Füzuli: ulu öndərə
sonsuz məhəbbətlə
Xalqımızın böyük oğlu, ulu öndər Heydər Əliyevin anadan olmasının 90 illiyi cəbhə bölgəsində yerləşən Füzuli rayonunda da zəngin və rəngarəng yubiley təntənələri ilə keçirilir.
“Böyük ömrün anları” adlı musiqili kompozisiya, futbol və şahmat yarışları, kitab sərgisi, gül bayramı, rəsm müsabiqələri, “Heydər Əliyev müstəqilliyinin banisidir adlı elmi-praktik konfrans, “Yeni Azərbaycan Partiyası üçüncü minilliyin partiyasıdır” mövzusunda dəyirmi masa, Heydər Əliyev mərkəzinə ekskursiyalar və s. belə tədbirlərdəndir. Ulu öndərin anadan olmasının 90 illiyi, rayonda həm də bir sıra ictimai və sosial obyektlərin açılışı ilə yadda qalmışdır.
Bu
günlərdə keçirilən tədbirlərin birində
- “Sahibkarlığın inkişaf etdirilməsi iqtisadiyyatın
güclənməsinə etibarlı təminatdır” adlı
görüşdə biz də iştirak etdik. Bu, əlbəttə, təsadüfü deyildi. Məsələ burasındadır ki, son illər Füzuli rayonunda azad sahibkarlığın, bazar
münasibətlərinin inkişafı sahəsində bir sıra əsaslı tədbirlər həyata
keçirilmiş, konkret
addımlar atılmışdır. Təkcə belə bir faktı göstərək ki,
hazırda rayonda 200-dən artıq
sahibkarlıq obyekti fəaliyyət
göstərir ki, bunun
da 130-u son 2 ildə
yaradılmışdır. Bu gün rayonda
istehsal olunan kənd təsərrüfatı
və sənaye məhsulları istehsalı yüz
faiz özəl bölmənin payına düşür. Əldə edilmiş
inkişaf və yüksəlişin əsasını
isə heç şübhəsiz ki, ümumilli lider Heydər Əliyev qoymuşdur.
İdarə,
müəssisə və təşkilat rəhbərlərinin,
fermer, sahibkar və iş adamlarının iştirakı ilə
keçirilən görüşü Füzuli Rayon İcra
Hakimiyyətinin başçısı Alı Alıyev
açdı. O, qeyd etdi ki, görüş
keçirdiyimiz Horadiz
şəhəri, eləcə də 21 kənd məhz ulu öndər Heydər Əliyevin biz füzulililərə böyük hədiyyəsidir.
Belə ki, 1994-cü ilin yanvar ayında ümummilli liderin tarixi çağırışından sonra Azərbaycan ordusunun güclü əks-hücumu sayəsində Horadiz düşmən caynağından azad edildi. Əgər biz bu gün
öz ata-baba yurdumuzda yaşayırıqsa, əkiriksə-becəririksə,
quruculuq, tikinti,
abadlıq işləri ilə məşğuluqsa bunun üçün, hər
şeydən əvvəl, ulu öndərimizin
müqəddəs ruhuna, parlaq
şəxsiyyətinə borcluyuq.
Düzdür, ərazimizin 70 faizi hələ də düşmən tapdağı altındadır. Bununla belə, 70 minə yaxın füzulili öz ata-baba yurd yerlərində yaşayır. Daha maraqlı cəhət isə odur ki, hazırda rayonda ümumi məhsul istehsalı işğaldan əvvəlki illərə nisbətən xeyli çoxdur. Məsələn, ötən il fermerlərimiz taxıl sahələrindən 103 min tona yaxın məhsul götürmüşlər. Bu, rayon tarixində ən yüksək göstəricidir. Burada, əlbəttə, müxtəlif səbəblər var və mən onlardan yalnız birinin üzərində dayanacağam. Bu da vaxtında və qətiyyətlə aparılan özəlləşdirmə tədbirləri, azad sahibkarlığa yaradılan münbit şərait, bu sahəyə göstərilən gündəlik diqqət və qayğıdır.
Başçı
daha sonra bildirdi ki, Füzuli rayonunda sahibkarlığın,
iş adamlarının sərbət fəaliyyəti
üçün heç bir maneə yoxdur. Kim gücü, imkanı
daxilində harada nə almaq,
yaratmaq istəyirsə heç
bir maneə olmadan fəaliyyət
göstərə bilər. Təki həvəs və səy, doğma elə-obaya məhəbbət və
ürək yanğısı ola. Son 2 ildə bu istiqamətdə yaradılmış onlarla müxtəlif təyinatlı özəl
müəssisə uğurla işləyir, bolluğa kömək edir.
Bütün
bu inkişaf və yüksəlişin möhkəm təməlini
isə ulu öndər Heydər Əliyev
yaratmışdır. Böyük enerji və qətiyyət
sahibi olan bu dahi şəxsiyyət formalaşdırdığı
və həyata keçirdiyi strateji xətlə,
apardığı ardıcıl islahatlarla ölkəmizi
dinamik inkişaf yoluna çıxarmışdır.
Ulu
öndər Heydər Əliyev tərəfindən əsası
qoyulmuş inkişaf strategiyası bu gün Prezident İlham Əliyev
tərəfindən böyük uğurla davam etdirilməkdədir.
Ölkə rəhbərinin qarşıya qoyduğu mühüm vəzifələr,
o cümlədən özəl bölmənin,
azad
sahibkarlığın daha sürətli
inkişafı ilə əlaqədar
verdiyi tapşırıq və
tövsiyələr Füzuli rayonunda da böyük diqqət, səy və
ardıcıllıqla həyata keçirilir.
Azad sahibkarlığın
inkişafına göstərilən həssas münasibət,
bu sahədə yaradılmış münbit və əlverişli şərait, əsassız
yoxlamaların, süni maneələrin aradan qaldırılması öz
bəhrəsini verir. Bunu
sahibkarların, iş adamlarının,
fermerlərin əldə etdiyi konkret nəticələr bir
daha sübut edir.
Görüşdə
“Qarabağ Brolyer” MMC-nin rəhbəri Nəriman Əliyev, kənd
təsərrüfatı məhsulları soyuducu
anbarının müdiri Aydın Hüseynov, “Şəhriyar”
ailəvi istirahət mərkəzinin direktoru Şəhriyar Əliyev
və başqaları çıxış etdilər. Onlar ölkəmizdə yeni
iqtisadi sistemin
formalaşmasında və inkişafında ümummilli
lider Heydər Əliyevin misilsiz
rolundan, yorulmaz fəaliyyətindən
danışdılar. Belə bir ümumi fikir ifadə olundu ki, bu
gün ulu öndərin
müəyyən etdiyi strateji
xətt ölkə rəhbəri İlham
Əliyev tərəfindən böyük
uğurla davam etdirilir. Prezidentin azad sahibkarlığın, bazar iqtisadiyyatının sürətli
inkişafına yönəldilmiş ardıcıl və qətiyyətli
fəaliyyəti, bu sahədə göstərdiyi
gündəlik diqqət və qayğı,
imzaladığı fərman və sərəncamların
önəmi xüsusi qeyd
olundu.
Görüş
iştirakçıları ulu öndər Heydər Əliyevin
ötən əsrin 70-80-ci illərində, o cümlədən
respublika Prezidenti İlham Əliyevin son illərdə
Füzuli rayonuna tarixi səfərlərini xatırladılar,
dahi rəhbərə sonsuz hörmət və
ehtiramlarını bildirdilər.
Ziyəddin SULTANOV
Xalq qəzeti.- 2013.- 11 may.- S. 10.