Ötən il milli mədəniyyətimizin
inkişafında əhəmiyyətli
dövr oldu
İllər
bir-birini əvəz etdikcə ölkəmiz yeni-yeni zirvələr fəth edir. Son illər mədəniyyətin inkişafı ilə
bağlı reallaşdırılan layihələr milli-mənəvi dəyərlərimizin
təbliğində əhəmiyyətli rol oynayır.
Xüsusilə 2014-cü il mədəniyyətin
inkişafı sahəsində
böyük nailiyyətlər
dövrü olmuşdur. Mədəniyyət
və Turizm Nazirliyinin 2014-cü ilin yekunlarına həsr
edilmiş kollegiya iclasında bu
barədə ətraflı
söhbət açılmışdır.
Kollegiya iclasında
geniş məruzə ilə
çıxış edən Mədəniyyət və
Turizm naziri Əbülfəs Qarayev il ərzində
görülən işlər haqqında, ötən il ölkəmizdə
keçirilən möhtəşəm mədəniyyət tədbirlərindən,
Azərbaycan mədəniyyətinin təbliği istiqamətində
görülmüş işlərdən və qarşıda
duran vəzifələrdən danışmışdır.
Söz yox ki, mədəniyyətimizin
qazandığı
uğurlar bilavasitə ölkə Prezidenti cənab
İlham Əliyevin qayğı
və diqqətinin nəticəsidir. Bu sahədə nailiyyətlərin əldə
olunmasında Heydər
Əliyev Fondunun və şəxsən Fondun prezidenti, UNESCO və
İSESCO-nun xoşməramlı səfiri Mehriban xanım
Əliyevanın səyləri
xüsusi olaraq vurğulanmalıdır. Heydər
Əliyev Fondu mədəni irsimizin, o cümlədən istər
ölkəmizdə, istərsə də xaricdə tarixi və
mədəniyyət abidələrinin qorunub
saxlanılmasına və bərpa edilməsinə
böyük diqqət yetirir.
Prezident İlham
Əliyevin 2014-cü il 14 fevral tarixli sərəncamı ilə
Azərbaycan Respublikasının Mədəniyyət
Konsepsiyası təsdiq edilib. Bu sənəd artıq
bütöv bir mədəniyyət siyasətinin həyata
keçirilməsinin istiqamətverici proqramına çevrilmişdir. Konsepsiya əsasında
“Qafqaz Albaniyası irsinin tədqiqi, mühafizəsi və təbliğinə
dair Dövlət Proqramı”, “Azərbaycan Respublikasında
uşaq musiqi, incəsənət və rəssamlıq məktəblərinin
inkişafı üzrə Dövlət Proqramı (2014-2018-ci
illər)”, “Dövlət rəsm qalereyalarının perspektiv
inkişafı üzrə Dövlət Proqramı (2015-2025-ci
illər)”, “2014-2020-ci illərdə Azərbaycan qeyri-maddi mədəni
irsinin qorunmasına dair Dövlət Proqramı”, “Azərbaycan
Respublikasında nəşriyyat-poliqrafiya işinin və kitab
sənətinin 2015-2020-ci illərdə inkişafına dair
Dövlət Proqramı” və “Azərbaycan Respublikasında
kitabxana-informasiya sahəsinin 2015-2020-ci illərdə
inkişafı üzrə Dövlət Proqramı”nın layihələri
hazırlanmışdır.
2014-cü il tarixi-mədəni irsin
qorunması sahəsində mühüm tədbirlərlə də
yadda qalıb. Azərbaycanda ilk dəfə olaraq beynəlxalq səviyyədə
Avropa İrs Günləri keçirildi. Avropa İttifaqı
ilə yeni tvinniq proqramı irəli sürüldü və
bu sahədə əməkdaşlıq davam etməkdədir.
Ötən ilin mühüm hadisələrindən biri də Azərbaycan Xalça
Muzeyinin yeni binasının açılışı oldu.
Avqustun 26-da ölkə rəhbərliyinin iştirakı ilə
açılışı keçirilən muzey şəhərimizin
yeni simvollarından birinə çevrildi.
Ötən il həm
də bir sıra mühüm beynəlxalq mədəniyyət tədbirləri
ilə yadda qaldı. Məlumdur ki, Azərbaycan
Aropa Şurasının Nazirlər Komitəsinə sədrlik
etdi. 2014-cü ildə Azərbaycanın Avropa Şurası səviyyəsində
təqdim edilən əsas layihələri məhz mədəniyyət
və incəsənətlə bağlı idi. Sərgilər,
təqdimatlar, müsabiqələr, konsertlər və s.
bütün bu hadisələr çox böyük əks-səda
doğurdu. Azərbaycan bu tədbirlərlə nə qədər
qüdrətli mədəniyyətə sahib olduğunu
nümayiş etdirə bildi. Bu tədbirlər Heydər Əliyev Fondunun dəstəyi ilə
reallaşdı. Fondun və nazirliyin birgə keçirdiyi tədbirlər
Azərbaycanın dünyaya təqdim edilməsində
mühüm yer tutur.
UNESCO xətti ilə keçirilən beynəlxalq
tədbirləri də qeyd etməliyik. İslam ölkələri
mədəniyyət nazirlərinin əməkdaşlığı
sahəsində görülən işləri də uğurlu
işlər siyahısına daxil etmək olar. Azərbaycan
UNESCO-nun qeyri-maddi mədəni irs üzrə komitəsində
fəal mövqe tutub. Azərbaycan kəlağayı sənətinin
ötən il UNESCO-nun
siyahısına salınması qeyri-maddi mədəni irsimizin
təbliği sahəsində daha bir nailiyyət kimi qiymətləndirilməlidir
TÜRKSOY təşkilatı ilə də əlaqələr davam etdirilmişdir. Bu nüfuzlu təşkilatla bir sıra layihələr həyata
keçirilmişdir. Türk dövlətləri rəhbərlərinin
birgə qəbul etdiyi sənəd əsasında ölkələr
arasında turizm mübadiləsinin gücləndirilməsi və
milli mədəniyyətlər üzərində qurulan mədəni
turizm proqramlarının həyata keçirilməsi
böyük əhəmiyyət kəsb edir.
Azərbaycan hər il müxtəlif beynəlxalq
mədəniyyət tədbirlərinə ev sahibliyi edir.
İlk dəfə Şəkidə I Beynəlxalq Teatr
Festivalı keçirildi. Artıq üçüncü dəfə
keçirilən Beynəlxalq Teatr Konfransı da yaddaqalan hadisə
oldu.
İlin uğurlu yekunları sırasında
Arif Məlikovun “Məhəbbət əfsanəsi” baletinin
Rusiya Böyük Teatrında premyerasını, Qara Qarayevin
“Yeddi gözəl” baletinin ABŞ-ın San Diyeqo Şəhər
Teatrında təqdimatını vurğulaya bilərik. Bu hadisələr
Azərbaycan musiqisinin beynəlxalq
arenada tanınmasına imkan yaratdı.
Ötən il
regionların mədəni
həyatında da əsaslı yeniliklər olmuşdur.
Bölgələrin mədəni irsinin təbliği sahəsində “Xalq yaradıcılığı
paytaxtları” layihəsinin
xüsusi yeri var. “Paytaxt”ların elan edilməsindən
sonra bölgələrdə
festivalların əsası qoyuldu. Mədəniyyət evləri, klub və kitabxanalar əsaslı
təmir olunub yenidən istifadəyə verilmişdir.
Nizami Kino Mərkəzi tam gücü ilə
işləyir. Bu məkanda yeni təqdimatlar, beynəlxalq
film festivalları keçirilir. Ötən il Bakıda ikinci dəfə keçirilən
idman filmləri festivalı layihənin təşkilatçıları
tərəfindən ən yaxşı festival kimi təsdiq
edildi. Həmçinin ikinci dəfə turizm
filmləri festivalı gerçəkləşdi. İl ərzində
filmlərimiz 50-dək beynəlxalq festivalda iştirak edib,
mükafatlara layiq
görülmüşdür. Yeni
çəkilmiş filmlərimiz artıq beynəlxalq arenaya
çıxır.
Azərbaycan
teatrlarında formalaşan
beynəlxalq təcrübə mübadiləsi
bizim ölkənin teatrsevərlərinə də kifayət qədər
müsbət nəticə nümayiş etdirə bilir. Teatrlarda qurulan yeni tamaşalar, qastrol səfərləri,
sözsüz ki, qaynar teatr həyatına rəng qatır.
İlin
müsbət hadisələrindən
bir neçəsi təhsil sistemi ilə
bağlı oldu.Təhsil və turizm sahəsində dövlət
tərəfindən irəli sürülən proqramlar bu sahələrin
daha da inkişafına təkan verir. Mədəniyyət və
Turizm Nazirliyinin Turizm İnstitutunun bazasında ali
təhsilin bütün pillələrində turizm və
menecment sahələri üzrə kadr
hazırlığını həyata keçirən Azərbaycan
Turizm və Menecment Universitetinin yaradılması barədə
sərəncam verildi. Bu addım ölkə rəhbərliyinin
turizm sahəsinə göstərdiyi diqqətin bir hissəsidir.
Burada artıq bütün təhsil pillələrini
əhatə edən turizm sənayesinin kadr
hazırlığı həyata keçiriləcək.
Ötən il Azərbaycan bir neçə böyük beynəlxalq kitab
sərgisində iştirak etmişdir. Beynəlxalq
sərgilərdə Azərbaycanda nəşr edilən
kitablara maraq artmaqdadır. 2015-ci ildə Bakıda növbəti beynəlxalq
kitab sərgi-yarmarkası keçiriləcək.
Əlbəttə, bütün
bunlar 2014-cü il Azərbaycanın mədəni həyatında baş verənlərin
tam mənzərəsi deyil. Onu deyə bilərik ki, ötən
il milli-mədəni
dəyərlərimizin
inkişafı və təbliğində çox uğurlu bir dövr oldu.
M. MÜKƏRRƏMOĞLU
Xalq qəzeti.- 2015.- 10 yanvar.- S.5.