“Nur şəhəri”nin sabahı...

Mingəçevirdə indi özgə büsat var. Azərbaycan Respublikasının Prezidenti cənab İlham Əliyevin bu şəhərə səfərindən çox az müddət keçib. Kiminlə salamlaşırsan, görüşüb söhbət edirsən, bu tarixi səfərdən danışır. Fəxrlə deyirlər ki, Mingəçevirin belə gözəlləşməsi məhz Prezident İlham Əliyevin adı ilə bağlıdır. Haqlı sözlərdir. Şəhərin 2014-cü ildə sosial-iqtisadi inkişafının yekunları və 2015-ci ildə qarşıda duran vəzifələrə həsr olunmuş hesabat yığıncağında bu barədə ətraflı söhbət getdi.

Şəhər icra hakimiyyətinin başçısı Niyazi Bayramov çıxış etdi. Uğurları sadaladı. Bildirdi ki, dövlət başçısının göstəriş və tapşırıqlarını fəaliyyət proqramı kimi qəbul edən Mingəçevir Şəhər İcra Hakimiyyəti tərəfindən hesabat ilində geniş tədbirlər görülüb və abadlıq işləri aparılıb. 2014-cü ildə şəhər üzrə ümumi məhsul buraxılışı 39 faiz artaraq 431 milyon manat təşkil edib. O cümlədən, sənaye məhsulu istehsalı 7,4 faiz artaraq 225 milyon manat olub. Əvvəlki illə müqayisədə şəhər iqtisadiyyatına qoyulan investisiyanın həcmi 2,2 dəfə artıb. Şəhərdə aparılan tikinti-quraşdırma işlərinin həcmi 3,5 dəfə, kənd təsərrüfatı məhsulları istehsalı 17, nəqliyyat xidmətləri 4,5, rabitə xidmətləri 22, ticarət dövriyyəsi isə 6,5 faiz çoxalıb.

“Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın Mingəçevir şəhərinə aid bəndlərinin icrası uğurla davam etdirilib. Dövlət Proqramının icrası ilə bağlı görülən tədbirlər nəticəsində il ərzində şəhərdə 1798 yeni iş yeri açılıb ki, onlardan 1738-i daimi iş yerləridir. Son illər Azərbaycanda müşahidə olunan iqtisadi inkişaf ölkə miqyasında olduğu kimi, Mingəçevir şəhərində də demoqrafik vəziyyətə müsbət təsir edib və şəhər əhalisinin sayı 100 min nəfəri ötüb.

2015-ci ildə ölkəmizdə keçiriləcək birinci Avropa Oyunlarının avarçəkmə yarışlarının Mingəçevir şəhərində nəzərdə tutulduğu üçün şəhərdə aparılan abadlıq və quruculuq işləri daha əhatəli olub.

Azərbaycan Respublikasının Prezidenti cənab İlham Əliyevin sərəncam və göstərişləri ilə Mingəçevir şəhərinə ayrılan vəsait hesabına saysız-hesabsız abadlıq və quruculuq işləri görülüb: hündürmərtəbəli 24 binanın 52 min kvadratmetr fasad hissəsində üzləmə, rəngləmə, işıqlandırma və dam örtüyünün əsaslı təmiri işləri aparılıb; prospekt, küçə, meydan və səkilərə 267 min kvadratmetr yeni asfalt salınıb; 49 min kvadratmetr dekorativ tamet daş döşənib; 20 Yanvar, İslamzadə, Aydın Məmmədov küçələrində və Gəncə şosesində 330 ədəd yeni, müasir işıq dirəyi quraşdırılıb; binalarda əhaliyə xidmət göstərən 48 sərnişin liftinin 32-si yeni müasir liftlərlə əvəz olunub; şəhərin 22 yolayrıcında qoyulmuş işıqfordan 20-nin yerinə saniyə göstəriciləri ilə işləyən yeniləri quraşdırılıb; Heydər Əliyev prospektində 3 ədəd müasir işıqli tablo quraşdırılıb və 28 ədəd günəş batareyası ilə işləyən yol göstəriciləri qoyulub, 19 müasir dayanacaq və 3 ədəd xidmət köşkü istifadəyə verilib, ticarət sıralarında əsaslı təmir işləri aparılıb; şəhər ərazisində mövcud olan və 40 il səmərəsiz istifadə nəticəsində istismara yararsız hala düşmüş yeganə yeraltı keçid əsaslı təmir olunub; əhalinin əsas istirahət guşələrindən olan Teatr meydanı və “Güllü bağ” əsaslı yenidən qurulub. Teatr meydanındakı fəvvarə təmir olunub, “Güllü bağ”a fəvvarə quraşdırılıb, daş və tamet döşənib, işıqlandırma sistemləri yenilənib, oturacaqlar qoyulub; Şəhidlər xiyabanı yenidən qurulub, işıqlandırma sistemi quraşdırılıb, daş döşənib, oturacaqlar qoyulub, şəhid məzarları qara mərmərlə üzlənib; İslamzadə küçəsində yerləşən birmərtəbəli yaşayış binaları, onların hasarları xüsusi materialla üzlənib, rənglənib və yeni işıqlandırma quraşdırılıb; müxtəlif ünvanlarda yerləşən hündürmərtəbəli 47 yaşayış binasının dam örtüyü əsaslı təmir olunaraq 27 min kvadratmetr metal-kirəmit örtük salınıb; aparılan abadlıq və quruculuq işlərinin davamı kimi Gəncə istiqamətində magistral yolun hər iki tərəfində əsaslı abadlıq işləri aparılıb, 3500 maşın torpaq daşınıb, 10 minə yaxın çinar, sərv, zeytun və digər ağaclar əkilib, ağacların qorunması üçün 12 min kvadratmetr yolqırağı metal tor quraşdırılıb, magistral yolların kənarına 500 metr təhlükəsizlik səddi, 800 kvadratmetr alüminium lövhə çəkilib, 2 min kvadratmetdrən çox metal hasar düzülüb. Bəli, bu işlər məhz bir il ərzində görülüb.

Hələ bu, harasıdır?! Niyazi Bayramovun deməyə sözü çox idi. O, qürurla bildirdi ki, şəhərin mərkəzi xəstəxanası əsaslı şəkildə yenidən qurulub və müasir tibbi avadanlıqla təmin olunub. Xəstə və kimsəsiz uşaqlar üçün yeni bina inşa edilib və onlar üçün lazımı şərait yaradılıb. 10 və 4 nömrəli məktəblər, 10 və 12 nömrəli uşaq bağçaları – körpələr evi əsaslı təmir olunub və lazımi avadanlıqla təchiz edilib. Şəhərdə 2 yeni bağca tikilib. Hazırda 1, 7 və 9 nömrəli məktəblərdə əsaslı təmir işləri davam edir.

Müasir layihə əsasında tam yenidən qurulan Heydər Əliyev meydanında və parkında 2014-cü ildə başlanmış işlər yüksək sürətlə davam edir və yaxın aylarda nəzərdə tutulan işlər tam həcmdə icra olunacaq.

Hesabat ilində Dövlət Proqramına uyğun istilik sisteminin bərpası, su və kanalizasiya xətlərinin yenidən qurulması işləri davam edib. Şəhərin enerji təminatı və qazlaşma işləri ardıcıllıqla aparılıb.

İl ərzində 1,3 min metr magistral su xətti, 185 min metr paylayıcı su xətləri yenilənib, 6 mindən çox “smart” tipli su sayğacları quraşdırılıb. Hər biri 10 min kubmetr olan 3 ədəd su anbarının tikintisinə başlanıb. Ötən il 76 min metr kanalizasiya xətləri çəkilib və 3 ədəd ötürücü nasos stansiyasının tikintisi davam edib.

Mingəçevir sənaye şəhəridir. Bu barədə yığıncaqda dönə-dönə danışıldı. İcra hakimiyyətinin başçısı vurğuladı ki, şəhərin ən iri sənaye müəssisəsi olan Azərbaycan İstilik Elektrik Stansiyasının mövcud 3 enerji blokunun hər biri əsaslı şəkildə yenidən qurulub. Müəssisədə işləyənlərin sayı 1029 nəfərdir, onların orta aylıq əmək haqqı 450 manat təşkil edib.

2014-cü il ərzində şəhərin digər sənaye müəssisələri “Mingəçevir SES silsiləsi”, “Azneftemaş”, “Akkord Maşınqayırma Zavodu”, “Mingəçevir -İzolit” ASC-lər, “Kür” Elektron Avadanlıqları" MMC sabit iş rejimində işləyib. Mingəçevir şəhərinin sənaye müəssisələrində ümumilikdə işləyənlərin sayı 3051 nəfər olub ki, onlardan 2324 nəfər dövlət, 727 nəfər özəl sektorda fəaliyyət göstərir. İstehsal olunan 225 milyon manat sənaye məhsulunun 201 milyon manatlığı dövlət, 24 milyon manatlığı özəl sektorun payına düşür. Sənayedə orta aylıq əmək haqqı dövlət sektorunda 394 manat, özəl sektorda isə 284 manat təşkil etməklə, 370 manat olub. Hesabat yığıncağında Mingəçevir təhsilinin uğurlarından da danışıldı. Qeyd olundu ki, 438 nəfər qəbul imtahanlarını müvəffəqiyyətlə verərək tələbə adına layiq görülüb.

2014-cü ildə Texniki Humanitar Liseyin müəllimi Sevda İsmayılovanın “Riyaziyyat-7" dərsliyi Təhsil Nazirliyi tərəfindən əsas dərslik kimi təsdiq edilib. 4 nömrəli tam orta məktəbin informatika müəllimi Natavan Mustafayeva İKT sahəsində “Əcnəbi dildəki veb resurslarının dilimizə tərcümə edərək vahid bloqda yerləşdirilməsi” layihəsinin, 13 nömrəli tam orta məktəbin ingilis dili müəllimi Gülnaz Hacıyeva “İlin ən yaxşı müəllimi”, şəhərin 3 nömrəli tam orta məktəbi, təbiət, riyaziyyat və humanitar elmlər təmayüllü lisey “İlin məktəbi” müsabiqələrinin qalibləri olublar.

Təbiət, riyaziyyat və humanitar elmlər təmayüllü liseyin şagirdi Fəridə Süleymanova Gənclər və İdman Nazirliyinin “İstedadların hazırlığı laboratoriyası” layihəsi çərçivəsində keçirdiyi Respublika Olimpiadasında I yerə layiq görülüb, 20 nömrəli tam orta məktəbin X sinif şagirdi Ayşən Məmmədli “Azərbaycan tarixi” fənni üzrə respublika olimpiadasında II yeri qazanıb, 10 nömrəli tam orta məktəbin XI sinif şagirdi Fərid Əhədli biologiya fənni üzrə İndoneziyada keçirilən beynəlxalq olimpiadada iştirak edib, 13 nömrəli tam orta məktəbin X sinif şagirdi Zaur Vəlizadə ətraf mühitin mühafizəsi beynəlxalq layihə olimpiadasında III yerə çıxaraq bürünc medala layiq görülüb.

Şahmat məktəbinin yetirməsi Aysel Səlimova isə 8 yaşadək qızlar arasında Azərbaycan cempionu, 7 yaşa qədər qızlar arasında Avropa çempionu, “Rupid” və “Blits” üzrə dünya çempionu olub. Bu il Sinqapurda keçiriləcək məktəblilərin dünya birinciliyinə vəsiqə qazanıb.

Hesabat ilində Mingəçevir Politexnik İnstitutuna 272 nəfər tələbə qəbul olunub, 252 nəfər tələbə institutu bitirib, hazırda 1059 tələbə təhsilini davam etdirir.

Azərbaycan Müəllimlər İnstitutunun Mingəçevir filialına tələbə qəbulu olmayıb,131 nəfər tələbə filialı bitirib, 449 nəfər tələbə təhsilini davam etdirir.

Mingəçevir Turizm Kollecinə 800 nəfər qəbul olunub, 694 nəfər kolleci bitirib, hazırda burada 2306 nəfər tələbə oxuyur.

Mingəçevir Tibb Kollecinə 162 nəfər tələbə qəbul olunub, 99 nəfər kolleci bitirib, hazırda kollecdə 398 nəfər tələbə təhsilini davam etdirir.

Qeyd olunan müəssisələrdə tələbələr arasında nizam-intizam məsələlərinin gücləndirilməsinə, keyfiyyət göstəricilərinin yüksəldilməsinə, müasir təlim texnologiyalarından daha səmərəli istifadə olunmasına diqqət artırılır.

Mingəçevir Şəhər Mərkəzi Xəstəxanası 14 tibb müəssisəsini birləşdirir. Burada 2192 nəfər tibb işçisi çalışır, onlardan 382 nəfəri həkimdir. Kollektiv 100 mindən çox şəhər, 20 mindən yuxarı məcburi köçkün və qaçqın ailələrinə, eləcə də müraciət edən ətraf rayonların əhalisinə tibbi xidmət göstərir.

Sonra natiq Mingəçevirdə səhiyyə, mədəniyyət sahəsində atılan addımlardan danışdı, əldə olunan uğurları, habelə problemləri qeyd etdi, 2015-ci ildə görüləcək işləri sadaladı. Yığıncaqda çıxış edən digər natiqlər də görülən işləri müsbət qiymətləndirdilər. Bildirdilər ki, “Nur şəhəri”nin sabahı bax beləcə aydındır. Son bir ildə Mingəçevir dünyanın bir sıra şəhərləri ilə rəqabətə girəcək bir məkana çevrilib.

Yığıncaqda Prezident Administrasiyasının məsul işçisi Vəfadar Bağırov və Milli Məclisin deputatı Aydın Mirzəzadə çıxış etdilər.

İlqar HƏSƏNOV

Xalq qəzeti.- 2015.- 5 mart.- S.6.