İsmayıllı: Sevinc sizə yaraşır

Heydər Əliyev adına Mərkəzi Meydanda Novruz bayramı münasibətilə geniş tədbir keçirildi. Öncə rayon rəhbərliyi və ictimaiyyət nümayəndələri şirniyyat nümunələrindən ibarət sərgiyə baxdılar.

Novruz bayramı həm də el adət-ənənələrini nümayiş etdirmək üçün əla bir fürsət olub. İsmayıllı rayonu xalqımıza məxsus milli xüsusiyyətləri ilə zəngin bir ərazidir. Nümayiş olunan xalçaçılıq və toxuculuq nümunələri bir daha təsdiq edir ki, rayonda qədim xalq sənətinin ənənələri olub və indi də qorunur.

Sakinləri bayram münasibətilə təbrik edən rayon icra hakimiyyətinin başçısı Mirdaməd Sadıqov yüzillərdən bəri yol gələn Novruzun tarixin bütün dönəmlərində özünəməxsusluğunu qoruyub saxladığını diqqətə çatdırdı. Bildirildi ki,bu gün Novruz bayramı Azərbaycanda dövlət səviyyəsində qeyd olunur. Eyni zamanda, 2010-cu ildən Novruz bayramı dünyanın bir neçə xalqının qeyri-maddi irsi kimi UNESCO-nun siyahısına daxil edilib.

Meydanda qurulan tonqala od vurulmaqla bayram şənliklərinə start verildi. Bahar qızın gəlişi bayram şənliyinə xüsusi rəng qatdı. Daha sonra Novruzun baş qəhrəmanları - Keçəl və Kosanın gəlişi başqa bir əhval-ruhiyə yaratdı. Meydanda öz məharətlərini göstərən gənc idmançılar bura toplaşanların marağına səbəb oldu.

Eyni zamanda, rayonda fəaliyyət göstərən folklor ansamblları müxtəlif rəqslər ifa etdilər. Min illərin sınağından çıxan, öz ilıq addımlarıyla yurdumuza qədəm qoyan bu bayram şənliyində səslənən mahnılar, rəqs nümunələri insanları bir daha birliyə, xeyirxahlığa səslədi. Bayram təntənəsi geniş konsert proqramı ilə davam etdirildi. Bir-birindən maraqlı mahnı və rəqslər tamaşaçıların alqışları ilə qarşılandı.

İ.MUSAOĞLU

Xalq qəzeti.- 2014.- 20 mart.- S. 5.