Milli dövlətçilik ənənələrinə sədaqətlə

28 May Respublika Günüdür

Xətai

Xətai Rayon İcra Hakimiyyəti Azərbaycan Xalq Cümhuriyyətinin yaranmasının 96-cı ildönümü münasibətilə toplantı keçirdi.Yeni Azərbaycan Partiyası Xətai rayon təşkilatında keçirilən toplantıda icra hakimiyyəti başçısının müavini Jalə Abdiyeva geniş məruzə ilə çıxış edərək dedi:

– Azərbaycan tarixinin şanlı səhifələrindən olan, xalqımızın milli azadlıq mücadiləsinin məntiqi nəticəsi sayılan və müasir dövlətçilik tariximizdə önəmli yer tutan Azərbaycan Xalq Cümhuriyyəti XX əsrin Şərqi üçün milli dövlətçilik ənənələri baxımından perspektiv inkişafın əsasına çevrildi. Məhz Xalq Cümhuriyyəti özünün dövlətçilik əsasları və demokratik islahatları ilə müsəlman Şərqinin mayakı rolun oynamağı bacardı. 23 ay fəaliyyət göstərməsinə baxmayaraq, Azərbaycan Xalq Cümhuriyyəti böyük bir coğrafi regionun siyasi həyatında mühüm rol oynadı, Cümhuriyyətin fəaliyyəti sayəsində dövlətçilik tariximizin əsasları daha da zənginləşdi.

XX əsrin sonunda yenidən müstəqillik əldə edən Azərbaycan dövləti ulu öndər Heydər Əliyevin zəngin siyasi təfəkkürü, idarəçilik təcrübəsi və rasional fəaliyyəti sayəsində Azərbaycan Xalq Cümhuriyyətinin taleyini yaşamaqdan, yəni qısa zamanda müstəqilliyini itirməkdən qurtuldu. Umummilli lider Heydər Əliyev həmin dövrdə ciddi təhdid və təhlükələr qarşısında olan müstəqilliyimizi qorudu və müasir, güclü, nüfuzlu dövlət kimi çıxış edən və böyük bir regionda lider ölkəyə çevrilən Azərbaycanın təməlini qoydu.

Natiq çıxışında qeyd etdi ki, bu gün istər Azərbaycan Xalq Cümhuriyyəti yaradıcılarının, istərsə də ulu öndər Heydər Əliyevin müstəqil dövlətçilik məsələləri ilə bağlı arzuları Prezident İlham Əliyev tərəfindən uğurla gerçəkləşdirilir. Ölkə iqtidarının xalqın dəstəyinə arxalanması, hər bir məsələdə milli maraqları önə çəkməsi sayəsində Azərbaycanın daxili və xarici siyasəti dövlətin maraq və təhlükəsizliyinə qarşı yönələn istənilən təhdidə çevik müqaviməti təmin edir.

Bu gün tam qətiyyətlə deyə bilərik ki, Azərbaycan regionun lideri kimi müstəqil siyasət yeridir.

Azərbaycan Prezidenti İlham Əliyev Azərbaycan Xalq Cümhuriyyətinin 90 illik yubileyi ilə bağlı keçirilən təntənəli mərasimdə bunu belə ifadə etmişdir: “Ölkələr var ki, müəyyən səbəblərə görə müstəqil siyasət aparmaq iqtidarında deyildir, haradasa imkanları yoxdur, haradasa tədbirlər görülməyibdir. Azərbaycan bu baxımdan ayaq üstə çox möhkəm dayanan ölkədir. Bizim vəzifəmiz, borcumuz, bütün Azərbaycan xalqının borcu ondan ibarətdir ki, bu müsbət meyilləri daha da möhkəmləndirək”.

Məruzə ətrafında çıxış edən digər natiqlər də tariximizin parlaq səhifəsi haqqında müxtəlif məqamları yada saldılar və xüsusi qeyd etdilər ki, bu gün dünyada gedən mürəkkəb, ziddiyyətli proseslərə baxmayaraq, Xalq Cümhuriyyətinin əsasını qoyduğu dövlətçilik ənənələrini müstəqil Azərbaycan özündə yaşatmaqla yanaşı, onları müasir dəyərlərlə zənginləşdirərək uğurla inkişaf etdirir.

Səbail

Respublika Günü münasibətilə Səbail Rayon İcra Hakimiyyəti və rayonun sıx əlaqədə olduğu Daxili İşlər Nazirliyinin Daxili Qoşunları “N” saylı hərbi hissədə gənclərin, əsgər və zabitlərin, ictimaiyyət nümayəndələrinin görüşünü keçirmişdir. Qonaqlar torpaqlarımız uğrunda döyüşlərdə həlak olmuş Daxili Qoşunların şəhidlərinin şərəfinə ucaldılmış abidə önünə çiçək dəstələri düzmüş, hərbi hissənin əsgər yataqxanasına və xidmət otaqlarına baxmışlar. Xüsusi təyinatlı dəstə bir sıra əməliyyat səhnələrini nümayiş etdirmişdir.

Hərbi hissənin sıra meydanında keçirilən təntənəli toplantıda çıxış edən Səbail Rayon İcra Hakimiyyətinin başçısı Asif Əsgərov iştirakçıları Respublika Günü münasibətilə təbrik etmiş, ümummilli lider Heydər Əliyevin dövlət müstəqilliyimizin bərpasında və qorunmasında, ordu quruculuğunda tarixi xidmətlərindən danışmış, Prezident, Silahlı Qüvvələrin Ali Baş Komandanı İlham Əliyev ərazilərimizin işğaldan azad edilməsi, Milli Ordunun möhkəmlənməsi ilə bağlı gördüyü işlər barədə məlumat vermişdir. Başçı belə görüşlərin gənclərin hərbi-vətənpərvərlik tərbiyəsində mühüm rol oynadığını, Səbail rayonu ilə DİN Daxili Qoşunlar arasındakı dostluq əlaqələrinin getdikcə daha da möhkəmləndiyini vurğulamışdır.

Bakı Şəhəri üzrə Təhsil İdarəsi rəisinin müavini Hüseyn Əsgərov hərbi hissənin şəxsi heyətinə Vətənə xidmətdə uğurlar arzulamışdır.

Daxili Qoşunların komandanının I müavini - qərargah rəisi, general-mayor Şirin Xəlilov da tədbir iştirakçılarını əlamətdar bayram münasibəti ilə təbrik etmiş, Azərbaycan Ordusunun ölkənin etibarlı müdafiəçisi olduğunu, ərazi bütövlüyümüzü bərpa etmək üçün hər an döyüşə hazır dayandığını söyləmiş, gənclərin Vətən sevgisinin müqəddəsliyini qeyd etmişdir.

Xidmətdə fərqlənən əsgər və zabitlərin bir qrupu Səbail Rayon İcra Hakimiyyətinin qiymətli hədiyyələri ilə mükafatlandırılmışldır. Rəsmi hissədən sonra qonaqlar və hərbi hisənin şəxsi heyəti birgə nahar etmişlər.

Görüş populyar incəsənət xadimlərinin iştirakı ilə konsert proqramı ilə davam etmişdir.

Binəqədi

Binəqədi Rayon İcra Hakimiyyətində 28 May Respublika Günü münasibətilə tədbir keçirilmişdir.

Mərasimdə çıxış edən icra hakimiyyəti başçısının birinci müavini İlqar Süleymanov müsəlman Şərqində ilk demokratik respublika olan Azərbaycan Xalq Cümhuriyyətinin tarixi haqqında məlumat vermişdir. SSRİ-nin dağılmasından sonra AXC-nin legitim varisi kimi Azərbaycan Respublikasının yenidən öz müstəqilliyinə qovuşduğunu deyən natiq müstəqilliyin ilk dövrləri üçün mövcud olan təhdidlər, o cümlədən Ermənistanın Azərbaycana qarşı təcavüzündən bəhs etmiş, Azərbaycanın bu çətinliklərdən uğurla keçdiyini və demokratik inkişaf yoluna qədəm qoyduğunu vurğulamışdır.

İyirmi üç illik müstəqillik dövründə Azərbaycanda ümumi daxili məhsulun həcminin bir neçə dəfə artdığını, ölkəmizin orta gəlirli və potensial sərmayəçi dövlətə çevrildiyini qeyd edən natiq Azərbaycanın qarşıya inkişaf etmiş dövlət statusunu əldə etmək kimi strateji məqsəd qoyduğunu bildirmişdir.

Milli Məclisin deputatı Musa Qasımlı çıxışında bildirmişdir ki, xalqımızın milli oyanış və dirçəlişinin məntiqi nəticəsi kimi meydana çıxan Azərbaycan Xalq Cümhuriyyəti milli dövlətçilik ənənələrimizin əsasını qoymuş, gələcək müstəqilliyimiz üçün möhkəm zəmin yaratmışdır. Natiq həmçinin XX əsrin sonunda xalqımızın yenidən öz müstəqilliyinə qovuşduğunu vurğulamış, dövlətçiliyimizin müqəddəratı təhlükə ilə üzləşdiyi bir vaxtda xalqın təkidi ilə ümummilli lider Heydər Əliyevin yenidən hakimiyyətə qayıtdığını, məhz ulu öndərin iradəsi və siyasi uzaqgörənliyi sayəsində Azərbaycanın öz müstəqilliyini qoruyub saxladığını, dünya dövlətləri arasında layiqli yer tutduğunu qeyd etmişdir. Bildirmişdir ki, müstəqil Azərbaycan Respublikası hazırda Prezident İlham Əliyevin rəhbərliyi ilə öz yeni inkişaf dövrünü yaşayır.

Milli Məclisin deputatı Rafael Cəbrayılov, RİH başçısının müavinləri, rayonun hüquq-mühafizə orqanları və icra strukturlarının rəhbərləri, həmçinin ictimaiyyətin nümayəndələrinin iştirak etdikləri mərasimin sonunda müğənni Azərinin ifasında vətənpərvərlik ruhunda mahnılar səslənmişdir.

Nəsimi

Nəsimi rayonunda 28 May Respublika Günü ilə bağlı silsilə tədbirlər keçirilmişdir. Mayın 27-də Nəsimi Rayon İcra Hakimiyyətinin akt zalında təşkil edilən “dəyirmi masa”nı giriş sözü ilə açan Nəsimi Rayon İcra Hakimiyyətinin başçısı Nəsib Məhəməliyev mayın 28-də Azərbaycan Xalq Cümhuriyyətinin yaradılmasının 96 illiyinin tamam olduğunu, bu tarixi günün Azərbaycan xalqının həyatına böyük və əlamətdar hadisə kimi daxil olduğunu vurğulamış, bununla bağlı keçirilən tədbirlərdə cümhuriyyət dövrünə bir daha nəzər salındığını, onun tariximizdəki yeri və rolunun ətraflı təhlil edildiyini bildirmişdir.

Milli dövlətçiliyin qorunması və möhkəmləndirilməsinin təkcə tarixi şans və milli iradə nümayişi ilə deyil, həm də lider amili ilə şərtləndiyini deyən icra hakimiyyətinin başçısı demişdir ki, 1993-cü ilin iyununda - kifayət qədər mürəkkəb bir dövrdə xalqın təkidi ilə hakimiyyətə qayıdan ulu öndər Heydər Əliyev Xalq Cümhuriyyətinin ənənələrini əsas tutaraq, müstəqil Azərbaycan dövlətini yaratdı. Müstəqillik və suverenliyin qorunması, dövlətçiliyin möhkəmləndirilməsi üçün qətiyyətli tədbirlər görüldü, davamlı ictimai-siyasi sabitlik bərpa edildi.

Hazırda Prezident İlham Əliyevin rəhbərliyi altında bugünkü Azərbaycanın daxili və xarici siyasətinin xalqımızın maraqlarına, milli mənafelərimizin təmin olunmasına, ölkəmizin beynəlxalq aləmdəki nüfuzunun daha da artmasına, rəsmi Bakının dünya siyasətində söz sahibinə çevrilməsinə xidmət etdiyini bildirən Nəsib Məhəməliyev bütün sahələrdə qazanılmış nailiyyətlərin qürur doğurduğunu diqqətə çatdırmışdır.

Tədbirdə icra hakimiyyəti başçısının müavini Gülarə Verdiyeva ulu öndər Heydər Əliyevin möhkəm təməl üzərində əsasını qoyduğu siyasəti bütün sahələrdə uğurla davam etdirən Azərbaycan Prezidenti İlham Əliyevin rəhbərliyi altında ölkənin son illərdəki sürətli inkişafını şərtləndirən əsas amillərdən olan sabitliyin yaradıldığını qeyd etmiş və bildirmişdir ki, Azərbaycan xalqı əmindir ki, növbəti illərdə də Prezident İlham Əliyevin rəhbərliyi altında dövlətimiz iqtisadi, siyasi və sosial həyatın bütün sahələrində yeni uğurlara imza atacaqdır.

Digər çıxış edənlər də müstəqil Azərbaycanda bütün sahələrdə əldə edilmiş uğurlardan söhbət açmış, yeni nailiyyətlər üçün möhkəm təməlin yarandığını qeyd etmişlər.

Respublika Gününə həsr olunmuş daha bir tədbir Nəsimi rayonu 42 saylı orta məktəbdə təşkil edilmişdir. Tədbirdə əvvəlcə məktəblilərin ifasında maraqlı kompozisiyalar təqdim edilmiş, tarixi şəxsiyyətlərin obrazı canlandırılmış, vətənpərvərlik mövzusunda ifalar səsləndirilmişdir. Daha sonra tədbirin rəsmi hissəsi olmuşdur. Tədbirdə Nəsimi Rayon İcra Hakimiyyəti başçısının müavini Gülarə Verdiyeva, 42 saylı orta məktəbin direktoru Firəngiz Həmidova və başqaları respublikamızın müstəqilliyi ilə bağlı maraqlı çıxışlar etmişlər.

Ağsu

Ağsu rayon Mədəniyyət sarayında 28 May - Respublika günü ilə əlaqədar rayon ictimaiyyətinin iştirakı ilə yığıncaq keçirildi.

Yığıncaqda Dövlət himni səsləndikdən sonra, rayon icra hakimiyyətinin başçısı Ənvər Seyidəliyev tədbiri açaraq bildirdi ki, Azərbaycan Xalq Cümhuriyyətinin qurulmasının 96-cı ildönümü - Respublika günü xalqımızın dövlətçilik tarixində mühüm yer tutur, onun parlaq və şərəfli səhifəsini təşkil edir.

İcra başçısı qeyd etdi ki, 1918-ci il mayın 28-də Şərqdə ilk demokratik müsəlman respublikası olan Azərbaycan Demokratik Respublikası yaradıldı. Həmin gün Tiflis şəhərində canişin sarayında Həsən bəy Ağayevin sədrliyi ilə Zaqafqaziya Seymində təmsil olunan 44 nümayəndədən 26 nəfərin toplantısında Milli Şuranın 24 səslə qəbul etdiyi qərar və 6 bənddən ibarət “İstiqlal Bəyannaməsi” Azərbaycan Xalq Cümhuriyyətinin yaradıldığını bütün dünyaya bəyan etdi.

1918-ci il mayın 30-da Azərbaycan öz müstəqilliyini elan etməsi haqqında dünyanın əsas siyasi mərkəzlərinə radio-teleqrafla məlumat verdi.

Azərbaycan Parlamentinin dekabrın 7-də keçirilmiş təntənəli açılış iclasında Fətəli xan Xoyski hakimiyyəti Parlamentə təhvil verdi. Parlament qarşısında duran mühüm vəzifələrdən biri yeni hökuməti təşkil etmək idi. Hökumətin təşkili Fətəli xan Xoyskiyə tapşırıldı. Dekabrın 26-da hökumətin tərkibi elan edildi.

Lakin 1920-ci il aprelin 27-28-də Sovet Rusiyası beynəlxalq hüquq normalarını kobudcasına pozaraq, müharibə elan etmədən öz silahlı qüvvələrini Azərbaycana yeritdi, suveren Azərbaycan Respublikasının ərazisini işğal etdi. Bolşeviklər qanuni seçilmiş hakimiyyət orqanlarını zorakılıqla devirdilər və xalqımızın çox böyük qurbanlar bahasına qazandığı 23 aylıq müstəqilliyinə son qoydular.

Azərbaycan Xalq Cümhuriyyətinin yaradılmasına ümummilli lider Heydər Əliyev böyük önəm vermişdir. Hər ilin bu günü bayram kimi respublikanın hər yerində yüksək əhval-ruhiyyə ilə qeyd olunur. Heydər Əliyev kursunun layiqli davamçısı Azərbaycan Respublikasının Prezidenti İlham Əliyev də Respublika Gününün azərbaycanlıların ən əziz bayramlarından biri olduğunu qeyd edərək demişdir: “Mənim üçün şəxsən Azərbaycanımızın ən böyük bayramı 28 Maydır, Azərbaycanın ilk demokratik respublikasının yaranması günüdür. Bu, doğrudan da, böyük bayramdır”.

Yığıncaqda “Şərqdə ilk demokratik respublika - Azərbaycan Xalq Cümhuriyyəti” mövzusunda məruzə dinlənilmişdir.

Tədbir 28 May Respublika günü ilə əlaqədar rayon Mədəniyyət şöbəsinin bədii özfəaliyyət kollektivinin iştirakı ilə konsert proqramı ilə davam etdirildi.

Yığıncaqda rayonun idarə, müəssisə və təşkilat rəhbərləri, ərazi dairələri üzrə icra nümayyəndələri, bələdiyyə sədrləri və rayon ziyalıları iştirak etmişdir.

Balakən

Ölkənin hər yerində olduğu kimi, Balakəndə də Respublika günü təntənə ilə qeyd olundu. Səhər tezdən - mayın 27-də rayon icra hakimiyyətinin işçiləri, hüquq-mühafizə orqanlarının rəhbərləri, rayonun digər idarə və müəssisələrinin işçiləri, eləcə də ictimaiyyət nümayəndələri ulu öndərin mədəniyyət və istirahət parkında yerləşən möhtəşəm abidəsi önünə tər gül-çiçək dəstələri qoymaqla ümummilli liderə özlərinin sonsuz məhəbbətlərini bildirdilər.

Sonra bayram tədbiri rayon mədəniyyət mərkəzində davam etdirildi.

Tədbirdə rayon icra hakimiyyətinin başçısı İslam Rzayev məruzə ilə çıxış etdi. Tədbir iştirakçılarını, bütün balakənliləri xalqımızın milli bayramı - Respublika Günü münasibətilə təbrik edən rayon icra hakimiyyətinin başçısı çıxışına davam edərək göstərdi ki, 28 May günü Azərbaycan xalqı üçün əziz gündür. “İstiqlal Bəyannaməsi” ilə həyata vəsiqə alan Azərbaycan Xalq Cümhuriyyəti xalqımızın qədim dövlətçilik ənənələrini bərpa etdi. Ümummilli liderimiz Heydər Əliyev bu barədə deyirdi: “Xalqımızın tarixində ilk dəfə demokratik prinsiplər əsasında müstəqil Azərbaycan dövlətinin və hökumətinin əsası qoyuldu. Ölkənin iqtisadi və siyasi inkişafında, mədəniyyət, maarif və xalq təhsili, habelə bir çox sosial problemlərin həllində prinsipial əhəmiyyətə malik tədbirlər həyata keçirildi. Cəmi 23 ay yaşamış Azərbaycan Xalq Cümhuriyyəti xalqımızın tarixində ən parlaq səhifələrdən biri kimi həmişə qalacaqdır”.

Həmin dövrdə əsası qoyulan prinsipləri ulu öndərdən sonra möhtərəm Prezident İlham Əliyev uğurla davam etdirir. Ulu öndər Heydər Əliyevin layiqli davamçısı İlham Əliyev tərəfindən onun siyasi kursu bütün istiqamətlərdə layiqincə inkişaf etdirilir. İndi hər birimizin borcu ümummilli liderimiz Heydər Əliyevin şah əsəri olan müstəqil Azərbaycanı göz bəbəyi kimi qorumaq və inkişaf etdirməkdir.

Tədbir ulu öndər Heydər Əliyevin müstəqil Azərbaycan Respublikasının quruculuğu sayəsində göstərdiyi səylərdən bəhs edən “Tarixin yaddaşı” filminin izlənməsi və Nüsrət Kəsəmənlinin “Yaddan çıxmaz Qarabağ” əsərinin motivləri əsasında hazırlanmış tamaşadan bir hissəyə baxışla başa çatdı.

Zaqatala

Zaqatala rayonunda 28 May Respublika Günü ilə əlaqədar tədbir keçirilmişdir.

Tədbir iştirakçıları Heydər parkında ümummilli lderimiz Heydər Əliyevin abidə kompleksini ziyarət etmiş, önünə tər çiçəklər düzmüş, xatirəsini ehtiramla yad etmişlər.

Sonra Heydər Əliyev Mərkəzində Azərbaycan Xalq Cümhuriyyətinin yaranmasının 96-cı ildönümünə həsr olunmuş konfrans keçirilmişdir. İlk öncə respublika gününə həsr olunmuş film nümayiş etdirilimiş, daha sonra konfransda “Şərəfli istiqlal yolunun başlanğıcı” mövzusunda rayon icra hakimiyyətinin başçısı Mübariz Əhmədzadənin məruzəsi dinlənilmişdir. Rayon rəhbəri çıxışında Xalq Cümhuriyyətinin yarandığı tarixi dövrə bir daha nəzər salmış, müstəqil Azərbaycan Respublikasının məhz onun varisi olduğunu xüsusi vurğulamışdır. O, Şərqdə ilk demokratik dövlətin yaranmasının xalqımızın milli azadlığa, müstəqilliyə və demokratiyaya olan istək və arzularının məntiqi nəticəsi olduğunu bildirmişdir. Cəmi 23 ay yaşamış bu Cümhuriyyətin xalqımızın tarixində böyük iz qoyan tədbirlər həyata keçirdiyini, Azərbaycanın gələcək müstəqilliyi üçün möhkəm zəmin yaratdığını diqqətə çatdırmışdır.

Natiq XX əsrin sonunda yenidən öz müstəqilliyini əldə edən Azərbaycan dövlətçiliyinin bilavasitə ümummilli liderimiz Heydər Əliyevin tarixi xidmətləri sayəsində qorunub saxlanıldığını və bu gün ulu öndərimizin layiqli davamçısı Azərbaycan Respublikasının Prezidenti İlham Əliyevin rəhbərliyi ilə yeni inkişaf mərhələsinə qədəm qoyduğunu xüsusi qeyd etmişdir.

Tədbirin sonunda şagirdlərin ifasında kompozisiya dinlənilmişdir.

İlqar RÜSTƏMOV,

Tahir RÜSTƏMOV,

Vaqif BAYRAMOV,

Leyla QURBANOVA,

İlqar HƏSƏNOV,

Rafiq SALMANOV (foto)

Xalq qəzeti.- 2014.- 28 may.- S.12.