Rumıniya səfiri Milli

Kitabxanada olmuşdur

Dünən Rumıniyanın Azərbaycan Respublikasındakı səfiri Dan İanku Milli Kitabxanada olmuşdur. Qonağı kitabxananın direktoru, professor Kərim Tahirov qəbul etmişdir.

Görüşdə Azərbaycan ilə Rumıniya arasında münasibətlərin möhkəm əsaslar, qarşılıqlı dostluq və tərəfdaşlıq prinsipləri üzərində qurulduğundan danışılmış, milli kitabxanalar arasında da əlaqələrin genişləndirilməsinin zəruriliyi bildirilmişdir.

Səfir ölkəmizə yeni təyin olunduğunu bildirmiş, hər iki ölkənin milli kitabxanaları arasında əlaqələrin daha da möhkəmləndirilməsinə təkan verəcəyini söyləmişdir.

Səfiri kitabxana ilə tanış edən direktor müavini Ədibə İsmayılova onu kitabxananın yeni layihəsi olan “Açıq kitabxana” ilə tanış etmişdir. Səfir “Açıq kitabxana”nı bəyənmiş, maraqlı və əhəmiyyətli layihə olduğunu söyləmiş, “Xatirə kitabı”na ürək sözlərini yazmışdır.

Azərbaycan Milli Kitabxanasının “Fotoalbom”u (Azərbaycan, ingilis və rus dillərində), mədəniyyət obyektlərini özündə əks etdirən xəritə və “Azərbaycan ədəbiyyatı” kitabı qonağa hədiyyə edilmişdir.

M. MÜKƏRRƏMOĞLU

Xalq qəzeti.- 2016.- 5 noyabr.- S.2.