Naxçıvanın
quruculuq
xəritəsi genişlənir
Qaraçuq
kəndinin yeni növrağı
Bu gün
Naxçıvan Muxtar Respublikası yeni inkişaf mərhələsinə
qədəm qoymuşdur. Həyata keçirilən uğurlu
inkişaf strategiyası, aparılan geniş tikinti-quruculuq
işləri paytaxt Naxçıvan şəhərini də əhatə
etmiş, mərkəzlə yanaşı, şəhərin ətraf
qəsəbə və kəndləri də yeniləşmə
prosesinə qoşulmuşdur. Naxçıvan şəhərinin
inzibati ərazisinə daxil olan Qaraçuq kəndi aparılan
kompleks tikinti işlərindən sonra müasir qəsəbə
görkəmi almışdır.
Abad yol iqtisadi
inkişafın əsas göstəricilərindəndir. Muxtar
respublikanın digər yaşayış məntəqələrində
olduğu kimi, paytaxt Naxçıvan şəhərində də
yol-nəqliyyat infrastrukturu yenidən qurulur.
Yanvarın 14-də
Qaraçuq kənd avtomobil yolunun açılışı
olmuşdur.
MR Ali Məclisinin sədri
Vasif Talıbov yolun istifadəyə verilməsi münasibətilə
sakinləri təbrik etmiş, açılışı
bildirən lenti kəsmişdir.
Məlumat
verilmişdir ki, Qaraçuqda yol şəbəkəsi
müasir standartlara uyğunlaşdırılmış, 5,5
kilometr kənddaxili yola asfalt örtük
salınmışdır. Müvafiq yerlərdə piyada
keçidləri və digər yol-nəqliyyat nişanları
quraşdırılmış, hərəkətin
rahatlığı və təhlükəsizliyi təmin
olunmuşdur. Yolun uzunmüddətli istismarı məqsədilə
zəruri tədbirlər görülmüş, 51 su
keçidi və 1036 metrlik beton kanal çəkilmişdir.
Naxçıvan şəhər 9 nömrəli
tam
orta məktəbi yeni binada
Həmin gün Naxçıvan şəhər
9 nömrəli tam orta məktəbinin binası istifadəyə
verilmişdir. Naxçıvan
şəhər icra hakimiyyətinin başçısı
Vüqar Səfərov çıxış edərək
demişdir ki, son illər aparılan quruculuq işləri nəticəsində
Naxçıvan şəhəri öz simasını tamamilə
dəyişmişdir. “2014-2015-ci illərdə
Naxçıvan şəhərinin sosial-iqtisadi
inkişafı üzrə Proqram”a uyğun olaraq Naxçıvan şəhərinin
Qaraçuq kəndində də yeni məktəb binası,
musiqi məktəbi, kənd və xidmət mərkəzləri,
həkim ambulatoriyası, abad yol istifadəyə verilir. Bütün bunların muxtar respublikada əhalinin
yüksək səviyyədə yaşayışının
təmin edilməsinə hesablandığını bildirən
Vüqar Səfərov Ali Məclis sədrini 55 illik yubileyi
münasibətilə təbrik etmiş və göstərilən
qayğıya görə Naxçıvan şəhər əhalisi
adından minnətdarlığını bildirmişdir.
Naxçıvan
Muxtar Respublikası Ali Məclisinin sədri Vasif Talıbov
aparılan kompleks quruculuq işləri nəticəsində
Qaraçuq kəndində yeni sosial obyektlərin, eləcə
də məktəb binasının istifadəyə verildiyini
bildirmiş, bu münasibətlə sakinləri və məktəbin
kollektivini təbrik edərək demişdir: Ulu öndər Heydər
Əliyevin yolunun uğurla davam etdirilməsi nəticəsində
ölkəmizdə bütün sahələrdə inkişafa
nail olunmuşdur. Bu gün Azərbaycanda sabitliyin və iqtisadi
inkişafın təmin olunması ölkə həyatı
üçün vacib olan bütün sahələrdə,
xüsusilə təhsil və ordu quruculuğu istiqamətində
ardıcıl tədbirlərin həyata keçirilməsini zəruri
edir. Naxçıvan şəhər 9 nömrəli tam orta məktəbinin
yeni binasının istifadəyə verilməsi də ölkəmizdə
bu istiqamətdə həyata keçirilən tədbirlərin
tərkib hissəsidir. Eyni zamanda, bütün bunlar həm də
insan amilinə və ölkəmizin gələcəyinə
göstərilən qayğının daha bir ifadəsidir.
Ali Məclisin sədri
demişdir: Ölkənin gələcəyini hazırlamaq
yalnız müasir məktəb binları tikməklə bitmir.
Bu, həm də əsl vətəndaş yetişdirmək
kimi mühüm bir vəzifəni zəruri edir.
Naxçıvan şəhər 9 nömrəli tam orta məktəbində
dövlətimiz tərəfindən bu tədbirlərin həyata
keçirilməsi üçün lazımi şərait
yaradılıb. Bu gün Qaraçuq kəndində
gənclər üçün müasir məktəb
binasının, idman qurğularının, asudə vaxtın
səmərəli təşkili üçün müsiqi məktəbinin
istifadəyə verilməsi onların sağlam gənclik kimi
yetişməsinə hesablanmış tədbirlərdir.
Pedaqoji kollektiv yaradılan şəraitdən səmərəli
istifadə etməli, bilikli, dünyagörüşlü və
vətənpərvər gənclər
hazırlamalıdırlar. Gənclərimiz isə özlərini
gələcəyin qurucuları hesab etməli, yaxşı təhsil
almalı, əsl vətəndaş kimi böyüməlidirlər.
Qeyd
olunmuşdur ki, məktəbin nailiyyətləri uğurludur.
Ötən tədris ilində ali məktəblərə qəbulun
nəticələrinə əsasən Naxçıvan şəhər
9 nömrəli tam orta məktəbinin göstəriciləri
muxtar respublikanın ümumi orta göstəricisindən
yuxarıdır.
Bütün bunlar nəzərə alınaraq 2014-cü ildə
məktəb Azərbaycan Respublikasında “Ən yaxşı
ümumtəhsil məktəbi” müsabiqəsinin qalibi
olmuşdur.
Sonra Ali Məclisin sədri
Naxçıvan şəhər ümumtəhsil məktəblərində
əla qiymətlərlə oxuyan bir qrup şagirdə
kompüter dəsti hədiyyə etmişdir.
Açılışı
bildirən lent kəsildikdən sonra məktəb binasına
baxış olmuşdur.
Məlumat
verilmişdir ki, Naxçıvan şəhər 9 nömrəli
tam orta məktəbi 702 yerlikdir. Məktəb 5-i elektron
lövhəli olmaqla 39 sinif otağından, kimya-biologiya və
fizika laboratoriyalarından, hərbi kabinə, şahmat sinfi, 4
kompüter, 2 müəllimlər otağı, kitabxana, bufet və
idman zalından ibarətdir.
Ali Məclisin sədri
ayrı-ayrı sinif otaqlarını və kabinələri gəzmiş,
1-ci sinif şagirdlərinin dərs prosesi ilə
maraqlanmışdır. Qeyd olunmuşdur ki, cari tədris ilində
məktəbin birinci siniflərinə 40 şagird qəbul
olunmuşdur.
Kompüter
otaqlarında 76 kompüter dəsti
quraşdırılmış və internetə
qoşulmuşdur. Burada informatika dərsləri ilə
yanaşı, ayrı-ayrı fənlərə aid elektron
resurslardan istifadə və elmi-texniki yeniliklər barədə
məlumat əldə etmək imkanı
yaradılmışdır. Məktəbin kimya-biologiya və
fizika laboratoriyaları da müasir avadanlıqlarla təchiz
olunmuşdur.
Məktəbin kitabxanası da zəngin fonda
malikdir. Burada 12 mindən çox dərslik və
bədii ədəbiyyat vardır.
Ali Məclisin sədri elektron lövhəli
sinifdə muxtar respublikanın 220 ümumtəhsil məktəbi
ilə Heydər Əliyev muzeyi arasında videobağlantı
vasitəsilə keçirilən virtual dərsi izləmişdir.
Şagirdlərin yüksək bilik
alması və zəngin dünyagörüşünə
malik olması həm də onların fiziki və əqli cəhətdən
sağlam böyüməsindən asılıdır. Buna görə də ümumtəhsil məktəblərində
bütün idman növləri, o cümlədən zehni
inkişafın idmanı hesab edilən şahmatın tədrisinə
xüsusi diqqət yetirilir. Şahmat sinfində
müasir şahmat masaları və lövhələr
quraşdırılmış, məktəbdə müasir
idman zalı istifadəyə verilmişdir.
Məktəblilərin hərbi biliklərə
yiyələnməsi, ən əsası vətənpərvər
ruhda böyüməsi təhsil sahəsində qarşıya
qoyulan ümdə vəzifələrdəndir. 9 nömrəli tam orta məktəbin müasir hərbi
kabinəsi də bu vəzifələrin yerinə yetirilməsinə
imkan verəcəkdir.
Müəllimlərlə görüşən
Ali Məclisin sədri demişdir ki, məktəbin nailiyyətləri
onu deməyə əsas verir ki, burada çalışqan və
tələbkar müəllim kollektivi formalaşmış, tədris
prosesi tələbkarlıq və qarşılıqlı
hörmət əsasında qurulmuşdur. Hər bir insan öz əməyinin bəhrəsini
görəndə sevinir, fərəh hissi keçirir. Müəllimlərin də əməyinin nəticəsi
layiqli gənclər, vətəndaşlar yetişdirməkdir.
Bu mənada hər bir müəllim öz fəaliyyəti
ilə əslində ölkəmizin gələcəyinə
xidmət etmiş olur. Müasir tədris
avadanlıqları ilə təminat gələcəkdə də
məktəbin uğurlarının artırılmasına
imkan verəcəkdir. Məktəbin
kollektivi də bu qayğıya cavab olaraq yaradılan şəraitdən
düzgün istifadə etməli, nailiyyətlər
artırılmalıdır.
Müəllimlərdən Aynur Qafarova və
Lətifə Rəşidova onlar üçün yaradılan
müasir tədris şəraitinə görə minnətdarlıq
edərək demişlər ki, məktəbin müasir bina ilə
təmin olunması, kollektivə göstərilən yüksək
diqqət və qayğı təhsilin keyfiyyətinin yüksəlməsinə
stimul verəcəkdir.
Məktəbin həyətində
geniş abadlıq işləri görülmüş,
gülkarlıqlar salınmış, açıq idman
qurğuları və süni örtüklü mini futbol
meydançası quraşdırılmışdır.
Musiqi məktəbinin
şagirdləri üçün dəyərli töhfə
Qaraçuq kənd uşaq musiqi məktəbinin
açılışı olmuşdur. Məktəbin müəllimi Rəmziyyə Abbasova
çıxış edərək demişdir ki, son illər
muxtar respublikada digər sahələrdə olduğu kimi, mədəniyyətin
inkişafı istiqamətində də ardıcıl tədbirlər
həyata keçirilir. Şəhər, qəsəbə
və kəndlərdə müasir mədəniyyət
ocaqlarının, o cümlədən musiqi məktəblərinin
tikilib istifadəyə verilməsi bunun ən parlaq nümunəsidir.
Qaraçuq kənd uşaq musiqi məktəbi
üçün müasir binanın inşa olunması
kollektivin sevincinə səbəb olmuşdur. Müəllimlər də göstərilən diqqət
və qayğıdan ruhlanaraq gənc musiqiçi kadrların
yetişdirilməsi istiqamətində səylə
çalışacaq, muxtar respublikada mədəniyyətin
inkişafına öz töhfələrini verəcəklər.
Ali Məclisinin sədri Vasif Talıbov kənd
uşaq-musiqi məktəbinin yeni binasının istifadəyə
verilməsi münasibətilə kollektivi təbrik edərək
demişdir: Uşaq-musiqi məktəbləri muxtar
respublikanın mədəni həyatının
inkişafında xüsusi yerə malikdir. Ona görə ki,
Naxçıvan Musiqi Kollecinin, Naxçıvan Dövlət
Universitetinin konservatoriyasının kollektivi bu məktəblərdə
təhsil alan gənclər hesabına
formalaşır. Musiqi məktəblərini
bitirən gənclərimiz gələcəkdə öz təhsillərini
bu məktəblərdə davam etdirəcəklər.
Ali Məclisin sədri açılışı bildirən
lenti kəsmiş, yaradılan şəraitlə tanış
olmuşdur.
Bildirilmişdir ki, iki mərtəbəli
məktəbdə 20 sinif otağı, direktor və müəllimlər
otaqları, tədbirlər zalı və kitabxana vardır. Hazırda məktəbdə 55 müəllim tərəfindən
204 şagirdə musiqi sənətinin incəlikləri öyrədilir.
Məktəbdə xalq çalğı alətləri,
fortepiano və nəzəri fənlər şöbəsi fəaliyyət
göstərir, tar, kamança, qarmon, skripka, fortepiano, nağara
və xanəndəlik üzrə dərslər keçirilir.
Maddi-texniki bazanın gücləndirilməsi
tədrisin yüksək səviyyədə təşkilinə,
şagirdlərin müxtəlif musiqi ixtisasları üzrə
hərtərəfli hazırlanmasına imkan verəcəkdir. Müasir inventar və avadanlıqlarla təchiz
edilmiş məktəbdə 8 piano və digər ixtisaslar
üzrə zəruri musiqi alətləri və tədris vəsaitləri
vardır.
Müəllimlərlə söhbət
zamanı Ali Məclisin sədri demişdir ki, muxtar respublikada
gənclərin musiqi təhsili alması üçün
lazımi şərait vardır. Ona
görə də gələcəkdə musiqi məktəbinin
fəaliyyəti daha da genişləndirilməli, nailiyyətlər
artırılmalıdır. Müəllimlər
ümumtəhsil məktəbləri ilə əlaqəli
işləməli, istedadı və qabiliyyəti olan gənclər
musiqi məktəbinə cəlb olunmalıdır.
Məktəbin müəllimi Ülkər
Seyidzadə yaradılan şəraitə görə minnətdarlıq
etmişdir.
Sonra Ali Məclisin sədri tədbirlər
zalında məktəbin şagirdlərinin ifasında musiqi
nömrələrini izləmiş, şagirdləri uğurlu
çıxışlarına görə təbrik
etmişdir.
Yerli icra
strukturları üçün
müasir
iş şəraiti yaradılmışdır
Naxçıvanın müasir kənd
modelinin özünəməxsus elementlərindən biri də
yeni yaradılan kənd mərkəzləridir. Məhz bu mərkəzlər sayəsində kəndlərdə
vahid idarəetmə sistemi formalaşır, sakinlərin
problemlərinin operativ həllinə nail olunur. Aparılan quruculuq işləri zamanı
Qaraçuqda da yeni kənd mərkəzi inşa olunmuşdur.
Mərkəzin açılışı
olmuşdur.
Naxçıvan Muxtar Respublikası Ali Məclisinin
sədri Vasif Talıbov kənd mərkəzinin
açılışını etmişdir.
Məlumat verilmişdir ki, iki mərtəbədən
ibarət olan mərkəzdə rabitə evi, kitabxana, polis sahə
və baytarlıq məntəqələri, Yeni Azərbaycan
Partiyası ərazi ilk təşkilatı, kənd inzibati ərazi
dairəsi üzrə nümayəndəlik, bələdiyyə,
mədəniyyət evi və 83 yerlik iclas zalı vardır.
Kənd inzibati ərazi dairəsinin əhatə
etdiyi Qaraçuq və Bulqan kəndlərində 4700 nəfər
əhali yaşayır. Onlardan 975-i dövlət
büdcəsindən əməkhaqqı, pensiya, müavinət
və ünvanlı sosial yardım alır. Kənd
inzibati ərazi dairəsi üzrə nümayəndəlik və
bələdiyyə üçün ayrılan müasir iş
otaqlarında sakinlərə nümunəvi xidmət göstəriləcəkdir.
Kənd mərkəzinin kitabxanası zəngin
fondu ilə diqqəti cəlb edir. Burada 8
min 760 kitab vardır. Birinci mərtəbədə
yerləşən rabitə evində əhaliyə nümunəvi
poçt xidməti göstərilir. Burada
quraşdırılan 640 yerlik yeni nəsil ATS Qaraçuq və
Bulqan kəndləri üzrə 629 abonentə xidmət edir.
Binanın ikinci mərtəbəsində Yeni Azərbaycan
Partiyası ərazi ilk təşkilatı üçün
ayrıca iş otağı ayrılmışdır. Məlumat verilmişdir ki, kəndin ictimai-mədəni
həyatında fəal iştirak edən ərazi ilk təşkilatının
117 üzvü vardır. Onlardan 74-ü gənclər,
61-i isə qadınlardır. Polis sahə məntəqəsində
yaradılan şərait də əməkdaşların səmərəli
fəaliyyətinə imkan verəcəkdir.
Baytarlıq məntəqəsi
Qaraçuq və Bulqan kəndlərinə xidmət göstərəcəkdir. Məntəqə lazımı dərman
preparatları və səyyar avadanlıqlarla təchiz
olunmuşdur. Bütün bunlar
mal-qaranın xəstəliklərdən qorunması və
baş sayının artırılması istiqamətində
görülən tədbirləri daha da intensivləşdirəcəkdir.
Sakinlərə
nümunəvi səhiyyə
xidməti göstəriləcək
Muxtar respublikada həyata keçirilən
sosial siyasətin mərkəzində səhiyyə
islahatları dayanır. Bu səbəbdəndir ki, hər il yaşayış məntəqələrində
müasir səhiyyə ocaqları tikilərək istifadəyə
verilir. Yanvarın 14-də Qaraçuq kəndində
də həkim ambulatoriyasının
açılışı olmuşdur.
Naxçıvan Muxtar Respublikası Ali Məclisinin
sədri Vasif Talıbov binanın
açılışını etmişdir.
Binaya baxış zamanı
bildirilmişdir ki, həkim ambulatoriyası 12 xidməti otaqdan
ibarətdir. Burada baş həkim, stomatoloji
kabinə, palata, doğuş, həkim-terapevt, peyvənd, aptek,
mama, tibb bacısı, qeydiyyat, müayinə və manipulyasiya
otaqları vardır. Hazırda bu səhiyyə
ocağında 11 tibb işçisi çalışır.
Ambulatoriya lazımi tibbi avadanlıqlar və dərman
vasitələri ilə təmin olunmuş, peyvəndləri
saxlamaq üçün soyuducu, təcili yardım və peyvənd
çantaları qoyulmuşdur. Sakinlərə
nümunəvi səhiyyə xidməti göstərmək
üçün burada lazımi şərait vardır.
Ali Məclisin sədri tibb işçilərinin
ixtisasartırma kurslarına göndərilməsinin, onların
praktik vərdişlərinin və nəzəri biliklərinin
artırılmasının vacibliyini vurğulamış, kənddə
dezinfeksiya işlərinin aparılması, gigiyenik qaydalara əməl
olunması, əhaliyə, xüsusilə uşaqlara və
hamilə qadınlara göstərilən səhiyyə xidmətinin
təşkili barədə müvafiq tapşırıqlar
vermişdir.
Yeni
ünvan –xidmət mərkəzi
Həmin gün Qaraçuq kəndində
aparılan kompleks quruculuq işləri çərçivəsində
tikilən xidmət mərkəzi də istifadəyə
verilmişdir. Ali Məclisin sədri xidmət
mərkəzinin açılışını bildirən
lenti kəsmişdir.
Mərkəzdə sakinlərin zəruri məişət
tələbatının ödənilməsinə
hesablanmış bütün imkanlar mövcuddur. Burada ərzaq, sənaye və təsərrüfat
malları olmaqla 3 mağaza, bərbərxana, qadın gözəllik
salonu, dərzi, ət satışı yeri fəaliyyət
göstərir. Hazırda xidmət mərkəzində
9 nəfər işlə təmin olunmuşdur.
Xidmət mərkəzi ilə tanışlıqdan
sonra sakinlərlə görüşən Ali Məclisin sədri
demişdir ki, Qaraçuq bu gün ölkəmizin, eləcə
də muxtar respublikanın abad yaşayış məntəqəsinə
çevrilmişdir. Müasirləşən
yaşayış məntəqələrimiz, xüsusilə də
kəndlər bu gün Azərbaycandakı mövcud sabitliyin və
inkişafın daha bir ifadəsidir. Kənddə
gənclərin yaxşı təhsil alması, idarəetmə
strukturlarının səmərəli fəaliyyəti,
insanların sağlamlığının qorunması və
gündəlik tələbatlarının ödənilməsi
üçün lazımi şərait
yaradılmışdır. Bütün
bunlar sakinlərin rahat yaşayışının təmin
olunmasına, məskunlaşmaya xidmət edir. Kənddə aparılan quruculuq işləri və
insanların rahatlığının təmin olunması
ölkəmizdə ümummilli lideirmiz Heydər Əliyevin
siyasi xəttinin uğurla davam etdirilməsinin, insan amilinə
göstərilən qayğının və dövlətimizin
iqtisadi gücünün göstəricisidir. Sakinlər yaradılan bu şəraitdən səmərəli
istifadə etməli, qurulanlar, tikilənlər qorunub
saxlanılmalıdır.
Kənd ağsaqqalı Allahverdi Sayilov
demişdir ki, bu gün Qaraçuq kəndinin quruculuq tarixi
yenidən yazılır. Kənddə yaradılan
şəriat insanların böyük sevincinə səbəb
olmuşdur. Çünki bu işlər
sakinlərin rahatlığı, firəvan
yaşayışı deməkdir. Kənd əhalisi
bütün bunları ulu öndərimizin siyasi xəttinin bəhrəsi
kimi qiymətləndirir. Çalışacağıq
ki, bundan sonra da ölkəmizin, eləcə də muxtar
respublikamızın inkişafında yaxından iştirak edək,
Naxçıvanın müasir tarixinin yaradıcılarına
çevrilək.
* * *
Tikinti-quruculuq tədbirləri zamanı kənddə
bir sıra abadlıq işləri də
görülmüş, rabitə və enerji təchizatı
yaxşılaşdırılmışdır. Bu məqsədlə
1300 metr fiber-optik, 1250 metr yerüstü və 1800 metr
yeraltı rabitə kabelləri çəkilmiş, 400
kilovoltamper gücündə yeni transformator
yarımstansiyası quraşdırılmışdır. Kəndin qaz xətləri yenilənmiş, yeni
tikililərə 745 metr uzunluğunda qaz xətti çəkilmişdir.
Xalq qəzeti.- 2015.- 15 yanvar.- S.3.