Azərbaycan Dillər Universitetində akademik Zərifə xanım Əliyevaya həsr olunmuş “dəyirmi masa” keçirilmişdir

Aprelin 10-da Azərbaycan Dillər Universitetində (ADU) görkəmli oftalmoloq alim, akademik Zərifə xanım Əliyevanın 90 illik yubileyinə həsr olunmuş “Qayğıkeş ana, vəfalı ömür-gün yoldaşı” mövzusunda “dəyirmi masa” keçirilmişdir.

ADU-dan AzərTAc-a bildirmişlər ki, əvvəlcə Sevil Əliyevanın sözlərinə bəstələnmiş “Ana” mahnısı səslənmişdir.

Tədbirdə universitetin dosenti Sevda Zamanova akademik Zərifə xanım Əliyevanın 90 illik yubileyinin keçirilməsi haqqında Prezident İlham Əliyevin 2013-cü il 7 fevral tarixli Sərəncamının əhəmiyyətini qeyd etmişdir. S.Zamanova gözəl ana və həyat yoldaşı, intellektual keyfiyyətləri özündə birləşdirən ziyalı, dünya tibb elminə əvəzolunmaz töhfələr vermiş böyük oftalmoloq alim Zərifə xanım Əliyevanın həyatı, elmi fəaliyyəti ilə bağlı geniş məlumat vermişdir.

Zərifə xanım Əliyevanın müasir, müstəqil Azərbaycan dövlətinin memarı və qurucusu, bütün mənalı ömrünü vətəninin və xalqının tərəqqisinə həsr etmiş dahi şəxsiyyətin - ümummilli lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olduğu diqqətə çatdırılmışdır. Elmi fəaliyyəti ilə yanaşı, qəlblərində daim Azərbaycan sevgisi yaşadan, Vətənin qüruru sayılan iki övlad yetişdirmiş Zərifə xanım Əliyevanın qazandığı fəxri adlar, elmi titullar, mükafatlar sırasında ən şərəflisinin “ana” adının olduğu vurğulanmışdır.

Bildirilmişdir ki, qısa ömür sürmüş görkəmli akademikin işıqlı obrazı yüksək vətənpərvərlik və humanizm rəmzi kimi həmişə bizimlə qalacaq, onun parlaq xatirəsi daim anılacaq və qədirbilən xalqımızın qəlbində əbədi yaşayacaqdır.

Sonra ADU-nun tələbələri akademik Zərifə Əliyeva haqqında Azərbaycan və rus dillərində elmi məruzələrlə çıxış etmişlər.

“Dəyirmi masa” müzakirələrlə davam etmişdir.

Xalq qəzeti.- 2013.- 11 aprel.- S. 7.