“Ulu öndər Heydər Əliyev yaradıcılığımın əbədi mövzusudur”

Ümummilli lider Heydər Əliyev – 90

Neftçala rayonunda ümummilli lider, xalqımızın dahi oğlu Heydər Əliyevin və onun həyat yoldaşı, görkəmli akademik, Azərbaycanda nəciblik və xeyirxahlıq simvolu kimi daim sevilən, xatirəsi əziz tutulan Zərifə xanım Əliyevanın 90 illik yubiley tədbirlərinə, bu iki misilsiz şəxsiyyət haqqında çox dəyərli əsərlər yazan yazıçı -dramaturq, Milli Məclisin deputatı Hüseynbala Mirələmovla görüşdən start verildi.

Rayonun əzəmətli mədəniyyət sarayında keçirilən görüşü Neftçala Rayon İcra Hakimiyyəti başçısının ictimai-siyasi və humanitar məsələlər üzrə müavini Gültəkin Sadıqova açaraq bildirdi ki, bu gün bütün Azərbaycanda olduğu bizim el-obamızda da əsil bayramdır- ulu öndər Heydər Əliyev və akademik Zərifə xanım Əliyevanın anadan olmalarının 90 illik bayramı. Belə bir gündə xalqımızın bu iki müstəsna şəxsiyyəti haqqında dəyərli əsərləri ilə bütün dünyaya səs salan yazıçı -dramaturq, Milli Məclisin deputatı Hüseynbala Mirələmovla görüşmək, onunla bərabər rayonumuza təşrif gətirən Milli Məclisin deputatları Eldar İbrahimov, Hadi Rəcəbli, Nizami Cəfərov, görkəmli ədəbiyyatşünas alim Nizaməddin Şəmsizadə, “Azərbaycan” jurnalının baş redaktoru İntiqam Qasımzadə kimi nüfuzlu şəxsiyyətlərin milli-mənəvi irsimizə çevrilmiş iki böyük azərbaycanlı-Heydər Əliyev və Zərifə Əliyev haqqında çox dəyərli fikirlərini dinləmək həqiqətən Neftçalanın mədəni həyatında tarixi bir hadisədir.

Sonra yazıçı-dramaturq Hüseynbala Mirələmovun ədəbi-bədii, siyasi-publisistika yaradıcılığından ətraflı məlumat vermək üçün rayonun tanınmış ziyalısı, dil - ədəbiyyat müəllimi Etibar Əbilova söz verildi. Natiq bildirdi ki, Hüseynbala Mirələmov ədəbi -bədii yaradıcılığı ilə bərabər, Azərbaycan oxucusuna həm də siyasi publisistika janrının usta yazarı kimi tanışdır. Belə bir gündə və ümummilli lider Heydər Əliyevə sonsuz məhəbbətini, Əliyevlər şəcərəsinin üç görkəmli nümayəndəsinə olan sədaqət və ehtiramını publisistik sözün bütün koloriti ilə obrazlarını yaratdığı üç möhtəşəm əsərində təkcə Azərbaycana deyil, bütün dünyaya bəyan etmiş belə bir yazarla görüşmək Neftçala oxucuları, ziyalı mühiti üçün böyük bayramdır.

Bu gün tərəddüd etmədən demək olar ki, yazıçı -dramaturq Hüseynbala Mirələmovu təkcə Azərbaycanda deyil, bir çox ölkələrdə bu qədər tanıdan da şübhəsiz ki, Moskvanın məşhur “Molodaya qvardiya” nəşriyyatının “Görkəmli adamların həyatı” seriyasında nəşr etdiyi “Heydər Əliyev”, “İlham Əliyev” və “Zərifə Əliyeva” əsərləridir. Dünyanın 23-dən çox dilinə tərcümə olunan bu əsərlər haqlı olaraq yazıçının siyasi-publisistik yaradıcılığının zirvəsi hesab olunur.

Natiq vurğuladı ki, Heydər Əliyev kimi liderin siyasi portretini yaratmaq ilk baxışdan çoxlarına asan görünə bilər. Düşünərlər ki, o bizim müasirimiz olub, həyat və fəaliyyəti haqqında kifayət qədər məlumat var. Ancaq bütün bunlar bu, dahi azərbaycanlının bitkin obrazını yaratmaq üçün yetərlidirmi? Əlbəttə yox... Çünki bunun üçün ulu öndər Heydər Əliyevin ideallarına ən azından Hüseynbala Mirələmov qədər sadiq olmalı, onu daxili bir məhəbbətlə sevməli, Heydər Əliyevi sözün yox, sözü Heydər Əliyevin zirvəsinə qaldırmağı bacarmalısan ki, qələmin qüdrəti aciz görünməsin. Bu mənada, alimlərimiz, ədəbiyyatçılarımız, tənqidçilərimiz haqlı olaraq bildirirlər ki, H.Mirələmov bu fenomenal XX əsr Azərbaycan dahisinin monumental obrazını yaradarkən publisistik sözün siyasi sehrindən ustalıqla yararlana bilib.

Etiraf etmək lazımdır ki, yüz il sonra da heç bir başqa əsəri oxumadan, təkcə H.Mirələmovun qələmə aldığı “Heydər Əliyev” kitabını oxumaqla, müstəqil Azərbaycanın memarı və qurucusu olan bu dahinin şəxsiyyəti, siyasi fəaliyyəti, vətənkeşliyi, qətiyyəti, müdrikliyi və xalqının xilaskarlıq missiyası haqqında müstəqil və zəngin məlumat almaq olar.

Bu seriyadan olan digər bir əsərdə isə biz bu dahi şəxsiyyətin sədaqətli, dəyanətli və nəcib xanımı Zərifə Əliyeva haqqında bir əbədiyyət dastanı ilə tanış oluruq. Müəllif bu əsərdə Zərifə xanımı təkcə birinci şəxsin həyat yoldaşı kimi deyil, qayğıkeş bir ana, sədaqətli bir rəfiqə, narahat bir bacı, ziyalı və nəcib bir Azərbaycan qadını kimi canlandırır. Onun davranışı, səmimiyyəti, peşəsinə sədaqəti hər bir Azərbaycan qızına, qadınına örnək ola bilər. Çəkinmədən demək olar ki, Zərifə xanım, əsərdən də göründüyü kimi, əsil Azərbaycan xanımının simvolu olmuşdur və yazıçı, Azərbaycan qadını simvoluna çevrilmiş bu gerçək obrazı bütün cizgiləri ilə əsərində göstərə bildiyi üçün, ən azından qadınlarımızın böyük sevgisini qazana bilmişdir.

Nəhayət, “Görkəmli adamların həyatı” seriyasından olan sırada ikinci sayca üçüncü – “İlham Əliyev” kitabı, bütün mənalarda ləyaqətli bir varisin üzərinə düşən siyasi, mənəvi və vətəndaşlıq borcunu necə böyük məsuliyyət və müdrikliklə həyata keçirdiyini nümayiş etdirir. Əslində böyük bir dahinin bütün mənalı həyatı boyu digər saysız-hesabsız xidmətlərilə yanaşı, bir müstəsna xidməti də Vətəni, xalqı naminə düşüncələrini, arzularını və planlarını həyata keçirəcək bir varisi bu missiyaya hazırlamaq olmuşdur.

H.Mirələmov siyasi publisistikanın çox incə priyomları ilə bu missiyaya hazırlanan gəncin hansı siyasi bir auditoriyadan, nəhəng simalarla ünsiyyət imtahanından necə keçdiyini açıb göstərə bilmişdir. İlham Əliyev diplomatiyanı əslində Moskva Dövlət Beynəlxalq Münasibətlər İnstitutunda oxuyarkən deyil, daha erkən, yeniyetmə, gənc ikən öyrənib. Onun ən böyük müəllimi, ustadı şübhəsiz mahir siyasət ustası, müdrik dövlət adamı – atası Heydər Əliyev idi.

Kitabda gerçək faktlarla İlham Əliyevin həyatda, siyasi fəaliyyətdə bu ailə, ata məktəbinin, siyasət akademiyasının adını necə doğrultduğu, çox qısa zamanda xalqının sevimlisinə çevrildiyi mükəmməl əksini tapmışdır. Bu gün artıq bütün dünya etiraf edir ki, Prezident İlham Əliyev XXI əsrin siyasi liderlərinə məxsus keyfiyyətləri ilə ən parlaq şəxsiyyətlərdən birinə çevrilmişdir.

E.Əbilov yazıçı-dramaturqun ədəbi-bədii yaradıcılığı haqqında da düşüncələrini bölüşərək qeyd etdi ki, “ Bir tikə çörək” adlı hekayə ilə ədəbiyyata gələn Hüseynbala Mirələmovun ədəbi aləmdə artıq məşhur olan “60-cılar” nəslinə mənsub olduğunu qeyd etsələr də, o bir yazıçı kimi ədəbi zirvəni 80-ci illərin axırlarında fəth etdi, desək, əsla yanılmarıq.

Bu çətin zirvəni o əlbəttə, gərgin zəhmət, ədəbi axtarışlarda keçən yuxusuz gecələr, ağrı-əzab dolu yaradıcılıq anları hesabına fəth etdi. Mən “ağrı-əzab dolu yaradıcılıq anları” ona görə deyirəm ki, müasir ədəbiyyatımızda doğma və nisgilli Qarabağımızla bağlı ən mükəmməl və dolğun əsərlərin müəllifi məhz H. Mirələmovdur. Onun Qarabağ faciəsinə həsr olunmuş “ Xəcalət” povestinin ilk oxucularından olan ulu öndərimiz Heydər Əliyev bu ibrətamiz əsərin ətrafında olan sadiq silahdaşlarına da oxumağı tövsiyə etmişdir. Yazıçının Qarabağ mövzusuna həsr olunmuş “Xəcalət”, “Vicdanın səsi”, “Güllələnmiş heykəllərin fəryadı”, “Yanar qar” kimi əsərlərini mütaliə etdikcə o qənatə gəlirik ki, yazıçı təxəyyülünün imkanlarından geniş istifadə etməklə yanaşı, həm də o ağrılı -acılı müharibə illərində vuruşan əsgərlərimizlə bir olmuş, damarlarda qan donduran ağlabatmaz hadisələrin şahidi olmuşdur. Atəşkəs illərində müharibə iştirakçısı olmuş insanlarımızla, yurd həsrəti çəkən qaçqın və köçkünlərimizlə, ələmli şəhid valideynləri ilə dönə -dönə görüşmüş, onların acı xatirələrini dinləmiş və məhz bu səbəbdən də, yaşı min ildən artıq olan ədəbiyyatımızı öz qiymətli əsərləri ilə zənginləşdirmişdir.

Hüseynbala müəllimi əsasən müasir mövzularda yazan yazıçı -dramaturq kimi tanısaq da o, ötən il işıq üzü görmüş “Sonuncu fateh” roman trilogiyası ilə yaradıcılığında yeni bir mərhələyə qədəm qoymuş oldu. “Sonuncu fateh” Nadir şaha həsr olunmuş çox orijinal , dəyərli bir əsərdir. Ədəbi janrlar içərisində fikrimcə, ən çətin janr tarixi əsər yazmaqdır və əgər bu əsərin qəhrəmanı xalqının tarixində müstəsna bir yer tutursa və həmin tarixi şəxsin həyatı məlum səbəblərdən işıqlandırılmayıbsa, çətinlik ikiqat artır. Tarixi mövzuda roman yazan şəxs həm də tarixi tədqiqat işi yazmış olur. Nadir şahın uşaqlıq çağlarından tutmuş, faciəli ölümünə qədər çox peşəkarlıqla öz romanında canlandıran H. Mirələmov yuxarıda sadaladığım hər iki işin öhdəsindən çox məharətlə gəlmişdir.

Çıxış üçün söz alan Milli Məclisin deputatı, sosial siyasət komissiyasının sədri, siyasi elmlər doktoru, professor Hadi Rəcəbli qeyd etdi ki, Vilhelm Ostvaldın düşüncəsi ilə yanaşsaq, böyük insan böyük işlər görən nəhəng aparatdır, onların dünyaya gəlməsi çox nadir hallarda baş verir. Azərbaycan xalqının ümumilli lideri də bu nadir insanlardan idi və Türkiyənin tanınmış siyasi xadimi Bülənt Ecevit nahaq demirdi ki, “Heydər Əliyev min ildən bir yetişən dahilərdəndir”. Əlbəttə, belə bir nəhəng siyasət ustası, fenomen insan haqqında birdən-birə sənədli publisistika janrında əsər yazmaq çox çətin və məsuliyyətli bir vəzifədir. Heydər Əliyev bizim müasirimiz olsa belə, bu, hələ o demək deyil ki, biz onun haqqında hər şeyi bilirik. Bu düşüncədə olan insanlar həmkarım, dostum yazıçı -dramaturq Hüseynbala Mirələmovun “Heydər Əliyev” kitabı ilə yaxından tanış olduqdan sonra yanıldıqlarının şahidi olurlar.

Natiq qeyd etdi ki, Heydər Əliyev XX -XXI əsrlərdə 30 ildən artıq xalqımızın taleyinə məsuliyyət daşıyan, ona sərəncam verən bir şəxs olub. Anacaq onun həyatı, təkcə bu illərdə deyil, hələ Dövlət Təhlükəsizlik Komitəsindəki fəaliyyəti illərində də həmişə qürur hissi keçirdiyi ölkəsinin və xalqının taleyi ilə sıx bağlı olub.

Filosoflar yazır ki, “insan özünü təbiətin, Tanrının yaratdığı dünyanın bir hissəsi hesab edəndə, özünün bu dünyanın taleyinə məsuliyyət daşıdığını başa düşəndə o zaman şəxsiyyət olur”. Hüseynbala Mirələmov təkzibolunmaz gerçəklərə, tarixi faktlara istinad edərək Heydər Əliyevin gənc yaşlarından xalqının taleyinə necə məsuliyyətlə yanaşdığının publisistik mənzərəsini yarada bilmişdir.

H.Rəcəbli yazarın bədii yaradıcılığına toxunaraq qeyd etdi ki, “ədəbiyyat həyatın gücgüsüdür” ifadəsini tərəddüd etmədən Hüseynbala Mirələmovun qələmə aldığı bütün əsərlərə şamil etmək olar. Onun ədəbi yaradıcılığının elə bir məhsulu yoxdur ki, onun mövzusu bizim yaşadığımız həyatın reallıqlarının bədii təsvirindən uzaq olsun.

Milli Məclisin deputatı, Azərbaycan Milli Akademiyasının müxbir üzvü Nizami Cəfərov isə çıxışında Hüseynbala Mirələmovun artıq dünyada tanınan bir Azərbaycan yazarı olduğunu bildirərək, ədibin istər müasir siyasi publisistikada, istərsə də ədəbi-bədii yaradıcılıq sahəsində möhtəşəm nümunəsinə çevrilmiş əsərlərinə münsibətini bölüşdü:

-Mənim Hüseynbala Mirələmovun ədəbi yaradıcılığında ən çox xoşuma gələn və haqqında geniş bir yazı yazdığım “Gəlinlik paltarı” əsəridir. Müstəqilliyin, demokratiyanın, insan azadlığının illər boyu gözlədiyimiz hansısa böyük nailiyyətlərinin yanında həmişə insan mənəviyyatı ilə bağlı problemlər olur. Bu ancaq yazıçının səlahiyyətinə aiddir ki, onları görə bilsin, çəkinmədən, obyektiv şəkildə və bütün təbiiliklə əks elətdirsin. Hüseynbala Mirələmov bunu bacardı.

Müəllifin dramaturji yaradıcılığının ən populyar nümunəsi “Xəcalət” dramı haqqında da fikirlərini bildirən ədəbiyyatşünas alim bildirdi ki, bu əsər əsasında hazırlanan tamaşa bu gün dünyanın bir çox teatr səhnələrində böyük uğur qazanıb.Əlbəttə yalnız mövzunu dünyaya təqdim etmək baxımından deyil, həm də sənətkarlıq baxımından çox qiymətli və böyük əsərdir. Onu da demək istəyirəm ki, bu əsər həm də Akademik Milli Dram Teatrının son illər uğurunu təmin edən bəlkə də yeganə əsərdir.

H.Mirələmov qələminin gücü həm də ondadır ki, o çox böyük ustalıqla insanın bu dövrün, mühitin eybəcər çağırışlarına necə cavab verməli olduğunu, cəmiyyətin problemlərilə necə mübarizə aparmaq lazım gəldiyini göstərir. Bəli, şəxsiyyət dünyanın ən böyük əxlaqsızlığı sayılan yalanla mübarizədə, ədalət naminə döyüşdə və qələbədə öz varlığının dəyərini təsdiq edir.

Yazıçı özünün başlıca vəzifəsini “cəsarətlə həqiqəti axtarmaqda”, bütün mürəkkəbliyi və ziddiyyətləri ilə insan haqqında gerçəyi üzə çıxarmaqda görür. Bu ümumi qayda Hüseynbala Mirələmovun seçdiyi ədəbi janrların hamısına şamil olunur.

Amma Hüseynbala Mirələmovun şah əsərləri bu gün dünyanı dolaşan və bu məclisdə haqqında haqlı olaraq geniş danışılan, Əliyevlər şəcərəsinin üç böyük şəxsiyyəti haqqında olan əsərlərdir. Yalnız müasir müstəqil Azərbaycan dövlətinin deyil, həm də müasir Azərbaycan millətinin yardıcısı, qurucusu olan, onu təşkil edən bir şəxsiyyətin həm bədii, həm publisistik, həm siyasi, həm də sadəcə bir Azərbaycan vətəndaşı kimi Heydər Əliyevin mükəmməl bir portretini yaradıb.

Amma bu portret o qədər də mükəmməl olmazdı, əgər, Hüseynbala Mirələmov eyni zamanda bizim hörmətli Prezidentimiz, türk dünyasının liderlərindən biri, bəlkə də birincisi olan cənab İlham Əliyevin də portreti yaradılmasaydı. Ümummilli liderin portreti bəlkə də tam olmazdı, əgər onun həyat yoldaşı, 90 illiyini birgə qeyd etdiyimiz Zərifə xanımın portreti yaradılmasaydı.

Ədəbiyyatşünas alim, filologiya elmləri doktoru Nizaməddin Şəmsizadə yazıçının “Heydər Əliyev” əsərinin qəhrəmanı haqqında zamanın reallıqlarından çıxış edərək bildirdi ki, Heydər Əliyevin bu xalq, ölkə qarşısında bir böyük xidməti vardı, əgər o baş tutmasaydı bu gün müstəqil Azərbaycan adlı bir dövlət yox idi. Heydər Əliyevin xidməti ondan ibarət idi ki, özünü itirmiş, başı pozulmuş ilxı kimi özünü qayadan atmağa hazırlaşan xalqın qarşısını kəsdi, xalqı təşkil etdi, topladı, Azərbaycan xalqının tarixdə yaşamaq hüququnu təşkil edən bir əbədi qəhrəmana çevrildi, xalq qəhrəmanına. Hüseynbala Mirələmov bütün bu tarixi zərrə-zərrə toplayaraq möhtəşəm və çox dəyərli bir əsərdə birləşdirdi.

Heydər Əliyevin iti zəkası bir Tanrı vergisi idi. Onun hazırcavablığı, onun gələcəyi görmək hissinin gücü, onun istənilən şəraitdən çıxış yolu tapmaq qabiliyyəti heyrətamiz idi. Gündəlik dövlətçilik fəaliyyəti ondan gərgin zehni əmək və psixoloji qüvvə tələb edirdi. Onun iş qabiliyyətinin, inzibati fəaliyyətinin və ictimai ruhunun digər bir nümunəsi yox idi. Bir sözlə, o həqiqətən möcüzə idi. Hüseynbala Mirələmov öz bu əsərində Heydər Əliyev möcüzəsinin qeyri-adi keyfiyyətlərini sadəcə təsvir etmir, əksinə tarixi sənədlər, hadisələr və faktlarla oxucusuna təqdim edir və bu dahinin obrazı məhz belə oxucunun fikir dünyasında canlanır.

Əlbəttə, Heydər Əliyevin müasirləri, ətrafındakılar, hətta onu sevməyən, ona paxıllıq edənlər belə onun dərin zəkasına, məntiqinə, fenomenal yaddaşına, siyasi intuisiyasına, polad iradəsinə və qətiyyətinə şübhə ilə yanaşa bilmirdi və onun həqiqətən Tanrının seçilmişlərindən olduğunu etiraf edirdi. Əsəri oxuduqca adamda belə bir fikir formalaşır ki, Heydər Əliyevin sahib olduğu bütün nadir üstün keyfiyyətlər yeganə bir hissdən – xalqına və ölkəsinə sevgidən qidalanır.

Həyatda olduğu kimi əsərdə də elm, ədəbiyyat və incəsənət sahəsində istedadlı insanların nədən Heydər Əliyevin cazibəsinə düşdüyünün, niyə bu zümrədən olan adamlara onun daha böyük qayğı ilə yanaşdığının, diqqət göstərdiyinin sirrinə bir açar axtarırsan. Aydın olur ki, Heydər Əliyev xalqın mənəviyyatını qidalandırdıqları, dünyagörüşlərini zənginləşdirdikləri üçün ölkəsinin bu adamlara böyük ehtiyacı olduğundan onlara dəyər verir, layiq olduqları qayğını göstərir.

Yazıçı Heydər Əliyevin əzəmətli əlinin sığalı ilə böyümüş, xeyirxah, nəcib bir ananın tərbiyəsi ilə ərsəyə gəlmiş bir şəxsiyyətin İlham Əliyevin tarixdə necə özünə yer tapması haqqında ikinci əsərini yazdı. Bu o İlham Əliyevdir ki, türk dünyasının möhtəşəm yazıçısı Çingiz Aytmatov onun haqqında deyir. “İlham Əliyev yeni dövrün lideridir.

Nəhayət, Azərbaycanın nəcib, xeyirxah, dəyanətli qadın simvoluna çevrilmiş Zərifə xanım Əliyeva haqqında əsər. Belə bir fikir mövcuddur ki, hər bir dahi kişinin arxasında böyük bir qadın dayanır. Mənə də elə gəlir ki, dahi Heydər Əliyevin arxasında dayanan böyük qadın-Zərifə xanım Əliyeva haqqında bu əsəri yazmamaq olmazdı.

Hüseynbala Mirələmov yazır: “O həyat yoldaşı və ana, həkim və alim, birinci xanım və ictimai xadim kimi uca Tanrıdan öz taleyini yaşamaq haqqı almış, ziyalı, əxlaqlı, humanist və əsl azərbaycanlı ailəsində məsum, pak və bir körpə qız kimi dünyaya gəlmişdi. Zərifə xanım dindar deyildi. Ancaq xalqının dini etiqadına, əqidəsinə dərin inam, hörmət və ehtiram ruhunda tərbiyə almış, islam dəyərlərinin və əxlaqının ən gözəl xüsusiyyətlərini özündə birləşdirirdi. Böyüdüyü ailədə Allaha və öz ölkəsinə sevgi öyrənmişdi və ona görə də özünü ölkəsinin bir parçası hesab edirdi... Zərifə Əliyeva milli ünsiyyət mədəniyyətimizin etalonu və əxlaqi zirvəsində dururdu. O, insan qəlbinə bir incəlik və həssaslıqla daxil olmağı bacarırdı...”

Yazıçı bu kiçik bir parça ilə belə Zərifə xanımı qadınlarımızın idelı səviyyəsinə qaldırmağa nail olur.

N.Şəmsizadə H.Mirələmovun ədəbi yaradıcılığına toxunaraq qeyd etdi ki, respublika ədəbi mühitində Qarabağ mövzusunu ədəbiyyata gətirən və müxtəlif əsərlərində bu problemin ağrısını, acısını bizə təkrar-təkrar yaşadıb milli yaddaşımıza ibrət dərsi kimi həkk edən yazıçı-dramaturq Hüseynbala Mirələmov müvəqqəti işğal olunmuş Vətən haqqında böyük vətəndaşlıq amalı ilə yazan, sərt həyat həqiqətlərini olduğu kimi əks etdirən realist nəsr ustasıdır. O, “Güllələnmiş heykəllərin fəryadı”ndan tutmuş bütün əsərlərində, Qarabağ ağrılarında, torpaq itkisində, Vətəndəykən qaçqınlıq və məcburi köçkünlük qınağının əzablarında, bu insanların xəcalətində oxucunun da payının olduğunu gizlətmir və onlara da bu hissləri yaşadır, eyni zamanda amansız düşmənlə mübarizəyə, qisas almağa çağırır.

H.Mirələmov, burada haqqında danışılan “Xəcalət”i üstümüzdən götürmək üçün “Yanan qar” romanını yazdı. Sanki yazıçı torpaqların xilası üçün bu romanında yatmışları yuxudan oyadıb partizan müharibəsinə çağırır. Əslində Hüseynbala Mirələmov bu əsərində Qarabağ müharibəsinin bədii həllini tapır. Əsər haqqında düşüncələrimi bölüşərkən mən qarşıya belə bir sual qoyuram: Hanı bu ölkənin partizan oğulları? Niyə Qarabağda erməni dığalarına göz yummağa imkan verməyən bir əli silahlı dolaşmır?...

Hüseynbala Mirələmovun Azərbaycan ictimaiyyətini silkələyən, insanları ayıqlığa, həssaslığa, paklığa, saflığa, ülvi hisslərə sahib olmağa, böyük məhəbbətə səsləyən, gəncliyimizin sosial ifliclərini göstərən ən dəyərli əsərlərindən biri də tənqidçilərin “azad insan ruhunun qüdrəti və faciəsi” adlandırdıqları “Gəlinlik paltarı” romanıdır. Roman bu gün yazıçının oxucularının, xüsusilə də gənc qızların ən çox mütaliə etdiyi əsərlər sırasındadır.

Yazıçı ilə görüşün ən maraqlı məqamı təbii ki, onun öz oxucuları ilə üz-üzə qalmasıdır. H.Mirələmov oxucuların suallarına cavab verərkən qeyd etdi ki, bu gün onun ədəbi yaradıcılığında iki baş mövzusu var - Heydər Əliyev və Qarabağ, torpaqların düşmən tapdağından azad olması. Heydər Əliyev əbədi mövzu olaraq qalır. Mən yaxın bir neçə ildə bu dahi haqqında sənədli bir roman yazmağa hazırlaşıram.

Qarabağ isə torpaqlar azad edilənə qədər baş mövzu olaraq qalacaq. Güman edirəm ki, o gün uzaqda deyil. Bunu dövlət başçısının həyata keçirdiyi xarici siyasət kursu da, ölkənin iqtisadi potensialının güclənməsi fonunda Milli Ordunun Qafqazın ən güclü ordusuna çevrilməsi faktı da tam aydın şəkildə göstərir. Mən möhtərəm Prezidentimizin məni daim daxilən duyğulandıran belə bir ifadəsini xatırlatmaq istəyirəm: “Qarabağsız, Şuşasız Azərbaycan ola bilməz. Biz heç vaxt qoymayacağıq ki, əzəli Azərbaycan torpaqlarında ikinci Ermənistan dövləti yaransın.” Bu bütün Azərbaycana və azərbaycanlılara bir çağırışdır. Qarabağın azadlığı Azərbaycan xalqının vicdanının hökmüdür. Nəyin bahasına olur-olsun bu hökmün həyata keçməsini təmin etməliyik. İkinci bir tərəfdən, bu, ulu öndər Heydər Əliyevin ömrünün gerçəkləşdirməyə macal vermədiyi müqəddəs arzusudur.

Sonda yazıçı Neftçala Rayon İcra Hakimiyyətinin başçısı İsmayıl Vəliyevə bu möhtəşəm yubiley tədbirinin keçirilməsinə görə bütün qonaqlar adından dərin minnətdarlığını bildirərək, xüsusi qeyd etdi ki, ümummilli lider Heydər Əliyev irsinin yeni nəslə aşılanmasında, çatdırılmasında belə tədbirlərin böyük rolu var.

İlqar RÜSTƏMOV

Xalq qəzeti.- 2013.- 7 aprel.- S. 8.