Ulu öndərin ad gününə həsr olunmuş elmi-praktik konfrans

Dünən AMEA Fəlsəfə və Hüquq İnstitutunda ulu öndər Heydər Əliyevin anadan olmasının 91-ci ildönümünə həsr edilmiş növbəti ümumrespublika elmi-praktik konfransı keçirildi. Konfrans iştirakçıları əvvəlcə Azərbaycan xalqının ümummilli liderinin dövlətçilik fəaliyyətinin tədqiqinə dair institutda nəşr edilmiş elmi-tədqiqat əsərlərinin sərgisi ilə tanış oldular.

Sonra ulu öndərin xatirəsi bir dəqiqəlik sükutla yad edildi, onun siyasi fəaliyyətinin bir sıra məqamlarını əsk etdirən filmin nümayişi keçirildi.

Konfransı giriş sözü ilə açan Fəlsəfə və Hüquq İnstitutunun direktoru, professor İlham Məmmədzadə görkəmli dövlət xadiminin Azərbaycanın ictimai-siyasi həyatındakı xidmətlərindən danışdı və onun irsinin öyrənilməsinin həm ölkədə, həm də beynəlxalq aləmdə xüsusi əhəmiyyət kəsb etdiyini vurğuladı. Professor qeyd etdi ki, ümummilli lider hər zaman Azərbaycan elminə xüsusi diqqət və qayğı ilə yanaşmışdır. AMEA və konkret olaraq bizim institut da onun qayğısından bəhrələnmişdir. Ümummilli lider Heydər Əliyev bu gün cismən aramızda olmasa da, onun müəyyənləşdirdiyi müqəddəs yol daim müdrik xalqımızın yeganə ümid və istinadgah mənbəyi olaraq qalacaqdır. Hazırda yalnız onunla təsəlli tapırıq ki, bu uğur magistralında bizə ulu öndərin layiqli siyasi davamçısı - Azərbaycan Prezidenti cənab İlham Əliyev kimi vətənpərvər, qətiyyətli, peşəkar, yeni dünya siyasətinin incəliklərinə dərindən bələd olan, islahatçı və çevik, praqmatik lider rəhbərlik edir.

Tədbirdə çıxış edən AMEA Humanitar və İctimai Elmlər Bölməsinin akademik katibi, AMEA-nın müxbir üzvü Teymur Kərimli ulu öndər Heydər Əliyevin keçdiyi həyat yolununun hər zaman cəmiyyətimiz üçün real örnək olduğunu qeyd edərək, Azərbaycan xalqının bu şəxsiyyətlə daim qürur duyacağını xüsusi vurğuladı.

Tədbir iştirakçıları ulu öndərin Azərbaycanın hüquqi dövlət kimi formalaşmasında, ölkənin ilk Konstitusiyasının və digər qanunların qəbulunda əsaslı islahatların keçirilməsində misilsiz xidmətlərindən söz açdılar. Onlar Fəlsəfə və Hüquq İnstitutunda “Heydər Əliyev məktəbi”nin fəaliyyətini yüksək qiymətləndirdilər. Qeyd olundu ki, ulu öndərin irsini tədqiq edən mərkəzdə fundamental araşdırmalar, geniş elmi təhlillər, tədqiqat işləri aparılır, onun irsinin ictimaiyyət tərəfindən mənimsənilməsi məktəbin fəaliyyətinin əsasını təşkil edir.

Konfransda institutun sosial fəlsəfə şöbəsinin müdiri, fəlsəfə elmləri doktoru Azər Mustafayev, “Heydər Əliyev məktəbi”nin məsul katibi Sənan Həsənov, institutun aparıcı elmi işçisi, hüquq elmləri doktoru Əli Rzayev və digərləri məruzələrlə çıxış etdilər. Onlar ulu öndərin siyasi fəaliyyətinin mühüm məqamlarına toxunaraq qeyd etdilər ki, XX əsr Azərbaycan tarixinin ən yaddaqalan siması olan Heydər Əliyevin qeyri-adi irsi olduqca zəngin və əhatəlidir. İllər geçdikcə artıq bəşəri sərvətə çevrilən bu irsin əhəmiyyətini daha çox dərk edir, sehrinə daha çox düşür, Vətəni necə sevmək, xalqa necə xidmət etmək nümunəsi olan şəxsi həyatını və fəaliyyətini örnək kimi qəbul edirsən.

Anar TURAN

Xalq qəzeti.- 2014.- 11 may.- S. 15.