İmişli:
İnsanın torpaq
sevgisindən xariqələr yaranır
İmişlini nahaq yerə
Muğanın mərkəzi və “döyünən ürəyi”
adlandırmırlar. Bu torpağın adamları həmişə
öz qonaqpərvərlikləri, mehribanlıqları və ən
nəhayət, zəhmətsevərlikləri ilə fərqləniblər.
Torpağın da bərəkətinə söz ola bilməz.
Burada torpaq bir aldığının əvəzini beşqat
ödəyib. Son illər rayonda abadlıq-quruculuq sahəsində
görülən işlər, sözün əsil mənasında,
ölçüyəgəlməzdir.
İndi
İmişli ölkəmizin ən baxımlı, səliqə-səhmanlı
rayonlarından biridir, abadlığı ilə göz
oxşayır. Yəqin ki, bu müqəddimədən sonra
rayonun 2014-cü ili necə yola salması ilə bağlı
sualın cavabı da aydındır:
sanballı uğurlarla.
Bəri
başdanca qeyd edək ki, ötən il rayonunun sosial-iqtisadi
inkişafında yaxşı nəticələr əldə
olunmuşdur. Belə ki, iqtisadiyyatın əsas sahələri
üzrə 380.701.000 manatlıq məhsul istehsal edilmiş və
ya xidmət göstərilmişdir ki, onun 164.706.100 manatı və
ya 43,3 faizi sənaye, 101.186.400 manatı və ya 26,6 faizi kənd
təsərrüfatı, 34.223.900 manatı və ya 15,4 faizi
tikinti, 47.356.000 manatı və 12,4 faizi ticarət və
iaşə, 7.953.400 manatı və ya 2,1 faizi nəqliyyat,
694.000 manatı və ya 0,2 faizi rabitə müəssisələrinin
payına düşür. Göründüyü kimi, rayon
iqtisadiyyatında əsas yeri - 70 faizi sənaye və kənd təsərrüfatı
məhsullarının istehsalı tutur.
“Azərbaycan
Respublikası regionlarının 2009-2013-cü illərdə
sosial-iqtisadi inkişafı Dövlət Proqramı”nın
icrası ilə bağlı 2014-cü ildə 180 şagird
yerlik Ölcələr kənd tam orta məktəbinin və
40 yerlik Məzrəli kənd uşaq
bağçasının tikintisi başa
çatdırılaraq istifadəyə verilmişdir. Bundan əlavə,
rayonun Xəlfəli, Hacırüstəmli, Məzrəli,
Qaraqaşlı kənd, şəhər 1 saylı, 6 saylı
və 8 saylı tam orta məktəblərində təmir
işləri görülmüşdür.
Son
illər rayonda emal sənayesinin inkişafı
üçün bir sıra işlər
görülmüş, “Azərbaycan Şəkər
İstehsalat Birliyi” MMC-nin Kəllə qənd,
Qarışıq Yem, Bitki Yağları, Spirt emalı,
Çuğundur yemqurutma zavodları, Bəhrəmtəpə
qəsəbəsində 50 min tonluq taxıl anbarı,
Qaragüvəndikli kəndində damazlıq yumurta istehsal edən
“Araz Damazlıq Quşçuluq” MMC istifadəyə
verilmişdir.
Qarabağ
müharibəsi əlilləri və şəhid ailələrinin
mənzil şəraitinin
yaxşılaşdırılması məqsədilə
Əmək və Əhalinin Sosial Müdafiəsi Nazirliyi tərəfindən
İmişli şəhərində 6 mərtəbəli 54 mənzilli
ictimai yaşayış binasında tikinti işləri
tamamlanmaq üzrədir. Həmçinin, rayonda bu təbəqədən
olan insanlar üçün növbəti, ikinci 6 mərtəbəli
54 mənzilli ictimai yaşayış binasının tikintisi nəzərdə
tutulmuşdur.
2014-cü
il ərzində aparılmış abadlıq və quruculuq
işləri nəticəsində İmişli şəhərinin
siması tamamilə dəyişmiş, şəhər son dərəcə
müasirləşmişdir. Bu sahədə işlər davam
etdirilir. Şəhər, demək olar ki, tamamilə yenidən
qurulur. İnşası davam etdirilən binalar sırasında
İmişli Rayon Məhkəməsinin inzibati binasını
da qeyd etmək lazımdır. Azərbaycan Respublikası Səfərbərlik
və Hərbi Xidmətə Çağırış
üzrə Dövlət Xidmətinin İmişli rayon
şöbəsinin inzibati binasının tikintisi nəzərdə
tutulmuşdur.
Sarıxanlı-Boşçalılar,
Cəfərli-Əliqulular, Muradxanlı kəndlərini birləşdirən
23 kilometr asfalt-beton yol əsaslı təmir olunaraq başa
çatdırılmışdır.
Xoşçobanlı-Murğuzalılı istiqamətində
6 km-lik, Xəlfəli istiqamətidə 6 km-lik, Qulubəylidə
3 kilometr, Qızılkənddə 2 kilometr, Aranlıda 2 kilometr avtomobil yollarında da təmir
işləri başa çatdırılmış və əhalinin
istifadəsinə verilmişdir. Bununla bərabər,
İmişli dairəvi yolunun və 7 km uzunluqda İmişliyə
Çahar istiqamətindən giriş yolunda təmir işlərinə
başlanılmışdır. Abadlıq işləri və
kənddaxili yolların çəkilməsi davam etdirilir.
Qeyd
olunduğu kimi, 2014-cü ildə rayon üzrə sənaye məhsullarının
həcmi 164.706.100 manat olmuşdur. İstehsal olunan sənaye məhsullarının
91,8 faizi qeyri-dövlət
sektorunun payına düşür. Muradxanlı İriləşdirilmiş
Neft Mədəni 19 min ton neft məhsulu istehsal etmiş,
dövlət sektorunu əhatə etməklə ümumi həcmdə
məhsul istehsalının 0,8 faizini təşkil etmişdir.
İmişli Şəkər Zavodu 2014-cü ildə 403.357,7
ton şəkər tozu istehsal etmişdir, o cümlədən,
başqa sifarişçiyə məxsus xammaldan 186.385,3 ton
şəkər tozu emal olunmuşdur. Ümumiyyətlə
İmişli Şəkər Zavodu 2014-cü ildə 136.792.300
manatlıq məhsul istehsal etmiş və xidmətlər
göstərmişdir ki, bu da həm sənaye məhsulunun, həm
də rayon üzrə ümumi məhsul
buraxılışının əsasını təşkil
edir.
2014-cü
ildə heyvandarlıq və quşçuluq sahələrinin
inkişafı təmin edilmiş, rayon üzrə
mal-qaranın sayı 92084 başa, qoyunların sayı 246828
başa, quşların sayı isə 1425965 başa çatmış,
ötən ilin müvafiq dövrü ilə müqayisədə
iribuynuzlu mal-qara 1271 baş, qoyunlar 3604 baş, quşlar isə
149734 baş artmışdır. Ət istehsalı (diri çəkidə)
13759,1 ton, süd istehsalı 48373 ton, yumurta istehsalı 78134
min ədəd, yun istehsalı isə 366,8 ton olmuş, ötən
ilin müvafiq dövrü ilə müqayisədə
bütün heyvandarlıq məhsullarının istehsalı
artmışdır. Həmçinin 2014-cü ildə 11652
hektar sahədə buğda, 5558 hektar sahədə arpa, 292
hektar sahədə kartof, 401 hektar sahədə bostan, 316 hektar
sahədə tərəvəz, 180 hektar sahədə dən
qarğıdalı, 3011 hektar sahədə pambıq, 620 hektar
sahədə isə şəkər çuğunduru əkilmişdir.
İlin ərzində 15002 ton arpa, 35541 ton buğda məhsulu
istehsal edilmiş və məhsuldarlıq 29,4 sentiner
olmuşdur. Həmçinin 12 ay ərzində 2873 ton kartof,
3674 ton tərəvəz, 1001 ton qarğıdalı, 18600 ton
şəkər çuğunduru, 5456 ton pambıq tədarük
edilmişdir. 2015-ci ilin məhsulu üçün 11263 hektar
sahədə buğda, 6392 sahədə isə arpa əkilmişdir.
İlin
bütün fəsillərində əhalini təzə tərəvəz
məhsulları ilə təmin etmək üçün Rayon
Telestudiyasının yaxınlığındakı 10 hektar ərazidə
yeni istixanaların inşa olunmasına
başlanılmışdır. Taxılçılğın
inkişaf etdirilməsi, yeni iş yerlərinin
yaradılması məqsədilə xarici investorları cəlb
etməklə dövlət fondu torpaqlarından 4000 hektar torpaq
sahəsinin ayrılması nəzərdə tutulmuş, həmçinin,
kənd təsərrüfatı məhsulları
istehsalının artırılması üçün “MKT”
MMC-yə 3813 hektar torpaq sahəsi verilmişdir.
2014-cü
ildə bütün maliyyə mənbələri hesabına
rayon iqtisadiyyatının və sosial sahənin inkişafı
üçün 67.009.200 manat vəsait yönəldilmiş,
onun 87,7 faizi və ya 58.805.100 manatı tikinti-quraşdırma
işlərinin yerinə yetirilməsinə sərf
edilmişdir.
Əvvəlki
illərdə olduğu kimi, keçən il də rayonda
sahibkarlığın inkişafı üçün hər
cür şərait yaradılmış, iqtisadiyyatın əsas
sahələri üzrə məhsul buraxılışında
qeyri-dövlət sektorunun payı 91,8 faiz təşkil
etmişdir. 2014-cü ildə Sahibkarlığa Kömək
Milli Fondunun vəsaiti hesabına 270 layihə üzrə
16.077.800 manat məbləğində müxtəlif növ
uzunmüddətli kreditlər verilmişdir ki, bu da 892 yeni
iş yeri açılmasına səbəb olmuşdur.
Bakı şəhərində keçirilən kənd təsərrüfatı
məhsullarının satışı yarmarkalarında
rayondan olan sahibkarların iştirakı təmin edilmişdir.
Əhalinin məşğulluğunu təmin etmək məqsədilə
25 iyul 2014-cü ildə keçirilmiş “Əmək
yarmarkası”na 345 boş iş yeri
çıxarılmış, 65 nəfər münasib işlə
təmin olunmuş, 31 nəfəri peşə
hazırlığı kurslarına göndərilmişdir.
İl ərzində 345 nəfər öz peşə və
ixtisaslarına uyğun işlə təmin olunmuşdur.
Ümumilikdə il ərzində rayonda 1445 yeni iş yeri
açılmışdır.
2014-cü
ildə gəlirləri ehtiyac meyarından aşağı olan
1530 ailəyə ünvanlı sosial yardım təyin
edilmişdir. Əhalinin həyat səviyyəsinin yüksəlməsini
səciyyələndirən orta aylıq nominal əmək
haqqı rayon üzrə 2014-cü ildə 335,4 manat
olmuşdur ki, bu da 2013-cü ilə nisbətən 30 manat və
ya 9,9 faiz çoxdur. Rayon üzrə ən yüksək orta
aylıq nominal əmək haqqı maliyyə vasitəçiliyi,
mədənçıxarma sənayesi və emal sənayesi sahələri
üzrə olmuşdur ki, həmin sahələrdə
işçilərin orta aylıq əmək haqqı 700 manat
təşkil etmişdir.
İmişli
şəhərində elektrik veriliş xətlərinin
SİP kabeli ilə əvəz olunması, qabaqcadan ödənişli
8500 ədəd SMART-kart tipli sayğacların və elektrik dirəklərinin
quraşdırılması işləri başa
çatmışdır. 2014-cü ildə rayon ərazisində
34450 metr məsafəyə SİP kabeli, 39277 metr məsafəyə
isə naqil xətlər çəkilmiş, 1964 ədəd
elektron tipli enerqomer sayğaclar
quraşdırılmışdır. İl ərzində 92 ədəd
müxtəlif gücdə olan transformatorlar təmir
edilmiş, 360 ədəd istismara yararsız dayaqlar yeniləri
ilə əvəz olunmuşdur. Bununla bərabər, rayon ərazisində
dayaqların dəyişdirilməsinə ehtiyac
böyükdür. Hazırda Bəhrəmtəpə qəsəbəsində
“Azenko” ASC tərəfindən smart-kart tipli sayğaclar
quraşdırılmış, elektrik dirəkləri və xətləri
dəyişdirilmişdir. Görülən işlər
zamanı 13,5 km məsafədə fiziki cəhətdən
köhnəlmiş 6 kv-luq kabel xətləri yenisi ilə əvəz
olunmuşdur. Bu sahədə işlər davam ertdirilir.
Rayon
Qaz İstismarı sahəsi tərəfindən 2014-cü ildə
rayonun qazlaşdırılması işi davam etdirilərək
1537 evə təbii qaz xətti çəkilmiş, bununla da
9963 abonentin təbii qazdan istifadəsi təmin edilmişdir.
Qeyri-əhali sektoru üzrə 71 abonentin də təbii qazdan
istifadəsi təmin edilmişdir. Hazırda bu sahədə
işlər davam etdirilir. Bundan əlavə, şəhər ərazisində
korroziyaya uğramış müxtəlif diametrli dəmir
borular təmir edilmişdir. 2014-cü ildə rayonun Ağaməmmədli
kəndinə maye qazın verilişi təmin edilmiş,
Otuziki və Şahverdili kəndlərində
isə qaz xəttinin çəkilməsi işlərinə
başlanılmışdır.
İmişli
şəhərinin su təchizatının yenidən
qurulması və kanalizasiya sisteminin yaradılması ilə əlaqədar
“Milli su təchizatı və kanalizasiya xidmətləri
üzrə ikinci layihə” çərçivəsində
İmişli şəhər və Yalavac kəndləri ərazisində
yaşayan əhaliyə xidmət göstərmək
üçün layihədə nəzərdə tutulmuş
9320 ədəd öncədən ödəmə sistemli smart
elektron su sayğaclarının
8320 ədədi evlərdə
quraşdırılmışdır və bu sahədə
işlər davam etdirilir. Quraşdırılmış su
sayğaclarının 7782 ədədi aktivləşdirərək
əhaliyə içməli su verilmişdir.
Rayonda
62 ümumtəhsil məktəbi, 15 məktəbəqədər,
4 məktəbdənkənar və 1 peşə təhsil
müəssisəsi fəaliyyət göstərir. Ümumtəhsil
məktəblərində təhsil alan 15223 şagirdin təlim-tərbiyəsi
ilə 1473 nəfər müəllim məşğul olur ki,
onların da 980 nəfərini və ya 67 faizini qadınlar təşkil
edir. Pedaqoji sahədə çalışanların 1113 nəfərinin
təhsili ali, 334 nəfərinin təhsili orta ixtisas, 24 nəfərinin
təhsili isə ümumi ortadır. Ötən tədris ilində
36 ümumtəhsil məktəbində birnövbəli iş
rejimi tətbiq olunmuşdur. 31 məktəbdə isə mərkəzləşdirilmiş
istilik sistemi quraşdırılmışdır. Hazırda 62
təhsil müəssisəsindən 7 məktəbdə yeni tədris
binasının tikintisinə, 8 məktəbdə isə əsaslı
təmir işlərinin aparılmasına ehtiyac vardır.
Bundan başqa, 15 məktəbəqədər tərbiyə
müəssisəsindən 12-nin yenidən tikilməsinə və
ya əsaslı təmirinə ehtiyac vardır.
2013-2014-cü
tədris ilində ali təhsil müəssisələrinə
keçirilən qəbul imtahanlarının nəticələri
təhlil edilərkən, əvvəlki illərlə
müqayisədə bu sahədə müsbət irəliləyişlərin
olduğu müəyyən edilmişdir. Belə ki, 2014-cü
ildə tam orta təhsilini başa vurmuş 1154 nəfər məzundan
460 nəfəri Tələbə Qəbulu üzrə Dövlət
Komissiyasına sənəd vermiş, onlardan da 256 nəfəri
və ya 55,6 faizi imtahanlarda uğurla iştirak edərək tələbə
adını qazanmışdır. Bu göstərici ötən
illə müqayisədə 51 nəfər çoxdur. 27 məzun
500-dən yuxarı, 7 məzun isə 600-dən yuxarı bal
toplamışdır.
Rayonda
9 xəstəxana, 12 həkim məntəqəsi, 29 tibb məntəqəsi
və 1 poliklinika, 2 gigiyena və epidemiologiya mərkəzi, 1
taun əleyhinə şöbə fəaliyyət göstərir
ki, həmin müəssisələrdə də 108 nəfər
həkim və 472 nəfər orta ixtisaslı tibb
işçisi çalışır. Hazırda rayonun səhiyyə
müəssisələrində ayrı-ayrı ixtisaslar
üzrə 60 həkim və 97 orta ixtisaslı tibb
işçisinə ciddi tələbat vardır. İl ərzində
əhaliyə göstərilən tibbi xidmətin keyfiyyətinin
yaxşılaşdırılması və səhiyyə
obyektlərinin maddi-texniki bazasının gücləndirilməsi
istiqamətində rayonda müəyyən işlər
görülmüşdür. Belə ki, Muradxanlı kənd xəstəxanası
əsaslı təmir edilmiş, Əliyetməzli və
Ağaməmmədli kənd tibb məntəqələri
üçün yeni binalar tikilmişdir, Qaragüvəndikli kənd
tibb məntəqəsinin isə tikintisi davam etdirilir. Ötən
ildə rayonda 1808 uşaq doğulmuşdur ki, onların da 97,7
faizi təqvim əsasında profilaktiki peyvəndlərə cəlb
olunmuşdur.
2014-cü
ildə İmişli-Bəhrəmtəpə, İmişliyə
giriş yolunda, İmişli-Mirili-Qaravəlili avtomobil yolunun bəzi
yerlərində təmir işləri aparılmış, 36
saylı yol istismarı idarəsi tərəfindən 825 min
manat məbləğində iş həcmi yerinə
yetirilmişdir. Türkiyənin “Kolin” şirkəti tərəfindən
Hacıqabul-Bəhrəmtəpə respublika əhəmiyyətli
avtomobil yolunda əsaslı təmir işləri
aparılır və İmişli rayonu ərazisindən
keçən 40 km məsafədə avtomobil yolu istifadəyə
verilmişdir. Bu sahədə işlər davam etdirilir.
Rabitə
xidməti sahəsində də il uğurlu olmuşdur. İl ərzində
rayon üzrə 294 abonentə telefon xətti çəkilmişdir.
Rayonun Qaravəlili kənd EATS-də 24 portluq
genişzolaqlı internet quraşdırılıb əhalinin
istifadəsinə verilmişdir. Əlavə olaraq Mərkəzi
EATS-də 320, Bəhrəmtəpə EATS-də 64, Sarıxanlı
EATS-də 96 nömrə, Qaradonlu EATS-də 64, Cəfərli
EATS-də 64, Əlqulular EATS-də 48, Bəcirəvan EATS-də
64 portluq internet avadanlıqları quraşdırılıb əhalinin
istifadəsinə verilmişdir. Genişzolaqlı internet
istifadəçilərinin sayı 2762-yə, CDMA tipli simsiz
telefonların sayı isə 440-a
çatdırılmışdır.
Əhalinin genişzolaqli internetə olan tələbatını
ödəmək üçün DSLAM avadanlıqları
olmayan EATS-də internet avadanlıqlarının
quraşdırılması nəzərdə tutulmuşdur. “Azərpoçt”
MMC-nin İmişli Regional Poçt filialı əhaliyə
müxtəlif xidmətlər göstərir (poçt, bank
xidmətləri, siğorta
haqlarının qəbulu və s). Müştəri xidmətləri
şöbəsində əhalidən su pulu, qaz, enerji
haqlarının qəbulu, eləcə də, kənd
poçt şöbələrində elektrik enerjisi
haqlarının qəbulu, Mərkəzi Bank Kütləvi
Ödənişlər üzrə Mərkəzləşdirilmiş
İnformasiya Sistemi üzrə aparılması təmin
olunmuşdur.
2014-cü
ildə sosial-iqtisadi inkişafın yekunlarının təhlili
göstərir ki, rayonda iqtisadiyyatın bir çox sahələrinin
inkişafı təmin edilmiş, İmişli şəhərində
abadlıq-quruculuq işləri yüksək zövqlə həyata
keçirilmiş, qarşıya qoyulan vəzifələrin
icrası istiqamətində yaxşı nəticələr əldə
olunmuşdur.
Bütövlükdə,
İmişlidə insanların torpağa sevgisi böyük
xariqələr yaradılmasını təmin etmişdir.
Səməd HÜSEYNOĞLU
Xalq qəzeti.- 2015.- 21 fevral.- S.5.