Paskal MÖNYE: Fransa Dağlıq Qarabağ münaqişəsinin sülh yolu ilə həlli yollarını axtarmaqda maraqlıdır

Fransa ATƏT-in Minsk qrupunun həmsədri kimi Dağlıq Qarabağ münaqişəsinin sülh yolu ilə həlli yollarını axtarmaqda maraqlıdır. Trend-in məlumatına görə, bu barədə Beynəlxalq Bakı Gələcək Forumunda jurnalistlərə Fransanın Azərbaycandakı səfiri Paskal Mönye bildirmişdir.

Səfirin sözlərinə görə, Fransa Azərbaycanla xarici işlər nazirləri səviyyəsində ikitərəfli əlaqələr və Dağlıq Qarabağ məsələsini müzakirə edir: “Biz düşünürük ki, tərəflər arasında mövcud olan narazılıqların aradan qaldırılmasının vaxtı çatıb. Düşünürəm ki, bəzi “beyin mərkəzləri” regionun gələcəyi üçün nə etmək lazım olduğu barədə fikirləşirlər.

Hər iki ölkənin öz parlaq gələcəyi barədə düşünməsi vacibdir. Və buna görə də bu cür tədbirlərdə qəbul olunacaq və Azərbaycanla Ermənistan hökumətlərinə və eyni zamanda, ATƏT-in Minsk qrupuna təqdim olunan bu cür hesabatlar münaqişənin həlli üçün müsbət olacaq”.

Xalq qəzeti.- 2013.- 5 iyun.- S. 5.