Bərdədə sahibkarlığın inkişafı

diqqət mərkəzindədir

Söhbət burada yaradılmış Aqro-Sənaye Parkının fəaliyyətindən gedir

Bərdə — Ağcabədi yolunun sol tərəfində, Mehdili kəndinin yaxınlığında yaşıllıqlar içərisinə qərq olmuş binalar uzaqdan diqqəti cəlb edir. Əslində bu binalar, yaşıllıq, su, elektrik, qaz, yol, bir sözlə, bütün infrastruktur son illər gözlərimiz qarşısında tikilib, qurulub, yaradılıb. Bəli, Bərdə Aqrar-Sənaye Parkı burada yerləşir.

Aqrar-Sənaye Parkının fəaliyyəti ilə tanışlığa hardan və nədən başlamaq o qədər də asan deyil. Məsələ burasındadır ki, buradakı ayrı-ayrı kompleksləri gəzmək, yaradılmış şəraitlə yaxından tanış olmaq üçün bəlkə də saatlarla vaxt lazımdır. Hər kompleks adama ayrıca bir təsərrüfat təsiri bağışlayır. Yeri gəlmişkən, ayrı-ayrı komplekslərin adlarını sadalamaq yerinə düşərdi: kənd təsərrüfatı məhsullarını saxlamaq üçün soyuducu, anbar, yem zavodu, südçülük kompleksi, ətlik kompleksi və s.

Onu da deyək ki, Bərdə Aqrar-Sənaye Parkının əsası 2011-ci ildə qoyulmuşdur. Əvvəllər tamamilə istifadəsiz, boş sahə idi. İndi isə göründüyü kimi, burada böyük komplekslər, müasir, nümunəvi bir təsərrüfat yaradılmışdır.

Öyrəndik ki, Bərdə Aqrar-Sənaye Parkında gün ərzində 30 ton süd istehsal olunur. Parkın illik ət istehsalı isə 400 tondur. Əlbəttə, bu göstəricilər hələlik ilk nəticələrdir. Nəzərdə tutulur ki, yaxın illərdə ümumi məhsul istehsalı iki dəfə artırılsın.

Aqrar — Sənaye Parkı İqtisadi İnkişaf Nazirliyinin Sahibkarlığa Kömək Milli Fondunun güzəştli krediti hesabına yaradılmışdır. Almaniyadan, Fransadan, Meksikadan, Avstriyadan gətirilmiş mal-qara, hər şeydən əvvəl, öz məhsuldarlığı və südünün keyfiyyəti ilə fərqlənir. Digər mühüm cəhət isə ondan ibarətdir ki, xarici ölkələrdən gətirilmiş mal-qara yerli torpaq və iqlim şəraitinə çox tez uyğunlaşıb.

Aqrar-Sənaye Parkının direktoru Vahid Rzayevlə çoxdan tanışıq. Əvvəllər müxtəlif rəhbər vəzifələrdə çalışıb. Təşəbbuskar, daim yenilik hissilə yaşayan, təcrübəli insandır. Əsas cəhət odur ki, təkcə uzun illər qabaqcıl təsərrüfat rəhbəri kimi qazandığı zəngin təcrübə ilə kifayətlənmir. Dünya iqtisadi proseslərindən yaxşı baş çıxarır, tez-tez xarici ölkələrə işgüzar səfərlərə gedir. İlk sualımız da elə bu barədə oldu:

— Hər halda, oxucular üçün nəinki regionda, hətta respublikamızda analoqu olmayan belə bir parkın yaranması maraqlıdır. Ona görə də yaxşı olar ki, keçilmiş yola qısa da olsa nəzər saldıq...

— Ən əvvəl onu qeyd edək ki, Bərdə Aqrar-Sənaye Parkı regionların sosial-iqtisadi inkişafı Dövlət Proqramının böyük uğurla həyata keçirilməsinin real bəhrəsidir. Digər tərəfdən, biz belə bir çətin, məsuliyyətli işə başlayarkən ölkə Prezidenti İlham Əliyevin gündəlik diqqət və qayğısına, azad sahibkarlığın daha sürətli inkişafına yaratdığı əlverişli şəraitə arxalanırdıq. Elə ona görə də nəzərdə tutulan tədbirlər vaxtında və keyfiyyətlə yerinə yetirildi.

Düzdür, işlərin böyük bir hissəsi görülüb başa çatdırılmışdır. Ancaq gələcək illər üçün də konkret tədbirlərimiz var və biz hazırda həmin işlərin icrasına başlamışıq.

İstifadəyə verilmiş komplekslərdə 200 nəfər daimi işlə təmin olunmuşdur. Onu da əlavə edim ki, burada çalışmaq müvafiq ixtisas təhsili, zəngin təcrübə və müasir iqtisadi münasibətlərdən baş çıxarmağı, iqtisadi təhlillər aparmağı tələb edir. Ona görə də mütəxəssislərin işə qəbul edilməsi əslində bir neçə mərhələdən keçir.

Bu gün Azərbaycanda sahibkarlığın inkişafı elə bir həddə çatıb ki, faydalı iş görmək istəyən adam heç bir çətinliklə, süni maneə və əngəllə rastlaşmır. Baxın, Bərdənin bir kəndində qurduğumuz, yaratdığımız müəssisənin səsi-sorağı bu gün xarici ölkələrdən gəlir. Müvafiq müqavilələr, təcrübə mübadiləsi, qarşılıqlı səfərlər isə sözsüz ki, işimizi yenidən qurmağa, müasir idarəetmə və texnologiyadan daha səmərəli istifadə etməyə kömək edir.

Məlum olduğu kimi, ölkə Prezidentinin tapşırığına əsasən, 2015-ci il “Kənd təsərrüfatı ili” elan olunmuşdur. Bu, əlbəttə, aqrar sektorun işçilərinə göstərilən böyük etimadla yanaşı, həm də yüksək məsuliyyət deməkdir. Mən yeri gəlmişkən, kənd təsərrüfatı işçiləri adından Azərbaycan Respublikasının Prezidenti İlham Əliyevə öz hədsiz təşəkkür və minnətdarlığımı bildirir, bu diqqət və qayğıya əməli işlə cavab vermək üçün bütün qüvvə və səylərimizi əsirgəməyəcəyimizi deyirəm.

Biz burada əsasən Aqrar-Sənaye Parkının fəaliyyəti üzərində dayandıq. Əlavə edək ki, ümumiyyətlə, son illər Bərdədə sahibkarlığın sürətli inkişaf etdirilməsi üçün əlverişli şərait yaradılmış, bütün qüvvə və səylər bu istiqamətə yönəldilmişdir. Nəticə isə göz qabağındadır. Bu gün rayonda istehsal olunan kənd təsərrüfatı və sənaye məhsulları demək olar ki, bütünlüklə özəl sektorun payına düşür.

Dövlət tərəfindən göstərilən diqqət və qayğının artması, yeni iqtisadi münasibətlərin formalaşması, infrastrukturun inkişaf etdirilməsi, bax, belə uğurlu nəticələrə gətirib çıxarmışdır. Təkcə belə bir faktı göstərək ki, ötən il sahibkarlıq fəaliyyəti ilə məşğul olanların sayı 3,3 faiz artaraq 9 min nəfərə çatmışdır.

Sahibkarlığın inkişafında iri fermer təsərrüfatlarının yaradılması, sənaye məhəllələrinin təşkil edilməsi prioritet istiqamət təşkil edir. Mehdili kəndindəki yeni yem istehsalı müəssisəsi, Mirzalıbəyli kəndindəki yeni heyvandarlıq kompleksi buna misaldır.

Kredit təşkilatları tərəfindən 2014-cü il ərzində 494 layihə üzrə sahibkarlara 14,8 milyon manat güzəştli kredit verilmişdir. Bu layihələrin həyata keçirilməsi nəticəsində 624 yeni iş yeri yaradılmışdır.

Güzəştli kreditlər əsasında rayonda müasir texnologiyaların tətbiqinə əsaslanan 5 min tonluq laqostik mərkəz, 20 min tonluq 2 taxıl anbarı, illik istehal gücü 20,5 min ton süd və 1,2 min ton ət olan 4700 başlıq 4 heyvandarlıq kompleksi, illik istehsal gücü 1,6 min ton quş əti olan quşçuluq təsərrüfatı, illik istehsal gücü 5 min ton olan süd emalı müəssisəsi, 82 hektar ərazidə bağçılıq təsərrüfatı, gündəlik istehsal gücü 38,6 ton olan çörək istehsalı müəssisəsi, gündəlik istehsal gücü 1,1 ton olan şirniyyat istehsalı müəssisəsi, illik istehsal gücü 5,4 min ton olan ət emalı müəssisəsi, illik istehsal gücü 46 min ton olan qüvvəli yem istehsal müssisəsi yaradılmışdır. Hazırda əhalinin ərzaq məhsulları ilə təminatında bu müəssisələr əhəmiyyətli rol oynayır.

Həyata keçirilmiş kompleks tədbirlər nəticəsində Dövlət proqramları qəbul olunandan indiyədək 25574 yeni iş yeri açılmışdır ki, bunun da 12773-ü daimidir.

Bəli, Bərdədə iqtisadi, sosial və mədəni sahədə olduğu kimi, sahibkarlığın inkişafı, müasir infrastrukturun yaradılması, bu sahədə dünya təcrübəsinin öyrənilməsi və cəsarətlə tətbiq olunması sahəsində zəngin təcrübə qazanılıb. Bu təcrübənin öyrənilməsi və geniş yayılması isə ümumi işimizə, hər şeydən əvvəl, respublikamızda milli ərzaq təhlükəsizliyinin möhkəmləndirilməsinə, daxili istehsal hesabına əhalinin əsas ərzaq məhsulları ilə etibarlı şəkildə təminatına xidmət edir.

Ziyəddin SULTANOV,

“Xalq qəzeti”nin

bölgə müxbiri

Xalq qəzeti.- 2015.- 2 iyul.- S.7.