Azərbaycan nümayəndə heyəti İstanbulda keçirilən XVI Avrasiya İqtisadi Zirvə Toplantısında iştirak edir

İstanbulda Mərmərə Qrupu Strateji və Sosial Araşdırmalar Vəqfinin təşkilatçılığı ilə XVI Avrasiya İqtisadi Zirvə Toplantısı keçirilir. Azərbaycan nümayəndə heyəti tədbirdə iştirak edir.

Zirvə Toplantısından əvvəl Azərbaycanın təşkilatçılığı ilə 58 ölkədən gəlmiş 450-dən çox prezident, baş nazir, nazirlər və digər rəsmi şəxslərin iştirak etdikləri “Azərbaycan gecəsi” keçirilmişdir. Gecədə müğənni Tünzalə Ağayevanın ifasında Azərbaycan və dünya bəstəkarlarının əsərləri ifa olunmuşdur.

Azərbaycan Respublikası Prezidenti Administrasiyasının İctimai-siyasi məsələlər şöbəsinin müdiri Əli Həsənov Azərbaycan Prezidenti, Mərmərə Qrupu Strateji və Sosial Araşdırmalar Vəqfinin fəxri sədri İlham Əliyevin Zirvə Toplantısının iştirakçılarına müraciətini oxumuşdur.

Zirvə Toplantısında Türkiyə Prezidenti Abdullah Gülün və UNESCO-nun baş direktoru İrina Bokovanın da müraciətləri oxunmuşdur.

Prezident Administrasiyasının İctimai-siyasi məsələlər şöbəsinin müdiri Əli Həsənov jurnalistlərə müsahibəsində bildirmişdir ki, Azərbaycan bu il də bu Zirvə Toplantısında geniş tərkibdə iştirak edir. On altıncı dəfə keçirilən bu Zirvə Toplantısında biz hər şeydən əvvəl müxtəlif sahələrdə qazandığımız uğurları təbliğ edirik. Burada iqtisadiyyat, sosial sahə, kommunikasiya, nəqliyyat, enerji, mədəniyyət və digər sahələr üzrə təmsil olunan ölkələrlə əlaqələr qururuq. Bu ölkələrlə Avrasiya məkanında əməkdaşlığın müxtəlif tərəflərini müzakirə edirik. Nəticə olaraq, Azərbaycanın dünyaya daha sıx inteqrasiyasına dəstək veririk. Bizim ölkəmiz bu il də xüsusi konsert proqramı təşkil etdi. Keçiriləcək bölmə iclaslarında nümayəndə heyətimizin üzvləri informasiya-kommunikasiya texnologiyaları, enerji, nəqliyyat, təhsil və digər sahələrə dair məruzələr təqdim edəcəklər.

Ə.Həsənov vurğulamışdır ki, 60-a yaxın ölkədən çoxsaylı nümayəndələrin iştirak etdikləri Zirvə Toplantısında biz Azərbaycanın Dağlıq Qarabağ, təhlükəsizlik və digər problemlərini də bölüşürük. Xəzər bölgəsində ölkəmizin reallaşdırdığı transmilli layihələr, digər mühüm məsələlər üzrə də vacib əlaqələr yaradırıq.

Mərmərə Qrupu Strateji və Sosial Araşdırmalar Vəqfinin sədri, professor Akkan Suver açılış nitqində bildirmişdir ki, Avrasiya İqtisadi Zirvə Toplantısı bu il də dünyanın bütün qitələrindən qonaqların iştirakı ilə planetin aktual məsələlərini gündəmə gətirir. O vurğulamışdır ki, hər il olduğu kimi, bu il də Azərbaycan Zirvə Toplantısının işində ən fəal ölkə kimi iştirak edir.

Türkiyə Böyük Millət Məclisinin sədri Cəmil Çiçək, Makedoniya Prezidenti Gyorge İvanov, Albaniya Prezidenti Bujar Nişani, Türkiyənin ətraf mühitin qorunması və meşə təsərrüfatı naziri Veysəl Eroğlu, İstanbul valisi Hüseyn Avni Mutlu, millət vəkilləri çıxış edərək Zirvə Toplantısının əhəmiyyətindən danışmış, tədbirin işinə uğurlar diləmişlər.

Sonra toplantı işini bölmə iclaslarında davam etdirmişdir. Azərbaycanın rabitə və informasiya texnologiyaları naziri Əli Abbasov, təhsil naziri Misir Mərdanov ölkəmizdə müasir kommunikasiya texnologiyaları, təhsil sahəsində həyata keçirilən islahatlar və əldə olunmuş nailiyyətlərdən ətraflı bəhs etmişlər. Çıxışlarda vurğulanmışdır ki, Azərbaycan Prezidenti İlham Əliyevin rəhbərliyi ilə həyata keçirilən ardıcıl islahatlar nəticəsində bu gün ölkəmiz orbitdə süni peykə malik olan inkişaf etmiş dövlətlər arasında yer almışdır.

Mədəniyyət və media üzrə keçirilən bölmə iclaslarında Bakı Slavyan Universitetinin rektoru, professor Kamal Abdulla və Qadın Jurnalistlər Birliyinin sədri Sevil Yusifova məruzələrlə çıxış etmişlər.

XVI Avrasiya İqtisadi Zirvə Toplantısı öz işini aprelin 11-də davam etdirəcəkdir.

Oqtay BAYRAMOV

Xalq qəzeti.- 2013.- 11 aprel.- S. 4.