Ordubad rayonunda yeni obyektlər istifadəyə verilmişdir

Yuxarı Əylis kəndində yeni məscid binası istifadəyə verilmişdir

Dini-mənəvi dəyərlər hər bir xalqın varlığını təcəssüm etdirir. Azərbaycan Respublikasının Prezidenti cənab İlham Əliyevin dini dəyərlərin qorunması, inkişaf etdirilərək gələcək nəsillərə çatdırılması istiqamətində həyata keçirdiyi tədbirlər bu baxımdan mühüm əhəmiyyət kəsb edir. Bu gün ölkəmizdə mənəvi irsə diqqət və qayğı ilə yanaşılır, dini abidələr bərpa edilir, yeni məscid binaları tikilir.

Mayın 14-də Ordubad rayonunun Yuxarı Əylis kəndində yeni məscid binası istifadəyə verilmişdir.

Naxçıvan Muxtar Respublikası Ali Məclisinin sədri Vasif Talıbov Yuxarı Əylis kənd məscidinin istifadəyə verilməsi münasibətilə sakinləri təbrik edərək demişdir: – Ölkəmizdə islami dəyərlərə yüksək qiymət verilir, müqəddəs yerlər, dini ziyarətgahlar və məscidlər yenidən qurulur, bərpa olunaraq insanların istifadəsinə verilir. Bütün bunlar ölkəmizdə islami dəyərləri yaşatmaqla yanaşı, həm də bu dəyərlərin gələcək nəsillərə ötürülməsi baxımından mühüm əhəmiyyət daşıyır.

Ali Məclisin sədri demişdir: “Azərbaycanda dini-mənəvi dəyərlərin qorunub saxlanılması istiqamətində ardıcıl tədbirlər görülür. Çünki bu dəyərlər uzun illər ərzində formalaşmış, insanlar tərəfindən yaşadılaraq bu günə çatdırılmışdır. Ölkəmizdə bu sahəni tənzimləyən qanunlar və digər normativ hüquqi aktlar hər bir şəxsin inanclarına hörmətlə yanaşılmasına, insanların dini etiqad azadlığının təmin olunmasına imkan verir. Dini etiqad azadlığının təmin olunması sahəsində görülən tədbirlərin nəticəsidir ki, bu gün Azərbaycan dünyada tolerant ölkə kimi tanınır.

Ümummilli lider Heydər Əliyevin “Məscidlər İslam aləmində islamı təmsil edən müqəddəs yerlərdir”, – fikrini xatırladan Ali Məclisin sədri demişdir: – Məscidlər inanclarımızın və mənəvi dəyərlərimizin yaşadıldığı yerlərdir. Müsəlmanların müqəddəs kitabı Qurani-Kərim və məscidlər İslam aləmini birləşdirən simvollardır. Bu gün istifadəyə verilən Yuxarı Əylis kənd məscidi də mənəvi dəyərlərimizin yaşadılması istiqamətində görülən tədbirlərin tərkib hissəsidir. Ona görə bu məsciddə də dini və mənəvi dəyərlərimizin yaşadılmasına xüsusi diqqət yetirilməlidir”.

Ali Məclisin sədri yeni məscidin istifadəyə verilməsi münasibətilə kənd sakinlərini və dindarları bir daha təbrik etmişdir.

Kənd sakini Tofiq Hüseynov demişdir ki, bu gün Yuxarı Əylis kəndində əhalinin sosial problemləri həll olunmuş, kənd mərkəzi, həkim ambulatoriyası, müasir məktəb binası istifadəyə verilmiş, insanların məşğulluğu təmin edilmişdir. Artıq hər bir sakin dövlətimizin yaratdığı şəraitdən layiqincə bəhrələnir. Bu da yaxşı yaşayış və yüksək əhval-ruhiyyə deməkdir. Məscid binası da Yuxarı Əylis kəndində aparılan quruculuq işlərinin davamı, islami dəyərlərə verilən qiymətin daha bir ifadəsidir.

Sonra Ali Məclisin sədri açılışı bildirən lenti kəsmiş, məsciddə yaradılan şəraitlə tanış olmuşdur.

Məlumat verilmişdir ki, ümumi sahəsi 250 kvadratmetr olan 1 minarəli məsciddə ibadət yeri, axund və yardımçı otaqlar vardır. Binada eyni vaxtda 200 nəfərin ibadət etməsi mümkündür. Minarənin hündürlüyü 21 metrdir. Binada müasir işıqlandırma sistemi quraşdırılmış, qadınlar üçün ayrıca ibadət yeri ayrılmış, mehrab qoyulmuşdur. İki girişi olan məscid binasının günbəzi naxış və ornamentlərlə bəzədilmişdir.

Ali Məclisin sədri İslam dininin müqəddəs kitabı Qurani-Kərimi və kitabın təfsirini məscidə hədiyyə etmişdir.

Sonra kənd sakinləri və dindarlarla görüşən Ali Məclisin sədri demişdir ki, dini-mənəvi dəyərlərin qorunub saxlanılması vacib şərtdir. Muxtar respublikada 207 məscid vardır. Onların 167-si müstəqillik dövründə tikilmiş və ya əsaslı təmir olunmuşdur. Bu da insanların saf niyyətlər ətrafında birləşməsinə, dini-mənəvi dəyərlərimizin olduğu kimi yaşadılmasına xidmət edir.

Kənd ağsaqqalları və dindarlar Yuxarı Əylis kəndində yaradılan şəraitə, yeni məscid binasının istifadəyə verilməsinə görə minnətdarlıqlarını bildirmişlər.

Ali Məclisin sədri kənd ağsaqqalları və dindarlarla xatirə şəkli çəkdirmişdir.

Məscidin həyətində dəstəmaz yeri yaradılmış, yaşıllaşdırma işləri aparılmış və müasir işıqlandırma sistemləri quraşdırılmışdır. Həmçinin məscidə gedən yol genişləndirilərək 1 kilometr məsafəyə asfalt örtük salınmışdır.

Ordubad şəhərində quruculuq işləri davam etdirilir

Qədim tarixə, memarlıq abidələrinə və tikililərinə malik olan Ordubad şəhəri bu gün həm də müasir görkəmi və inkişafı ilə diqqəti cəlb edir. Aparılan quruculuq işləri şəhərin görkəmini tamamilə dəyişmişdir. Artıq tarixilik və müasirliyin vəhdəti qədim Ordubadın müasir inkişaf göstəricisinə çevrilmişdir.

Bu istiqamətdə görülən tədbirlərin davamı olaraq cari ildə Ordubad şəhərindən keçən Dübəndi çayında sahilbərkitmə işləri aparılmış, ətraf ərazilər abadlaşdırılmışdır.

Mayın 14-də Naxçıvan Muxtar Respublikası Ali Məclisinin sədri Vasif Talıbov Ordubad şəhərinə gəlmiş, aparılan abadlıq işləri ilə maraqlanmışdır.

Bildirilmişdir ki, çay yatağında istiqamətləndirici beton bəndlər salınmış, istinad divarları tikilmiş, suyun sürətini azaldan beton konstruksiyalar inşa edilmişdir. Həyata keçirilən tədbirlər sürüşmə təhlükəsinin aradan qaldırılmasına və insanların rahatlığının təmin olunmasına imkan verəcəkdir.

Ali Məclisin sədri ərazidə yaşıllaşdırma işlərinin aparılması, Ordubad şəhərində tikinti və abadlıq işlərinin bundan sonra da davam etdirilməsi barədə tapşırıqlar vermişdir.

Akademik Yusif Məmmədəliyevin Ev Muzeyində yenidənqurma işləri aparılmışdır

Muxtar respublikada görkəmli tarixi şəxsiyyətlərin, ədəbiyyat, incəsənət və elm xadimlərinin ev muzeylərinin yardılması və bərpası istiqamətində ardıcıl tədbirlər görülür. Ötən ildən başlayaraq, görkəmli akademik Yusif Məmmədəliyevin Ordubad şəhərindəki ev muzeyində yenidənqurma işləri aparılmışdır.

Mayın 14-də Naxçıvan Muxtar Respublikası Ali Məclisinin sədri Vasif Talıbov muzeyin yenidənqurma işlərindən sonrakı vəziyyəti ilə tanış olmuşdur.

Məlumat verilmişdir ki, muzeyin sahəsi 190 kvadratmetrdir. 2 mərtəbədən ibarət olan binanın birinci mərtəbəsində fond və iş otaqları, ikinci mərtəbəsində isə ekspozisiya zalı yerləşir. Burada akademikin həyat və fəaliyyətinin müxtəlif dövrlərinə aid sənədlər, çap olunmuş əsərləri, fotoşəkillər, habelə xatirə şəkillərindən ibarət 2000-nə yaxın eksponat saxlanılır. Bu eksponatlardan 250-si ekspozisiyada nümayiş olunur.

Yenidənqurma işləri zamanı iş otaqlarında müasir şərait yaradılmış, ekspozisiya zalının döşəməsi yenilənmiş, qazanxana quraşdırılmışdır. Həmçinin muzeyə gedən yol yenidən qurulmuş, binanın həyətində təmir işləri aparılmış, gülkarlıqlar salınmışdır.

Ali Məclisin sədri Yusif Məmmədəliyevin Ev Muzeyinin ümummilli lider Heydər Əliyevin qayğı və himayəsi ilə 1975-ci ildə yaradıldığını, 2005-ci ildə Yusif Məmmədəliyevin 100 illik yubileyinin UNESKO səviyyəsində qeyd olunduğunu bildirmiş, muzeydə görkəmli alimin elmi irsinin hərtərəfli öyrədilməsi barədə tapşırıqlar vermişdir.

Xalq qəzeti.- 2014.- 16 may.- S. 10.