Neftçala: İli uğurla sona çatdırmaq

üçün etibarlı zəmin yaradılıb

Ölkə miqyasında gedən davamlı inkişaf prosesində Neftçalanın da öz rolu var. Son illərdə bu rayon daha da inkişaf edib, gözəlləşib. Cari ildə rayonun sosial-iqtisadi inkişaf göstəriciləri bunu söyləməyə əsas verir. İcra hakimiyyətinin başçısı İsmayıl Vəliyev doqquz aylıq hesabat məruzəsində aşkar tərəqqi meyllərini konkret faktlarla hərtərəfli əsaslandırdı.

Rayon rəhbəri dedi ki, bu il Neftçala üçün ən mühüm ictimai-siyasi hadisə Azərbaycan Respublikasının Prezidenti İlham Əliyevin rayona səfəri olub. Dövlət başçısı 28 May - Respublika Gününə təsadüf edən tarixi səfəri zamanı bir neçə inzibati və sosial əhəmiyyətli obyektin açılışında iştirak edib. Möhtərəm Prezidentimiz rayondakı Heydər Əliyev Mərkəzinin açılışından sonra orada rayon ictimaiyyətinin üzvləri ilə unudulmaz görüş keçirib. Cənab Prezidentin Neftçalanın abadlığı və inkişafı ilə əlaqədar imzaladığı 29 may 2014-cü il tarixli sərəncamları rayon sakinlərinin böyük sevincinə səbəb olub. Sərəncamlara əsasən, Neftçalanın sosial-iqtisadi inkişafının daha da sürətləndirilməsi məqsədilə 2 milyon manat, 37 min nəfər əhalinin yaşadığı 21 yaşayış məntəqəsini birləşdirən Şorkənd-Beştalı-Bankə-Şirvanlı avtomobil yolunun tikintisi məqsədi ilə isə 3 milyon manat ayrılıb.

Rayonda ümumi məhsul istehsalının həcmi 2013-cü ilin müvafiq dövrünə nisbətən 3,6 faiz artaraq 152,4 milyon manat olub. Ümumi tərkibdə sənaye məhsulu 12,8 faiz, kənd təsərrüfatı məhsulu 41,8 faiz, ticarət, iaşə və digər xidmətlərin həcmi 3,7 faiz, tikinti işlərinin həcmi isə 10,5 faiz olub. Qeyri-dövlət bölməsinin payı 89,3 faizə çatıb.

İlin əvvəlindən rayonda 5 yeni müəssisə yaradılıb, 431 fiziki şəxs fəaliyyətə başlayıb. Cəmi 549 daimi yeni iş yeri açılıb. Tikinti-quruculuq, abadlıq işlərinə 135 nəfər, kənd təsərrüfatında mövsümü işlərə 1415 nəfər cəlb olunub. Bank filialları və kredit təşkilatları tərəfindən vətəndaşlara 9 milyon 165 min manat kredit verilib ki, bu da 2013-cü ilin eyni dövrü ilə müqayisədə 2 dəfə çoxdur. Sahibkarlığa Kömək Milli Fondundan 5 sahibkar 57 min manat məbləğində kredit alıb. Hesabat dövründə aqrar sahədə önəmli irəliləyişlər olub. Diri çəkidə 9448,2 ton ət, o cümlədən 6660,7 ton quş əti, 15147,3 ton süd, 3 milyon 193 min ədəd yumurta istehsal edilib. Taxıl əkini sahələri xeyli genişləndirilərək 45158 hektar olub. İri buynuzlu mal-qaranın sayı 41700 başa, qoyun və keçilərin sayı 129411 başa çatdırılıb. Kür çayından Xol zonasına qədər məsafədə 25 kilometrlik kanalın tikintisinə 10,9 milyon manat vəsait sərf olunub.

Rayon ərazisində yüksək keyfiyyətlə təmir, tikinti və abadlıq işləri görülüb. Doqquz ayda tikinti, təmir və yol çəkilişində 16 milyon 600 min manatlıq iş həcmi yerinə yetirilib. Heydər Əliyev prospektinin təzədən qurulması, yeni parkların salınması, prospekt boyunca yol kənarlarının abadlaşdırılması, icra hakimiyyəti aparatının, Heydər Əliyev Mərkəzinin inzibati binasının, Bayraq meydanının, “Şəhidlər Kompleksi”nin, Kür çayı sahilində Bulvarın, yeni müasir saat qülləsinin tikintisi başa çatıb. “İdman Kompleksi”nin tikintisi üçün ərazi hazırlanır. Yuxarı Qaramanlı kəndində 360 şagird yerlik, Kürkənd kəndində 200 şagird yerlik tam orta məktəblər tikilərək şagird və müəllimlərin istifadəsinə verilib. Aşağı Surra kəndində 360 şagird yerlik tam orta məktəbin əsaslı təmiri və əlavə 10 sinif otağının tikintisi isə başa çatmaq üzrədir.

İdman yarışlarında rayon təmsilçilərinin uğurları yüksək olub. Belə ki, ümummilli lider Heydər Əliyevin anadan olmasının 91-ci il dönümünə həsr olunmuş respublika boks yarışlarında Neftçalanın 6 yetirməsi qızıl, 2 nəfər isə gümüş medala layiq görülüb.

Universitetlərə qəbul imtahanlarından 204 nəfər rayon məzunu uğurla keçib. Tələbə adını qazananlardan 41 nəfəri 500-dən, o cümlədən 8 nəfəri 600-dən yuxarı bal toplayanlardır.

Neftçala Mərkəzi Rayon Xəstəxanasında əhaliyə göstərilən ambulator-poliklinik xidmətlərin keyfiyyətinin daha da yaxşılaşdırılması istiqamətində müəyyən işlər görülüb. Yazda Prezidentin tapşırığı ilə bütün əhali tibbi müayinədən keçib. İyun ayında Milli Onkologiya Mərkəzinin yüksək ixtisaslı mütəxəssislərindən ibarət səyyar həkim briqadası rayonda müayinələr aparıb. Mərkəzi rayon xəstəxanasının 2013-cü ilin avqust ayından başlayan əsaslı təmiri hesabat dövründə də davam etdirilib. Ötən müddət ərzində poliklinika, doğum, yoluxucu xəstəliklər, pediatriya və terapiya korpuslarında dam örtükləri əsaslı təmir olunub, həmin korpusların xarici və daxili divarlarında suvaq işləri başa çatdırılıb, istilik, su-kanalizasiya xətlərinin çəkilişinə başlanıb.

Doqquz ayda icra başçısı tərəfindən 30 səyyar görüş və qəbul keçirilib. Bu görüşlərə 3180 nəfər qatılıb. Vətəndaşlardan 157 nəfəri 102 tənqidi qeyd və təkliflə çıxış edib. Qaldırılan məsələlər ciddi nəzarətə götürülüb, həlli istiqamətində əməli addımlar atılıb. Rayon icra hakimiyyəti aparatına ümumilikdə 680 ərizə, şikayət və təklif daxil olub. Başçı tərəfindən 233, o cümlədən icra aparatında 75, səyyar qəbullarda 158 vətəndaş qəbul edilib. Müraciət və xahişlərin heç biri diqqətsiz qalmayıb.

İsmayıl Vəliyev sonda belə bir inam ifadə etdi ki, neftçalalılar ili yüksək nailiyyətlərlə başa çatdırmaqdan ötrü fəaliyyətlərini daha da genişləndirəcək, bütün sahələrdə inkişafa nail olacaqlar.

Əli NƏCƏFXANLI

Xalq qəzeti.- 2014.- 29 oktyabr.- S.6.