Cəlilabad: sosial-iqtisadi inkişaf sürətlənir

Azərbaycan Respublikasının Prezidenti İlham Əliyev fevralın 12-də Bakı Biznes Mərkəzində “Azərbaycan Respublikası regionlarının 2009-2013-cü illər üçün sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunmuş konfransda qeyd etmişdir ki, “Azərbaycan iqtisadiyyatı dünya miqyasında ən sürətlə inkişaf edən iqtisadiyyatdır. Ölkəmiz bu baxımdan bütün mötəbər beynəlxalq qurumlar tərəfindən yüksək qiymətləndirilir”. Ölkəmizin hər yerində olduğu kimi, 2012-ci il Cəlilabad rayonunda da uğurlu nəticələrlə yadda qalmışdır.

İllik hesabat yığıncağında rayon icra hakimiyyətinin başçısı Əziz Əzizov bildirdi ki, ötən dövrü xüsusilə əlamətləndar edən ən mühüm hadisə Azərbaycan Prezidenti İlham Əliyevin iyulun 31-də Cəlilabada tarixi səfəri olmuşdur. Ölkə rəhbəri rayon ictimaiyyətinin nümayəndələri ilə görüşündə görülən işləri yüksək qiymətləndirmişdir.

Hesabat ilində tərəqqi prosesləri təkcə Cəlilabad və Göytəpə şəhərlərini deyil, kənd yaşayış məntəqələrini də əhatə etmişdir. 1952-ci ildə salınmış mərkəzi istirahət parkı ilk dəfə olaraq əsaslı şəkildə yenidən qurulmuş, parkdakı Veteranlar evi və iaşə obyektləri müasir formaya salınmış, Boyük Vətən müharibəsi iştirakçılarının xatirəsinə ucaldılan kompleks yeniləşdirilmiş, idman meydançası tikilmişdir.

Eyni zamanda Cəlilabad şəhərinin Qurtuluş prospektinə aqlay və mozaik daşlarla 5 kilometr hasar çəkilmiş, səkilərə 12 min kvadratmetr tamet döşənmiş, çoxmərtəbəli yaşayış evlərinin və inzibati binaların fasadları üzlənmiş, dam örtükləri, qapı və pəncərələri təzələnmişdir. Ümumi uzunluğu 10 kilometrdən artıq olan Heydər Əliyev və Qurtuluş prospektlərində, Xatirə və Cəlil Məmmədquluzadə parklarında modern işıqlandırma sistemi quraşdırılmışdır. Cəlilabad şəhərinin küçələrinə 38700 kvadratmetr asfalt vurulmuş və 7800 kvadratmetr çınqıl döşənmişdir.

Şəhərin ən yüksək nöqtəsində inşa edilən Bayraq Meydanı da son dövrün möhtəşəm tikililərindəndir. Bayrağın yerləşdiyi 2 hektarlıq Gənclər parkı tamamilə yenidən qurulmuşdur.

Kəndarası yolların yenidən qurulması istiqamətində rayonun tarixində heç vaxt görünməmiş miqyasda iş gedir. Azərbaycan Prezidentinin 9 mart 2012-ci il tarixli sərəncamına əsasən 24 min əhalisi olan 14 yaşayış məntəqəsini əhatə edən 17 kilometrlik Cəlilabad-Hamarqışlaq-Sadatlı avtomobil yolunun tikintisi üçün 3 milyon, 28 sentyabr 2012-ci il tarixli sərəncama əsasən isə 33 min nəfər əhalinin yaşadığı 21 kəndi birləşdirən 34 kilometrlik Qarazəncir-Qarakazımlı-Bayxanlı avtomobil yolunun tikintisi üçün ilkin olaraq 2 milyon manat vəsait ayrılmışdır. Hazırda birinci yolun çəkilişi başa çatmaq üzrədir, ikinci yolda isə torpaqbərkitmə və çınqıldöşəmə işləri görülür. Eyni zamanda cənab İlham Əliyevin tapşırığına əsasən, 45 kəndi əhatə edən 72 kilometrlik Cəlilabad-Yardımlı yolunun 20 kilometri asfaltlaşdırılmış, 42 yerdə suötürücü borular quraşdırılmışdır. Bu ilin dövlət investisiya proqramında yolun tikintisi üçün 10 milyon manat vəsait ayrılmışdır və tikinti işləri sürətlə davam etdiriləcək.

Hazırda 80 kəndi əhatə edən 96 kilometrlik kəndarası yollar yenidən qurulur. Lakin bu da son deyil. Biz Göytəpə-Komanlı, Cəlilabad-Soltankənd, Təklə-Bayxanlı, Xanəgah-Mikayıllı, Əliqasımlı-Üçtəpə, Şiləvəngə-Adnalı, Göytəpə-Kazımabad, Muğan-Söyüdlü-Maşlıq yollarının da asfaltlaşdırılması üçün əlaqədar təşkilatlar qarşısında məsələ qaldırılmışdır.

Cəlilabad şəhərində su və kanalizasiya sistemlərinin yenidən qurulmasına başlanmışdır. Bu il hərbi hissənin yaşayış binalarının, su-kanalizasiya sisteminin, mərkəzi xəstəxananın, Cəlilabad-Yardımlı və Qarazəncir-Qarakazımlı-Bayxanlı yollarının, 5 məktəbin, Muğan kəndində 2 min tonluq soyuducu kameranın istifadəyə verilməsi, Göytəpə şəhərinin və 6 kəndin qazlaşdırılması nəzərdə tutulmuşdur. Hazırda Cəlilabad şəhərində 120 yerlik müasir tipli uşaq bağçasının tikintisinə başlanılmışdır.

Regionların sosial-iqtisadi inkişafı Dövlət Proqramının icrası nəticəsində keçən il sənayenin inkişafı artan dinamika ilə getmiş, ümumi daxili məhsulun həcmi 2003-cü ilə nisbətən 4,4 dəfə, 2011-ci ilə nisbətən 7,1 faiz artaraq 524,7 milyon manata çatmışdır. İstehsal olunan sənaye məhsullarının həcmi 6,7 milyon manat olmuşdur ki, bu da bütövlükdə 2003-cü ildəkindən 10,6 dəfə çoxdur. Son illərdə fəaliyyətə başlayan müəssisələrin məhsulları hər yerdə rəğbətlə qarşılanır.

Aqrar bölmənin inkişafı nəticəsində kənd təsərrüfatı məhsulları istehsalı 2003-cü illə müqayisədə 2,9 dəfə artmışdır. Ənənəvi sahə olan taxılçılığın inkişafına xüsusi diqqət yetirilmiş, 131,2 min ton məhsul istehsal edilmişdir ki, bu da 2011-ci ildəkindən 16,9 min ton çoxdur. Ümumi məhsulun tərkibində buğdanın xüsusi çəkisi 89 faizdir.

Üzümçülüyün də inkişaf etdirilməsi üçün ardıcıl iş aparılmış, üzüm sahələri 1500 hektara çatdırılmışdır. Dövlət Proqramında nəzərdə tutulan tədbirlərin həyata keçirilməsi nəticəsində ət, süd, yumurta istehsalı da artmışdır. Açılışında Azərbaycan Respublikası Prezidentinin iştirak etdiyi yeni yem fabriki saatda 10 ton quş yemi hazırlamaq gücünə malikdir. 2012-ci ildə hər işçiyə düşən orta aylıq əmək haqqı 273 manata çatmışdır.

Sahibkarların fəaliyyəti üçün əlverişli şərait yaradılmışdır. Ümumi məhsulda qeyri-dövlət sektorunun xüsusi çəkisi artaraq 98 faizə çatmışdır. İl ərzində 1358 nəfər işlə təmin olunmuşdur ki, onun da 173-ü daimi xarakterlidir. Rayon əhalisini elektrik enerjisi və təbii qazla təmin etmək üçün məqsədyönlü tədbirlər həyata keçirilmişdir.

Məktəb tikintisi rayon rəhbərliyi üçün prioritet vəzifə olmuşdur. 2012-ci ildə 360 yerlik Gülməmmədli kənd tam orta və 180 şagird yerlik Cəlilabad şəhər 6 saylı ümumi orta məktəbləri tikilib istifadəyə verilmişdir. Hazırda daha beş məktəbin tikintisi davam etdirilir. 2013-cü ildə dörd kənddə yeni məktəblərin tikintisinə başlanacaq. Eyni zamanda təhsil sahəsinin mövcud çatışmazlıqları da aradan qaldırılmalıdır. Keçən il səhiyyə işçiləri üçün də əlamətdar olmuşdur. Ölkə başçısının rayona səfərindən sonra yeni xəstəxananın tikilməsi barədə göstəriş verməsi və 25 sentyabr 2012-ci il tarixli sərəncamı ilə tikinti üçün 3 milyon manat vəsait ayırması xüsusi fərəh doğurur. Yeni layihə əsasında tikilən xəstəxana regionda ən müasir tibb ocaqlarından biri olacaq.

Tədbirdə qarşıda duran vəzifələrə də diqqət cəlb edildi. İnam ifadə olundu ki, 2013-cü ildə uğurlar daha da möhkəmlənəcək.

Əli NƏCƏFXANLI

Xalq qəzeti.- 2013.- 26 fevral.- S. 9.