Üzeyir bəy Hacıbəylinin adını daşıyan

Beynəlxalq Musiqi Festivalı ənənəyə çevrilmişdir

Artıq beşinci ildir ki, Bakı şəhərində Azərbaycan peşəkar musiqisinin banisi, dahi bəstəkar Üzeyir bəy Hacıbəylinin adını daşıyan Beynəlxalq Musiqi Festivalı təşkil olunur.

Azərbaycan Bəstəkarlar İttifaqının mətbuat xidmətindən bildirilir ki, bu sıradan sentyabrın 18-28-də keçiriləcək festivalda dahi bəstəkara həsr olunmuş bəzi tədbirlərin keçirilməsi planlaşdırılır. Belə ki, sentyabrın 22-də Azərbaycan Bəstəkarlar İttifaqının Üzeyir bəy Hacıbəyli adına konsert salonunda “Türk xalqlarının musiqisi ortaq dəyərlər müstəvisində” mövzusunda elmi-praktik konfrans təşkil ediləcəkdir. Konfransda əcnəbi mütəxəssislərin də iştirakı nəzərdə tutulmuşdur.

Sentyabrın 24-də isə yenə də Azərbaycan Bəstəkarlar İttifaqının Üzeyir bəy Hacıbəyli adına konsert salonunda “Trio-klassik” ansamblının konserti olacaqdır. Məlum olduğu kimi, Heydər Əliyev Fondunun prezidenti, UNESCO və İSESCO-nun xoşməramlı səfiri, millət vəkili Mehriban xanım Əliyevanın təşəbbüsü ilə həyata keçirilən möhtəşəm “Muğam aləmi” layihəsi çərçivəsində Azərbaycan muğamına həsr olunmuş “Muğam Ensiklopediyası”nın rus dilindəki nəşri az müddət əvvəl işıq üzü görüb. Belə bir ensiklopediyanın ilk nəşri ölkəmizin musiqi və elmi ictimaiyyəti tərəfindən rəğbətlə qarşılanaraq, Azərbaycan muğamının qorunub saxlanması, inkişafı və daha geniş şöhrət tapması üçün əlverişli zəmin yaratmışdır. Nəfis şəkildə hazırlanmış nəşrin təqdimat mərasimi sentyabrın 25-də saat 14.00-da Muzey Mərkəzində keçiriləcəkdir.

A.ÜLVİ

Xalq qəzeti.- 2014.- 19 sentyabr.- S.11.