Yardımlı: Zirvələr əlçatmaz deyil

Dağların başının tacı olan Yardımlıya yaz qədəm-qədəm gəlir. Fəsilayrıcı günlərdə yağan qar qışın asanlıqla “təslim” olmaq istəmədiyini göstərsə də, bahar qeyd-şərtsiz “taxt-tac”ına sahib durmaqda iddialı idi. Elə dağ camaatı da hər il bu vaxtlar iki fəslin “döyüş”ünü görməyə öyrəncəlidir. Novruz xonçalarının üstünü qar dənəcikləri bəzəməsə, dağın arandan nə fərqi olar?

Yaşlıların yadına gələr, 1967-ci il iyunun ilk günlərində ot çalını vaxtı Yardımlı ərazisinə güclü qar yağmışdı. Görənlər deyirdi ki, qar möcüzə kimi yağdı, yuxu kimi keçib getdi.

İndilər Yardımlının gözəllik aşiqlərini qoynuna çağıran vaxtıdır. Meşə örtüklü dolama yollar boyunca ağ çiçəklər açmış meyvə ağacları gəlin köçən qızlar kimi gözəllik saçır. Təkdam şəlaləsinin həzin səsi kövrək duyğular yaradır. Ötən ilin avqustuna qədər bu dağlarda səsi ilahi lütfü olan bir xanəndə yaşayırdı: Qürbət Fətəliyev. Sağ əlində mikrofon, sol əlinin şəhadət barmağını düz tutub dürüst oxuyan Qürbətin sədaları şəlalə səsini, göy gurultusunu xatırladır, az qala, qayaları titrədirdi. Qaraqayada ədəbiyyat və muğam bilicisi kimi tanınan Eynulla müəllim söyləyir ki, Qürbət doğma Avaş kəndindən axan dağ çayına qoşularaq səsinin gücüylə Bakıya qədər axıb sənətsevərlərın qəlbinə süzülə bilmişdi. Müxalifi hücum, Mənsuriyyəsi qələbə hayqırtısı olan “Çahargah”ı məclislərdə təkrar-təkrar oxumaqla ustadı Sabir Mirzəyevi layiqincə xatırladardı Qürbət...

Yadıma gəlir ki, Masallının Qəriblər kəndindən dostumuz Cəmil öz oğlunun toyunu xanəndə Qürbətə həvalə eləmişdi. Qəriblər ola, Qürbət ola, toy ola! Şaqraq, sehirli səs ürəkləri sac üstündə buğda kimi qovururdu! Nə Qürbət yorulurdu, nə də alqışlar səngiyirdi. Heyf ondan, özünün-səsinin qədrini bilmədi. Dağlar bir tərənnümçüsünü erkən itirdi.

Amma nə yaxşı ki, Yardımlıda istedadlar çoxdur. Yurda şöhrət gətirənlər davamlı artmaqdadır. Neçə-neçə Qürbəti, Sabiri boy göstərir dağların. Biri elə Cavanşir! O gün televizorda elə gözəl zəngulələr vururdu ki...

Özünün yüksəliş dövrünü yaşayan rayonun siması ilbəil dəyişir. Yeni sosial obyektlər tikilir, iş yerləri açılır, yollar abadlaşdırılır, mozaik naxışlı istinad divarları kilometrlərcə uzanır. Təbii gözəlliklər insan əlləri ilə bir qədər də cilalanıb üzə gülür. Gözəl diyara turist marağı ilə gələnlərin sayı da durmadan artır.

Yardımlının inkişaf dinamikası 2014-cü ildə də qorunub saxlanmışdır. İcra hakimiyyətinin başçısı Sevindik Hətəmovun bildirdiyinə görə, ötən il rayon üzrə 86 milyon 912 min manatlıq ümumi məhsul istehsal olunub ki, bu da əvvəlki illə müqayisədə 3 faiz, 2003-cü illə müqayisədə 9,5 dəfə çoxdur. Prezident İlham Əliyevin müvafiq sərəncamları ilə uzunluğu 38 kilometr olan yerli əhəmiyyətli Yardımlı-Deman-Arvana və uzunluğu 15 kilometr olan Yardımlı-Hamarkənd-Abbasabad avtomobil yolları istifadəyə verilib. İl ərzində 661 min 300 manatlıq sənaye, 34 milyon 923 min manatlıq kənd təsərrüfatı məhsulları istehsal olunub. Rayonda 319 daimi yeni iş yerləri yaradılıb ki, onlardan 270-i fiziki, 49-u isə hüquqi şəxslərə aiddir.

Dövlətimizin başçısının 2014-cü ili “Sənaye ili” elan etməsi rayonda iqtisadiyyatın bu mühüm sahəsinin inkişafı üçün münbit şərait yaradıb. Burada “Limonad, su, kompot və mürəbbə sexi” istifadəyə verilib. Müəssisədə 30-a yaxın rayon sakini işlə təmin olunub. Yeni istehsalatda çalışanların orta ayılq əmək haqqı 314 manatdır. Bu il “Kənd təsərrüfatı ili”dir. Deməli, məhsul bolluğuna vəsilə olan önəmli addımlar atılacaq, torpaqlardan daha səmərəli istifadə ediləcək. Hazırda “Biləzəmi” adlanan ərazidə rayonun kənd təsərrüfatı idarələri üçün üç mərtəbədən ibarət, bütün lazımi avadanlıqla təchiz ediləcək inzibatı bina inşa olunur. Həmin bina bu il istifadəyə veriləcək.

Rayonun genişləndirilmiş inkişaf planında bu ərazidə digər idarə və müəssisələr üçün də müasir inzibati binaların tikintisi nəzərdə tutulub. Heydər Əliyev Fondunun hesabına müasir tələblərə tam cavab verən 55 yerlik körpələr evi-uşaq bağçası artıq inşa olunaraq fidan balaları qoynuna alıb. Bununla da rayonda körpələr evi-uşaq bağçasının sayı dördə çatıb. Polis şöbəsinin yeni yaraşıqlı inzibatı binası da ötən ilin aprelində istifadəyə verilib.

Bundan başqa, ölkə Prezidentinin göstərişinə əsasən, şəhərin Heydər Əliyev küçəsində icra hakimiyyəti aparatı üçün yeni binanın tikilməsinə qərar verilib. Bu binanın da cari ildə istifadəyə verilməsi planlaşdırılır. Ümumiyyətlə, Yardımlıda uzun müddət istismarda olduğu üçün yararsız vəziyyətə düşmüş binaların yenilənməsinin şahidi olmaq mümkündür.

Son vaxtlar ərzində yerli əhəmiyyətli avtomobil yollarının Viləş çayı üzərindən keçən hissəsində 3 yerdə - Yardımlı-Hamarkənd-Abbasabad, Yardımlı-Bozayran-Vərgədüz-Sırıq, həmçinin şəhərin Əsədabad və Ünəç küçələri arasında müasir körpülər inşa olunub. Sahilləri birləşdirən yeni, rahat körpülərdən ümumilkdə 18 yaşayış məntəqəsinin 20 minə yaxın əhalisi istifadə edir. Bununla da üç ildə Yardımlıda tikilən avtomobil körpülərinin sayı 6-ya çatıb. Digər körpülər Sırıq-Horavar, Separadi-Teşkan və Urağaran-Qaraqaya kəndləri arasında inşa olunub. Üç kilometrlik Pirimbel yolunun da tikintisi başa çatdırılıb.

Yaxşı haldır ki, yeni məktəblərin inşası, mühüm infrastruktur layihələrinin icrası diqqətdədir. Ötən dərs ilinin əvvəlində rayonun Zenqaran, Solğard və Fındıqlı-Qışlaq kəndlərində məktəblər tikilərək istifadəyə verilib. Sonrakı aylarda isə Yardımlı şəhər 3 nömrəli, Anzov, Urağaran və Çayüzü kənd tam orta məktəblərinin açılış mərasimləri olub. Yeni məktəblərdə minə qədər şagirdə rahat şəraitdə təhsil almaq imkanı yaradılıb.

Ölkə Prezidentinin tapşırığına əsasən, 2013-cü ilin sonlarından rayonda müasir idman kompleksinin tikintisinə başlanılıb. Yeri gəlmişkən, dağlıq diyarın idmançıları mötəbər yarışlarda parlaq qələbələr qazanmaqda davam edirlər. Onların arasında mötəbər beynəlxalq yarışların qalibləri də var. Çoxmübarizəli döyüş növləri üzrə Avropa çempionu Valeh Sahratlı, şotokan-karate növü üzrə dünya çempionu Orxan Baratlı, “Cənub” idman klubunun rəhbəri, kikboksinq məşqçisi Samir Həsənov (yetirməsi Sənan İsgəndərli dünya çempionudur) rayonun fəxri sayılırlar. Yeni sağlamlıq və güc ünvanının da qapılarını idmançıların üzünə açmasına çox qalmayıb.

Yardımlıda kiminlə söhbət etdiksə, ölkə rəhbərliyinin ucqar bölgəyə qayğısından razılığını bildirdi. İcra hakimiyyətində vətəndaş müraciətlərinə son dərəcə həssas münasibət bəslənməsi hamılıqla təqdir olundu. Əlbəttə, bütün bunlar müsbət hallardır. Elə dövlətimizin başçısı hər zaman məmurlara xalqla hakimiyyət arasında inam, etimad körpüsünü beləcə möhkəmləndirməyi tapşırır. Ümid qapısına gələnləri xoş üzlə qarşılayıb razı şəkildə yola salmaq hər bir idarə və təşkilat rəhbərinin ümdə vəzifəsi hesab olunur.

Rayonun tanınan ziyalılarından biri, ötən ilin payızında “Tərəqqi” medalı ilə təltif edilmiş Ostayır kənd məktəbinin müəllimi Mehdi Həsənov uzun illərdir ki, Yardımlı ilə bağlı tarixi əhəmiyyəti olan faktları qələmə alır, yurdu bacardığı qədər tanıtmağa çalışır. Bizimlə görüşündə o, ürək sözlərini həvəslə bölüşdü:

– Yardımlı özünün intibahını yaşayır. Möhtərəm Prezidentimizin diqqəti sayəsində son illərdə rayonumuz onilliklərə bərabər inkişaf yolu keçib. Quruculuq işləri genişlənib. Təhsilə, mədəniyyətə qayğı bizi xüsusilə hədsiz sevindirir. Bir də məni razı salan odur ki, indi rayonumuzda ziyalılara çox isti münasibət bəslənir. Hər hansı birimizin müraciəti müsbət qarşılanır, sözümüz eşidilir, fikrimizlə hesablaşılır. Bu, əlbəttə, rəhbərin özünün ziyalı xarakterindən irəli gəlir. Qəbullarda, səyyar görüşlərdə onun sadə davranışları ilə ürəklərə yol tapması çox müsbət halddır. Sevindik müəllim əsl el adamı kimi camaatın xeyir-şərində yaxından iştirak edir, hər kəsə maddi və mənəvi dayaq olur. Elə bərqərar olan qarşılıqlı inama görədir ki, Yardımlı günbəgün tərəqqi edir, mədəni həyatı durmadan canlanır. Başçını kabinetindən çox abadlıq-quruculuq işlərinin episentrində, sadə adamların arasında görmək olar. Möhtərəm Prezidentimiz çox sağ olsun ki, belə qabiliyyəti kadrları vacib vəzifələrə irəli çəkir.

Ötən payız İDEA İctimai Birliyi tərəfindən həyata keçirilən I Ümumrespublika yaşıllaşdırma marafonu çərçivəsində Yardımlıda da idarə, müəssisə və təşkilat kollektivlərinin iştirakı ilə iməciliklər keçirilib. Heydər Əliyev parkı, mədəniyyət və istirahət parkı, Heydər Əliyev küçəsi boyunca, Urağaran, Zevin, Avaş, Pirimbel kənd inzibati ərazi dairələrində, həmçinin Masallı-Yardımlı magistral avtomobil yolunun 44-45-ci kilometrliyində ümumilikdə beş minə qədər müxtəlif növlü ağac əkilib. Bu il martın ortalarından başlayaraq yenə də həmin ərazilərdə, həmçinin Porsova, Vərov, Astanlı kəndlərində müxtəlif növ ağac tingləri basdırılıb. Rayon yaşıllaşdırma idarəsinin işçiləri tərəfindən xüsusi avadanlıq vasitəsi ilə ağaclar suvarılır və onlara aqrotexniki qulluq göstərilir.

Çox çəkməz ki, yeni fidanlar Yardımlının yaşıl örtüyünü daha da zənginləşdirər. Yaşıllığı bol olan yerdə gözəllik, təkamül, halallıq və xeyir-bərəkət sarıdan qıtlıq çəkilməz.

Əli NƏCƏFXANLI

Xalq qəzeti.- 2015.- 5 aprel.- S.6.