Dövlət Proqramı Lerikdə uğurla icra edilir

Dağlar diyarı Lerikdə ötən ilin yekunlarına və qarşıda duran vəzifələrə həsr olunmuş hesabat yığıncağı işgüzar şəraitdə keçmişdir. Tədbir iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad etmiş, mədəniyyət evinin foyesində rayonun sosial-iqtisadi inkişafına dair foto-sərgi ilə tanış olmuş, “2012–Lerikin tarixə qovuşan uğurlar ili” sənədli filminə baxmışlar.

Rayon icra hakimiyyətinin başçısı Rövşən Bağırovun məruzəsi maraqla dinlənilmişdir. O qeyd etmişdir ki, ötən il rayonda tikinti, quruculuq və abadlıq işləri davam etdirilmiş, iqtisadiyyatın bütün sahələrində uğurlu nəticələr qazanılmışdır.

2012-ci ildə rayonda iqtisadiyyatın əsas sahələri üzrə məhsul buraxılışı 12,2 faiz, pərakəndə əmtəə dövriyyəsi və pullu xidmətlər 2,2 faiz, təmir-tikinti işləri 74,1 faiz, sənaye məhsulunun ümumi həcmi 56 faiz artmışdır. Rayon üzrə əhalinin orta aylıq nominal əmək haqqı 274,6 manata, əhalinin gəlirləri 64 milyon 896 min manata çatmışdır.

Hesabat ilində kənd təsərrüfatı məhsullarının istehsalı sahəsində də önəmli uğurlar qazanılmışdır. Ötən il rayonda 2 min 262 ton buğda, 16 min 481 ton kartof, 36 min 945 ton tərəvəz, 4 min 452 sentner meyvə istehsal edilmişdir.

Heyvandarlıq rayonun ən inkişaf etmiş sahələrindəndir. Görülmüş kompleks tədbirlər nəticəsində iribuynuzlu mal-qaranın, davarların baş sayı, süd, ət, yumurta, yun istehsalı da artmışdır.

Regional inkişafa dair ikinci Dövlət Proqramının rayonda uğurla icra edildiyi xüsusi vurğulanmışdır. Bu dövrdə Lerik şəhəri və rayonun 12 yaşayış məntəqəsi təbii qazla təmin edilmişdir. Hazırda rayonun 20-dən çox kəndinə qaz xətti çəkilir. Cari ilin sonunadək 40-dan çox kəndin qazlaşdırılması nəzərdə tutulmuşdur.

Şəhərin abadlaşdırılması istiqamətində tədbirlər ötən il də davam etdirilmişdir.

Lerik şəhərində 300 yerlik xeyir-şər evinin inşasında tamamlama işləri aparılır. Vergilər idarəsi üçün Lerik şəhərində kompüter terminalı, Rvarud kəndində yeni sahə baytarlıq məntəqəsi, Yaponiya hökumətinin maliyyə dəstəyi ilə Şingədulan kəndində tibb məntəqəsi tikilərək istifadəyə verilmişdir. Statistika idarəsinin inşası son mərhələdədir.

Hesabat ilində Züvüç, Davradibi, Daster, Aran, Ləkər, Barzavu və Veri kəndlərində inşa edilən məktəb binaları istifadəyə verilmişdir. Daha 8 kənddə məktəb binalarının tikintisi davam etdirilir.

Ötən il Prezident İlham Əliyevin sərəncamı ilə Lerik-Qosmalian-Kəlvəz avtomobil yolunun tikintisi üçün ilkin olaraq 3 milyon manat vəsait ayrılmış, yolun 8,6 kilometri asfaltlaşdırılmışdır. Piran, Noda, Peştətük kənddaxili yollarına xeyli asfalt döşənmişdir. Bundan başqa, Əliabad-Ağçay, Piran-Bürsülüm, Piran-Hamarat, Tikəband, Əliabad-Livədirqə kəndlərarası yollarında təmir işləri aparılmış, Bürsülüm ərazisində əhalinin müraciəti nəzərə alınaraq çay üzərində avtomobil körpüsü, Orand, Livədirqə, Vənədi kəndlərindəki çayların üzərində piyada keçidləri inşa edilmişdir.

Lənkəran-Lerik yolunun 37-ci kilometrliyində süfrə suyu və şirə istehsal edən müəssisənin tikintisi davam etdirilir. Lerik şəhərində mebel, plastik-qapı və pəncərələr istehsal olunacaq sexin, çörək zavodunun, 400 yerlik şadlıq sarayının, ikimərtəbəli ictimai iaşə obyektinin tikintisində işlər sürətlə gedir, şəhər uşaq bağçasının əsaslı təmiri sona çatır.

Lənkəran-Lerik yolu boyunca, Qosmalian və Bilnə kəndlərində yeni turizm-istirahət mərkəzləri, Lerik şəhərində, yaşayış məntəqələrində, magistral yol boyu ticarət mərkəzləri, iaşə obyektləri tikilmişdir. “Relax” “Cənub”, “Yaşıl ada”, “Meşəbəyi” turizm-istirahət mərkəzlərində tikinti-quraşdırma işləri davam etdirilmiş, yeni kotteclər, istirahət meydançaları inşa edilmişdir.

Fövqəladə Hallar Nazirliyi tərəfindən ötən il kəndlərdə 4 ailə üçün yeni yaşayış evi inşa edilmişdir.

R.Bağırov sonra dedi ki, Lerik şəhərində inşasına 2011-ci ildə başlanan 17 meqavatlıq modul tipli elektrik stansiyasının tikintisi sürətlə davam etdirilir. Lerik-Yardımlı yüksək gərginlikli elektrik hava xətti istismara verilmişdir. 19 kilometrlik Qosmalian-Lerik su xəttinin çəkilişi başa çatmışdır. Şəhərdaxili su xətləri çəkilir, kanalizasiya sistemi qurulur.

Piran kəndində yumurta, ət, quş istehsalı ilə məşğul olacaq broyler fabrikinin tikintisi sona çatır. Gündəlik istehsalı 50 ton quş əti olacaq obyektdə hazırda 80-dən çox işçi çalışır. Müəssisə tam fəaliyyətə başlayandan sonra burada 150-dən yuxarı daimi iş yeri yaradılacaq.

Yığıncaqda çıxış edənlər çalışdıqları sahələrin uğurlarından danışmış, mövcud problemlərlə bağlı təkliflərini bildirmişlər.

Toplantıda rayon icra hakimiyyətinin şöbə müdiri Baləli Rzayevə, Dövlət Sosial Müdafiə Fondu Lerik rayon şöbəsinin müdiri Təzəxan Məmiyevə “Dövlət qulluğunda fərqlənməyə görə”, Rvarud kənd tam orta məktəbinin direktoru Zöhrab Salayevə “Tərəqqi” medalı, idmançılara icra hakimiyyətinin mükafatları təqdim edilmişdir.

Yığıncaqda həmçinin ötən tədris ilində ali məktəblərə qəbulda 600-dən yuxarı bal toplayan lerikli məzunlara hədiyyələr verilmiş, 500-dən yuxarı bal toplayan 16 tələbəyə yanvardan etibarən aylıq təqaüdlərin verilməsi haqqında qərar qəbul edilmişdir.

Yığıncaq iştirakçıları adından Azərbaycan Respublikasının Prezidenti İlham Əliyevə müraciət qəbul edilmişdir.

Toplantıda Prezident Administrasiyasının məsul işçisi Vəfadar Bağırov və Milli Məclisin deputatı İqbal Məmmədov iştirak etmişlər.

Əli NƏCƏFXANLI

Xalq qəzeti- 2013.- 13 fevral.- S. 6.