Milli Kitabxanada “Multikulturalizm və kitab” mövzusunda konfrans keçirilmişdir

Mədəniyyət və Turizm Nazirliyi, Bakı Beynəlxalq Multikulturalizm Mərkəzi, Azərbaycan Respublikası Prezidenti yanında Bilik Fondu və Azərbaycan Milli Kitabxanasının birgə təşkilatçılığı ilə “Multikulturalizm və kitab” mövzusunda konfrans və “Multikulturalizm” jurnalının ilk nömrəsinin təqdimatı keçirilmişdir.

Milli Kitabxananın direktoru, professor Kərim Tahirov tədbirdə çıxış edərək bildirmişdir ki, bu konfrans Azərbaycan Respublikasının Prezidenti İlham Əliyevin 2016-cı il 11 mart tarixli sərəncamı ilə təsdiq olunmuş 2016-cı ilin “Multikulturalizm ili” elan edilməsinə dair Tədbirlər Planının 21-ci bəndinə müvafiq olaraq keçirilir.

Bununla bağlı kompleks tədbirlərin regionlarda da keçiriləcəyini diqqətə çatdıran direktor, multikulturalizmin Azərbaycanın ənənəvi siyasətinin çox mükəmməl modeli olduğunu, ölkəmizin milli mədəniyyətinə inteqrasiya olunan müxtəlif xalqların nümayəndəllərinin harmonik inkişaf etdiyini bildirmişdir. Konfransda Atatürk Mərkəzinin müdiri, Milli Məclisin deputatı Nizami Cəfərov, Bakı Beynəlxalq Multikulturalizm Mərkəzinin analitik şöbəsinin müdiri Nəriman Qasımzadə, Yazıçılar Birliyinin katibi, “525-ci qəzet”in baş redaktoru Rəşad Məcid, Bəstəkarlar İttifaqının katibi, Əməkdar incəsənət xadimi Sərdar Fərəcov, “Multikulturalizm” ədəbi-bədii, elmi-publisistik jurnalının baş redaktoru Fəxri Uğurlu, yazıçı-publisist Sədaqət Kərimova və b. çıxış edərək Azərbaycanın multikulturalizm ənənələri ilə bütün dünyanın diqqətini cəlb etdiyini, multikulturalizmin Azərbaycan mədəniyyətinin cövhəri olduğunu, xalqımızın mədəniyyətində, başqa xalqlara münasibətində əsrlər adlayıb gələn bir anlayış olduğunu bildirmişlər.

Konfransın ikinci hissəsində mövzu ətrafında məruzələr dinlənilmişdir. Azərbaycan Respublikasının Prezidenti yanında Bilik Fondu İnformasiya təminatı sektorunun aparıcı məsləhətçisi Ramilə Qurbanlı, Bilik Fondunun əməkdaşı Reyhan Yusifqızı, Multikulturalizm Mərkəzinin analitik şöbəsinin müdiri Nəriman Qasımzadə, F.Köçərli adına Uşaq kitabxanasının direktor müavini Zahirə Dadaşova, Prezident Kitabxanasının əməkdaşı Əliyusif Məmmədov, Hərbi Akademiyanın dosenti, filologiya elmləri namizədi Münəvvər Məmmədova, Polis Akademiyasının müəllimi Rahim Məcnunov, AMEA-nın Mərkəzi Kitabxanasının fondların formalaşması şöbəsinin biblioqrafı Sevil Əliyeva və b. öz çıxışlarında multikulturalizm və kitab mövzusunda ətraflı məruzə etmişlər. Milli Kitabxananın əməkdaşları tərəfindən hazırlanmış “Azərbaycanda multikulturalizm” elektron məlumat bazası təqdim edilmişdir. Sonda tədbir iştirakçıları “Multikulturalizm Azərbaycanın həyat tərzidir” adlı kitab sərgisi ilə tanış olmuşlar.

M.MÜKƏRRƏMOĞLU,

“Xalq qəzeti”

Xalq qəzeti.- 2016.- 25 iyun.- S.10.