Füzuli: inkişaf sürətli və davamlıdır

Füzuli Rayon İcra Hakimiyəti Aparatının 2014-cü ilin 9 ayında rayonun sosial-iqtisadi inkişafı barədə hesabatında əksini tapmış sevindirici uğurlar, fakt və rəqəmlər bir daha təsdiq edir ki, bölgənin hərtərəfli inkişafı sürətli və davamlıdır. Prezident İlham Əliyevin sədrliyi ilə Nazirlər Kabinetinin bugünlərdə keçirilmiş iclasından irəli gələn vəzifələrin və rayonun sosial- iqtisadi inkişaf göstəricilərinin müzakirəsinə həsr olunmuş müşavirədə əminiklə bildirildi ki, füzulililər ilin sonuncu rübünü də nailiyyətlərlə başa vurmaq üçün bütün sahələrdə səylərini artıracaqlar.

Hesabat məruzəsi ilə çıxış edən Füzuli Rayon İcra Hakimiyyətinin başçısı Alı Alıyev bildirdi ki, 2014-cü ilin 9 ayının rayonumuz üçün ən əlamətdar hadisəsi möhtərəm Prezidentimiz İlham Əliyevin bu il avqustun 28-də rayona səfəri olmuşdur. Son bir il 8 ayda ölkə başçısının Füzuliyə 2 dəfə gəlməsi cənab İlham Əliyevin füzulililərə böyük inamı, füzulililərin isə Prezidentə böyük məhəbbətini ifadə edir.

Prezident İlham Əliyevin bilavasitə himayəsi ilə son illərdə Füzulidə həyata keçirilmiş geniş quruculuq işləri və ölkə rəhbərinin son səfəri barədə ətraflı məlumat verən rayon rəhbəri qeyd etdi ki, cənab İlham Əliyev Horadiz şəhərində yaradılan əzəmətli Bayraq meydanının, Heydər Əliyev Fondunun təşəbbüsü ilə inşa olunan 2 nömrəli körpələr evi-uşaq bağçasının, işğal zamanı dağıdılmış 227 evin və çoxmənzilli 3 binanın, Əhmədalılar - Mollaməhərrəmli - Arayatlı - Babı kəndlərarası avtomobil yolunun və Tarix-Diyarşünaslıq Muzeyinin açılışlarında iştirak etdi. Ölkə rəhbəri Horadiz şəhərində Füzuli Rayon İcra Hakimiyyətinin yeni binasında yaradılan şəraitlə və Mil – Muğan hidroqovşağının fəaliyyəti ilə də tanış olub.

Məruzəçi daha sonra məlumat verdi ki, Prezident İlham Əliyevin təsdiq etdiyi “Azərbaycan Respublikası Regionlarının 2014-2018-ci illərdə sosial-iqtisadi inkişafı Dövlət Proqramı”nda növbəti 5 ildə Füzuli rayonunda cins heyvandarlıq, taxılçılıq, üzümçülük, tərəvəzçilik, meyvəçilik, toxumçuluq, tingçilik sahələrinin inkişafı, iri taxılçılıq təsərrüfatlarının yaradılması, kənd təsərrüfatı istehsalının inkişafına xidmət edən infrastrukturun maddi-texniki bazasının möhkəmləndirilməsi, yaşayış məntəqələrində modul tipli su təmizləyici qurğuların quraşdırılması, kəndarası yolların tikintisi, yenidən qurulması və abadlıq-quruculuq işlərinin davam etdirilməsi kimi silsilə tədbirlər nəzərdə tutulmuşdur. Bu layihələrin artıq bir çoxu uğurla yerinə yetirilir.

Ayrı-ayrı sahələrdə qazanılan uğurları şərh edən natiq bildirdi ki, bu il 30 min hektardan 90 min tona yaxın taxıl əldə edilmişdir. Hər hektarın məhsuldarlığı 30 sentnerə yaxın olmuşdur: “Biz yaxın gələcəkdə taxılçılığı özümüz yetişdirdiyimiz elit növ toxum hesabına inkişaf etdirəcək və builki nəticəni 160-200 min ton səviyyəsinə yüksəldəcəyik.

Hazırda rayonda 31622 baş qaramal, 115490 baş qoyun-quzu, 407190 min baş ev quşları vardır. Cari ilin 9 ayı ərzində 3489 ton ət, 13473 ton süd, 5840 milyon ədəd yumurta, 152 ton yun istehsal edilmişdir. Bunlar isə öz növbəsində əvvəlki ilin müvafiq dövrü ilə müqayisədə xeyli çoxdur. Başqa kənd təsərrüfatı məhsulları istehsalında da nəticələrimizin yüksək olacağı proqnozlaşdırılır.

Son 3 ildə Əhmədbəyli kəndi ərazisində 5 min ton kənd təsərrüfatı məhsulları saxlayan soyuducu anbar kompleksi, ildə 2,5 – 3 min ton quş əti istehsal edən “Qarabağ-Broyler” MMC fəaliyyətə başlamış, müasir üslubda “Qarabağ” Ailəvi İstirahət Mərkəzi, bir neçə şadlıq evi tikilərək istifadəyə verilmişdir.

İş adamları rayonun Haramı adlanan hissəsində 5000 baş ətlik və südlük istiqamətində heyvandarlıq kompleksi və sutkada ilk növbədə 10 ton süd qəbul edəcək zavodun tikintisini sürətlə davam etdirirlər. Üçüncü Zobucuq qəsəbəsində isə gündə 40 ton çörək- un məmulatları istehsal edən zavodun istifadəyə verilməsinə az qalmışdır. Yaşayış məntəqələrində 20 ədəd artezian quyusu qazılmasına yaxın günlərdə başlanacaq. İndiyədək 29 yaşayış məntəqəsinə təbii qaz verilib, ilin sonunadək 39 yaşayış məntəqəsinin hamısında əhali qazdan istifadə edəcək. Yaxın vaxtlarda Qayıdış qəsəbələrinin yolları bərpa olunacaq, rayonda yolla bağlı problem olmayacaq.

Heydər Əliyev Fondunun dəstəyi ilə Horadiz şəhərində 100 yerlik, Bala Bəhmənli kəndində 60 yerlik uşaq bağçaları tikilmişdir. Böyük Bəhmənli kənd xəstəxanası üçün 15 çarpayılıq yardımçı binalar tikilməkdədir. Qəzalı vəziyyətdə olan ictimai binalarda, yol kənarlarında, yataqlarda məskunlaşmış 721 ailə üçün yeni qəsəbə salınmasına yaxın günlərdə başlanacaq.

Məruzə ətrafında çıxışlarda müxtəlif sahələrdə qazanılan uğurlardan, qarşıda duran vəzifələrdən ətraflı söhbət açıldı. Bildirildi ki, əhalinin həyat şəraitini daha da yaxşılaşdırmaq, respublikanın müxtəlif şəhər və rayonlarında yaşayan məcburi köçkünlərlə əlaqə saxlamaq, onların qayğı və müraciətlərini həll etmək, dövlət proqramlarının, Prezidentin fərman və sərəncamlarının yerinə yetirilməsini təmin etməklə, bundan sonra da qarşıda dayanan vəzifələrə layiqincə əməl ediləcək.

Ziyəddin SULTANOV

Xalq qəzeti.- 2014.- 17 oktyabr.- S.9.