Azərbaycanın bölgələrində də

seçkilər siyasi fəallıq şəraitində keçdi

Gəncə

Gəncədə parlament seçkilərinə əhalinin marağı böyükdür. Biz qəzetimizin ötən nömrəsində qeyd etmişdik ki, şəhərdə adamların seçki əhval-ruhiyyəsi açıq- aşkar hiss olunur. Elə seçki günü səhər tezdən bu, bir daha özünü göstərdi. Budur, 38 saylı Nizami I seçki dairəsi üzrə 16 saylı seçki məntəqəsindəyik. Səhər tezdən olmasına baxmayaraq, məntəqəyə xeyli seçici gəlib. Öyrənirik ki, məntəqə üzrə 1495 seçici qeydə alınıb. Onlardan 5 nəfəri ilk dəfə səs verir. Ən yaşlı seçicinin 83 yaşı var. Bütövlükdə, dairə üzrə 6 namizəd mübarizə aparır.

Yenicə səs verib çıxan seçicilərdən biri — Azərbaycan Respublikasının Xalq artisti, tanınmış müğənni Şahnaz Haşımova ilə rastlaşırıq. Hal-əhvaldan sonra səsvermənin gedişi ilə maraqlanırıq. Deyir ki, deputatlığa namizədin seçki kampaniyasında da yaxından iştirak edib. Buradakı səliqə- sahman, nizam- intizam çox xoşuna gəlib. Millətinə, xalqına vicdanla xidmət edə biləcək namizədə səs verib.

Şəhərdəki 39 saylı Kəpəz seçki dairəsinin 8 və 9 saylı məntəqələrində olarkən xarici müşahidəçilərlə rastlaşdıq. Onların ilkin təəssüratları çox yüksək idi.

Ömər Kocaman, Türkiyə:

– Xoş bir təsadüfdir ki, bu gün bizim ölkədə də parlament seçkiləri keçirilir. Azərbaycan da, Türkiyə də artıq bütün dünyaya sübut ediblər ki, əsl demokratik, azad və şəffaf seçki keçirmək mümkündür və bunu bizim ölkələrin timsalında görmək olar. Mən bilmirəm, bundan artıq nə etmək olar. Seçicilərə heç bir təsir göstərilmir, veb- kameralar quraşdırılıb, hər kəs öz istədiyi namizədə sərbəst şəkildə səs verir. Heç bir nöqsana rast gəlmirik. Demək istəyirəm ki, Azərbaycanın bu qədim şəhəri seçki mədəniyyəti nümunəsi göstərir.

Amantay Şarip, Qazaxıstan: — Biz şəhərə bir gün əvvəl gəlmişik və vaxtımız az olsa da, Gəncənin görməli yerləri ilə tanış olmuşuq. Çox gözəl şəhəriniz var. Adamlarla söhbət edərkən bir daha əmin olduq ki, sizdə seçkilərə çox böyük maraq var. Dünən eşitdiklərimizin reallığını bu gün öz gözlərimizlə gördük və heyran qaldıq. Bax əsl demokratik seçki budur. Burada adamlar o qədər sərbəst, cəsarətlidirlər ki, onlara seçki ilə bağlı heç kim, heç bir irad tuta bilməz.

Məntəqə seçki komissiyasının sədri Füzuli Musayev bizimlə söhbət zamanı bildirdi ki, bütövlükdə səsvermənin gedişini 14 müşahidəçi izləyir. Narazılıq, şikayət yoxdur.

Sonda məlum oldu ki, 37 saylı Nizami I seçki dairəsində seçicilərin 47 faizi, 38 saylı Nizami II seçki dairəsində 50,2 faizi, 39 saylı Kəpəz I seçki dairəsində 48,7 faizi, 40 saylı Kəpəz II seçki dairəsində isə 46,8 faizi səs verib.

Sumqayıt

Gənclik şəhərində vətəndaşların demokratik şəraitdə, rahat və maneəsiz səs vermələri üçün hər cür şərait yaradılmış dörd seçki dairəsi 154 məntəqəni birləşdirir. Bu seçki məntəqələrinin 38-də səsvermə prosesini internet vasitəsilə onlayn izləmək mümkün olub. Sumqayıtlıların çoxu vətəndaşlıq borcunu yerinə yetirmək üçün səhər saat 8-dən seçki məntəqələrinə gəliblər. Onların arasında ağsaqqallar və ilk dəfə səs verən gənclər də az deyildi. Bu insanlar öz seçimlərini etməklə respublikamızın çiçəklənməsinə və tərəqqisinə səs vermələrindən məmnun idilər.

Ümumilikdə, Sumqayıtda 161 min 518 seçici qeydə alınmışdır. 42 saylı Sumqayıt ikinci seçki dairəsi seçki komissiyasının sədri Ruslan Hacıyev dedi ki, dairənin əhatə etdiyi yaşayış ərazilərində 41 449 seçici qeydiyyata alınıb. Onlardan 279-u ilk dəfə səs verənlərdir. 80-100 yaşlı 622 seçici var. Bir nəfərin isə yaşı 100-ü keçib. Xəstəlik keçirən, hərəkəti məhdud olan və məntəqəyə gəlməkdə çətinlik çəkən digər bu kimi seçicilər də nəzərə alınıb.

Dairənin 33 saylı məntəqəsində Avropa Strateji Araşdırmalar və Təhlükəsizlik Mərkəzinin icraçı direktoru, Belçikadan olan rus əsilli Jevgeniya Qvozdyeva bizimlə söhbətində gördüklərinin ona pozitiv təsir bağışladığını bildirdi:

—Mən bir sıra ölkədə seçkiləri izləmişəm. Sizdə olan səliqə-sahman daha nümunəvidir. Veb-kameralar, seçicilərin baş barmağına bənövşəyi boya vurulması kimi müsbət prosedurları xüsusi olaraq qeyd edirəm. Bir də ki, Sumqayıtda məntəqə komissiyası üzvlərinin, seçkilərin keçirilməsinə məsul olan hər kəsin yüksək cavabdehlik hissinə malik olması diqqətçəkəndir. İlkin müşahidələrimə əsasən deyə bilərəm ki, seçkilər düzgün təşkil olunub.

Biz 42 saylı ikinci seçki dairəsinin 34 və 35 saylı məntəqələrinin qarşısında müstəqil qrupların “exit-poll” keçirdiklərinin şahidi olduq.

Şəhərin mərkəzində yerləşən 44 saylı Sumqayıt-Xızı seçki dairəsinin komissiya sədri Məzahir Süleymanovun bildirdiyinə görə, burada 44 494 nəfər seçici qeydiyyata alınıb. Onlar üçün dairəyə daxil olan 48 məntəqənin hamısında təlimata uyğun şərait yaradılıb. Dairə komissiyasının tərkibində YAP, Ana Vətən, Böyük Quruluş, Azərbaycan Demokratik İslahatlar partiyalarını təmsil edən şəxslər və bitərəflər cəmləniblər.

Dairənin 9 məntəqəsində veb-kameralar quraşdırılıb. Xaricdən gəlmiş müşahidəçilər dairənin 1, 10, 20, 21, 31, 38 saylı və digər məntəqələrində səsvermənin gedişini izləyiblər. MDB dövlətlərini təmsil edən müşahidəçilərdən Mixail Lonkin, Sukles Urmas, Mirsek Kurmet, Yevgeni Sokogin və başqaları ciddi pozuntu halları ilə rastlaşmadıqlarını qeyd ediblər. Türkiyədən gəlmiş müşahidəçilər qrupu da əksər seçki məntəqələrinə baş çəkərək səsverməni izləyib.

Günün sonunda öyrəndik ki, 41 saylı Sumqayıt I seçki dairəsində 52,5 faiz, 42 saylı Sumqayıt II seçki dairəsində 50,5 faiz, 43 saylı Sumqayıt III seçki dairəsində 50,1 faiz, 44 saylı Sumqayıt – Xızı seçki dairəsində 51,2 faiz seçici səsvermədə iştirak etmişdir.

Yevlax

Növbəti parlament seçkilərində Yevlax seçiciləri 48 saylı Yevlax və 49 saylı Yevlax – Mingəçevir seçki dairələrində öz iradələrini ifadə edirlər. Biz seçkilərin gedişi haqqında ilk məlumatı 48 saylı Yevlax dairəsinin sədri Yaşar Abbasovdan aldıq:

– Dairə üzrə seçicilərin sayı 33284 nəfərdir. Onlar 30 seçki məntəqəsində səs verirlər. Onu da bildirirəm ki, seçkilərin azad, ədalətli və obyektiv keçirilməsi üçün bütün məntəqələrdə hər cür şərait yaradılmışdır. 15 məntəqədə veb-kamera quraşdırılmışdır. Müntəzəm olaraq məntəqələrlə əlaqə saxlayırıq. Aldığımız məlumat belədir ki, hər yerdə işlər yaxşı gedir, seçicilərin fəallığı yüksəkdir.

29 saylı məntəqəyə baş çəkdik. Məşhur fermer, Sosialist Əməyi Qəhrəmanı, “Qəhrəman ana” Şamama Əliyeva yenicə səs vermişdi:

– İstədiyim namizədə səs verdim. Heç bir təsirə, maneəyə və başqa neqativ hallara rast gəlmədim. Məntəqədə səsvermənin azad, ədalətli və obyektiv keçirilməsi üçün hər cür şərait yaradılmışdır. İndi vəziyyət elədir ki, heç kimə təsir etmək, fikrindən döndərmək mümkün deyil. Ona görə ki, hamı hər şeyi yaxşı görür və qiymətləndirir. Biz o adamı Milli Məclisdə görmək istəyirik ki, daim bizim yanımızda olsun, çətinlik və problemlərin həllində kömək əlini uzatsın. Birdəfəlik başa düşmək lazımdır ki, təmtəraqlı sözlərlə etibar qazanmaq mümkün deyil.

Bərdə

Səhər tezdəndir. Havanın soyuq, yağışlı olmasına baxmayaraq, şəhərdə və kəndlərdə bir canlanma, yüksək əhval-ruhiyyə, fəallıq dərhal nəzərə çarpır. Seçicilər dəstə-dəstə seçki məntəqələrinə yaxınlaşır, istədikləri namizədə səs verirlər.

Öyrəndik ki, Bərdədə 93 və 94 saylı seçki dairələri fəaliyyət göstərir. Biz əvvəlcə 93 saylı DSK-da olduq. Dairənin sədri Asif Hüseynov bizi səsvermənin gedişi ilə tanış etdi:

– Bizim dairə üzrə 54 məntəqə yaradılmışdır. Seçicilərimizin sayı isə 44731 nəfərdir. Əlbəttə, əsas vəzifəmiz dairə və məntəqələrin seçkilərə vaxtında və keyfiyyətli hazırlığını təşkil etmək, burada hər cür şərait yaratmaqdan ibarət idi. Belə də etmişik. Ona görə də hazırda səsvermənin gedişində heç bir çətinlik yoxdur.

45 saylı məntəqənin sədri Səyyarə Həsənova bizi ilk səs verən bir ailə ilə tanış etdi. Öyrəndik ki, Vaqif Fətullayev Azərbaycan Müəllimlər İnstitutu Ağcabədi filialında, həyat yoldaşı Ləman İsgəndərova isə Qaradəmirçi kənd məktəbində müəllim işləyirlər. Vaqif müəllim seçkilərin gedişi haqqında öz fikir və ürək sözlərini belə ifadə etdi:

– Ölkəmiz müstəqillik əldə etdikdən sonra bütün parlament seçkilərində ailəliklə iştirak etmişik. Ancaq etiraf edim ki, bu dəfəki seçkilər daha azad, ədalətli və şəffaf şəraitdə keçir. Heç bir kənar təsir hiss etmədik. Hamı öz iradəsini sərbəst şəkildə ifadə edir, istədiyi, inandığı namizədə səs verir.

Tərtər

28 saylı Bala Zərgərli seçki məntəqəsi. Biz bura günortadan sonra gəldik. Seçki məntəqəsinin sədri Rəşid Şahbazov bildirdi ki, indiyə kimi seçicilərin yarısından çoxu məntəqəyə gəlmiş, öz iradəsini sərbəst şəkildə ifadə etmişlər. Ümumiyyətlə, seçicilərimizin sayı 389 nəfərdir. Seçici fəallığı gözlədiyimizdən də yüksəkdir. Gördüyünüz kimi, məntəqəmizdə hər cür şərait yaradılmışdır. Elektrik, su, yol kimi məsələlər vaxtında həll edilmiş, lazım olan hallar üçün xüsusi avtomobillər ayrılmışdır.

Ümumiyyətlə, 95 saylı Tərtər Seçki Dairəsində seçicilərin sayı 40834 nəfərdir. Öyrəndik ki, günün yarısı olmasına baxmayaraq dairə üzrə seçicilərin 60 faizindən çoxu artıq öz istədikləri, etibar etdikləri namizədə səs vermişlər.

Biz günün sonunda adları çəkilən, o cümlədən Zərdab, Ağdaş, Göygöl, Goranboy, Ağcabədi, Füzuli, Ağdam royonları ilə bir daha əlaqə saxladıq, seçkilərin yekunu ilə maraqlandıq. Hər yerdə bu mühüm ictimai-siyasi kompaniyanın yüksək mütəşəkkilliklə, fəallıq və işgüzarlıq şəraitində keçdiyini bildirdilər.

Xaçmaz

Seçki günü şimal bölgəsində, o cümlədən Xaçmazda havanın temperaturu əvvəlki günlərə nisbətən bir qədər də enmişdi. Yerdə qar olmasa da, əsl qış havası idi. Bununla belə, şəhərin küçə və meydanları əvvəlki günlərlə müqayisədə daha izdihamlı idi. Bayramsayağı geyinmiş insanlar dəstə-dəstə seçki məntəqələrinə tələsirdilər. Ayrı-ayrı məntəqələrdə səs vermək üçün əməlli-başlı növbə yaranmışdı. Ümumilikdə, Xaçmaz seçiciləri 55 saylı Xaçmaz şəhəri və 56 saylı Xaçmaz kənd seçki dairəsini birləşdirən 86 məntəqədə səs vermişlər. Səhər saat 10-da 55 saylı Xaçmaz seçki dairəsi üzrə seçicilərin 14,6 faizi, 56 saylı Xaçmaz kənd seçki dairəsi üzrə isə 16,4 faizi məntəqələrə gələrək özünün seçim hüququndan istifadə etmişdir. 917 nəfər xaçmazlı gənc ilk dəfə olaraq seçkilərdə iştirak etməklə Azərbaycan parlamentinin yeni tərkibinin formalaşmasına öz töhfəsini vermişdir. Xaçmazlı seçicilər 55 saylı dairədə deputat mandatı uğrunda mübarizə aparan 6, 56 saylı dairədə isə 7 namizəd arasında seçim etməli olmuşlar. Saat 19-a olan yekun məlumatına görə, 55 saylı Xaçmaz seçki dairəsində seçicilərin 56,9 faizi, 56 saylı Xaçmaz kənd seçki dairəsində isə 58,3 faizi səsvermə hüququndan istifadə etmişlər.

Seçkilərin gedişi 1000 nəfərdən çox yerli və habelə müxtəlif ölkələri və beynəlxalq təşkilatları təmsil edən müşahidəçilər tərəfindən izlənilmişdir. Rayon üzrə 22 məntəqədə veb-kameralar quraşdırılmışdır. Dairə seçki komissiyalarının sədrlərindən aldığımız məlumata görə, seçkilərin təşkili və səsvermə prosesinin gedişi zamanı heç bir ciddi qanun pozuntusu qeydə alınmamışdır.

Samux

Samuxda seçki günü yüksək fəallığın olacağını sanki əvvəlcədən bilirdilər. Xüsusilə bu dəfə gənclərin daha fəal olacaqlarını söyləyənlər də çox idi. Rayonda seçki ərəfəsində gənclərlə aparılan iş də öz səmərəsini verməli idi. İki həftə qabaq gənclərlə “Sənin səsin, sənin gələcəyindir” adlı maarifləndirici görüşlərin keçirilməsi də noyabrın 1-də seçkinin fəal olacağından xəbər verirdi.

102 saylı Samux- Şəmkir seçki dairəsinin 3 saylı seçki məntəqəsində olarkən bir daha hiss etdik ki, seçicilərin fəallıığı əvvəlki parlament seçkilərindən yüksəkdir. Rayon mərkəzindəki 1 saylı seçki məntəqəsində səsvermə üçün hər bir şəraitin yaradıldığının şahidi olduq. Müşahidəçilər səsvermənin gedişini sərbəst şəkildə izləyirdilər. Adamlar bülleten almaq üçün növbəyə dayanmışdılar. Səs verib çıxan Anar Qasımova yaxınlaşır və təəssüratını öyrənmək isyəyirik ki, bayırda gözləyən övladları Zeynal və Vüsal onu bizdən qabaq sorğu- suala tuturlar: “Ata, kimə səs verdin”, “onun adını de də, nə olar” – deyə əl çəkmirlər. Ata isə gülümsəyərək “axşam deyərəm” – deyib bizim sualları cavablandırdı:

– Səsvermə o qədər gözəl təşkil olunub ki, söz tapa bilmirəm. Qərb dediyimiz bəzi ölkələrdə necə təşkil olunub, öz işləridir, qarışmırıq. Amma hər halda, öyrənmək istəsələr, Samuxa gəlmələrini məsləhət bilərdim.

102 saylı Samux- Şəmkir seçki dairəsində 51 məntəqə fəaliyyət göstərir. Seçicilərin sayı isə 44 min 976 nəfərdir.

Rayonun Ziyadlı, Sərkar, Çobanabdallı və bir sıra digər kəndlərindəki seçki məntəqələrinə də baş çəkdik. Seçici fəallığı açıq- aşkar hiss olunurdu.

Ziyadlı kənd orta məktəbindəki 10 saylı məntəqə seçki komissiyasından dedilər ki, məntəqə üzrə 777 seçicidən artıq 70 faizi səs verib.

Seçki başa çatarkən məlum oldu ki, 102 saylı Samux-Şəmkir seçki dairəsi üzrə səsvermədə 55,8 faiz seçici iştirak edib.

Quba

Noyabrın 1-də Milli Məclisə keçirilən seçkilərdə 52 saylı Quba və 53 saylı Quba – Qusar seçki dairələri üzrə 11 nəfər namizəd deputat mandatı uğrunda mübarizə aparmışdır. Səhər saat 10-dək 52 saylı dairədə seçicilərin 14,4 faizi, 53 saylı dairədə isə 14,3 faizi səsvermədə iştirak etmişdir.

Seçkilərin tam azad və demokratik şəraitdə keçməsini təmin etmək üçün seçki dairələrinin hər birində 10 veb-kamera işləmişdir. 52 saylı dairə seçki komissiyasının sədri Mübariz Abbasovdan aldığımız məlumata görə, onun rəhbərlik etdiyi dairə üzrə seçici siyahılarına 45005 nəfərin adı daxil edilib. Onlardan 354 nəfəri ilk dəfədir ki, səs vermə hüququndan istifadə edir. Komissiya sədri səhər saatlarından başlayaraq ayrı-ayrı məntəqələrdə, o cümlədən 3, 6, 9, 38 və 39 saylı məntəqədə seçici fəallığının daha yüksək olduğunu bildirdi.

47000 nəfər seçicini əhatə edən 53 saylı Quba — Qusar seçki dairəsində də Milli Məclisə beşinci çağırış seçkilər mütəşəkkil keçmişdir. Həmin dairədən olan seçicilər 76 məntəqədə səs vermişlər. Seçkilərin gedişi 767 nəfər yerli müşahidəçi tərəfindən izlənilmişdir. Dairə seçki komissiyasının sədri Rahim Qarayevin verdiyi məlumata görə, məntəqələrdən heç birində qanun pozuntusu qeydə alınmayıb. Komissiya sədri rayonun İkinci Nügədi kəndindəki 7 və 9 saylı, habelə Zərdabi qəsəbəsindəki 21 saylı və Hacı Hüseynqulu kəndindəki 31 saylı məntəqələrdə seçicilərin fəallığının daha yüksək olduğunu bildirdi. Dairə seçki komissiyalarından aldığımız yekun məlumata görə 52 saylı Quba seçki dairəsi üzrə seçicilərin 56,4 faizi, 53 saylı Quba – Qusar seçki dairəsi üzrə isə 57,9 faizi seçkilərdə iştirak etmişdir.

Zaqatala

Fadimay Əsgərova ilə çox görüşmüşəm. 116 yaşı var. Zaqatalanın Çobankol kəndində yaşayır. Bu yaşa çatsa da, yaddaşı yerindədir. Maraqlı müsahibdir. Həmişə belə adamlarla söhbət edəndə ürəyimdən keçib ki, kaş bütün gördüklərini qələmə ala, maraqlı söhbətləri ipə-sapa düzə. Təbii ki, Fadimay nənə bu gün xatirələrini yazmaq iqtidarında deyil. Bütün bunlar barədə biz jurnalistlər düşünməliyik. Söhbət edirik: “Oğul, indiyədək neçə seçkidə iştirak etmişəm, dəqiq xatırlamıram, – dedi. – İnan, bəlkə də ikisində-üçündə olmamışam. Amma həmişə məntəqəyə getmişəm. Getmişəm ki, özüm səs verəm. Bu dəfə isə nə gizlədim, ayaqlarım sözümə baxmır. Təklif etdilər ki, səsvermə qutusunu evə gətirsinlər. Razılaşmaqdan başqa çarəm qalmadı”.

Seçki günü 34 saylı məntəqənin sədri Murad Nurullayevlə əlaqə saxlayanda bildirdi ki, məntəqəmizdə 1177 seçici var və artıq onların 400 nəfəri səs verib.

– Bəs Fadima xala necə, səs verdimi, – deyə soruşdum. – Əlbəttə, – dedi. – Evlərinə getdik.

110 saylı Zaqatala dairə seçki komissiyasının bütün mətəqələrində qələbəlik oldu. Hamı gəldi, istədiyi namizədə səs verdi. Dairə seçki komissiyasının sədri Fikrət Mustafayevlə söhbət zamanı bildirdi ki, 47 məntəqədə 542 nəfər müşahidəci qeydiyyatdan keçib. 46 min 107 nəfər seçicimiz var. 5 məntəqədə veb kamera quraşdırılıb. Indiyədək heç bir məntəqədən qanun pozuntusu ilə bağlı müraciət olmayıb.

Həmin gün bir neçə məntəqədə olduq. Seçicilərlə görüşdük. Əliabad qəsəbəsindəki 9 saylı məntəqəyə ilk dəfə səs verməyə gəlmiş Nailə Məmmədova dedi: “İnanın, səhərə qədər sevincimdən yatmamışam. Fəxr edirəm ki, bu gün ürəyim istəyən namizədə səs verdim. Dəməli, müstəqil Azərbaycanın müstəqil vətəndaşı kimi mənim səs vermək hüququm var.”

Günün sonunda 110 saylı dairə seçki komissiyasının sədri Fikrət Mustafayevə zəng vurduq. Bildirdi dairə üzrə 52,5 faiz seçici səs vermişdir.

Qax

Soyuq havalarda Qaxda olmağın başqa ləzzəti var. Mən dəfələrlə yazmışam. Qaxlılar qədər öz yurd- yuvalarını sevənlərə çox az rast gəlmişəm.

Jurnalist həmkarım Mustafa Dadaşovla məntəqələri gəzirik. Kimi dindirsən, bugünkü seçkiyə həvəslə gəldiyini deyir.

112 saylı Qax dairə seçki komissiyasının sədri Abdukərim Əliyev bildirir ki, 41 min 741 nəfər seçici 58 məntəqədə səs verəcək. 8 məntəqədə veb-kamera quraşdırılıb. Seçicilərin səsverməsi üçün bütün şərait yaradılıb. Məntəqələrlə hər an əlaqəmiz var.

746 nəfər bu gün ilk dəfə səs verəcək. Amma məni sevindirən başqa məsələdir. İlk dəfə səs verənlərin üç nəfərin 18 yaşı məhz bu gün-noyabrın 1-də tamam olur. Mərkəzi Seçki Komisiyası tərəfindən hər üçünə xüsusi dəvətnamə göndərilib. Bu, bir tarixdir. Aradan illər keçəcək, bu gün onların yaddaşında əbədi qalacaqdır.

Qax peşə liseyində yerləşən 8 saylı məntəqəyə gəlirik. Xeyli adam var. Yaxınlaşıb, onlardan biri ilə tanış oluruq. Xavər Əfəndiyeva səsverməyə nəvəsi Tahirlə gəlib. O bildirir: Burada hər şey ideal səviyyədə təşkil olunub. Seçicilər istədikləri namizədə müdaxiləsiz, sözsüz-söhbətsiz səs verə bilirlər. Mən də səsimi layiq bildiyim namizədə verdim. Məntəqənin seçki komissiyasının sədri Ələkbər Musayev deyir: – “1121 nəfər burada səs verməlidir. Kimdən istəsəniz soruşa bilərsiniz. Seçkinin şəffaflığına söz ola bilməz”.

Axşama yaxın 112 saylı dairə seçki komissiyasının sədri Abdulkərim Əliyevlə yenidən əlaqə saxladıq. Bildirdi ki, seçicilərin 57,04 faizi seçkilərdə iştirak edib.

İsmayıllı

İsmayıllıya yağan yağış hələ də dayanmayıb. Uzun illər rayon təhsilinə rəhbərlik etmiş, hamının ziyalı, ağsaqqal kimi hörmət etdiyi Fərman Bəşirovla dayanıb söhbət edirik. Son vaxtlar İsmayıllıda görülən abadlıq, tikinti-quruculuq işlərindən danışır. Fəxrlə bildirir ki, indi İsmayıllı həmin İsmayıllı deyil. Başdan-başa dəyişib, gözəlləşib. Yaxından, uzaqdan, demək olar ki, hər gün qonağı var. Ən əsası isə burada böyük sözünə, ziyalı fikrinə hörmətlə yanaşılır.

Düz sözə nə deyəsən? Bu başqa bir yazının mövzusu olsa da, Fərman müəllimin dediklərini yazmaya bilməzdim.

Fərman Bəşirovdan ayrılıram. O, getməlidir. Getməlidir ki, seçki məntəqəsində özünün ürəyindən keçən namizədə səs versin.

Doğrusu, həmin namizədin kim olduğunu heç soruşmadım da. Fikirləşdim ki, birdən qəlbinə toxunar. Amma soruşmağın nə mənası? Fərman Bəşirov ağı-qaradan seçməyi yaxşı bilir. Bilir ki, kim İsmayıllıların sözünü yuxarı kürsülərdə daha sanballı deyə bilər.

Həmin günü İsmayılladakı hansı seçki məntəqəsində olduqsa, kiminlə söhbət etdiksə, hamının fikri bir oldu: “Seçki ədalətli, demokratik, şəffaf keçir. Heç kəsin səs verməsinə müdaxilə yoxdur. Yaxınlaş, sənədi göstər, bülletenini al, səsvermə kabinəsinə gir, məsləhət bildiyin nazmizədə səs ver və vəssalam”.

86 saylı dairə seçki komissiyasının sədri Əlirəmzi Məhərrəmov qeyd etdi ki, 41 min 50 nəfər seçici var. 69 məntəqənin 6-da veb-kamera quraşdırılıb. Seçkinin gedişini 875 nəfər müşahidəci izləyir.

Yaxşısı budur, gəlin, Rusiya Mərkəzi Seçki Komissiyasnın sədri Vladimir Çurovun fikirlərini dinləyək: “Bir çox məntəqələrdə olduq. Düzü seçkinin bu dərəcədə şəffaf, demokratik keçiriləciyini gözləmirdim. Sevinirəm ki, Azərbaycanda mükəmməl seçki sistemi yaradılıb. Sizə uğurlar arzulayıram.”

Qəzet çapa hazırlanarkən Əlirəmzi Məhərrəmov redaksiyaya zəng vurdu: “Seçicilərin 56 faizi seçkildə iştirak etdi.

Xalq qəzeti.- 2015.- 2 noyabr.-S.11.