Ulu öndər Heydər Əliyev və akademik Zərifə Əliyevanın 90 illik yubileylərinə həsr olunmuş sərgi

Dünən Səttar Bəhlulzadə adına sərgi salonunda ulu öndər Heydər Əliyev və akademik Zərifə xanım Əliyevanın 90 illik yubileylərinə həsr olunmuş “Azərbaycan qadını rəsm əsərlərində” adlı sərginin açılışı olmuşdur. Sərgini Mədəniyyət və Turizm Nazirliyi və Bakı Şəhər Səbail Rayon İcra Hakimiyyəti birgə təşkil etmişdilər. Tədbir başlamazdan əvvəl sərgi salonunun direktoru, əməkdar mədəniyyət işçisi Elçin Orucovla görüşdük.

Elçin Orucov bildirdi ki, hazırda ölkəmizin hər yerində bu böyük şəxsiyyətlərin 90 illik yubileyləri ilə bağlı tədbirlər geniş vüsət almışdır. Bu, bir daha xalqımızın onlara olan hədsiz hörmət və məhəbbətinin ifadəsidir. Heydər Əliyev rəssamlıq sənətini həmişə yüksək qiymətləndirir və rəssamlara böyük qayğı ilə yanaşırdı. Amma bizim bugünkü sərgimiz qadın obrazlarının bu sənətdə əks olunan nümunələrinə həsr olunmuşdur. Burada çox məşhur rəssamlarımızın əsərləri sərgilənib. Altay Məmmədov, Ömər Eldarov, Oqtay Sadıqzadə, Sakit Məmmədov və başqalarının əsərləri tamaşaçılara təqdim olunur.

Bu əsərlər arasında Zərifə xanımın portreti və heykəli daha çox diqqət çəkir. Ümumiyyətlə, Zərifə xanım yüksək duyumu olan insan idi. Professor N.Şulpina Zərifə xanım Əliyevanı belə xarakterizə etmişdir: “Biz onu sevmişik, sevirik və ömrümüzün sonuna qədər sevəcəyik. Zərifə xanımın bədii duyumu, bədii istedadı bənzərsiz idi. Zərifə xanım necə böyük məharətlə ifa edir, nəğmələr oxuyurdu. Onun incə barmaqları sürətlə pianonun dilləri üstündə gəzir, toplaşdığımız otağı bəzən gur, bəzən də həzin musiqi sədaları bürüyürdü. Bir qadın kimi də Zərifə Əziz qızı haqqında bir neçə kəlmə deməyə bilmərəm. Təbiət ona qeyri-adi qadın cazibədarlığı bəxş etmişdi. Zərifə Əziz qızının bütün varlığı hərəkətlərindən və üzünün mimikasından oxunurdu. Mən onu heç zaman əsəbi, qəzəbli görməmişəm. O, həmişə gülərüz, xeyirxah idi”. Sərgidə nümayiş etdirilən portreti də bu gözəl insanın xarakterini əks etdirən qiymətli sənət əsəridir.

Sonra sərgilənən əsərlərə baxdıq. Bu əsərlərin hər birində Azərbaycan qadınının daxili zənginliyi, mənəvi saflığı əks olunmuşdur.

Elçin Orucov onu da bildirdi ki, ulu öndərin portretini yaratmaq üçün gənc rəssamlar arasında müsabiqə elan etmişik. May ayının 11-də müsabiqəyə yekun vurulacaq və qaliblər müəyyənləşəcək.

Sonra açılış mərasimi oldu. Mərasimdə Mədəniyyət və Turizm Nazirliyi və Səbail Rayon İcra Hakimiyyətinin nümayəndələri iştirak edirdilər. Açılış mərasimindən sonra iştirakçılar sərgi ilə tanış oldular.

M.MÜKƏRRƏMOĞLU

Xalq qəzeti.- 2013.- 30 aprel.- S. 5.