“Bakı ən mötəbər idman yarışlarını əla keçirməyi bacarır”

“Formula -1” Avropa Qran-prisinin Bakı mərhələsi uğurla başa çatsa da, yarış iştirakçıları, çoxsaylı fanatlar, qonaqlar belə bir fikri dönə-dönə vurğulayırlar ki, qitənin idman tarixinin bu yeni, möhtəşəm səhifəsi hələ uzun illər yaddaşlarda yaşayacaq. Onların fikrincə, Bakı ən mötəbər idman yarışlarını keçirməyi yaxşı bacarır.

Yeri gəlmişkən, qonaqlar əməkdaşlarımıza verdikləri qısa və eksklüziv müsahibələrdə həvəslə öz təəssüratlarıtı bölüşüblər.

Gaay Grant, (Böyük Britaniya):

– İlk dəfədir ki, Bakının müsafiriyəm. “Formula -1” yarışlarını izləməyə gəlmişəm. Bakıda həqiqətən adlı-sanlı pilotlar arasında yaşanan sürət və qələbə həyəcanının doğurduğu qeyri-adi hisslər yaşadım. Buradakı təəssüratlarım uzun müddət yaddaşımda xoş bir xatirə kimi qalacaq. Azərbaycan paytaxtı bütün dünyaya bir daha nümayiş etdirdi ki, bu gün ən mötəbər idman yarışlarını keçirməyi hamıdan yaxşı bacarır.

Bəli, Bakıda yarışın ən yüksək səviyyədə təşkil olunması məni çox məmnun etdi. Bir məqamı xüsusi vurğulamaq istəyirəm: “Formula -1” kimi mötəbər yarışı yalnız böyük idman ənənələri olan ölkələr keçirə bilir. Azərbaycan gənc dövlət olsa da, idman sahəsində artıq özünün böyük uğurlarına imza atıb. Bakıda ötən il birinci Avropa Oyunlarının yüksək səviyyədə təşkil olunması barədə də məlumatım var.

Azərbaycan iqtidarı ölkənin inkişafı sahəsində düzgün hədəflər seçib. Bu hədəflərdən biri də idmandır. İdman bu gün dünyada inkişaf və tərəqqinin barometri hesab oluna bilər. Bu istiqamətdəki uğurlar, fikrimcə, digər sahələrdə də böyük qələbələr üçün müjdədir.

Bu gün Bakıda geniş idman infrastrukturu yaranıb. İnanıram ki, yaxın gələcəkdə Azərbaycanın öz məşhur pilotları yetişəcək. Bunun üçün burada artıq hər cür şərait yaranıb.

Sergey Polişuk, (Ukrayna):

– Kiyevdənəm. Bakıya məxsusi olaraq “Formula-1” Avropa Qran-prisini izləməyə gəlmişəm. Adətən belə yarışları indiyədək mavi ekran qarşısında müşahidə etmişəm. Amma canlı olaraq izləmək olduqca maraqlıdır. “Ferrari” komandasının azarkeşi olsam da, digər komandaların, məşhur pilotların uğurlarına, təbii ki, sevinirəm. Soruşursunuz ki, “Formula-1” yarışları məni nə ilə özünə cəlb edir. İlk növbədə, sürət və sürətdən doğan həyəcanı ilə! Bu, həqiqətən inanılmaz sürətdir.

Mən öz yeniyetməlik illərimdə pilot olmaq arzusunda düşmüşdüm. Sonradan hiss etdim ki, sadəcə arzu etmək azdır, bunun üçün qeyri-adi səriştə, istedadın da olmalıdır. Bu, həm də çox böyük cəsarət tələb edən bir idman növüdür. Pilotlar mənim nəzərimdə qeyri-adi, güclü insanlardır. Pilotlara uğurlu finiş, qələbələr arzulayıram.

Bəli, Bakıda “Formula -1” yarışları uğurla start götürdüyü kimi, uğurla da başa çatdı. Burada təşkilatçıların yarışa ciddi hazırlaşdıqları hər an hiss olunurdu. Pilotlar da, mütəxəssislər də Bakı trası barədə müsbət rəylər söyləyirlər.

Bakı şəhərinin qeyri-adi, gözəl aurası var. Adam burada özünü yad hesab etmir, əksinə, doğma insanların arasında hiss edirsən. Ümid edirəm ki, gələn il də bu gözəl şəhərə gələcəyəm. Axı, “Formula-1” yarışları burada yenə də keçiriləcək. Ona görə də, “Bakı, hələlik, gələn görüşlərədək!” deyirəm.

Kareline Riçards, (Böyük Britaniya):

– Bakıya gəlişimdən çox razıyam. “Formula -1” yarışını burada böyük maraqla müşahidə etdim. Hər dəfə olduğu kimi, bu dəfə bu heyrətamiz idman yarışından sonsuz zövq aldım. Azərbaycan paytaxtında məni, həmçinin yarış iştirakçıları, əcnəbi qonaqlar üçün təşkil olunan rəngarəng mədəniyyət proqramı da çox məmnun etdi. “Natiq” ritm qrupunun konsertindən zövq aldım. İçərişəhərdə gördüklərimi adi sözlərlə təsvir etmək çətindir. Burada insan özünü sanki “Min bir gecə” nağıllar aləmində hiss edir. Qız qalası, Karvansara, başqa tarixi mədəniyyət abidələrini həvəslə ziyarət etdim.

Burada insanları xoş ovqatda gördüm. Məndə belə təsəvvür yarandı ki, Bakı sakinləri çox mehriban və qonaqpərvərdirlər. Bu gözəl şəhəri, onun gülərüz, həyatsevər insanlarını unutmaq olarmı?! Yox, olmaz! Bakıya, əlbəttə, yenidən gələcəyəm.

Andrey Qolubev, (Rusiya):

– Bakıya Rusiyanın Yaroslavl şəhərindən dostum Yevgeni ilə birlikdə gəlmişəm. Məqsədimiz həm “Formula-1” yarışlarını izləmək, həm də Azərbaycan paytaxtını ziyarət emək idi. “Formula-1” həqiqətən qeyri-adi yarışdır. Burada gördüklərim xəyalımda təsəvvür etdiklərimizdən də üstün oldu. Ayrı-ayrı pilotlara qalanda isə həmyerlimiz Daniil Kvyaka azarkeşlik edirdim. Bununla bərabər, bütün qalibləri ürəkdən təbrik edirəm. Yaxşı haldır ki, ölkənizdə idmanın inkişafına böyük qayğı göstərirlər. Hesab edirəm ki, idman xalqlar arasında dostluq əlaqələrini daha da gücləndirir. Nahaq yerə demirlər ki, idman sülhün elçisidir. Bu gün dünyanın sülhə, sabitliyə böyük ehtiyacı var.

Bakı sakinləri bütün qonaqlara mehriban, xeyirxah münasibət bəsləyirlər. Ünsiyyət qurduğum adamların çoxu rus dilində səlis, sərbəst danışırdılar. Yaroslavl da Bakı kimi qədim şəhərdir. Yeri gəlmişkən, mən də bakılıları bizim şəhərə dəvət edirəm. Bakıdan isə ən xoş hisslər və duyğularla ayrılıram.

Məsaim ABDULLAYEV,

Elçin ABBASOV,

“Xalq qəzeti

Xalq qəzeti.- 2016.- 23 iyun.- S.3.