Heydər Əliyev
və Azərbaycanda mülkiyyət islahatları
Müasir Azərbaycan dövlətinin qurucusu
ulu öndərimiz Heydər Əliyev hər şeydən əvvəl
böyük azərbaycanlı idi. “Mən həmişə
fəxr etmişəm və indi də fəxr edirəm ki, mən
Azərbaycanlıyam” deyən müdrik rəhbərimiz
dünya azərbaycanlılarının əbədi
yaddaşına bütün zamanların ən böyük azərbaycanlısı
kimi həkk olunmuşdur.
Heydər
Əliyev yalnız Azərbaycan xalqının deyil,
bütün dünya xalqlarının və bəşəriyyətin
tarixinə daxil olmuş dahi şəxsiyyətdir. Onun 30 ildən
artıq Azərbaycana rəhbərliyi dövründə
ölkəmizin inkişafı və qüdrətlənməsi
naminə gördüyü tarixi xidmətlər
xalqımız tərəfindən yüksək qiymətləndirilir.
O illərdə
xalqın ictimai-siyasi, iqtisadi və mədəni həyatının
bütün sahələrində əldə edilmiş
yüksəliş məhz Heydər Əliyevin adı ilə
sıx bağlıdır. Dahi şəxsiyyətin həyat və
fəaliyyəti ilə əlaqədar olan hər gün tarixi əhəmiyyət
kəsb edir.
Heydər
Əliyev ölkəmizə rəhbərlik etdiyi dövrdə
Azərbaycanı bir dövlət kimi zamanın ağır və
sərt sınaqlarından uğurla çıxara bilmişdir.
Müdrik rəhbər uzaqgörən siyasəti ilə
respublikanın gələcək inkişaf strategiyasını
müəyyənləşdirmiş və onun həyata
keçirilməsi üçün mühüm addımlar
atmışdır. Həyatın bütün sahələrində,
o cümlədən iqtisadiyyatda aparılan islahatlar müstəqil
dövlətçiliyimizin təşəkkülünə və
möhkəmləndirilməsinə zəmin
yaratmışdır.
Azərbaycan
dünya ölkələri arasında ən dinamik inkişaf
edən, müstəqil siyasət yeridən, hüquqi,
demokratik, dünyəvi və unitar dövlətdir. Onun siyasi,
sosial-iqtisadi sisteminin, dövlət quruculuğunun əsasları
ümummilli liderimiz Heydər Əliyevin gərgin səyi və
xalqın dəstəyi ilə yaradılmışdır.
Dahi
rəhbər Azərbaycanın siyasi və sosial-iqtisadi həyatına
yeni meyillər, idarəçilik qaydaları, prinsiplər gətirdi.
O, siyasi mədəniyyət, mətinlik, kompromis üsullar,
siyasi, ideoloji, iqtisadi fəallıq, ölkənin fəal
sosial-iqtisadi qüvvələrini vahid ideya ətrafında birləşdirmək,
konsolidə olunmuş, qarşılıqlı əlaqəyə
əsaslanan fəaliyyət praktikasının müəllifinə
çevrildi.
Heydər
Əliyevin respublika iqtisadiyyatının inkişafı naminə
gördüyü misilsiz işlər danılmazdır. Bu
gün müstəqil dövlətçiliyimizin tərəqqisinin
mənbəyi görülmüş həmin işlərlə
bağlıdır. Sözügedən dövrdə Azərbaycan
özünün ən yüksək inkişaf zirvəsinə
qalxmışdır. Heydər Əliyevin gələcəyə
istiqamətlənmiş müdrik fəaliyyəti nəticəsində
ölkəmiz keçmiş Sovet İttifaqında qabaqcıl
sənaye və kənd təsərrüfatı
respublikasına çevrilmişdir.
Azərbaycanda
çoxlu sayda yeni sənaye müəssisələri
yaradılmış, neft və qaz sənayesinin inkişafı
üçün infrastruktur qurulmuş, aqrar bölməyə
mühüm önəm verilmiş, tikinti, nəqliyyat, rabitə
və sosial sahələrdə həyata keçirilən
inkişaf proqramları iqtisadiyyatın qüdrətlənməsinə,
əhalinin sosial vəziyyətinin və həyat şəraitinin
yaxşılaşmasına səbəb olmuşdur. Elm, mədəniyyət
və kadr hazırlığında müsbət nəticələr
əldə edilmişdir. Ulu öndərimizin uzaqgörənliyi
nəticəsində minlərlə azərbaycanlı gənc
keçmiş SSRİ-nin müxtəlif şəhərlərində
yerləşən ən məşhur ali məktəblərdə
təhsil alaraq vətənə dönmüşdür.
Keçən
əsrin 80-ci illərinin sonu, 90-cı illərinin əvvəli
keçmiş SSRİ məkanında baş verən
dağıdıcı proseslər Azərbaycana da öz təsirini
göstərdi. Ermənipərəst ittifaq rəhbərliyinin
xəyanətkar mövqeyinə etiraz edərək rəhbərlikdən
istefa verən Heydər Əliyev 1990-cı ilin Qanlı Yanvar
hadisələri zamanı öz xalqına dayaq oldu. Həyatı
üçün təhlükə olmasına baxmayaraq,
müdrik rəhbərimiz Moskvadan bütün dünyaya etiraz
səsini ucaltdı, xalqımıza qarşı törədilən
qanlı faciənin səbəbkarlarını göstərdi.
Böyük
enerji və qətiyyət sahibi olan Heydər Əliyev formalaşdırdığı
və həyata keçirdiyi strateji xətlə,
apardığı ardıcıl islahatlarla həmin dövrdə
ölkəmizin dinamik inkişafının əsasını
qoydu. Əldə edilmiş makroiqtisadi və sosial-siyasi sabitlik
isə Azərbaycanın zəngin, qüdrətli dövlətə
çevrilməsinin qarantı idi.
Heydər
Əliyev Azərbaycan həqiqətlərinin dünya ictimaiyyətinə
çatdırılması, Ermənistan-Azərbaycan,
Dağlıq Qarabağ münaqişəsinin dinc yolla
nizamlanması prosesinə start verdi. Dahi öndərin
reallaşdırdığı məqsədyönlü tədbirlər
nəticəsində Azərbaycan bütün dünyada
tanınmağa başladı, Avropa Birliyinin bərabərhüquqlu
üzvlüyünə qəbul edildi. Respublikamızın
dünya iqtisadiyyatına inteqrasiyası sürətləndi.
Müdrik
rəhbərimiz uzaqgörənliklə bildirirdi ki, milli
iqtisadiyyatın quruculuğu bazar iqtisadiyyatı prinsiplərinə
söykənməlidir. Ulu öndərin “Strateji xəttimiz - sərbəst
iqtisadiyyat, özəlləşdirmə və sosial inkişaf
yoludur” konsepsiyasına söykənən islahatlar ölkəmizi
qısa zamanda sabitliyə və inkişafa gətirib
çıxartdı. Respublikamızın bugünkü dinamik
inkişafı məhz bu siyasətin məntiqi nəticəsidir.
Heydər
Əliyev yeni iqtisadi sistemin formalaşması və
inkişafının strateji xəttini, başlıca
konturlarını, mexanizmlərini, alət və vasitələrini
müəyyən etmişdir. O, ölkəni hiperinflyasiyadan,
total ictimai-siyasi və sosial böhrandan, xaosdan xilas etmiş,
siyasi, makroiqtisadi, makromaliyyə sabitliyi yaratmış və
davamlı sosial-iqtisadi inkişafın bünövrəsini
qoymuşdur. Heydər Əliyevin həyata keçirdiyi
dövlət mülkiyyətinin özəlləşdirilməsi,
sahibkarlığın inkişafı, azad rəqabətə
meydan açılması, qiymətlərin, gəlirlərin
liberallaşması, struktur, idarəetmə islahatları,
büdcə, vergi, pul-kredit, gömrük, tarif siyasətində
radikal dəyişikliklər Azərbaycanda davamlı iqtisadi
artıma təminat yaratmışdır.
Ulu
öndərimizin reallaşdırdığı islahatlar
sistemində dövlət əmlakının özəlləşdirilməsinə
də mühüm əhəmiyyət verilmişdir. Dahi rəhbər
bu prosesin həm dövlətin, həm də xalqın mənafeləri
baxımından səmərəli təşkilinin vacibliyini
daim ön plana çəkirdi. O, özəlləşdirmənin
məqsəd və vəzifələrinin düzgün müəyyən
edilməsinə, onun sosial ədalət prinsipləri gözlənilməklə
həyata keçirilməsinə xüsusi həssaslıqla
yanaşırdı.
Dövlət
əmlakının özəlləşdirilməsi ilə
bağlı qərarların qəbulundan öncə bu sahədə
əsas məsələlərin ölkə rəhbəri tərəfindən
müvafiq dövlət strukturlarının, təsərrüfat
rəhbərlərinin, elm adamlarının və ictimaiyyətin
nümayəndələrinin iştirakı ilə geniş
müzakirəyə çıxarılması bu
yanaşmanın bariz nümunəsi kimi qiymətləndirilməlidir.
Ümummilli liderimiz 1994-1995-ci illərdə özəlləşdirmə
proqramının hazırlanması ilə əlaqədar gərgin
və səmərəli iş rejiminə rəhbərlik etdi.
Ulu öndərin rəhbərliyi ilə müşavirələr,
məsləhətləşmələr keçirildi. Mütəxəssislərin
təklif və iradları diqqətlə dinlənildi. Nəhayət,
üzərində dəfələrlə dəyişiklik aparılandan
sonra dövlət mülkiyyətinin özəlləşdirilməsi
haqqında sənədlərin layihəsinin hazırlanma
prosesi başa çatdırıldı. Heydər Əliyevin
bilavasitə təşəbbüsü ilə “Azərbaycan
Respublikasında 1995-1998-ci illərdə dövlət
mülkiyyətinin özəlləşdirilməsinin Dövlət
Proqramı” hazırlandı.
Adıçəkilən
proqramın məqsədi təsərrüfat subyektləri
üçün xüsusi mülkiyyət və sərbəst
rəqabət prinsipləri əsasında özünütənzimləmə
mexanizmlərinə malik bazar iqtisadiyyatı mühitinin
yaradılması, xalq təsərrüfatı strukturunun bazar
iqtisadiyyatının tələblərinə uyğun şəkildə
yenidən qurulması, iqtisadi prosesə bütün növ
istifadə olunmamış ehtiyatların, yeni
investisiyaların, o cümlədən, xarici investisiyaların
cəlb edilməsi, əhalinin həyat səviyyəsinin və
sosial vəziyyətinin yaxşılaşdırılmasından
ibarət idi.
Ümummilli
lider Heydər Əliyev bu zaman sıravi insanların mənafeyinə
xüsusi önəm verdi. O, dövlət əmlakı özəlləşdirilərkən
bütünlükdə ölkə vətəndaşlarının
özəlləşdirmə prosesindən kənarda
qalmamasını, onların bu prosesə fəal surətdə
cəlb edilmələrini başlıca şərt kimi
qarşıya qoydu. Buna görə də özəlləşdirmə
proqramı hazırlanarkən bu sahədə bir çox xarici
ölkələrin təcrübəsi öyrənildi və nəzərə
alındı. Nəticədə Azərbaycanda özəlləşdirmənin
qarışıq modeli tətbiq edildi, yəni dövlət əmlakının
bir hissəsinin əmək kollektivi üzvlərinə və
ölkə vətəndaşlarına əvəzsiz verilməsi
qərara alındı. Bu məqsədlə 25 mart 1996-cı
il tarixdə Prezident Heydər Əliyev tərəfindən “Azərbaycan
Respublikasında dövlət özəlləşdirmə
payları (çekləri) haqqında” Əsasnamə təsdiq
edildi və “Azərbaycan Respublikasında dövlət özəlləşdirmə
paylarının (çeklərinin) dövriyyəyə
buraxılması haqqında” fərman imzalandı. Fərmana əsasən
dövriyyəyə ümumi dəyəri özəlləşdiriləcək
dövlət əmlakının 65 faizinə bərabər
olan 32 milyon ədəd özəlləşdirmə çeki
buraxıldı. Bununla da vətəndaşlar dövlət
müəssisələrinin səhmlərinin və ya hissələrinin
satın alınmasında güzəştli qaydada iştirak
hüququna malik oldular. Eyni zamanda, özəlləşdirmə
çeklərinin qiymətli kağızlar bazarında sərbəst
alınması, satışı və digər formada özgəninkiləşdirilməsi
üçün geniş şərait təmin edildi.
Beləliklə,
dövlət mülkiyyətinin özəlləşdirilməsinə
dair birinci özəlləşdirmə proqramının və
digər hüquqi sənədlərin icrası sayəsində
Azərbaycanda yerli və xarici vətəndaşların
iştirakı ilə özəlləşdirmənin həyata
keçirilməsi üçün əlverişli şərait
təmin olundu. Bu planın icrasının gedişində
ölkəmizdə iqtisadiyyat liberallaşdırıldı,
xüsusi mülkiyyətçilər təbəqəsi
formalaşdı və bütün təsərrüfat sahələrində
azad sahibkarlıq prinsipləri bərqərar oldu, istehsalın
səmərəliliyinin və milli gəlirin
artımının həlledici amili kimi mülkiyyətin
rasional strukturu yaradıldı. Həmçinin,
inhisarsızlaşdırma və rəqabət mühiti
formalaşdırıldı, iqtisadi səmərəlilik
yüksəldi, əhalinin həyat səviyyəsi əhəmiyyətli
dərəcədə yaxşılaşdı.
Özəlləşdirmənin
I Dövlət Proqramında torpaq sahələrinin özəlləşdirilməsi
öz əksini tapmamışdı və bunun da obyektiv səbəbləri
vardı. Çünki proqram təsdiq ediləndə hələ
“Torpaq islahatı haqda Qanun” mövcud deyildi və torpaq sahələrinin
xüsusi mülkiyyətə verilməsi respublikada həyata
keçirilmirdi. Bütün bu məsələlər öz həllini
ulu öndərin 1997-ci il 19 dekabr tarixli 659 nömrəli fərmanı
ilə təsdiq edilmiş “Özəlləşdirilən
müəssisə və obyektlərin, habelə hüquqi və
fiziki şəxslər tərəfindən inşa edilmiş
müəssisə və obyektlərin yerləşdiyi dövlət
torpaq sahələrinin satılması qaydaları haqqında Əsasnamə”də
və 2000-ci ildə imzaladığı müvafiq fərmanları
ilə təsdiq edilmiş “Dövlət əmlakının
özəlləşdirilməsi haqqında Azərbaycan Respublikasının
Qanunu”nda və “Azərbaycan Respublikasında Dövlət əmlakının
özəlləşdirilməsinin II Dövlət
Proqramı”nda tapmışdır.
Xatırladım
ki, həmin dövrdə respublikada artıq sağlam rəqabət
mühiti formalaşmağa başlamışdı. Nəticədə
torpaq dövriyyəsi proseslərində torpaq sahələrinin
alqı-satqı, girov qoyulması, bağışlanması,
habelə mülkiyyət, istifadə və icarə
hüquqlarının digər formalarda dəyişməsi ilə
bağlı dövlət orqanları, bələdiyyələr,
fiziki və hüquqi şəxslər arasında yaranan
iqtisadi və hüquqi münasibətlərin tənzimlənməsi
ilə əlaqədar yeni qanunun qəbul edilməsinə
ehtiyac duyulurdu. Məhz ulu öndərin zamanın nəbzini
tutmaq və uzaqgörənlik siyasəti 1999-cu ildə “Torpaq
bazarı haqqında Azərbaycan Respublikasının Qanunu”nun
qəbul edilməsi ilə nəticələndi.
Həmçinin
qeyd etmək lazımdır ki, dahi rəhbərin hakimiyyəti
dövründə müvafiq fərmanlarla qüvvəyə
minmiş “Torpaq icarəsi haqqında”, “Dövlət torpaq
kadastrı torpaqların monitorinq və yerquruluşu
haqqında”, “Torpaqların münbitliyi haqqında”, “Bələdiyyələrin
əraziləri və torpaqları haqqında” və bir
sıra digər qanunları qəbul edilmişdir.
Torpaq
islahatı sahəsində aparılan bu geniş miqyaslı fəaliyyət
həmin dövrlərdə Azərbaycan Respublikasının
Mülki Məcəlləsində, İnzibati Xətalar Məcəlləsində,
Meşə Məcəlləsində və s. normativ hüquqi
aktlarda da öz əksini tapmışdır.
Ölkəmizin
inkişafının yeni dövründə meydana
çıxan tələblər, dövlət
başçısının iqtisadi quruculuq sahəsində irəli
sürdüyü vəzifələr özəlləşdirmənin
qanunvericilik bazasının təkmilləşdirilməsini zəruri
edirdi. Bununla əlaqədar ümummilli liderimizin təşəbbüsü
ilə 2000-ci ilin avqust ayında Dövlət əmlakının
özəlləşdirilməsi barədə yeni Qanun və
Dövlət Proqramı qəbul edildi. Bununla yanaşı, II
Dövlət Proqramının icrasını təmin edən
normativ hüquqi aktlar təsdiq olundu.
Hər
iki Dövlət Proqramına uyğun olaraq ilkin mərhələdə
ticarət və xidmət obyektlərinin özəlləşdirilməsi
ilə başlanan dövlətsizləşdirmə prosesi
getdikcə iqtisadiyyatın daha geniş və aparıcı sahələrini-nəqliyyat
və telekommunikasiya, tikinti və inşaat materialları,
yüngül, yeyinti və emal sənayesi,
maşınqayırma, metallurgiya, neft-kimya və kimya, hava
yolları və digər aparıcı sahələri əhatə
etmişdir.
Qeyd
etmək lazımdır ki, özəlləşdirmə siyasəti
gözlənilən səmərəni və gərəkli nəticələri
verdi və iqtisadi inkişafın sürətlənməsində,
azad biznesin əhatə dairəsinin genişlənməsində,
xarici sərmayədarların respublikamıza axınında və
milyardlarla dollar investisiyaların qoyuluşunda mühüm rol
oynadı. Özəlləşdirmə ilə bağlı
proqramların icrası sayəsində dövlətin
iqtisadiyyata müdaxiləsi minimuma endirildi, qiymətlərin
liberallaşdırılması və əsasən bazar tərəfindən
tənzimlənməsi, vergilərin sayının və dərəcələrinin
əhəmiyyətli dərəcədə azaldılması
özəl bölmənin fəaliyyəti üçün əlverişli
imkanlar yaratdı. Nəticədə azad rəqabət təmin
edildi və artıq Azərbaycan iqtisadiyyatı konkret proqramlar
əsasında idarə olunan iqtisadiyyata çevrildi.
Bütün
bunlarla yanaşı, ümummilli lider Heydər Əliyevin rəhbərliyi
ilə ölkədə mülkiyyət münasibətlərinin
tənzimlənməsi sahəsində real imkanlara və
inkişaf etmiş ölkələrin təcrübəsinə
əsaslanan mühüm dövlət tədbirləri
görüldü. 26 yanvar 1993-cü il tarixdə qəbul
olunmuş “Azərbaycan Respublikasında mənzil fondunun özəlləşdirilməsi
haqqında” qanun təkmilləşdirildi. Mənzil fondunun
özəlləşdirilməsi üzrə müəyyən
edilmiş hüquqi mexanizmlər sadələşdirilərək
vətəndaşların maraqlarına
uyğunlaşdırıldı. Heydər Əliyevin
birbaşa müəllifliyi ilə hazırlanaraq 12 noyabr 1995-ci
il tarixdə ümumxalq səsverməsi əsasında qəbul
edilən müstəqil Azərbaycan dövlətinin ilk
Konstitusiyasında da mülkiyyət hüquqları ilə
bağlı son dərəcə demokratik müddəalar təsbit
olundu. Vətəndaşların başqa hüquq və
azadlıqları kimi, mülkiyyət hüquqlarının da
etibarlı qaydada qorunması dövlətin müəyyən
etdiyi əsas məqsədlərdən biri oldu.
1996-cı
ildən etibarən isə MDB məkanında ilk dəfə
olaraq torpaqların dövlət, bələdiyyə və
xüsusi mülkiyyətə verilməsi prosesi məhz Azərbaycanda
başlandı.
2001-ci
ildən bələdiyyələrin mülkiyyətinə verilən
torpaq sahələrinin sərhədləri müəyyənləşdirildi
və beləliklə, yeni bir mülkiyyət
növünün - bələdiyyə mülkiyyətinin əsası
qoyuldu. Belə şərait ölkədə daşınmaz əmlakın
qeydiyyatı sisteminin müasir reallıqlara uyğun surətdə
yenidən qurulmasını tələb edirdi. Azərbaycan
Respublikası Prezidentinin 2006-cı il 29 iyun tarixli sərəncamı
ilə “Azərbaycan Respublikasında daşınmaz əmlaka
hüquqların dövlət qeydiyyatı sisteminin
inkişafı üzrə Tədbirlər Planı ” təsdiqləndi.
Tədbirlər planına uyğun olaraq ölkədə
“Daşınmaz Əmlakın Milli Qeydiyyat Sistemi” yaradıldı,
sistemin texniki təminatı gücləndirildi və ərazi
idarələrində lokal kompyuter şəbəkəsi
quruldu.
Ulu
öndər Heydər Əliyev tərəfindən əsası
qoyulmuş ölkəmizin inkişaf strategiyası bu gün də
möhtərəm Prezidentimiz cənab İlham Əliyev tərəfindən
uğurla davam etdirilməkdədir. Məhz bunun nəticəsində
Azərbaycan dünyanın dinamik inkişaf edən ölkələri
səviyyəsinə çatmış, regionda lider dövlətə
çevrilmişdir. Daim artan iqtisadi potensialımız Azərbaycana
beynəlxalq aləmdə özünün milli və dövlətçilik
maraqlarını ifadə etməyə imkan verir. Möhtərəm
Prezidentimizin son illər həyata keçirdiyi daxili və
xarici siyasət ölkəmizin davamlı sosial-iqtisadi yüksəlişinə
və xalqımızın rifahının daha da
yaxşılaşdırılmasına yönəlmişdir.
Respublikamız üçün vacib əhəmiyyətli bir sıra
iri iqtisadi layihələr reallaşdırılmış, vətəndaşların
sosial şəraitində müsbət dəyişiklik nəzərə
çarpmışdır. Sosial-iqtisadi sahədə onlarla məqsədli
dövlət proqramları qəbul edilmişdir və
hazırda bu, ardıcıl şəkildə həyata
keçirilməkdədir.
Möhtərəm
Prezidentimiz tərəfindən həyata keçirilən
iqtisadi siyasət nəticəsində regionların tarazlı
inkişafı, bölgələrdə infrastrukturun yenidən
qurulması, neft sektoru ilə yanaşı, qeyri-neft sektorunun
da inkişafı ilə bağlı uğurlar əldə
edilməkdədir. Azərbaycanın regionlarının və
Bakı şəhərinin qəsəbələrinin
sosial-iqtisadi inkişafı, paytaxtın nəqliyyat sisteminin təkmilləşdirilməsi,
yolların və körpülərin tikintisi, ekoloji vəziyyətin
yaxşılaşdırılması və infrastruktur layihələrinin
reallaşdırılmasına cənab Prezident tərəfindən
xüsusi diqqət yetirilir.
Ulu
öndər Heydər Əliyevin başladığı özəlləşdirmə
siyasəti onun layiqli davamçısı, dövlət
başçısı İlham Əliyev tərəfindən
uğurla davam etdirilir. Cənab Prezident müasir dövrün
tələblərinə uyğun olaraq dövlət əmlakı
üzərində idarəetmənin təkmilləşdirilməsini
və özəlləşdirmə zamanı şəffaflığın
təmin edilməsini əsas vəzifə kimi qarşıya
qoymuşdur.
Prezident
İlham Əliyev dövlət mülkiyyətinin özəlləşdirilməsi
prosesində sosial ədalət prinsipinin və vətəndaşların
bütün təbəqələrinin bərabərhüquqlu
iştirakının təmin edilməsi məqsədi ilə
özəlləşdirmə paylarının dövriyyə
müddətinin başa çatmasına baxmayaraq, bir neçə
dəfə çeklərin müddətinin uzadılması
barədə fərmanlar imzalamışdır. Eyni zamanda,
özəlləşdirmə çeklərinin istifadə
müddətinin başa çatmasından sonrakı dövr
üçün yeni özəlləşdirmə mexanizmləri
müəyyənləşdirilmişdir. Bu isə birbaşa əhalinin
özəlləşdirmədə geniş şəkildə
iştirakının təmin edilməsinə xidmət
göstərir.
Prezident
İlham Əliyev Heydər Əliyev siyasətini davam etdirərək
Azərbaycan iqtisadiyyatına yeni töhfələr
qazandırdı. Dövlət başçısı bu istiqamətdə
xeyli sayda fərman və sərəncamlar
imzalamışdır. Onlardan biri də “Dövlət əmlakının
qorunub saxlanılması və səmərəli istifadə
edilməsinin təkmilləşdirilməsi haqqında” Azərbaycan
Respublikası Prezidentinin 2007-ci il 6 iyun tarixli fərmanı ilə
təsdiq edilmiş “Azərbaycan Respublikasında dövlət
əmlakının idarə edilməsinin təkmilləşdirilməsi
üzrə Dövlət Proqramı”dır.
Son
dövrdə daşınmaz əmlaka dair hüquqların
dövlət qeydiyyatı sahəsində vətəndaşlara
göstərilən xidmət keyfiyyətinin daha da yüksəldilməsi
və müasir standartlar səviyyəsində qurulması,
hüquqların qeydiyyatı ilə bağlı daxil olan hər
bir müraciətə operativ yanaşılmasına xüsusi
önəm verilir. Dövlət orqanlarının elektron xidmətlər
göstərməsinin təşkili ilə əlaqədar qəbul
edilən qərarların icrası istiqamətində
müvafiq işlər həyata keçirilir.
Ölkə
başçısının tapşırıqlarına əsasən
çevik və modern dövlət idarəetməsinin
inkişaf etdirilməsi, şəffaflığın və səmərəliliyin
artırılması üçün informasiya-kommunikasiya
texnologiyalarından geniş istifadə edilir. Bu, ölkəmizdə
aparılan müasirləşmə siyasətinin prioritetlərindən
birinə çevrilmişdir. İnformasiya-kommunikasiya
texnologiyalarının inkişafı ilə bağlı qəbul
edilən qərarlar əsasında dövlət orqanları tərəfindən
əhaliyə və biznes qurumlarına beynəlxalq standartlara
uyğun elektron xidmətlər göstərilir.
Son
illər əmlak qeydiyyatı sistemi səmərəlilik və
şəffaflıq baxımından əhəmiyyətli dərəcədə
təkmilləşmişdir. Hazırda daşınmaz əmlaka
dair hüquqların qeydiyyatı sahəsində göstərilən
xidmətlərin səviyyəsinin yüksəldilməsi
üçün zəruri olan çevik və etibarlı
informasiya sistemi formalaşdırılır.
Son
bir neçə ildə görülmüş işlərin nəticəsidir
ki, Dünya Bankı və Beynəlxalq Maliyyə
Korporasiyasının dərc etdiyi “Doing Business-2013”
hesabatına əsasən, daşınmaz əmlak üzərində
hüquqların qeydiyyatı sahəsində Azərbaycan ən
yaxşı vəziyyətin olduğu on ölkə
sırasındadır. Respublikamız həmin göstərici
üzrə 183 ölkə arasında 9-cu yerdədir.
Ulu
öndərimizin adını şərəflə
daşıyan, onun ideyalarını yaşadan Heydər Əliyev
Fondu hesabına son illər müasir tipli yeni məktəblər,
tədris, elm və mədəniyyət müəssisələri,
uşaq bağçaları inşa edilmiş və digər
sosial yönümlü layihələr həyata keçirilməkdədir.
Azərbaycan reallıqlarının, Qarabağ həqiqətlərinin
dünyaya çatdırılmasında Heydər Əliyev
Fondunun xidmətləri əvəzsizdir. Bütün bunlar
xalqımıza diqqət və qayğının göstəricisi
olmaqla yanaşı, ümummilli liderimizin arzularının və
ideallarının şanlı təcəssümüdür.
Yuxarıda
qeyd edilənlər onu deməyə əsas verir ki,
xalqımızın ümummilli lideri Heydər Əliyevin
uzaqgörən, dahi şəxsiyyət olduğunu təcrübə
və zaman təsdiq etdi. Bu müdrik insandan xalqımıza, həyatı
və sağlamlığı bahasına yaratdığı
güclü dövlət, bugünümüz və gələcəyimizin
strateji xətti, olduqca radikal islahatlar, dinamik inkişaf relsinə
çıxarılmasına ürəyinin hərarətini,
yanğısını, bütün varlığını həsr
etdiyi şah əsəri müstəqil Azərbaycan
Respublikası qaldı.
Rafiq CƏLİLOV,
Əmlak Məsələləri
Dövlət
Komitəsinin sədr müavini
Xalq qəzeti.- 2013.- 21 aprel.- S. 3.