Azərbaycanın
vergi sistemi: uğurlar və perspektivlər
Müasir dünya dövlətləri öz maliyyə təhlükəsizliyinin təmin edilməsi məqsədi ilə vergi sistemi yaradırlar. Bu zaman vergi ödəyiciləri -dövlət -iqtisadi harmoniya kimi dərin, həmcinin vacib olan amillər nəzərə alındıqda müxtəlif çətinliklər ortaya çıxır. Bu isə təbii haldır, çünki vergi siyasəti vətəndaşın və eləcə də şirkətlərin əldə etdiyi vəsaitlərin müəyyən hissəsinin ictimai maraqlar naminə dövlət fondlarına ödənilməsi kimi başa düşülür.
Lakin bir həqiqət
danılmazdır ki, dövlət vergilər
tətbiq etməklə büdcə vəsaitləri
formalaşdırır və bu vəsaitlər
vətəndaşların daha təhlükəsiz
mühitdə yaşayıb fəaliyyət göstərməsi,
ölkənin müdafiəsi, sosial problemlərin həlli, xalqın ölkə
hüdudlarından kənarda da maraqlarının
təmin edilməsi kimi bir
çox əhəmiyyətli məsələlər
üçün istifadə edilir.İnkişaf etmiş
ölkələr digərləri ilə müqayisədə
vergilərin tətbiqi və vəsaitlərin
yığılmasında daha az problemlərlə üzləşirlər.Buna
səbəb kimi həmin ölkələrdə
dövlət maliyyəsinin uzun müddətli
inkişafı, iş adamlarının
vergilərin ödənilməsi ilə bağlı dərin ənənələrinin
olmasıdır.
Azərbaycanda
vergi sisteminin formalaşması əsasən ölkəmizin
müstəqillik qazandığı dövrə təsadüf
etsə də, bu sahədə ciddi uğurlara imza
atılmışdır.Ölkənin vergi sistemi respublikada
qeyri-neft sektorunun inkişafını stimullaşdıran əsas
vasitələrdən biri olmaqla yanaşı, eyni zamanda liberal
iqtisadiyyatın fundamental əsaslarının qorunması
baxımdan da əhəmiyyətlidir.Azərbaycan vergi sistemində
aparılan həm struktur, həm institutsional islahatlar bu sahədə
ölkəmizi keçmiş sovet məkanında lider ölkəyə
çevirmişdir.Beynəlxalq təşkilatların qiymətləndirmələrinə
görə, Azərbaycan son illər vergi sistemində tətbiq
edilən elektronlaşma səviyyəsinə görə MDB
ölkələri arasında liderliyini qoruyub saxlayır.
Ölkə
Prezidenti İlham Əliyev son illər Azərbaycanda vergi
sisteminin inkişafını yüksək qiymətləndirərək
qeyd etmişdir ki, respublikamızda bütün proqramlar, layihələr,
irəli sürülmüş təşəbbüslər
güclü əsas üzərində reallaşır. Cənab
Prezident demişdir: “Ölkə iqtisadiyyatı
üçün çox vacib olan sahədə - vergilər
sistemində aparılan islahatlar, tətbiq edilən yeniliklər,
“bir pəncərə" təşəbbüsü,
bütün bunlar müasir Azərbaycanın inkişafına
xidmət göstərir.Vergilər Nazirliyində tətbiq
edilmiş “bir pəncərə” prinsipi indi başqa qurumlarda
da tətbiq olunur.Bu prinsip əslində həm müasir səviyyəni
göstərir, eyni zamanda, Azərbaycanda iqtisadi sahədə
şəffaflığın təmin edilməsi
üçün də çox vacib rol oynayır.Biz indi
“elektron hökumət” qaydalarını tətbiq etməyə
çalışırıq.Vergilər Nazirliyində toplanan təcrübə
çox qiymətlidir.Mən çox şadam ki, bu nazirlik
müasir əsaslarla idarə olunur, müasir menecment tətbiq
edilir, dünya praktikası öyrənilir.Biz elə etməliyik
ki, dünya praktikasını, onun ən qabaqcıl nümunələrini
Azərbaycanda tətbiq edək".
Göründüyü
kimi, ölkəmizdə vergi sisteminin inkişafı, eyni
zamanda iqtisadiyyatın digər sferalarında dayanıqlı
inkişaf templərinin qorunub saxlanması baxımdan müsbət
təsirlərə malikdir. Azərbaycan müstəqilliyinin ilk 20 ilində
öz maliyyə təhlükəsizliyini təmin etmiş və
makroiqtisadi göstəricilərinə görə regionun
favoritinə çevrilmişdir.Gələcəkdə də
mövcud tempi qoruyub saxlamaq və büdcə gəlirlərini
təmin etmək üçün ölkənin müasir,
çevik və şəffaf vergi sisteminə ehtiyacı Azərbaycanın
müstəqilliyini əldə etdiyi ilk illərdə gündəmə
gəldi.Bu məqsədlə ölkə müstəqilliyinin əldə
edildiyi 1991-ci ildən bu günə qədər vergi sisteminin
formalaşdırılması istiqamətində xeyli iş
görülmüşdür.
1991-ci
ilin oktyabr ayında vergi qanunvericiliyinə nəzarət
sisteminin təkmilləşdirilməsi, onun müstəqil fəaliyyətinin
və obyektivliyinin təmin edilməsi məqsədi ilə
respublika Baş Dövlət Vergi Müfəttişliyi
yaradılmışdır.Azərbaycan Respublikası
Prezidentinin 11 fevral 2000-ci il tarixli fərmanı ilə Baş
Dövlət Vergi Müfəttişliyinin bazasında dövlətin
vergi siyasətinin həyata kecirilməsini, dövlət
büdcəsinə vergilərin və digər daxilolmaların
vaxtında və tam yığılmasını təmin edən
və bu sahədə dövlət nəzarətini həyata
keçirən mərkəzi icra hakimiyyətinə tabe olan Azərbaycan
Respublikası Vergilər Nazirliyi yaradıldı.İki il sonra
isə Vergi Məcəlləsi qəbul edildi.Lakin vergi sistemi
daim yenilənməyə ehtiyacı olan orqan olduğu
üçün ötən illər ərzində bu sahədə
bir çox addımlar atılıb.Yeni qanunların qəbul
edilməsi və vergi sisteminin texniki aktivliyinin
artırılmasında əsas məqsəd sabit iqtisadi
artıma nail olmaq, əmtəə və xidmətlərin qiymət
sabitliyinin qorunması, əhalinin yüksək məşğulluğunun
təmini və gəlirlərin yenidən bölgüsündə
sosial ədalətin maksimum səviyyəyə
çatdırılması, o
cümlədən, vətəndaşların sosial müdafiə
sisteminin təkmilləşdirilməsidir.Bütün bu məqsədlərə
eyni zamanda nail olmaq müasir vergi sisteminin əsas problemi
sayılır.Məhz dövlətin əsas funksiyası
balanslaşdırılmış vergi siyasətinin həyata
keçirilməsidir.Vergilər Nazirliyinin fəaliyyətində
irəliyə doğru atılan addımları
aşağıdakı kimi sıralamaq olar:
-Nazirliyin
fəaliyyətinin inkişaf etdirilməsi məqsədi ilə
“2005-2007-ci illərdə Azərbaycan Respublikasında vergi idarəçiliyinin
təkmilləşdirilməsi haqqında Dövlət
Proqramı" təsdiq edildi.Bu proqrama əsasən vergi
hesabatlarının elektron təqdimatına
başlanıldı.2006-cı ildən isə Vergilər
Nazirliyində tətbiq edilən
Avtomatlaşdırılmış Vergi İnformasiya
Sistemi(AVİS) vergi sisteminin tam şəkildə
elektronlaşdırılmasına, operativ informasiya mübadiləsinə,
vergi ödəyicilərinə hərtərəfli elektron xidmət
göstərilməsinə və vergi bəyannamələrinin
qəbulu prosesinin sadələşdirilməsinə təkan
verib. Ümumilikdə isə vergi sistemində elektron
hökumətin tətbiq edilməsi
tendensiyası son illər daha
da inkişaf
etdirilir.2011-ci ilin iyun
ayından etibarən hüquqi şəxs
yaratmadan sahibkarlıq fəaliyyəti həyata
keçirən fiziki şəxslərin
dövlət qeydiyyatı vergi
orqanlarına gəlmədən İnternet
Vergi İdarəsi vasitəsilə on-layn rejimdə reallaşdırılır.
Bu
günədək internet vasitəsi ilə
qeydiyyatdan keçən fiziki
şəxslərin sayı 47 mindən artıqdır.2012-ci ilin avqust ayından isə
Vergilər Nazirliyi ikitərəfli SMS xidməti
istifadəyə verib ki,
artıq vergi ödəyiciləri dövlət
büdcəsinə olan borc,
təqdim etməli olduğu bəyannamə
və ya fəaliyyətinin aktiv, yaxud dondurulmuş
olduğu haqqında məlumatları
asanlıqla əldə edəcəkdir.Qeyd etmək
lazımdır ki, görülən tədbirlər
nəticəsində sahibkarlıq fəaliyyətinə başlama prosedurları sadələşib və
cevik vergi siyasətinin
həyata kecirilməsinə şərait
yaranıb.Həmçinin kargüzarlıq xərclərinin
azalması həm vergi ödəyicilərinə, həm də nazirliyə əlavə
dividentlər gətirib.Eyni zamanda, digər
maraqlı strukturların (DSMF, DGK, banklar və
s.) məlumat əldə etmək
imkanları artıb.Son araşdırmalara görə, ölkə
üzrə orta informasiya açıqlığı
33,5 faiz olsa da, Vergilər Nazirliyində analoji
göstərici 66 faiz olub.Bu isə onu deməyə əsas verir
ki, bu qurum
ölkədə elektron hakimiyyətin
yaradılmasında öz favoritliyini
davam etdirir. Beynəlxalq təşkilatların MDB ölkələrində
dövlət qurumlarının
elektronlaşdırılması ilə bağlı
apardığı tədqiqatlar da göstərir
ki, Azərbaycanın Vergilər Nazirliyi elektron hökumətin
qurulması sahəsində birlik ölkələri
arasında ən yaxşı göstəriciyə malikdir;
-2010-cu
ildə Vergilər Nazirliyi tərəfindən struktur
islahatları həyata kecirilib və Bakı Şəhər
Vergilər Departamenti üzrə 1, 2 və 3 saylı filiallar ləğv
edilərək Vergi borclarının məcburi alınması,
Bəyannamələrin qəbulu və işlənməsi və
Vergi ödəyicilərinə xidmət idarələri
yaradılıb.Həmcinin, 60 rayon vergi şöbələri əvəzində
12 regional bölmə yaradılıb ki, nəticədə
“vahid pəncərə” sistemi tətbiq edilib, inzibati xərclər
azaldılıb, nəzarət sistemi gücləndirilib;
-Dövriyyədən
yayınma hallarının qarşısını almaq məqsədi
ilə nazirlik tərəfindən nəzarət kassa
aparatlarına məsafədən ötürmə
qurğuları quraşdırılır. Bu qurğular nazirliyin vəsaiti hesabına təchiz edilir və dövriyyənin dəqiq və istənilən
anda öyrənilməsinə imkan yaradır. Nəticədə nəzarət
kassa aparatlarına kənar müdaxilələrin
qarşısı alınacaq;
-Ölkəmizdə
qarşılıqlı ödənişlərdə daha
çox nağd puldan istifadə edilməsi vergi ödəyicilərinə
vergidən yayınmaqda münbit şərait yaradır.
Nağdsız hesablaşmaların təşviqi məqsədilə
Vergilər Nazirliyi tərəfindən bütün növ
ticarət və iaşə obyektlərinə məcburi qaydada
post terminallar quraşdırılır.Post terminal vasitəsilə
aparılan əməliyyatların vergiyə cəlb edilməsi
isə daha asan olacaq.Bu hal faktiki dövriyyənin gizlədilməsi
hallarının qarşısının alınmasına da
müsbət təsir göstərəcək.
Vergi
sistemində dəyişikliklərin aparılması ilə
yanaşı, bu sahədə ötən illərdə xeyli
iş görülmüşdür. Bunun üçün
aşağıdakı fəaliyyətlərin vergi sistemində
nəzərə alınması məqsədəuyğun hesab
edilməlidir:
- Nağdlı ödənişlərə
limitlərin müəyyənləşdirilməsi məqsədəuyğundur.
Bir
sıra inkişaf etmiş
ölkələrin uğurla tətbiq etdiyi praktikanı nəzərə alaraq Azərbaycanda da
nağdlı hesablaşmaların
minimumlaşdırılması istiqamətində inzibatı metodlardan istifadə edilməsi mümkündür.Bu
baxımdan, birinci mərhələdə
dəyəri 5000 manatdan artıq olan məhsulların
alqı-satqısının nağd
aparılması qadağan edilməli və
bu zaman yalnız
nağdsız ödənişlərdən istifadəyə
icazə verilməlidir. Sonrakı mərhələlərdə
bu göstəricini pilləli olaraq 1000 manatadək azaldılması məqsədəuyğundur;
-
Nağdsız hesablaşmaların
stimullaşdırılması məqsədilə müəyyən
dövr üçün bonus sistemlərin tətbiqi məqsədəuyğundur.
Bu zaman plastik kartlardan
yararlanaraq, alqı-satqı edənlərin
ödədiyi vəsaitin bir qismi (məsələn, 3 faizi)
sonradan həmin şəxsin hesabına
qaytarıla bilər.Bu sistem ötən əsrin
90-cı illərində qardaş
Türkiyədə çox uğurla tətbiq edilmişdir
və bu, vətəndaşları
nağdsız hesablaşmalardan
istifadəyə təşviq edir. Bununla da eyni
zamanda, vətəndaşlarda plastik kartlardan istifadə ənənəsi
formalaşır ki, bu
da uzunmüddətli dövr
üçün nağdsız hesablaşmalardan istifadə üçün
zəmin yaradır.
-
Elektron ticarətin inkişafı üçün bu sahənin
ƏDV-dən azad edilməsi məqsədəuyğundur. Bu, elektron ticarətin inkişafına yardım göstərməklə
yanaşı, e-ticarətin daha da leqalaşdırılmasına səbəb ola bilər. Uyğun təcrübə
hazırda ABŞ-da tətbiq edilir;
-Son illər ölkə
iqtisadiyyatının leqallaşdırılması istiqamətində
aparılan islahatlara dəstək olaraq vergi dərəcələrinə
yenidən baxılması məqsədəuyğundur. Bu məqsədlə
fərqli sektorlara ƏDV-nin tətbiqi dərəcələri
azaldılmalı və bir çox Avropa ölkələrində
olduğu kimi, dəyişən dərəcələr metodu tətbiq
edilməlidir;
-Vergilər
Nazirliyi yanında vergi siyasətinin çevikliyi və
optimallığının təmin edilməsi və iqtisadi
sektorların daimi öyrənilməsi məqsədilə
xüsusi səlahiyyətli qurum formalaşdırılması
və quruma xüsusi mütəxəssislər cəlb edilməsi
məqsədəuyğundur;
-Əhalinin
əmək mühitinin yaxşılaşdırılması və
işverənlə işçi arasında əmək
müqavilələrinin bağlanması, vətəndaşın
qanuni işlə təmin edilməsi məqsədilə əmək
haqqından tutulan birinci növ
gəlir vergisi dərəcəsinə yenidən
baxılması, sosial sığorta fonduna işverən tərəfindən
ödənən məbləğlə bağlı bir
sıra sektorlarda, xüsusən də tədqiqat və
innovasiya sahələrində güzəştlərin tətbiqi
məqsədəuyğundur;
-
Vergi Məcəlləsi üzrə risk təhlilinin
aparılması məqsədəuyğun hesab edilməlidir.
Müstəqil və tanınmış xarici şirkət tərəfindən
həyata keçirilməsi tövsiyə olunan bu təhlil məcəllənin
dayanıqlı inkişaf üçün hansı imkanlar
yaratdığını müəyyənləşdirə
bilər;
-
İnvestisiya vergi sisteminin tətbiqinin gücləndirilməsi
vacib məsələlərdən hesab edilir. Bu sistemin tətbiqi
həmin güzəştdən istifadə etmək hüququ
olacaq müəssisələrin sərəncamında əlavə
vəsaitlərin qalmasına və təbii ki, onların
inkişafını stimullaşdırmağa xidmət edəcək.
Müasir
bazar münasibətləri şəraitində vergi siyasəti
dövlətin iqtisadiyyata müdaxiləetmə imkanı
sayılır və bu siyasət iqtisadi artımın təmin
edilməsi, işsizliyin azaldılması, potensial imkanlardan
maksimum yararlanma, dövlətin maliyyə
dayanıqlığının təmin edilməsi və qlobal
iqtisadiyyata inteqrasiya imkanlarının genişləndirilməsinə
xidmət edir.Bu baxımdan sözügedən istiqamətdə
uğurlar əldə edən Azərbaycanın vergi sistemi
qeyri-neft sektorunun inkişafına gələcəkdə də
töhfəsini verəcək.
Vüqar BAYRAMOV,
İqtisadi və Sosial
İnkişaf Mərkəzinin sədri
Xalq qəzeti.- 2013.- 4 iyun.- S. 5.