ona görə də BMT Təhlükəsizlik Şurasına seçkilər zamanı öz namizədliyini verən Ermənistan Azərbaycanın nüfuzu qarşısında duruş gətirə bilməyəcəyini görəndə sakitcə öz namizədliyini geri götürmüşdü. Ermənistanın həmin hərəkətini "döyüş meydanından qaçmaq" adlandıran Prezident İlham Əliyev işğalçı ölkənin rəhbərliyinə növbəti çıxış yolunu göstərir: "Onlara aid olmayan torpaqlardan öz xoşları ilə çıxsınlar və beləliklə, sülh bərpa oluna bilər".

Ermənilərin artıq başqa yolları da yoxdur. Onlar görürlər ki, Ermənistanın ümumi xərcləri 2 milyard dollardır. Bizim təkcə hərbi xərclərimiz isə ondan təxminən iki dəfə çoxdur. Prezident İlham Əliyevin dediyi kimi imzalanmış kontraktların icrası nəticəsində Azərbaycan ordusunun döyüş qabiliyyəti əhəmiyyətli dərəcədə artacaq və hərb yolu seçiləcəyi təqdirdə bizim ordumuz az itkilərlə daha böyük uğurlar əldə edə biləcəkdir.

Bir sözlə, zaman erməniləri bəlalara mübtəla edib Ermənistanı siyasi-diplomatik dalana dirədikcə Azərbaycanın hərtərəfli inkişafı günün reallıqlarına çevrilir. Nazirlər Kabinetinin 16 yanvar 2012-ci il tarixli iclasında həmin reallıqlar barədə çoxsaylı faktlar və rəqəmlər səsləndirildi.

İttifaq MİRZƏBƏYLİ

Xalq qəzeti.- 2012.- 21 yanvar.- S. 4.