Ölkədə turizmin inkişafı yeni perspektivlər vəd edir

Azərbaycanın füsünkar təbiəti, zəngin tarixi və mədəniyyət abidələri turizmin inkişafı üçün güclu stimul yaradır. Son illər bu istiqamətdə həyata keçirilən davamlı tədbirlər bu sahənin tərəqqisində əhəmiyyətli rol oynamışdır. Ölkə başçısının daim diqqət mərkəzində olan turizm sahəsində qəbul olunmuş dövlət proqramları və Prezident sərəncamları bir daha təsdiq edir ki, yaxın gələcəkdə Azərbaycan inkişaf etmiş turizm ölkəsinə çevriləcəkdir. Heç təsadüfi deyil ki, 2011-ci ili cənab Prezident ölkədə “Turizm ili” elan etmişdi.

Ötən ilin yekunları da bir daha təsdiq edir ki, həqiqətən, Azərbaycanda turizm yüksələn xətlə inkişaf etməkdədir. Azərbaycan Respublikasında 2010-2014-cü illərdə turizmin inkişafına dair Dövlət Proqramının qəbul edilməsi turizmin inkişafına güclü təkan verdi. Bu vaxta kimi proqramın icrası çərçivəsində regionlarda turizmin müxtəlif növlərini inkişaf etdirmək, turizm xidməti obyektlərinə yerli turizm şirkətlərinin səfərlərini mütəmadi şəkildə təşkil etmək, eyni zamanda, daxili turizm bazarının fəallığını artırmaq məqsədilə müvafiq layihələr həyata keçirilmişdir.

Dövlət Proqramının icrasını təmin etmək məqsədilə ölkəmizin bütün bölgələri üzrə “Kulinariya turu” mədəni turizm marşrutlarının yaradılması planlaşdırılmışdır. İlkin mərhələdə Qubada rayon mədəniyyət və turizm şöbəsi, Milli Kulinariya Mərkəzi və “Vitory Tour” turizm şirkətinin təşkilatçılığı ilə “Kulinariya turu” adlı mədəni turizm marşrutu üzrə infotur keçirilmiş və marşrut pasportlaşdırılmışdır.

Bununla yanaşı, nazirliyin dəstəyi ilə İsmayıllı Rayon Mədəniyyət və Turizm Şöbəsi, Lahıc İnformasiya Mərkəzi, AMEA-nın Folklor İnstitutu, “Millennium Turizm Kongress” turizm şirkəti tərəfindən “Qırx otaq Əfsanələri” və “Fit dağı əfsanələri” adlı mədəni və ekoturizm marşrutları üzrə turizm şirkətlərinin və KİV nümayəndələrinin iştirakı ilə infotur keçirilmiş və marşrut pasportlaşdırılmışdır.

İlkin olaraq qeyd etməliyik ki, ötən il xarici ölkələrlə turizm əlaqələri qurulması istiqamətində aparılan işlərin miqyası xeyli genişlənmişdir. İkitərəfli və çoxtərəfli əməkdaşlıq bu sahədə öz müsbət nəticələrini verməkdədir. Çoxtərəfli əməkdaşlıq münasibətlərinin qurulması və inkişaf etdirilməsinin turizm siyasətinin prioritet istiqamətlərindən biri olduğunu nəzərə alaraq Mədəniyyət və Turizm Nazirliyi Ümumdünya Turizm Təşkilatı (BMÜTT), Avropa Şurası, İslam Konfransı Təşkilatı (İKT), Müstəqil Dövlətlər Birliyi (MDB), Demokratiya və İqtisadi İnkişaf Naminə - GUAM, Qara Dəniz İqtisadi Əməkdaşlıq Təşkilatı (QDİƏT), İqtisadi Əməkdaşlıq Təşkilatı (İƏT) və s. beynəlxalq təşkilatlarla turizm sahəsində əməkdaşlığın təşkil edilməsi, mövcud proqramlara qoşulma, beynəlxalq tədbirlərdə fəal iştirakın təmin edilməsi, həmçinin yeni təklif və layihələrin hazırlanması, əməkdaşlığa dair sənədlərin imzalanması istiqamətində səmərəli və mühüm fəaliyyətini davam etdirmişdir.

Azərbaycanın turizm imkanlarının xarici ölkələrdə təbliğ edilməsi məqsədilə Mədəniyyət və Turizm Nazirliyi tərəfindən müxtəlif vaxtlarda İtaliyanın “Classis Assoiation”, “Italian Multimedia Group Sri” şirkətlərinin, Cənubi Koreyanın “Educational Broadasting System” dövlət televiziya kanalının, Almaniyanın media nümayəndələrinin, Rusiyanın “Kommersant FM” radiosunun və Yaponiyanın “Turistlərin cəlb olunmasına dair GUAM-ın vahid turizm məhsulu” layihəsi çərçivəsində bu ölkənin kütləvi informasiya vasitələri nümayəndələrinin ölkəmizə press-turları təşkil edilmişdir. Bakı şəhərində Azərbaycan Respublikası Mədəniyyət və Turizm Nazirliyi, Ümumdünya Turizm Təşkilatı (BMÜTT) və Azərbaycan Turizm Assosiasiyasının birgə təşkilatçılığı ilə “İpək Yolunun tamı: kulinariya, mədəniyyət və turizm” adlı beynəlxalq konfrans keçirilmişdir. Konfransda bir neçə ölkənin nümayəndələri iştirak etmişlər.

Mədəni turizm marşrutlarının sertifikatlaşdırılması ilə əlaqədar ilkin işlər görülmüşdür. Belə ki, Avropa Mədəni Turist Marşrutları İnstitutu tərəfindən müəyyənləşdirilmiş kriteriyalara əsasən Aleksandr Düma mədəni turist marşrutunun sertifikatlaşdırılması işinə başlanılmışdır.

Ötən il Azərbaycan nümayəndə heyəti bir sıra beynəlxalq turizm sərgisində iştirak etmiş, həmin sərgilərdə Azərbaycanın turizm potensialını əks etdirən eksponatlar nümayiş olunmuşdur. Madrid şəhərində “FİTUR”, ABŞ-ın Los-Anceles şəhərində “Los Anceles Times Travel Show 2012”, Türkiyənin İstanbul şəhərində “EMİTT 2012”, İtaliyanın Milan şəhərində “BİT 2012”, Litvanın Vilnüs şəhərində “VİVATTUR 2012”, Yaponiyanın Tokio şəhərində “CATA 2012”, Almaniyanın Berlin şəhərində “İTB-2012” və s. kimi beynəlxalq turizm sərgilərində Azərbaycan Respublikası Mədəniyyət və Turizm Nazirliyi iştirak etmiş və bu sərgilər Azərbaycanın turizm potensialının təbliğində əhəmiyyətli rol oynamışdır.

Bakı şəhərində Azərbaycan Respublikası Mədəniyyət və Turizm Nazirliyinin rəsmi dəstəyi ilə “AITF-2012” beynəlxalq turizm və səyahətlər sərgisi keçirilmişdir. Sərgiyə həmçinin Ümumdünya Turizm Təşkilatı, Azərbaycanda İxracın və İnvestisiyaların Təşviqi Fondu (AZPROMO), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası və Beynəlxalq Turizm Sərgiləri Assosiasiyası tərəfindən dəstək verilmişdir. Sərginin tərəfdaşları qismində ”AZAL" şirkəti (rəsmi hava daşıyıısı), “Hilton Baku” , “Qafqaz Point” otelləri (rəsmi mehmanxanalar) və “Greenwih Travel lub” şirkəti (rəsmi tur-operator) çıxış etmişlər. “SW Travel” (Azərbaycan) şirkəti ardıcıl olaraq ikinci ildir ki, “AITF” sərgisinin sponsoru olmuşdur.

“Eurosport” kanalı ilə nazirlik arasında ölkəmizin təbliği ilə bağlı müqavilə imzalanmışdır. “BMİ Voyager”, “Business Year” jurnallarında və “MİTT” sərgisinin rəsmi kataloqunda Azərbaycanın turizm potensialına dair reklam səhifələri yerləşdirilmişdir.

“Euronews” telekanalı ilə əməkdaşlıq çərçivəsində “V Qəbələ musiqi festivalı”, “Caz festivalı”, “Üzeyir Hacıbəyli adına Beynəlxalq musiqi festivalı” və “VI Beynəlxalq Rostropoviç adına musiqi festivalı” həmin telekanalın “Le Mag” verilişində işıqlandırılmışdır.

Ümumdünya Turizm Təşkilatının proqnozlarına görə, 13 dekabr 2012-ci il tarixinin simvolik olaraq dünya üzrə milyardıncı turistin beynəlxalq səyahət tarixi kimi qeyd olunduğunu nəzərə alaraq, “Azərbaycan Hava Yolları”nın Bakı-London reysində uçan hər bir sərnişinə simvolik olaraq Azərbaycan Respublikası Mədəniyyət və Turizm Nazirliyi tərəfindən müvafiq sertifikat təqdim edilmişdir. Bununla da, Ümumdünya Turizm Təşkilatına üzv olan hər bir ölkə kimi Azərbaycan da “Milyardını Turist” aksiyasına qoşulmuşdur.

Azərbaycanda bu il də turizm sektorunun sürətlə inkişaf etdirilməsi nəzərdə tutulur. Prezident İlham Əliyev Nazirlər Kabinetinin 2013-cü ilin birinci rübünün yekunlarına həsr olunmuş müşavirrədəki çıxışında demişdir: “Eyni zamanda, mən son illər ərzində Azərbaycanda turizmin sürətlə inkişafını qeyd etmək istəyirəm. Xüsusilə birinci rübdə bu sahədə çox əlamətdar hadisə baş vermişdir - “Şahdağ” Xizək Mərkəzi fəaliyyətə başlamışdır. Bu da hesab edirəm ki, əlamətdar hadisədir. Çünki heç bir dövrdə Azərbaycanda dağ-xizək mərkəzi olmamışdır. Qonşu ölkələrdə olmuşdur. Ancaq Azərbaycanda olmamışdır. Hesab edirəm ki, bu layihənin icra edilməsi artıq öz səmərəsini göstərir. Dövlət əsas texniki və maliyyə yükünü öz üzərinə götürmüşdür. Bu da təbiidir. Bu da özəl sektora, regionun inkişafına verdiyimiz töhfədir”.

Aprel ayının əvvəlində Bakıda “AİTF 2013” XII Azərbaycan Beynəlxalq Turizm və Səyahətlər sərgisi keçirildi. Bu il ”AİTF-2013" sərgisində 35 ölkədən 60-dan çox istiqaməti təmsil edən 251 şirkət iştirak edirdi. Sərgidə bir çox ölkənin milli stendlərinin fəal iştirakı artıq ənənəyə çevrilmişdir. Builki sərgidə rekord sayda - 20 stend öz milli ekspozisiyası ilə iştirak etmişdir. Onların arasında sərginin daimi iştirakçıları olan Türkiyə, Rusiya, Gürcüstan, Bolqarıstan, Kipr, Çexiya, Birləşmiş Ərəb Əmirlikləri, Sloveniya və Misirin milli qrupları vardır. Fransa, Macarıstan, İndoneziya, İran, Monteneqro, Mərakeş, Ukraynanın Krım Muxtar Respublikası, Tayiland və Tunisin milli qrupları isə bu il ilk dəfə sərgiyə qatılmışlar. Mədəniyyət və Turizm Nazirliyi bu il 20-yə yaxın beynəlxalq turizm sərgisində iştirak etməyi planlaşdırmışdır.

Yeni mehmanxanalar inşa edilir, əvvəlkilərdən bəziləri təmir olunaraq yenidən istifadəyə verilir, turistlərin rahat istirahəti üçün gözəl şərait yaradılır. Əgər inkişaf bu templə davam etsə yaxın gələcəkdə Azərbaycana turistlərin axını daha da sürətlənəcəkdir.

M.MÜKƏRRƏMOĞLU

Xalq qəzeti.- 2013.- 21 may.- S. 7.