Qadınlara bəşəri sevgi-sayğı günü

Azərbaycan Yazıçılar Birliyinin katibi, Xalq yazıçısı Çingiz Abdullayev bu il ölkəmizdə 100-cü dəfə qeyd edilən 8 Mart Beynəlxalq Qadınlar Günündən doğan səmimi duyğu-düşüncələrini qəzetimizin oxucuları ilə bölüşdü, ölkə qadınlarına ən xoş arzularını ünvanladı:

– Bayramlar həyatımızdakı uca dəyərləri hamılıqla, özü də təntənə ilə qeyd etmək ehtiyacından yaranıb. Hər bir xalqın tarixində və bu günündə belə günlər az deyil və onlar təqvimdə ayrıca yer tutur. Dünya xalqlarının birlikdə bayram etdiyi günlər isə vur-tut bir neçədir. Onlardan biri də Beynəlxalq Qadınlar Günüdür.

Qadın hamımıza anadır, bacıdır, xaladır, bibidir. Analıq qadının həyatda ən uca məqamıdır. Buna görə də Ana adı dünyada insan üçün hər şeydən qiymətli olan Vətənlə qoşa tutulur, hər ikisi müqəddəs sayılır. Analar Adəmdən-Həvvadan üzü bəri həyatın ağır yükünü çəkiblər, buna görə də seviliblər, hamıdan üstün tutulublar. Lakin qadının həyatımızdakı bu əzəli, ali statusu zaman-zaman pozulub. Bəşəriyyət sivil dəyərlər, uca məramlar ətrafında toparlandıqca, ilkin olaraq, qadınların cəmiyyətdəki təbii-tarixi rolunun dirçəldilməsini aktuallaşdırıb.

Bu humanist missiyanı kütləviləşdirmək üçün sosial anlayışların yüksəliş dövrü olan XX əsrin əvvəllərində qadınların şərəfinə təqvimdə ayrıca gün yaranıb. Tarixən, ailədə və cəmiyyətdə qadına böyük hörmət bəsləyən Azərbaycan xalqı da dünyada öncüllər sırasında 8 Mart Beynəlxalq Qadınlar Gününü böyük sayğı ilə qeyd etməyə başlayıb. Bu il 100-cü dəfədir ki, ölkəmizdə qadınlar bayramı keçirilir.

İllər keçdikcə, 8 Mart bayramının məram və məzmunu Vətənimizdə daha dərindən başa düşülüb, qiymətləndirilib. Ümummilli dəyərləri həmişə ucalıqlara qaldıran, qadınların ictimai həyatda rolunu daim yüksəldən ulu öndər Heydər Əliyevin 8 Mart Beynəlxalq Qadınlar Gününü “bizim bütün bayramlar içərisində ən gözəli” adlandırması heç də təsadüfi deyildi.

Sevimli yazıçımız daha sonra dedi:

– İnsanı dünyaya analar gətirdiyi kimi, onunla bağlı ən ülvi arzular da ana ürəyində yuva qurur. İnsanlıq isə bu gözəl diləklərin pərvazlanmasına yaradılan imkan və şəraitlə yüksəlir. Analarımızın ötən zamanlarda ən böyük arzularından biri yurdumuzun müstəqillik əldə etməsi idi. Bu tarixi diləyin gerçəkləşməsi analarımıza indiki nəsillərin ən böyük töhfəsidir. Qadınlar həm də dünyamızı dinc, ehtiyacsız, firavan görmək istəyirlər. Bu yöndə də müstəqillik illərində ölkəmizdə əsrlərə bərabər irəliləyiş olub.

Lakin düşmən qüvvələrin fitnə-fəsadla törətdiyi, xalqımızın qolunda yeni qandala döndərmək istədiyi Qarabağ münaqişəsi və müharibəsi 30 ilə yaxındır ki, qanı axan yara kimi hamıdan çox analarımızı ağrıdır, ağladır. Yurd, övlad itkiləri ilə onların qəlbinə dağ basır. Anaların dözüm və dəyanətindən güc alan xalqımız bu bəlanın aradan qaldırılması üçün illərdən bəri möhkəm iradə göstərir, güc-qüvvətini durmadan artırır. İndiki iqtisadi-hərbi qüdrətimiz, son bir ildə cəbhədə düşmənə vurulan sarsıdıcı zərbələr analarımızın əmin-amanlıq diləyinin çin olacağı günü yaxınlaşdırır.

Bayramlar bizə gerçəkləşən istəklərimizdən yaranan xoş duyğular yaşatdığı kimi, yeni arzularımıza da qanad taxır. Bu ən gözəl bayram günündə mən qadınlarımıza olan borcumuzu layiqincə qaytarmağın vacibliyini bir daha hamıya xatırlatmaq istəyirəm. Yada salmaq istəyirəm ki, qadının incidildiyi, aşağılandığı cəmiyyətlər və toplumlar həmişə lənətə düçar olubmuş kimi məhv olub.

Dünyaca məşhur söz adamı sonda qadınlarımıza bayram təbrikini və arzularını belə ifadə etdi:

– Diləyi xoş, duası alqış, qədəmləri rüzi-bərəkətli olan analarımız ən yüksək diqqət və qayğıya layiqdirlər. Şükürlər olsun ki, çağdaş cəmiyyətimiz bu zərurəti kifayət qədər anlayır və gerçəkləşdirməyə çalışır. Mən analarımıza bu günlərdə sevgilərimizin timsalı olaraq bağışladığımız bahar müjdəli, min bir ətirli güllər kimi təravətli, gözəl günlər arzulayıram. Azərbaycan qadınlarını bütün dünyanın sonsuz sayğı ilə qeyd etdiyi 8 Mart Beynəlxalq Qadınlar Bayramı münasibətilə təbrik etməkdən böyük məmnunluq duyuram.

Qoy qadınlarımızın hər qayğısını çəkdikləri həyatımız dincliyə, səadətə və bolluğa bürünsün! Qoy növbəti qadınlar bayramınadək torpaqlarımızda qanlı dava bitsin! Analarımızın üz-gözlərində kədər, qəlblərində ağrı-acı qalmasın! Ulu Yaradan qadınlarımızı bütün xoş diləklərinə qovuşdursun!

Tahir AYDINOĞLU

Xalq qəzeti.- 2017.- 8 mart.- S.5.