Sosial siyasətimizin mərkəzində Azərbaycan
vətəndaşı dayanır
Azərbaycan Respublikasının Prezidenti İlham Əliyevin rəhbərliyi altında qeyri-neft sektorunun inkişafının sürətləndirilməsi, iqtisadiyyatın şaxələndirilməsinin təmin edilməsi, əlverişli biznes və investisiya mühitinin formalaşdırılması və əhalinin rifahının daha da yüksəlməsi nəticəsində son 12 ildə sosial sahədə müsbət göstəricilərə nail olunub.
Azərbaycan iqtisadiyyatında qazanılan uğurların son nəticədə sosial ədalət prinsiplərinin möhkəmləndirilməsinə xidmət göstərdiyini vurğulayan dövlət başçısı sosial sahədə həyata keçirilən ciddi proqramların mahiyyətini izah edərək demişdir: “...Əlbəttə, bizim bütün işlərimizin təməlində və mərkəzində insan amili dayanır. Hesab edirəm ki, bu, hər bir dövlət üçün ən vacib yanaşmadır. Çünki hər şey insan üçün edilir. Onun azadlığı, təhlükəsizliyi, sağlamlığı, işlə təmin edilməsi, rahat yaşaması dövlətin başlıca qayğısıdır. Hesab edirəm ki, bu istiqamətdə də böyük addımlar atılıb, uğurlar əldə edilib. Azərbaycan vətəndaşları azad cəmiyyətdə yaşayırlar. Onlar bütün azadlıqlara malikdirlər və öz dövlətinin gücünü artırmaq üçün çalışırlar”.
Ölkə rəhbəri respublikamızın iqtisadi uğurlarından bəhrələnməklə ilk növbədə xalqın həyat səviyyəsini yüksəltməyə, onun güzəranını yaxşılaşdırmağa mühüm önəm verir, sosial məsələlərin həllinə böyük diqqət yetirir. Eyni zamanda, sosial ədalət prinsiplərini möhkəmləndirməyi qarşıya ciddi vəzifə kimi qoyur: “Dünyada gedən xoşagəlməz halların əsas səbəbi əslində sosial ədalətsizlikdir. İqtisadi islahatlar, eyni zamanda, güclü sosial siyasətlə tamamlanmalıdır. Əgər bu olmasa, köklü iqtisadi islahatlar insanlara əziyyət gətirə bilər. Biz ona nail ola bilmişik ki, sosial sahədə də çox ciddi proqramlarımız vardır və bu proqramlar icra edilir. İnsanların rifah halının yaxşılaşdırılması onu göstərir ki, bu sahədə də addımlar uğurlu istiqamətdə atılmışdır”. Bu baxımdan hazırda ölkə qarşısında duran bütün əsas vəzifələrin icra olunduğunu, iqtisadiyyatımızın davamlı inkişaf etdiyini vurğulayan Azərbaycan Prezidenti sosial sahədə işlərin bundan sonra da uğurla aparılacağını deyib.
Xatırladaq ki, iqtisadi inkişaf potensialı müasir dövrdə hər bir dövlətin gücünü müəyyənləşdirən başlıca amildir. Ümumiyyətlə, hər bir ölkənin, xalqın problemlərinin həllinin ən səmərəli yolu məhz iqtisadi-sosial tərəqqidən keçir. Ona görə də respublikamızın iqtisadi siyasətinin sosialyönümlü xarakter daşıması təsadüfi deyil. Bu, bir tərəfdən insan amilinə yüksək həssaslıq nümunəsidirsə, digər tərəfdən bazar iqtisadiyyatı yolu ilə inkişaf edən bir sıra qabaqcıl dünya dövlətlərinin təcrübəsinə əsaslanır. Dövlət başçısı İlham Əliyev də bu reallığı daim önə çəkir. Çünki insanların sosial şəraitinin yaxşılaşdırılması iqtisadi-sosial islahatların həyata keçirilməsinə, iqtisadi inkişaf prosesində hər bir vətəndaşın iştirakını təmin etməyə müsbət təsir göstərir.
Son 12 ilin reallıqları göstərir ki, ölkənin iqtisadi inkişafından, neft strategiyasının və sahibkarlığın inkişafının uğurlu nəticələrindən əldə edilən dividendlər bilavasitə insanların sosial problemlərinin həllinə, vətəndaşların həyat səviyyəsinin yaxşılaşmasına yönəldilir. Minimum əməkhaqlarının, büdcə təşkilatlarında çalışan ayrı-ayrı vətəndaş kateqoriyalarının məvaciblərinin, pensiya və müavinətlərin, tələbə təqaüdlərinin artırılması, sosial müdafiə sisteminin davamlı şəkildə təkmilləşdirilməsi dövlətin vətəndaşlarına olan diqqət və qayğısının bariz təcəssümüdür.
Ümumiyyətlə, Prezident İlham Əliyevin rəhbərliyi altında həyata keçirilən sosialyönümlü iqtisadi siyasətin əsas mahiyyəti əhalinin faydalı məşğulluğunun təmin edilməsindən, yeni iş yerlərinin açılmasından, sosial müdafiədə ünvanlılıq və səmərəlilik prinsipinə üstünlük verilməsindən, əlillərin, aztəminatlı, habelə şəhid ailələrinin, bu qəbildən olan digər şəxslərin həyat səviyyəsinin yüksəldilməsinə lazımi şərait yaradılmasından ibarətdir.
Müstəqil Azərbaycanın son illər dinamik inkişaf yolunda olması və müsbət makroiqtisadi göstəricilərə imza atması, ilk növbədə, onun dövlət büdcəsində real əksini tapır. Sürətli tərəqqinin “barometrinə” çevrilən büdcə dövlətin hərtərəfli inkişafı baxımından zəruri sosial və infrastruktur layihələrinin həyata keçirilməsində başlıca maliyyə mənbəyi rolunu oynayır. Yeri gəlmişkən, bu ilin dövlət büdcəsi ölkənin sosial-iqtisadi inkişaf sürətinin qorunub saxlanılmasına, iqtisadiyyatın tənzimlənməsinə və stimullaşdırılmasına, qeyri-neft sektorunun, sahibkarlığın inkişafına, sosial infrastrukturun müasir tələblər səviyyəsində qurulmasına, xüsusilə, xalqın rifah halının yaxşılaşdırılmasına maliyyə təminatı yaradıb.
Azərbaycanın regionda analoqu olmayan inkişaf mərhələsinə qədəm qoyması, ümumi daxili məhsulun artım tempi, büdcə gəlirlərinin ildən-ilə əhəmiyyətli dərəcədə çoxalması iqtisadi sektorda islahatların genişləndirilməsinə, sosial-mədəni modernləşməyə müsbət təsir göstərib.
“Azərbaycanda heç kim yoxsulluq şəraitində yaşamamalıdır. Yoxsul insan olmamalıdır”, - deyən ölkə Prezidenti İlham Əliyev respublikamızda sosial dövlət prinsipinin uğurla reallaşdırılmasını belə ifadə edib: “Büdcəmizin artımı bizə imkan verir ki, Azərbaycanda həm infrastruktur layihələri icra edilsin, həm də sosial məsələlər öz həllini tapsın. Son illər maaşlar və pensiyalar bir neçə dəfə artırılmışdır. Bu da onu göstərir ki, Azərbaycan özünü dünyaya sosial dövlət kimi təqdim edir. Bizim siyasətimiz məhz bundan ibarətdir”.
Bu, Dövlət Statistika Komitəsinin
yaydığı məlumatda da öz aydın ifadəsini
tapıb. Məlumatda bildirilir ki, bu ilin yanvar-iyul
aylarında 32,1 milyard manatlıq və ya ötən ilin
müvafiq dövründəkindən 5,6 faiz çox ümumi
daxili məhsul istehsal olunub. Əlavə dəyərin 12,5
faizi ticarət, turistlərin yerləşdirilməsi və
ictimai iaşə xidmətləri sahələrində, 13,6
faizi tikinti kompleksində, 5,7 faizi nəqliyyatda, 6 faizi kənd
təsərrüfatında, 1,9 faizi rabitədə, 17,2 faizi
digər sahələrdə yaradılıb. Məhsula və idxala xalis vergilər ÜDM-in 8,1 faizini təşkil edib.
Cari ilin
yanvar-iyul aylarında əsas kapitala 9368,5
milyon manat məbləğində, yaxud ötən ilin
müvafiq dövrü ilə müqayisədə 3,5 faiz
çox vəsait yönəldilib. İstifadə olunan vəsaitin
6259,6 milyon manatı və ya 66,8 faizi məhsul
istehsalı obyektlərinin tikintisinə sərf olunub. Əsas kapitala yönəldilən vəsaitin 5494
milyon manatı daxili vəsaitlər olub. Bilavasitə tikinti-quraşdırma
işlərinin yerinə yetirilməsinə sərf olunan vəsait
2014-cü ilin eyni dövrü ilə müqayisədə 11,6 faiz artaraq 6998,2 milyon manat təşkil edib.
Ölkə iqtisadiyyatının qeyri-neft sənayesində
artımı nəzərə çarpır. Bu artım
iqtisadiyyatın real sektoruna qoyulan investisiyalar,
sahibkarlığın inkişafı hesabına mümkün
olub. Bu, verilən
kreditlərin, sahibkarlığın inkişafı
üçün qəbul edilən proqramların və
dövlət siyasətinin çox uğurlu olmasının nəticəsidir.
Ümumiyyətlə, ölkədə güclü sənaye
potensialının yaradılması üçün tədbirlər
görülür. Həm böyük müəssisələr
yaradılır, böyük texnoparklar fəaliyyətə
başlayır, həm də orta və kiçik həcmli
müəssisələr fəaliyyətini gücləndirir,
onların sayı artır. Bunu yanvar-iyul
aylarında sənaye sahəsində əldə edilən
göstəricilərdən də aydın görə bilərik.
Belə ki, hesabat dövründə sənaye müəssisələri
və bu sahədə fəaliyyət göstərən fiziki
şəxslər tərəfindən 15,8 milyard manatlıq və ya
ötən ilin müvafiq dövrü ilə müqayisədə
3,5 faiz çox sənaye məhsulu istehsal edilib. Mədənçıxarma bölməsində
məhsul istehsalı 2 faiz, o cümlədən əmtəəlik
qaz hasilatı 10,6 faiz artıb.
Sənayenin qeyri-neft sektorunda artım daha yüksək
olub. Yeddi ay ərzində
bu bölmədə məhsul istehsalı 14,7
faiz, neft-qaz sektorunda isə 0,1 faiz artıb. İstehsal edilən
məhsulun 99,8 faizi istehlakçılara
göndərilib.
Bir
neçə il əvvəl bəzi kənd
təsərrüfatı məhsullarını xarici ölkələrdən
idxal edən Azərbaycan indi əksinə, xarici dövlətlərə
məhsul ixrac edir. Bu da sözsüz ki, məhsul
istehsalının intensiv artımı nəticəsində
mümkün olub. Azərbaycan hökumətinin
aqrar sahəyə diqqət və qayğısının
güclənməsi və kənd təsərrüfatı
mülkiyyətçilərinə göstərilən güzəştli
yardımların miqyasının artması bu sahədə
inkişaf tempinə mühüm stimul verməkdədir. Məhz bunun nəticəsidir ki, sözügedən
sahədə vəziyyət ildən-ilə
yaxşılaşır.
Dövlət Statistika Komitəsinin son məlumatına
görə, indiyədək taxıl sahələrinin 913123 (99,8 faiz) hektarı biçilib, hər hektardan
30,5 sentner olmaqla, 2781834 ton taxıl götürülüb.
Xatırladaq ki,
ötən mövsüm bu göstərici hər hektardan 22,8
sentner təşkil edib.
Cari ildə ölkənin kənd təsərrüfatının
digər sahələrində də uğurlu göstəricilər
əldə edilib. Avqustun 1-nə kimi, yığım başlanandan sahələrdən
506,8 min ton və ya keçən ilin müvafiq dövründə
olduğundan 40,7 min ton çox kartof, 765,4 min ton (47,6 min ton
çox) tərəvəz, 356,4 min ton (31,3 min ton çox)
bostan məhsulları, 179,7 min ton (3,1 min ton çox) meyvə
və giləmeyvə, 3201 ton (27 ton çox) üzüm, 363,6
ton (47 ton çox) yaşıl çay yarpağı, 1495,8
ton (250 ton çox) tütün yığılıb.
Regionların
üçüncü sosial-iqtisadi inkişafı Dövlət
proqramına uyğun olaraq, 2014-cü ilin yanvar ayından cari
il iyul ayının 1-nə kimi ölkədə 187,9 min (153,1 mini daimi) yeni iş yeri, bu ilin
altı ayında isə 60,6 min
(48 mini daimi) yeni iş yeri açılıb. Bu müddətdə
açılan yeni iş yerlərinin 75,1
faizi qeyri-dövlət sektoruna aiddir. Onların 68,8 faizi
regionların, o cümlədən 19,8 faizi Aran, 14,3 faizi Gəncə-Qazax,
7,7 faizi Abşeron, 6,5 faizi Lənkəran və digər
iqtisadi rayonların payına düşür. Daimi iş yerlərinin
13,7 faizi yeni yaradılmış müəssisə
və təşkilatlarda, 11,3 faizi
mövcud müəssisə və təşkilatlarda
yaradılıb.
Yanvar-iyun
aylarında muzdla işləyənlərin orta aylıq əməkhaqqı
2014-cü ilin eyni dövrü ilə müqayisədə 4 faiz artaraq 457,2
manat təşkil edib. Yeddi ay ərzində əhalinin gəlirləri
6,4 faiz artaraq 23,6 milyard manata
çatıb. Göründüyü kimi, əhalinin
gəlirləri inflyasiyanı təxminən 2 dəfə
üstələyir. Gəlirlərin 74,1 faizi son istehlaka,
9,3 faizi vergilər, sosial sığorta və
könüllü üzvlük haqlarının ödənilməsinə,
14 faizi əmanətlərin və
kapitalın artırılmasına, 2,6 faizi kreditlər üzrə
faizlərin ödənilməsinə sərf edilib.
Maliyyə
Nazirliyinin məlumatına əsasən, 2015-ci ilin yanvar-iyun
aylarında dövlət büdcəsinə 7,8 milyard manat vəsait
daxil olub, büdcədən 8,6 milyard manat vəsait xərclənib,
büdcənin icrasında yaranmış 770,9 milyon manatlıq
kəsir ümumi daxili məhsulun 2,9 faizinə bərabər
olub. Büdcə xərclərinin 4 milyard manatı
iqtisadiyyatın inkişafına, 1
milyard manatı sosial müdafiə və sosial təminata,
945,4 milyon manatı isə təhsilə və səhiyyəyə
yönəldilib.
Azərbaycanda həyata keçirilən ən ciddi sosial
layihələrdən biri də aztəminatlı vətəndaşlara
ünvanlı sosial yardımları nəzərdə tutan
xüsusi dövlət proqramının
reallaşdırılmasıdır. Ünvanlı sosial
yardım sisteminin tətbiqi üçün ilkin tədbir
kimi qanunvericilik bazası formalaşdırılıb, Milli Məclisdə
“Ünvanlı sosial yardım haqqında” Azərbaycan
Respublikasının Qanunu qəbul olunaraq qüvvəyə
minib.
Bu ilin ilk
yarısında respublika üzrə orta hesabla 112 min ailənin
490 min üzvünə, yəni, ölkə əhalisinin 5
faizinə ünvanlı dövlət sosial yardımı
verilib. Bundan başqa, 414 min nəfərə
aylıq və birdəfəlik sosial müavinət, 54 min nəfərə
Azərbaycan Respublikası Prezidentinin təqaüdləri
ödənilib. Hesabat dövründə
ünvanlı sosial yardımların, aylıq və birdəfəlik
sosial müavinətlərin, təqaüd və
kompensasiyaların ödənişinə dövlət büdcəsindən
248 milyon manat vəsait xərclənib. Ölkəmizin ərazi
bütövlüyünün, müstəqilliyinin və
konstitusiya quruluşunun müdafiəsi zamanı əlil
olmuş şəxslərin və şəhid ailələrinin
mənzil və fərdi evlərlə təmin olunması
proqramı çərçivəsində iyun ayında Tərtər
rayonunda 54 mənzilli yaşayış binası istifadəyə
verilib, hazırda isə İmişli, Beyləqan,
Şamaxı və Bakı şəhərlərində
ümumilikdə 238 mənzili olan çoxmərtəbəli 4
yaşayış binası və 52 rayonda 375 fərdi evin
inşası işləri davam etdirilir. Bakı
şəhərində gözdən əlillər
üçün 132 mənzilli 12 mərtəbəli
binanın tikintisi tamamlanmaq üzrədir. Əlilliyi olan
şəxslərə il ərzində
ümumilikdə 964 mənzilin və fərdi evin verilməsi təmin
ediləcək. Azərbaycanda neft
strategiyasının, dərindən düşünülərək
hazırlanmış çoxsaylı dövlət
proqramlarının yerinə yetirilməsi nəticəsində
son 12 ildə əhalinin həyat şəraiti, gəlirləri
xeyli yüksəlib. BMT yanında
İnkişaf və Artım Komissiyasının son məruzəsində
qeyd edilib ki, Azərbaycan insan inkişafı indeksinin orta illik
artım tempinə görə MDB məkanında birinci yerdədir.
Respublikamızın
“orta insan inkişafı” ölkələri qrupundan
“yüksək insan inkişafı” qrupuna keçməsi də
məhz sosial siyasətin müsbət göstəricisidir. Həmin məruzədə
həmçinin vurğulanıb ki, 1950-ci ildən sonra belə
sürətli inkişafa yalnız 13 ölkə nail olub. Bu, Azərbaycanın böyük uğurudur.
Orta aylıq əmək haqqının səviyyəsinə
görə Azərbaycan hazırda Qafqazda birinci yerdədir. Bu, onu deməyə
əsas verir ki, ölkəmizdə əhalinin sosial həyat
şəraitinin yaxşılaşdırılması istiqamətində
həyata keçirilən kompleks tədbirlər öz səmərəsini
verməkdədir.
Ekspertlər tərəfindən 2018-ci ilədək
iqtisadiyyatımızın 23 faiz, yəni 12,6 milyard manat
yüksələcəyi proqnozlaşdırılır. Bu müddət ərzində
qeyri-neft sektoru 31,9 milyard manatdan 48,7 milyard
manata qədər artacaq. Nəticədə ölkə
iqtisadiyyatının neft amilindən
asılılığı yaxın 4 ildə kifayət qədər
azalacaq ki, bu da ölkəmizdə dayanıqlı maliyyə
sisteminin formalaşmasını, sosial şəraitin daha da
yaxşılaşacağını, işsizliyin və
yoxsulluğun daha da azalmasını, rəqabətlilik
indeksinin artımını təmin edəcək.
Proqnozlara əsasən, 2017-ci ilədək əhalinin gəlirləri,
orta aylıq əməkhaqları da yüksələcək. Nəticədə
növbəti illərdə əhalinin gəlirləri orta
hesabla illik 4-7 faiz çoxalaraq 2017-ci ildə təxminən 56
milyard manata qədər artacaq. Həmin
dövrdə orta aylıq əmək haqqı təxminən
41 faiz artaraq 618 manata çatacaq.
Azərbaycanda bu gün ulu öndər Heydər Əliyevin sosialyönümlü siyasəti insan amilinə hörmətin formalaşmasına, ümumilikdə ictimai rifahın, siyasi sabitlik və sosial sülhün bərqərar olmasına etibarlı zəmin yaradan konseptual inkişaf yoluna çevrilib. Bu siyasət Azərbaycan vətəndaşının həyati tələbatlarının ödənilməsini təmin edən əlverişli sosial-mənəvi iqlimin və həmrəylik şəraitinin, ümumilikdə ölkədə etibarlı sosial müdafiə sisteminin yaradılmasını təmin edib. Həmin sistem vətəndaşların sağlam mühitdə yaşamaq, istirahət, mənzil, təhsil və digər hüquqlarının da etibarlı müdafiəsinə mükəmməl institusional-qanunverici təminat mexanizmləri formalaşdırıb.
Hazırda Azərbaycanda və bütün dünyada müasir, modern iqtisadiyyatın ən mühüm sosial-mədəni amilinə çevrilən insan kapitalının formalaşmasına, möhkəmlənməsinə və inkişafına xüsusi diqqət göstərilir. Bu mənada ölkəmizdə həyata keçirilən sosial-iqtisadi islahatlar hər bir Azərbaycan vətəndaşının rifahının yüksəldilməsinə yönəldilib. Prezident İlham Əliyevin vurğuladığı kimi, insan amili, ölkə vətəndaşlarının sosial-iqtisadi rifahının yaxşılaşdırılması, respublikamızın yüksək inkişaf etmiş ölkələr sırasına daxil olması həyata keçirilən çoxşaxəli islahatların başlıca hədəfidir.
Vaqif BAYRAMOV,
“Xalq qəzeti”.-2015.-28 avqust.-S.1.