Demokratik jurnalistikamızın

böyük “Molla Nəsrəddin”i

Cəlil Məmmədquluzadə – 150

Azərbaycanın aparıcı media təhsili və araşdırmaları mərkəzi olan Bakı Dövlət Universitetinin jurnalistika fakültəsində böyük demokrat yazıçı, dramaturq və publisist Cəlil Məmmədquluzadənin anadan olmasının 150 illik yubileyi və onun naşirliyi və redaktorluğu ilə 25 il müddətində Azərbaycanın 3 inzibati-mədəni mərkəzində – Tiflisdə, Təbrizdə və Bakıda buraxılmış ilk satirik jurnalımız “Molla Nəsrəddin”in birinci nömrəsinin işıq üzü görməsinin 112 illiyi münasibətilə dəyirmi masa keçirilmişdir.

Alim, pedaqoq və media təmsilçilərinin iştirak etdiyi müzakirədə Cəlil Məmmədquluzadənin 150 illiyinin qeyd edilməsi barədə ölkə Prezidentinin sərəncamının aktuallığı və müstəqillik dövrünün tələbləri baxımından böyük ədibin bənzərsiz şəxsiyyətinin və zəngin ədəbi-publisistik irsinin layiqincə öyrənilməsi və təbliği məsələləri diqqət mərkəzində olmuşdur.

Müzakirəni giriş sözü ilə açan fakültənin kafedra müdiri, professor Allahverdi Məmmədli bildirmişdir ki, Prezident İlham Əliyevin sərəncamında göstərildiyi kimi, Cəlil Məmmədquluzadə Azərbaycan ədəbiyyatının yeni mərhələyə yüksəlməsində müstəsna rol oynamış və bütöv bir ədəbi məktəb formalaşdırmış qüdrətli şəxsiyyətdir. Vətəndaş yazıçının bədii nailiyyətlərlə zəngin irsində azərbaycançılıq məfkurəsi dövrün ictimai-siyasi fikrinin aparıcı amili kimi dolğun ifadəsini tapmışdır. Ana dilinin saflığı uğrunda inadlı mübarizə aparmış Mirzə Cəlilin qələmindən çıxmış qiymətli dram və nəsr əsərləri, parlaq publisistika nümunələri dərin humanizmi ilə yanaşı, özündə milli və ümumbəşəri dəyərlərin vəhdətini də ehtiva edir. Azərbaycanda və onun hüdudlarından kənarda geniş yayılaraq milli oyanışa, yeniləşmə hərəkatına yol açan və azadlıq ideyalarının inkişafına qüvvətli təsir göstərən “Molla Nəsrəddin” jurnalı məhz Mirzə Cəlil dühasının məhsuludur.

Alim qeyd etmişdir ki, milli mətbuatımızın xəlqi əsaslarını qüvvətləndirmiş, azərbaycançılıq ideyalarını Arazın hər iki tayında cəsarət və fədakarlıqla yaymış Mirzə Cəlilin “Molla Nəsrəddin” jurnalistika məktəbi öz zamanında milli istiqlal məfkurəsinin təntənəsinə, dövlətçiliyimizin bərpa edilməsinə xidmət etmişdirsə, sonrakı dövrdə milli jurnalistikamızın demokratik ənənələrinin qorunub-yaşadılmasında, xalq işinə sadiq, qələmi ilə müstəqilliyin bərpasına və qüvvətləndirilməsinə kömək edən jurnalistlərin yetişdirilməsində, onların qeyrətli fəaliyyətində başlıca qaynaqlardan biri olmuşdur. Müstəqillik dövründə isə böyük “Molla Nəsrəddin” irsi və mübarizə timsalı daha artıq dərəcədə aktuallıq kəsb edir. Əlamətdar yubiley barədə dövlət başçısının sərəncamı məhz bu yöndə tədbirlərin gerçəkləşdirilməsinə yol açmışdır.

Müzakirələrdə çıxış edən fakültə dekanı Vüqar Zifəroğlu, kafedra müdirləri Cahangir Məmmədli və Şamil Vəliyev, professorlar Nəsir Əhmədli və Alxan Məmmədov, dosentlər Sima Rəhimova və Aygün Əzimova, əməkdar jurnalistlər Tahir Aydınoğlu və Akif Aşırlı Cəlil Məmmədquluzadənin məfkurəvi yaradıcılığının, onun mübariz şəxsiyyətinin jurnalistika təhsili alan tələbələr, mediada çalışan yazarlar üçün misilsiz ideya və sənətkarlıq məktəbi olmasını, bu yöndə yeni yanaşmaların zəruriliyini vurğulamışlar. Onlar Cəlil Məmmədquluzadə və “Molla Nəsrəddin” irsinin daha dərindən öyrənilməsinin nəzəri və təcrübi məsələlərindən də söz açmış, yubiley tədbirlərinin bu axarda keçirilməsinin vacibliyini söyləmişlər.

Müzakirələrdə Cəlil Məmmədquluzadənin növbəti yubileyinin daha yüksək səviyyədə keçirilməsi ilə bağlı təkliflər də səslənmiş, bunun üçün Mədəniyyət Nazirliyinin, AMEA Ədəbiyyat İnstitutunun, Yazıçılar Birliyinin, Mətbuat Şurasının, Teleradio şirkətlərinin və qəzet-jurnal redaksiyalarının əlbir, məqsədyönlü, səmərəli fəaliyyətinin önəmi qeyd edilmişdir.

Sonda ölkənin jurnalistika məktəbinin müəllimləri öz yetirmələri olan media ictimaiyyətini və hər bir jurnalisti yubiley tədbirlərində fəal iştiraka, böyük Cəlil Məmmədquluzadəyə vəfa borcunu layiqincə yerinə yetirməyə, onun kimi yaşayıb-yaratmağa çağırmışlar.

T. RÜSTƏMOV

Xalq qəzeti.- 2019.- 7 aprel.- S.8.