Sabunçu rayonunda quruculuq işləri sürətlə davam edir

Bakı şəhərinin bütün rayonlarında olduğu kimi, Sabunçuda da son illər əsaslı yenidənqurma işləri davam etməkdədir. Bu rayonun qəsəbələrinin hər biri tanınmaz dərəcədə dəyişmiş, yollar abadlaşdırılmış, yeni parklar və xiyabanlar salınmış, yüksək mərtəbəli evlər ucaldılmış, bir sözlə, həyat tamamilə yeniləşmişdir. Bütün bunlar Prezident İlham Əliyevin həyata keçirdiyi sosial-iqtisadi islahatların nəticəsində mümkün olmuşdur. Aprelin 26-da Sabunçu Rayon İcra Hakimiyyətinin birinci rübün yekunlarına həsr olunmuş iclasında bu nailiyyətlərdən və qarşıda duran vəzifələrdən ətraflı danışılmışdır.

İclası Sabunçu Rayon İcra Hakimiyyətinin başçısı Adil Vəliyev açmışdır. Sonra “2013-cü ilin I rübündə Sabunçu rayonunun sosial-iqtisadi inkişafının yekunları və qarşıda duran vəzifələr haqqında” Sabunçu rayon İcra Hakimiyyəti başçısının I müavini Qəzənfər Həsənov geniş məruzə ilə çıxış etmişdir. O, bildirmişdir ki, 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş Nazirlər Kabinetinin iclasında dövlət başçısı ölkə həyatının bütün sahələrində görülən işlərin aydın mənzərəsini yaratmış, qarşıda duran həlli vacib vəzifələri müəyyənləşdirmişdir. Prezident İlham Əliyev öz çıxışında 2013-cü ildə keyfiyyətcə daha da böyük nəticələr əldə ediləcəyini bildirmiş, birinci rübdə ümumi daxili məhsulun 3,1 faiz və ya 395,2 milyon manat artaraq 12,9 milyard manat, qeyri-neft sektorunun inkişafının isə 11,4 faiz olduğunu qeyd etmişdir.

Natiq demişdir ki, 2013-cü ilin I rübündə Sabunçu rayonunun iqtisadiyyatında da artım davam etmiş, dövlət proqramları çərçivəsində və başqa mənbələr hesabına infrastruktur layihələri həyata keçirilmiş, yeni sosial əhəmiyyətli obyektlər tikilərək istifadəyə verilmişdir.

Cari ilin I rübündə rayonun sənaye müəssisələri və idarələri tərəfindən istehsal edilmiş məhsulun ümumi həcmi 18 faiz artaraq 78,9 milyon manat, pərakəndə əmtəə dövriyyəsi 15,2 faiz artaraq 147,97 milyon manat, əhaliyə göstərilən pullu xidmətlər 19,4 faiz artaraq 65,3 milyon manat, əsas kapitala yönəldilən investisiyalar isə 22,1 faiz artaraq 15,95 milyon manat təşkil etmişdir. Bir işçiyə hesablanmış orta aylıq əməkhaqqı ötən ilin müvafiq dövründəkinə nisbətən 14,6 faiz artaraq 417,2 manat, sənaye müəssisələrində isə 12,5 faiz artaraq 605,8 manat olmuşdur. Bu dövrdə 589 yeni iş yeri yaradılmışdır.

İlin əvvəlindən rayonun sosial-iqtisadi inkişaf planına uyğun olaraq rayon ərazisində respublikanın və şəhərin müvafiq mərkəzi dövlət orqanlarının, eləcə də rayonun daxili imkanları hesabına xeyli sosial əhəmiyyətli obyektlərin, qurğuların tikinti-quraşdırma və abadlıq işlərinin aparılması təmin edilmişdir. Belə ki, “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” çərçivəsində nəzərdə tutulmuş işlər cari ilin I rünündə də davam etdirilmişdir. Hazırda 252 və 155 saylı məktəblər üçün yeni korpusların tikintisi, 5 təhsil və 3 səhiyyə müəssisəsində əsaslı təmir işləri davam etdirilir. Heydər Əliyev Fondu tərəfindən isə Pirşağı qəsəbəsindəki 112 saylı məktəb üçün yeni 650 şagird yerlik bina mart ayının 14-də istifadəyə verilmişdir.

Qəzənfər Həsənov bildirmişdir ki, Əmək və Əhalinin Sosial Müdafiəsi Nazirliyinin sifarişi ilə Zabrat qəsəbəsində yetkinlik yaşına çatmayanlar üçün 3 mərtəbəli 50 yerlik ixtisaslaşdırılmış reabilitasiya və 50 yerlik sosial sığınacaq, eləcə də gözdən əlillər üçün 4 mərtəbəli tədris bərpa mərkəzlərinin tikintisinə başlanılmışdır. Hal-hazırda həmin obyektlərdə işlər davam edir. Qeyd etmək lazımdır ki, hər üç binada xəstələrin sağlamlığının bərpası üçün əlavə idman korpuslarının tikintisi də nəzərdə tutulmuşdur. Bundan başqa Bilgəh qəsəbəsində müharibə və əmək əlilləri pansionatı üçün 5 mərtəbəli 170 nəfərlik korpusun tikintisinə başlanmışdır. Sabunçu qəsəbəsi, Şəhər Şossesi küçəsi 5-ci döngədə yerləşən 8 saylı qəzalı bina sökülərək yerində 3 mərtəbəli yaşayış evi tikilir. Hazırda binada tamamlanma işləri aparılır. Ümumiyyətlə, rayon ərazisində belə qəzalı vəziyyətdə olan 10-a yaxın bina qeydə alınmışdır ki, bunlarla bağlı da müvafiq tədbirlər görülməkdədir.

Rayon icra hakimiyyətinin inzibati binasında yenidənqurma, əsaslı təmir işləri ilə yanaşı, Bakıxanov qəsəbəsi ərazisində bir sıra binalar, o cümlədən də rayon prokurorluğu, rayon və 2 saylı Bakı inzibati iqtisad məhkəmələri, Gənclər evi üçün binalar inşa edilməkdədir.

Bakıxanov qəsəbəsində Heydər Əliyev adına istirahət parkında xüsusi layihə əsasında yenidənqurma işləri davam etdirilməklə yanaşı, orada Heydər Əliyev Mərkəzinin də inşasına başlanılmışdır.

Ümumiyyətlə, 2013-cü ilin sonuna kimi Bakıxanov qəsəbəsinin Sülh, Gənclik, R.Qənbərov və sair mərkəzi küçələrinin yollarının genişləndirilməsi, yeni səkilərin salınması, yaşayış binalarının aqlayla üzlənməsi, dam örtüklərinin, qapı-pəncərələrinin yeniləşdirilməsi, müasir küçə işıqlarının quraşdırılması, yaşıllıq zolaqlarının salınması və digər abadlıq işlərinin aparılması nəzərdə tutulmuşdur ki, nəticədə qəsəbənin həmin mərkəzi küçələrinin görkəmi əsaslı surətdə dəyişəcək.

Qəsəbələrdə yolların təmiri, asfaltlaşdırılması üzrə işlər davam etdirilir. Görülmüş tədbirlər əsasında 280-dən çox məişət tullantıları üçün nəzərdə tutulmuş meydança təmir edilmiş, onların 80 faizi yeni konteynerlərlə təmin olunmuş, çoxmərtəbəli yaşayış binalarının həyətlərindəki və ətraflardakı 25 qeyri-qanuni tikili, 17 dəmir qaraj, 40-dan çox yöndəmsiz çəpərlər sökülərək ərazi abadlaşdırılmışdır.

Qeyd edilmişdir ki, son vaxtlar binalarda liftlərin tez-tez sıradan çıxması, uzun müddət işləməməsi barədə sakinlər tərəfindən şikayətlər daxil olmaqdadır. Belə binalara yerində baxış keçirilərkən məlum olmuşdur ki, MKTB-nin balansında olan 248 sərnişin liftindən 5-nin həmin gün işləməməsi, 48 liftin əsaslı təmirə, 17-nin isə yenisi ilə əvəz olunmasına ehtiyac vardır. Bu barədə tədbirlər görülməkdədir.

Görülən işlərlə yanaşı, bəzi qəsəbələrdə nəzarətin zəifləməsi nəticəsində küçə ticarətində hələ də müəyyən nöqsanlar özünü göstərir. Hələ də Zabrat və Sabunçu qəsəbələrinin mərkəzindən keçən yolun kənarlarında heyvan satışına rast gəlinir, Sabunçu qəsəbəsinin Ş.Şossesi, Zabrat qəsəbəsinin Babək, M.Məmmədyarov, Pirşağı qəsəbəsinin Ə.Məlikov və Heydər Əliyev küçələri boyu yol kənarlarında yerləşən obyektlərin qarşısında iribuynuzlu heyvanlar kəsilir, Bakıxanov qəsəbəsinin Xəstəxanayanı, Maştağa qəsəbəsinin Maştağa-Zabrat (H.Heybətov, Nizami küçəsi) Şəhər Şossesi boyu yol kənarlarında antisanitariya şəraitində təndir çörəkləri bişirilərək əhaliyə satılması davam edir. Bu məsələ hazırda diqqət mərkəzindədir.

Cari ilin 3 ayı ərzində 1077 ərizə və 545 məktub daxil olmuş icra hakimiyyəti başçısı tərəfindən 60 nəfər, səyyar görüşlərdə isə 75 nəfər vətəndaş qəbul edilmişdir. Bütün hallarda vətəndaşların müraciət və ərizələrinə yerində baxılaraq müvafiq tədbirlər görülmüş, yazılı və ya şifahi izahatlar verilmişdir. Zəruri hallarda hər cür müxtəlif köməkliklər göstərilmişdir.

Rayon ərazisində 50 müxtəlif binada məskunlaşmış 2100 məcburi köçkün ailələrinin məişət-kommunal şəraitlərinin yaxşılaşdırılması, binalarda müəyyən təmir-bərpa işlərinin aparılmasına köməkliklər edilmiş, onların enerji, su təchizatı, digər kommunal xidmətlərin göstərilməsi nəzarətdə saxlamışdır.

Sonda məruzəsi bildirmişdir ki, gələcəkdə də fəaliyyətimizi bu istiqaməndə davam etdirərək ölkə rəhbərliyinin qarşıya qoyduğu vəzifə və tapşırıqları davamlı olaraq həyata keçirməyə çalışacağıq.

Məruzə ətrafında çıxışlarda Dövlət Sosial Müdafiə Fondunun Sabunçu rayon şöbəsinin müdiri Məzahir Vəliyev, Qaz İstismar İdarəsinin rəisi İsmixan Nəsirov, Mənzil Kommunal Təsərrüfatı birliyinin rəis müavini Bəxtiyar Qasımov, Milli Məclisin deputatı Eldar Quliyev 2013-cü ilin birinci rübündə rayonda görülən işlərdən və qarşıda duran vəzifələrdən ətraflı bəhs etmişlər.

M.MÜKƏRRƏMOĞLU

Xalq qəzeti.- 2013.- 27 aprel.- S. 8.