Azərbaycanlıların Soyqırımı Günü Avstraliyada qeyd olunmuşdur

31 Mart - Azərbaycanlıların Soyqırımı Günü Avstraliyanın Sidney şəhərində Azərbaycan və türk icması tərəfindən anılmışdır.

Martın 29-da Azərbaycan-Avstraliya-Türk Dostluq Cəmiyyətinin prezidenti İmaməddin Qasımovun təşkilatçılığı ilə Avstraliyada fəaliyyət göstərən ən böyük məscid olan Gelibolu Camisində 3000-dək insanın iştirak etdiyi cümə namazından öncə 1918-ci ilin 30 mart - 3 aprel tarixləri arasında erməni silahlı dəstələrinin Azərbaycanın müxtəlif bölgələrində azərbaycanlılara qarşı törətdikləri soyqırımı barədə məlumat verilmiş, broşürlər paylanmışdır.

İştirakçılara bildirilmişdir ki, 1918-ci ilin mart-aprel ayları ərzində Stepan Şaumyanın rəhbərlik etdiyi erməni silahlı dəstələri tərəfindən 50 mindən çox azərbaycanlı qətlə yetirilmiş, xeyli sayda kənd və qəsəbə yerlə yeksan edilmişdir.

Məscid axundunun müraciəti ilə erməni vəhşiliyinin qurbanlarının ruhuna “Yasin” oxunub, dualar edilmişdir.

Eyni zamanda, Sidney şəhərində fəaliyyət göstərən “Azərbaycanın səsi” (Voice of Azerbaijan) radiosu soyqırımı ilə əlaqədar xüsusi veriliş hazırlamışdır. Veriliş aprelin 1-də yerli vaxtla saat 22.00-da radio proqramının rəhbəri Gülzar Qasımovanın təqdimatında yayımlanmışdır. Proqramda 31 Mart soyqırımı və azərbaycanlılara qarşı törədilmiş digər erməni vəhşilikləri barədə məlumat verilmişdir.

Samirə ƏLİYEVA

Xalq qəzeti.- 2013.- 4 aprel.- S. 6.