Polşanın Krakov şəhərində akademik Yusif

Məmmədəliyevin yubileyi qeyd olunmuşdur

Görkəmli Azərbaycan alimi, akademik Yusif Məmmədəliyevin Polşa elminə verdiyi töhfələri nəzərə alaraq, Krakov şəhərində yerləşən Stanislav Staşiç adına Dağ-Mədən Akademiyasının ərazisində Y.Məmmədəliyevə həsr olunmuş barelyefin təntənəli açılış mərasimi keçirilmişdir. Mədəniyyət Nazirliyindən bildirmişlər ki, görkəmli şəxsiyyətin xatirəsi akademiyanın təklifi, Azərbaycan Respublikası Mədəniyyət Nazirliyinin və ölkəmizin Polşa Respublikasındakı səfirliyinin dəstəyi ilə əbədiləşdirilmişdir.

Açılış mərasimində Stanislav Staşiç adına Dağ-Mədən Akademiyasının rəhbərliyi, kimya və neft fakültələrinin müəllim-professor və tələbə heyəti, habelə Azərbaycan Respublikasının nümayəndələri – ölkəmizin Polşa Respublikasındakı səfiri Həsən Həsənov, Azərbaycan Respublikası Mədəniyyət Nazirliyinin Elm və tədqiqatlar sektorunun müdiri Vüqar Baxışov, Azərbaycan Milli Elmlər Akademiyası akademik Y.H. Məmmədəliyev adına Neft Kimya Prosesləri İnstitutunun laboratoriyasının rəhbəri Reyhan Əliyeva və mətbuat nümayəndələri iştirak etmişlər.

Akademiyanın rəhbərliyi keçirilən bu tədbirin məramından söz açmışdır. Həsən Həsənov çıxış edərək barelyefin bu akademiyanın ərazisində qoyulması ideyası və həyata keçirilməsi barədə tədbir iştirakçılarına məlumat vermişdir. Vüqar Baxışov nazirliyin rəhbərliyinin salamlarını akademiyaya çatdıraraq rəsmi təşəkkür məktubu təqdim etmişdir. Reyhan Əliyeva tədbirdə akademik Y. Məmmədəliyevin elmi və ictimai fəaliyyəti haqqında və xüsusən onun neft və kimya sahəsində Polşa alimləri ilə əlaqələrindən danışmışdır. Bundan sonra Heydər Əliyev Fondu tərəfindən hazırlanmış Y.Məmmədəliyevə həsr olunan film nümayiş olunmuşdur.

Sonda akademiyanın kimya fakültəsinin korpusunda Y.Məmmədəliyevin barelyefinin rəsmi açılış mərasimi keçirilmişdir.

M. MÜKƏRRƏMOĞLU

Xalq qəzeti.- 2019.- 26 aprel.- S.10.