Mədəniyyətimizi qarşıda

möhtəşəm uğurlar gözləyir

 

Uğurlarla dolu daha bir ili yola saldıq. İldən- ilə yeni zirvələr fəth edən müstəqil dövlətimiz 2016-cı ildə yeni nailiyyətlər qazandı, Cənubi Qafqazda öz liderliyini qoruyub saxlaya bildi. Prezident İlham Əliyevin həyata keçirdiyi uğurlu daxili xarici siyasət ölkəmizi dünyaya tanıtdı. Bu gün Azərbaycan artıq beynəlxalq tədbirlərin keçirildiyi mərkəzə çevrilmişdir.

 

Beynəlxalq mədəniyyət tədbirləri, idman yarışları ölkəmizin imicini yüksəltdi.

Mədəniyyət, təhsil sahəsində çalışan mütəxəssis kimi, deyə bilərəm ki, hər iki sahədə ölkəmizdə islahatlar davam etdirilmişdir.

Mən heykətəraşam, bu gün paytaxtımızın dünyanın ən gözəl şəhərlərindən birinə çevrilməsi məni qəlbən çox sevindirir. Yeni parklar, dənizkənarı bulvar, şəhərin müxtəlif guşələrində ucaldılan heykəllər, memarlıq abidələri yüksək mərtəbəli binalar Bakımıza xüsusi yaraşıq verir. Yola saldığımız 2016-cı ildə isə bu gözəlliyə yeni çalarlar əlavə olunub. Bu, inkişaf, tərəqqidir. Elə regionlarımızda da şəhərsalmanın müasir üsullarından məharətlə istifadə edilir, arxitektorlarımız şəhər rayonlarda yeni-yeni layihələr reallaşdırırlar.

Neçə illərdir ki, Azərbaycan Rəssamlıq Akademiyasına rəhbərlik edirəm. Ötən il tələbələrimizin yeni işlərinin sərgiləri təşkil olunmuş, onların yüksək səviyyədə təhsilinin təşkili üçün bir sıra tədbirlər həyata keçirilmişdir. Bu gün bizim məzunlarımızın əsərləri dünyanın nüfuzlu beynəlxalq sərgilərində nümayiş etdirilir.

2016-cı il Azərbaycanda Multikulturalizm ili idi. Multikulturalizm bizim həyat tərzimizdir. Biz tarixən ölkəmizdə yaşayan azsaylı xalqların mədəniyyətlərinə, adət-ənənələrinə hörmətlə yanaşmışıq. Bu gün belədir, sabah da belə olacaq. Elə bizim akademiyada qədər müxtəlif xalqların nümayəndələri təhsil alırlar.

Biz 2017-ci ilə böyük ümidlərlə gedirik. İnanırıq ki, cənab Prezidentin uğurlu siyasəti sayəsində düşmən tapdağı altında qalan torpaqlarımız azad olacaq, Azərbaycanın suveren hüquqları təmin ediləcək. Bu il mədəniyyətimizi möhtəşəm uğurlar gözləyir.

Dünya Azərbaycanlılarının Həmrəyliyi Günü Yeni il münasibətilə xalqımızı səmimi qəlbdən təbrik edir, Azərbaycanımıza yeni-yeni uğurlar arzulayıram.

 

Ömər ELDAROV,

Xalq rəssamı, akademik

 

Xalq qəzeti.- 2016.- 31 dekabr.- S.3.