Ölkə Prezidentinin diqqət və qayğısı Azərbaycan təhsilini yeni inkişaf səviyyəsinə qaldırmışdır

Yeni dərs ilinin başlanmasına az qalıb. Ayrı-ayrı şəhər və rayonlarda keçirilən ənənəvi sentyabr konfranslarında görülmüş işlərə yekun vurulur, əldə edilmiş uğurlar geniş təhlil edilir. Belə bir yekdil fikir ifadə edilir ki, ölkə Prezidenti İlham Əliyevin təhsilə, təhsil işçilərinə göstərdiyi diqqət və qayğı, bu istiqamətdə imzaladığı fərman və sərəncamlar, qəbul edilən dövlət proqramları nəticə etibarilə sahənin sürətli inkişafı, onun maddi-texniki bazasının daha da möhkəmləndirilməsilə nəticələnmişdr. Bölgə müxbirimiz bu günlərdə Yevlax, Ağdaş və Göygöl rayonlarında olmuş, yeni dərs ilinə hazırlıqla bağlı görülmüş tədbirlərlə maraqlanmışdır. Aşağıda həmin rayonların təhsil şöbələrinin rəhbərlərinin dediklərini dərc edirik.

Y e v l a x

Raqub Mirzəyev, Yevlax Şəhər Təhsil Şöbəsinin müdiri:

– Yeni dərs ilinə hazırlıqla əlaqədar ümumtəhsil məktəblərimizin hamısında təmir işləri aparılmış, lazımi inventar və avadanlıqlarla təchiz edilmişdir. Hazırda şəhər təhsil şöbəsi üçün tikilmiş yeni inzibati binada son tamamlama işləri aparılır. Bu tədris ili üçün 141 adda 47394 nüsxə dərslik alınmışdır. 2015 – 2016-cı tədris ilində ümumtəhsil müəssisələrinə müəllimlərin işə qəbulu üzrə Təhsil Nazirliyinin keçirdiyi müsabiqənin nəticəsinə uyğun olaraq verilmiş 9 vakant yerdən 5 nəfəri təhsil nazirinin əmri ilə öz yerini tutmuşdur.

Böyük fərəh hissi ilə qeyd etmək istəyirəm ki, pedaqoji kollektivlərimiz son 10 il ərzində ali məktəblərə qəbul sahəsində ən yüksək göstəricilərə nail olmuşdur. 2015-ci ildə məktəblərimizi 1039 nəfər şagird bitirmişdir. Onlardan 603 nəfəri ali məktəblərə sənəd vermiş, 301 nəfər qəbul olunmuşdur. Məzunlardan 10 nəfər 600-dən, 24 nəfər isə 500-dən yuxarı bal toplamışdır.

2015–2016-cı dərs ilində V-VIII siniflərdə dərs aparacaq kurikulum təlimlərindən keçməyən kimya, riyaziyyat, informatika, fizika, coğrafiya, tarix, Azərbaycan dili və ədəbiyyatı, texnologiya fənləri və ibtidai sinif üzrə 129 nəfər müəllim 60 saatlıq proqram əsasında 10 günlük təlimlərə cəlb edilmişdir.

Yeni dərs ilində rayonun ümumtəhsil məktəblərində 16284 şagird təhsil alacaqdır. O cümlədən, 1741 şagird I sinifdə oxuyacaqdır. Şagirdlərin məktəbli forması ilə təmin edilməsi üçün valideynlərlə söhbətlər aparılmışdır.

Rayon üzrə xüsusi istedada malik uşaqların vaxtından əvvəl I sinfə qəbulu üçün 16 sentyabr – 31 dekabr müddətində 6 yaşı tamam olan 160 nəfər şagirdin valideyni ərizə ilə müraciət etmiş, həmin uşaqlar 1-10 sentyabr 2015-ci il tarixlərində xüsusi komissiya tərəfindən müsahibədən keçiriləcəkdir.

Ötən dərs ilində Təhsil Nazirliyi tərəfindən fənn olimpiadalarının “Qaydaları” yeniləşdirilmiş, bütün turlar nazirliyin tərtib etdiyi testlər əsasında keçirilmişdir. Fənn olimpiadalarının rayon turunda 8 fənn üzrə 366 nəfər IX-XI sinif şagirdləri iştirak etmişdir. Həmin şagirdlərdən hər fənn üzrə ilk üç yeri tutan 34 nəfər respublika mərhələsinin yarımfinal turunda iştirak etmək hüququ qazanmışdır. Final turunda 3 nəfər şagird iştirak etmişdir. Onlardan şəhər 3 nömrəli məktəbin XI sinif şagirdi Elvin Hacıyev tarix fənni üzrə I yeri tutaraq “Qızıl medal”a, Gülövşə kənd tam orta məktəbin XI sinif şagirdi Nurlan Yusifov III yeri tutaraq “Bürünc” medala, şəhər 8 nömrəli tam orta məktəbin X sinif şagirdi Cavid Əliyev coğrafiya fənni üzrə iştirak sertifikatına layiq görülmüşlər.

Daha bir sevindirici cəhət ondan ibarətdir ki, 2015–2016-cı ildə tələbə adını qazanan məzunlardan 5 nəfəri müxtəlif ali hərbi məktəblərə, 6 nəfər C.Naxçıvanski adına Hərbi Liseyə qəbul olunmuşdur. Ümumiyyətlə, son 9 il ərzində hərbi məktəblərə qəbul olan məzunların sayı 207 nəfərə çatmışdır.

A ğ d a ş

Lütvü Paşayev, Ağdaş Rayon Təhsil Şöbəsinin müdiri:

– Bu gün xalqımız, dövlətimiz məktəbin qarşısında çox mühüm, məsuliyyətli vəzifələr qoymuşdur. Heç vaxt məktəb həyatının ritmi indiki kimi dolğun, məzmunlu və gərgin olmamışdır. 2014–2015-ci dərs ilində rayonumuzda 68 ümumtəhsil məktəbi fəaliyyət göstərmişdir. Onlardan 41-i tam orta, 18-i ümumi orta, 9-u isə ibtidai məktəbdir.

2014-2015-ci dərs ilində rayonun ümumtəhsil məktəblərində 14068 şagird təhsilə cəlb olunmuşdur. Şagirdlərin təlim-tərbiyəsi ilə 2204 nəfər müəllim məşğul olmuşdur. Bundan əlavə, rayonda uşaq gənclər idman məktəbi, şahmat məktəbi və uşaq yaradıcılıq mərkəzi fəaliyyət göstərmişdir. Həmin müəssisələrdə fəaliyyət göstərən dərnəklərə 630 şagird cəlb edilmişdir.

Məktəblərin maddi-texniki bazasının möhkəmləndirilməsi və yeni məktəblərin tikilməsi sahəsində mühüm işlər görülmüşdür. Son bir il ərzində 1100 şagird yeri olan yeni məktəb binaları (Aralbir və Tofiqi kənd tam orta, Qarağanşıxlar, Qülbəndə, Ərəbşəki kənd ümumi orta) tikilib istifadəyə verilmişdir. Tədris ili ərzində rayonun Qolqəti, Şəmsabad, Ərəb, Aşağı Ləki kənd tam orta, Qumlaq kənd ümumi orta və Əmrmahmud kənd ibtidai məktəblərində əsaslı və cari təmir işləri aparılmışdır.

Təhsil Nazirliyi tərəfindən 58000 manat dəyərində 9 kimya, fizika və biologiya fənləri üzrə laboratoriya avadanlığı alınmış, S.Vurğun, M.İsayev, M.Şeyxzadə, 8 saylı şəhər, Kükəl, Dəhnəxəlil və Cardam kənd tam orta məktəblərində quraşdırılmışdır. Elektron məktəb layihəsinə uyğun olaraq ötən dərs ili rayonumuza Təhsil Nazirliyi tərəfindən 12 elektron lövhə göndərilmişdir.

2015 – 2016-cı dərs ilində şagirdlərin pulsuz dərsliklərlə təmin olunması məqsədilə respublika Təhsil Nazirliyindən rayona ayrılan IV-VI siniflər üçün 35520 manat dəyərində 20978 nüsxə dərslik gətirilərək məktəblərə paylanmışdır. Yeni dərs ilində I siniflərə 1700 şagirdin cəlb olunması nəzərdə tutulmuşdur.

Böyük minnətdarlıq hissi ilə qeyd etmək istəyirəm ki, hər il olduğu kimi, bu il də Heydər Əliyev Fondu tərəfindən 15 sentyabr “Bilik günü” ərəfəsində məktəblərə ilk dəfə qədəm qoyan uşaqlara hər cür məktəbli ləvzimatı ilə təmin olunmuş, 1750 məktəbli çantası hədiyyə olaraq göndərilmişdir.

Bu dərs ili üçün məktəblərdə olan 19 vakant müəllim yeri üçün Təhsil Nazirliyinə sifariş verilmişdi. Onlardan 17 nəfəri imtahandan keçərək rayon məktəblərinə təyinat almışdır.

Rayon təhsil şöbəsinin tabeliyində olan təhsil müəssisələrində payız-qış mövsümünə hazırlıqla əlaqədar bir sıra tədbirlər görülmüşdür. Rayonda 31 ümumtəhsil məktəbi mərkəzləşdirilmiş istilik sistemi, bir ümumtəhsil məktəbi elektrik qızdırıcısı, 36 ümumtəhsil məktəbi isə odun yanacağı ilə qızdırılır.

Rayonumuzda şagirdlərin istedad və qabiliyyətlərini daha da inkişaf etdirmək məqsədilə müxtəlif tədbirlər keçirilir. Bu sahədə hər il ənənəvi olaraq keçirilən fənn olimpiadalarının böyük əhəmiyyəti vardır. Ötən dərs ilində fənn olimpiadaları və beynəlxalq kimya olimpiadasının zona turu rayonumuzda keçirilmişdir. Bu mərhələlərdə 11 şagirdimiz fənn olimpiadasının, 4 nəfər isə beynəlxalq kimya olimpiadasının zona turunun qalibi olmuş və Bakı şəhərində keçirilən yekun turda iştirak etmişdir.

Rayonumuzun təhsil tarixində ilk dəfədir ki, 1 şagirdimiz fənn olimpiadasında qazandığı uğurlara görə “Qızıl medal”a, 1 nəfər isə “Bürünc medal”a layiq görülmüşdür. Biz təhsil işçiləri bu yüksək mükafatları dövlətimizin gənc nəslin təhsilinə göstərdiyi yüksək diqqət və qayğının nümunəsi kimi qiymətləndiririk.

Keçən tədris ilində Ağdaş təhsilinin uğurları çox olmuşdur. Təkcə onu qeyd etmək kifayətdir ki, M.İsayev adına şəhər tam orta məktəbi “Ən yaxşı ümumtəhsil məktəbi” respublika müsabiqəsinin qalibi olmuşdur. Həmin məktəbin məzunu Günay Novruzlu 677 balla Azərbaycan Respublikası Prezidenti yanında Dövlət İdarəçilik Akademiyasının hüquq fakültəsinə qəbul olunmuş və Prezident təqaüdünə layiq görülmüşdür.

Hesabat ilində S.Vurğun adına şəhər tam orta məktəbin biologiya müəllimi Şəkər Pirimova, 7 saylı şəhər tam orta məktəbin tarix müəllimi Leyla Bayramova, Qaradeyn kənd tam orta məktəbinin coğrafiya müəllimi Aqil İsayev “Ən yaxşı müəllim” respublika müsabiqəsinin qalibləri olmuşlar.

Məzunlarımızın ali məktəblərə qəbul imtahanlarında göstərdikləri nəticələr də əvvəlki illə müqayisədə uğurlu olmuşdur. Ötən dərs ilində rayon məktəblərinin XI sinfini 928 nəfər məzun bitirmişdir. Onlardan 576 nəfəri ali məktəbə sənəd vermişdi. Məzunlardan 267 nəfəri tələbə adını qazanmışdır. Bu da əvvəlki illə müqayisədə 22 nəfər çoxdur. 35 abituriyentimiz 500-dən, 8 nəfər isə 600-dən yuxarı bal toplamışdır. Cari ildə ali məktəbə qəbul imtahanında ən yüksək nəticəni Kotavan tam orta məktəbinin məzunu Ləman Kərimli göstərmişdir. O, 695 bal toplayaraq Azərbaycan Tibb Universitetinə qəbul olmuşdur.

M.Şeyxzadə adına texniki, təbiət və humanitar fənlər təmayüllü gimnaziyanın, S.Vurğun adına, M.İsayev adına şəhər, Kükəl və Cüvə kənd tam orta məktəblərinin məzunları da ali məktəblərə qəbul imtahanlarında yüksək nəticələr göstərmişlər.

Əlbəttə, əldə etdiyimiz bütün bu uğurlar heç də bizi arxayınlaşdırmır. Pedaqoji kollektivlərimizin, bütün təhsil işçilərinin yekdil fikrini ifadə edərək demək istəyirəm ki, yeni dərs ilində uğurlarımız daha çox olacaqdır.

G ö y g ö l

Elbrus Atayev, Göygöl Rayon Təhsil Şöbəsinin müdiri:

– Rayonumuzun ümumtəhsil məktəblərinin hər birində yeni dərs ilinə hazırlıq işi yüksək səviyyədə təşkil edilmişdir. Cari təmir, təmizlik işləri aparılmış, səliqə-sahman yaradılmışdır. Ayrılan vəsaitin hər il davamlı olaraq artırılması, dövlət qayğısının güclənməsi təhsilin bütün sahələrinin dinamik inkişafı üçün böyük imkanlar açmışdır.

Təhsil xərclərinin ilbəil artırılması Azərbaycan Respublikasının Prezidenti İlham Əliyevin bu sahəni dövlət siyasətinin prioritetlərindən biri hesab etməsi ilə bağlıdır. Ölkə başçısının vurğuladığı kimi, şagirdlərin idrak fəaliyyətinin gücləndirilməsi, “yaddaş” məktəbindən “təfəkkür və düşüncə” məktəbinə keçilməsi qarşımızda duran əsas vəzifələrdən biridir. Bu mənada “Təhsil əsri” elan edilən XXI yüz ildə yüksək intellektə malik insan kapitalının formalaşmasında və güclü iqtisadiyyatın qurulmasında təhsilin rolu indiki qədər aktual olmamışdır. Həmin konseptual müddəaların əsasında təhsilə qoyulan maliyyə vəsaitləri ilbəil artır. Ümumi təhsilin inkişafı ən mühüm sahələrdən biri kimi mühüm yer tutur.

Rayonumuzda 39 tam orta, 10 ümumi orta, 1 ibtidai məktəb, 4 məktəbdənkənar təhsil müəssisəsi fəaliyyət göstərir. Ümumtəhsil məktəblərində 8912 məktəbyaşlı uşaq təhsillə əhatə olunmuşdur. Onların təlim-tərbiyəsi ilə 1663 nəfər ixtisaslı pedaqoq məşğul olur.

Ötən dərs ilinin yekunlarına görə IX sinfi 717 şagird bitirmiş, onların hamısı ümumi orta təhsil haqqında şəhadətnamə almışdır. Rayon üzrə 729 nəfər XI sinif şagirdi imtahanlara buraxılmış, bunların hamısı tam orta təhsil haqqında attestat almışdır.

Orta ümumtəhsil məktəblərinin qarşısında duran ən mühüm vəzifələrdən biri də gələcəkdə şagirdləri ali təhsilə, ən layiqli və zəruri ehtiyac duyulan sahələrə yönəltməkdən ibarətdir. Bunun üçün şagirdlər təlimin müasir üsulları ilə öyrədilməli, elmi, texniki nailiyyətlərlə tanış olmalıdırlar.

Bu mənada ötən dərs ili rayonumuz üçün əlamətdar olmuşdur. Məzunlardan 420 nəfəri ali məktəblərə sənəd vermişdi. Qəbul imtahanlarının nəticələrinə əsasən 200 məzunumuz tələbə adını qazanmışdır. 40 nəfər 500-dən, 14 nəfər 600-dən yuxarı bal toplayaraq yüksək nəticələr əldə etmişdir. Göygöl şəhər texniki təbiət fənlər təmayüllü lisey, 1, 3, 5 saylı, Balçılı kənd 1 saylı tam orta məktəblərinin məzunlarının göstəriciləri daha yüksək olmuşdur.

Ötən dərs ilində istər məktəb rəhbərləri, istərsə də məsləhətçi və metodistlər tərəfindən ayrı-ayrı fənlərin tədrisi vəziyyəti diqqətlə öyrənilmiş, müvafiq qərarlar qəbul edilmiş, tövsiyələr hazırlanmışdır. Pedaqoji kollektivlər təhsil prosesinin həyata keçirilməsində yeni pedaqoji baxışların formalaşmalı olduğunu dərindən dərk edirlər. Əlbəttə, yeniliyi duymaq heç də çətin deyil, ancaq dərk olunmuş yenilyi işə tətbiq etmək çətin və mürəkkəb bir prosesdir. Elə buna görə də hər bir təhsil işçisi, xüsusilə müəllimlər daim axtarışda olmağa çalışır.

Ümumtəhsil məktəblərimizdə öz işinə məsuliyyətlə yanaşan, daim yeniliyə can atan müəllimlər çoxdur. Texniki təbiət fənlər təmayüllü liseyin direktoru Zəhra Zeynalovanı, Balçı kənd 1 saylı tam orta məktəbin müəllimi Sevil Əhmədovanı, şəhər 3 saylı tam orta məktəbin müəllimi Tünzalə Rəşidqızını və başqalarını misal göstərə bilərik.

Bu gün rayon məktəblərinin hər birində “qabaqcıl və yenilikçi müəllimlər bankı” yaradılmışdır. Ötən tədris ilində bütün məktəblərdə “açıq dərslər” və qarşılıqlı dərs dinləmələri təşkil edilmişdir.

“Ümumtəhsil məktəblərinin informasiya və kommunikasiya texnologiyaları ilə təminatı” proqramı çərçivəsində rayonun ümumtəhsil məktəblərinə 360 kompüter dəsti, 52 noutbuk və s. verilmişdir. Hazırda 8 tam orta məktəbdə 9 kompüter kabineti fəaliyyət göstərir. Əksər məktəblərimiz də internet şəbəkəsinə qoşulmuşdur.

Göygöl rayonunda bütün ümumtəhsil məktəbləri dərsliklərlə tam təmin olunmuşdur. Məktəb kitabxanaları bədii kitablarla zənginləşmişdir. Şagirdlərin elmi-bədii dünyagörüşünün formalaşmasında, yazılı və şifahi nitq mədəniyyətinin inkişafında kitabların, dərsliklərin və elmi-bədii ədəbiyyatın böyük rolu vardır. Buna görə də fənn müəllimləri, xüsusən Azərbaycan dili və ədəbiyyatı müəllimləri məktəb kitabxanaçıları ilə qarşılıqlı əlaqədə fəaliyyət göstərir, şagirdlərin maraq dünyasının formalaşmasında kitablara, mütaliəyə geniş meydan verirlər.

Ümumtəhsil müəssisələrində müəllimlərin işə qəbulu və pedaqoji kadrların həvəsləndirilməsi ilə bağlı Təhsil Nazirliyi müvafiq əmr imzalamışdır. Həmin əmrə uyğun olaraq müəllimlərin işə qəbulu Təhsil Nazirliyi tərəfindən test üsulu ilə həyata keçirilir. Bu tədris ili üçün rayonun 9 məktəbində 10 fənn müəlliminə ehtiyac olduğu haqqında Təhsil Nazirliyinə məlumat verilmişdi. İmtahandan keçib rayon təhsil şöbəsində qeydiyyata düşən müəllimlərə lazımi şərait yaradılacaqdır.

Dövlət başçısı “Xüsusi istedada malik olan uşaqların (gənclərin) yaradıcılıq potensialının inkişafı üzrə Dövlət Proqramını (2006 – 2010-cu illər)” təsdiq etmişdir. Proqram yetişməkdə olan gənc nəslin yaradıcılıq potensialını üzə çıxarmaq, daha da inkişaf etdirmək baxımından mühüm dövlət sənədidir.

Ümumtəhsil məktəblərində “İstedad bankı” yaradılmış, ayrı-ayrı təhsil sahələri üzrə istedadlar müəyyən olunmuşdur. İstedadlı uşaqlarla iş aparmaq üçün müvafiq müəllimlər ayrılmışdır.

Ümummilli lider Heydər Əliyevin anadan olmasının 92-ci ildönümü münasibəti ilə “Heydər Əliyev və müstəqil Azərbaycan” mövzusunda rəsm və inşa yazı müsabiqələri, futbol və şahmat turnirləri keçirilmişdir. Qaliblər müxtəlif hədiyyə və diplomlarla mükafatlandırılmışlar.

Göründüyü kimi, ötən dərs ili Göygöl rayonunun pedaqoji kollektivləri üçün əlamətdar və yaddaqalan olmuşdur. Yeri gəlmişkən, onu da əlavə edək ki, son 10 ildə rayonumuzda 17 yeni məktəb binası, 5 məktəbdə 26 əlavə sinif otağı tikilmiş, 19 məktəbdə əsaslı təmir işləri aparılmışdır. Heç şübhəsiz, bir neçə gündən sonra başlanacaq yeni dərs ilində əldə edilmiş bütün bu uğurları daha da artıracağıq.

Ziyəddin SULTANOV,