Naxçıvan turizm
məkanı
kimi tanınmağa
iddialıdır
Turizm dünya
iqtisadiyyatının əsas istiqamətlərindən biri kimi qəbul edilir. Turizm potensiallı
ölkələr bu sahədən il ərzində külli miqdarda gəlir əldə edir,
dövlət büdcələrinin böyük
hissəsini bu sahənin hesabına
formalaşdırırlar. Bu gün Azərbaycan dövlətinin də
qarşısında duran əsas hədəf
qeyri-neft sektorunun
inkişafı çərçivəsində turizm sənayesini aktivləşdirməkdir.
Turizm sektoru ölkə iqtisadiyyatına çox böyük həcmdə gəlir gətirməklə yanaşı, həm də ölkənin dünyada tanınmasına imkanlar açır. Tanıtım məsələsindən söz düşmüşkən deyək ki, son illər keçirilən beynəlxalq əhəmiyyətli tədbirlər ölkəmizin turizm potensialının tanınmasına əhəmiyyətli dərəcədə təsir göstərib. “Bakı – 2017” IV İslam Həmrəyliyi Oyunları kimi mötəbər yarışın paytaxtımızda təşkili də, şübhəsiz ki, turizm sektoruna təsirsiz ötüşməyəcək.
Turizm sektorunun inkişafı üçün aşağıdakı şərtlərin olması vacibdir: mövcud təbii-coğrafi şərait, zəruri infrastruktur, sabitlik, zəngin tarixi-mədəni irs, yüksək xidmət, münasib qiymət və sair. Bu amillərin hər birini özündə birləşdirən Naxçıvan Muxtar Respublikası da turizm məkanı kimi tanınmağa iddialıdır. Dünyada Duzdağı, Əshabi-Kəhf, Göygöl, Batabat kimi təbiət möcüzələri olan ölkələri barmaqla saymaq olar. Müasir infrastruktur, turizmin inkişafı məqsədilə yaradılan şərait, münasib qiyməti və gülərüz personalı ilə xidmət göstərən otellər, zəngin mətbəxi, füsunkar təbiəti, dini və sağlamlıq ocaqları, tarixi abidələri, mədəniyyəti, incəsənəti Naxçıvanı cəlbedici məkan kimi səciyyələndirir.
Dövlət tərəfindən turizm sektoruna göstərilən dəstək isə bu sahənin inkişafını daha da sürətləndirib. Ötən il martın 18-də Ali Məclisdə Naxçıvan Muxtar Respublikasında turizmin inkişaf etdirilməsi ilə bağlı keçirilən müşavirədə əlaqədar qurumlara müvafiq tapşırıqlar verilib. Bu tapşırıqların icrası istiqamətində, xüsusilə muxtar respublikanın turizm potensialının təbliği sahəsində ardıcıl tədbirlər görülür.
Milli dəyərlərin və milli mətbəx nümunələrinin təqdim və təbliğ olunduğu festivalların keçirilməsi artıq bir ənənə halını alıb. Belə festivallar turistlərin marağını daha çox cəlb edir. Həyata keçirilmiş tədbirlərin nəticəsidir ki, 2016-cı ildə muxtar respublikaya gələn turistlərin sayı 1995-ci illə müqayisədə 10,4 dəfə artıb. Cari ilin ilk rübü ərzində muxtar respublikaya gələn turistlərin sayı bir il öncəyə nisbətdə 5,1 faiz artaraq 98,8 min nəfər təşkil edib.
Görülən işlər sırasında Naxçıvan Dövlət Universitetində və “Naxçıvan” Universitetində turizm və otelçilik ixtisaslarının açılması, İran İslam Respublikası və Türkiyə Respublikası ilə sərhəd-keçid rejiminin sadələşdirilməsi, yeni beynəlxalq marşrutların təşkili turizmin inkişafı məqsədilə son illər həyata keçirilən məqsədyönlü tədbirlər sırasındadır. Ötən dövrdə universitetlərin məzunları olmuş ixtisaslı kadrlar sahələri üzrə müvafiq işlə təmin olunmuşlar.
Hazırda muxtar respublikada 9 turizm firması fəaliyyət göstərir.
Naxçıvan şəhərindəki
XVII əsrə aid Zaviyyə-Mədrəsə
binasında yerləşən
Naxçıvan Turizm
İnformasiya Mərkəzi
muxtar respublikanın turizm potensialını tanıtmaq üzrə ixtisaslaşıb. Mərkəzin 3 dildə–Azərbaycan, rus və ingilis dillərində saytı fəaliyyət göstərir.
Sayt vasitəsilə Naxçıvanın
turizm potensialı ilə bağlı məlumatları əldə
etmək mümkündür.
Mərkəz tərəfindən
“Naxçıvan-Ordubad”, “Naxçıvan-Əlincəqala”,
“Naxçıvan-Gəmiqaya”, “Naxçıvan-Əshabi–kəhf”, “Naxçıvan-Qarabağlar”, “Naxçıvan-Şahbuz-Batabat”,
“Naxçıvan-Gülüstan” turist marşrutları hazırlanaraq turistlərə
təklif olunur.
Naxçıvan Muxtar Respublikasında son illər həyata keçirilən genişmiqyaslı
quruculuq işləri,
yaradılan müasir infrastruktur, yaşıllıqların
artırılması, tarixi
abidələrin və
dini ocaqların bərpası istiqamətində
həyata keçirilən
çoxşaxəli tədbirlər
turizmin əksər növlərinin inkişafı
üçün real zəmin
yaradıb. Tarixi-mədəni, dini, sağlamlıq
turizmi ilə yanaşı, kənd turizminin də inkişafı üçün
muxtar respublika geniş potensiala malikdir. Ən ucqar dağ kəndlərinədək çəkilən
abad yollar, yaşayış məntəqələrinin
qaz, su, elektrik, rabitə və internet təminatı,
bütün bölgələri
əhatə edən quruculuq tədbirləri turizmin inkişafına imkanlar açıb.
Təbii
ki bura əhalinin
kənd təsərrüfatının
ayrı-ayrı növləri
ilə məşğul
olması, qonaqpərvərliyi
və zəngin süfrə mədəniyyətinə
malik olması da təsir göstərir.
Naxçıvan Muxtar
Respublikası Mədəniyyət
və Turizm Nazirliyinin xətti ilə kənd turizminin inkişafı mövzusunda keçirilən
maarifləndirici tədbirlər bu sahənin inkişafına
hesablanıb. Əhalinin iştirakı
ilə keçirilən
tədbirlərdə kənddə
istirahət etmək istəyən turistlər üçün minimum şərait
yaradılması ilə
turizm mövsümü
ərzində yaxşı
gəlirlər əldə
etməyin mümkünlüyü
diqqətə çatdırılır.
Həyata keçirilən
tədbirlər nəticəsində
indi muxtar respublikanın ən səfalı kəndlərində–Biçənəkdə,
Ağbulaqda, Dırnısda,
Şahbulaqda, Küküdə
və onlarca belə yaşayış məntəqələrində evlər turistlərə
təklif olunur. 45 belə kirayə ev
haqqında məlumat Turizm İnformasiya Mərkəzinin saytında
(turizm.nakhchivan.az) yerləşdirilib.
Muxtar respublikada
turizm sahibkarlığının
da inkişafına diqqət yetirilir.
Kənd turizminin inkişafı
məqsədilə İqtisadiyyat
Nazirliyi tərəfindən
kreditlər verilir.
Son illər Naxçıvan öz stendi ilə turizm sərgilərində iştirak
edir, səmərəli
təbliğat və təşviqat işləri
görülür. 2017-ci il aprelin 8-də Bakı Ekspo Mərkəzində Dünya Turizm Təşkilatının himayəsi
altında keçirilən
regionun ən böyük turizm sərgisi sayılan XVI Azərbaycan Beynəlxalq Turizm və Səyahətlər “AITF 2017” sərgisində
muxtar respublikanın “Naxçıvan”
stendi ilə iştirakı buna misaldır. Azərbaycan Respublikasının Prezidenti İlham Əliyevin ziyarət etdiyi sərgidə Naxçıvan Muxtar Respublikası Mədəniyyət
və Turizm Nazirliyinin ekspozisiyasında
qədim diyarın turizm zənginliyi və unikal məkanlar üzrə fəaliyyət göstərən
marşrutlar nümayiş
olunub. Burada yerləşdirmə obyektlərinin reklamları,
həmçinin Naxçıvan
MR Mədəniyyət və
Turizm Nazirliyi tərəfindən hazırlanmış
muxtar respublikanın turist marşrutlarını
əks etdirən buklet və reklam-informasiya materialları
yer alıb. Turizm ehtiyatlarının təbliği
baxımından böyük
əhəmiyyət daşıyan
belə bir sərgidə Naxçıvanın
da öz stendi ilə iştirak etməsi, heç şübhəsiz,
öz bəhrəsini
verəcəkdir.
Turizm elə bir sahədir ki, davamlı təbliğat işlərinin
aparılmasını şərtləndirir. Mövsümün başlandığı bir
vaxtda muxtar respublikanın turizm potensialını təbliğ
etmək, eləcə
də turizmi canlandırmaq, yeni partnyorlar qazanmaq, xarici turizm firmaları
ilə əlaqələri
gücləndirmək mühüm
əhəmiyyət daşıyır.
Bu məqsədlə aprel ayında “Nəqşicahan Holdinq” tərəfindən qədim
diyara infotur təşkil edilib. İnfotur çərçivəsində
Türkiyə, İran,
Kipr və Küveytdən, eləcə
də paytaxt Bakıdan, ümumilikdə,
220 sahibkar və turizm mütəxəssisi
Naxçıvana gəlib.
Naxçıvana təşkil edilən infotur həm xarici, həm də yerli turizm
firmalarının fəaliyyətlərini
genişləndirmələri üçün bir stimul oldu. Digər tərəfdən,
muxtar respublikanın turizm potensialının təbliğinə şərait
yaratdı. İnfotur iştirakçılarının
geri döndükdən
sonra sosial şəbəkələrdə Naxçıvan təəssüratları
barədə yazdıqları
statuslar, paylaşdıqları
çoxsaylı fotoşəkillər
və videogörüntülər
də bunu bir daha təsdiq
edir.
Turizm öz növbəsində yeni xidmət və istehsal sahələrinin inkişafını da şərtləndirir. Ötən dövr ərzində istifadəyə verilən
Uzun-oba istirahət kompleksi, Naxçıvan atçılıq
klubu, iri ticarət mərkəzləri,
kafelər, restoranlar, Naxçıvan şəhərində
fəaliyyətə başlayan
yeni xidmət sahəsi – dünyanın məşhur firmalarının
istehsal etdikləri ətriyyat və kosmetika mağazası– “İdeal” kimi məkanlar turistlər üçün nümunəvi
xidmətin və mənalı istirahətin
ünvanlarıdır.
Naxçıvan öz tarixi, müasir infrastrukturu, mədəniyyəti, incəsənəti,
unikal təbiət abidələri, mətbəxi,
folklor kollektivləri,
bənzərsiz sənət
nümunələri yaradan
sənətkarları, qonaqpərvərliyi,
sabitliyi ilə dünyanın istənilən
ölkəsindən gələn
turisti heyrətləndirməyə
qadirdir.
Naxçıvan 2018-ci il üçün İslam mədəniyyətinin paytaxtı
seçilib. Sözsüz ki, Naxçıvanı
daha geniş sferada tanıdacaq bu möhtəşəm tədbir turizmin inkişafına da təkan verəcək.
İslam Konfransı Təşkilatının tərkibinə
daxil olan 52 ölkənin nümayəndələrinin
iştirakı, o cümlədən
dünya mediasının
diqqətinin
həmin ərəfədə
Naxçıvana yönəldilməsi,
eyni zamanda, bu qədim diyarın
turizm potensialının
təbliğinə geniş
imkanlar açacaq.
1996-cı ildən başlayaraq
Naxçıvan mötəbər
beynəlxalq tədbirlərə
ev sahibliyi
edir. Muxtar respublikanın inkişaf
səviyyəsi, burada
əldə edilən uğurlar, eyni zamanda, beynəlxalq tədbirlərin keçirilməsində
qazanılan böyük
təcrübə belə
deməyə əsas verir ki, Naxçıvan
şəhəri İslam
mədəniyyətinin paytaxtı
statusunu şərəflə
daşıyacaq.
Turizm ümumxalq işidir. Hər birimiz Naxçıvanın təbliğinə çalışmaqla, bu məqsədlə sosial şəbəkələrdəki imkanlarımızdan istifadə etməklə turizmin muxtar respublika iqtisadiyyatındakı rolunu gücləndirə və Azərbaycanın bu qədim və gözəl guşəsinin daha geniş miqyasda tanınmasına töhfəmizi vermiş olarıq. Turizmin inkişafı həm də Naxçıvan həqiqətlərinin dünya ictimaiyyətinə çatdırılması işinə dəstəkdir.
Ruhiyyə
RƏSULOVA,
Naxçıvan
Televiziyasının
baş redaktoru
Xalq qəzeti.- 2017.- 21
may.- S.5.