İnam, etimad və
sevgiyə
haqqı olan xanım
lider
Mehriban Əliyevanın UNESKO-nun
xoşməramlı səfiri seçilməsindən 15 il keçir
Mehriban Əliyevanın beynəlxalq
aləmdə böyük nüfuzu var. Məhz öz fəaliyyəti
nəticəsində bir çox ölkələrin ən
yüksək dövlət mükafatları və ordenləri
ilə təltif edilibdir. Eyni zamanda, … Mehriban Əliyeva UNESKO-nun və
İSESKO-nun xoşməramlı səfiridir. Dünyada ikinci
belə şəxsiyyət yoxdur ki, hər iki mötəbər
təşkilatın, eyni zamanda, səfiri olsun. Bu,
onun dinlərarası, sivilizasiyalararası dialoqa verdiyi töhfə
ilə bağlıdır. Bu töhfə
ölkəmizin siyasətinin təzahürüdür.
İlham
ƏLİYEV
Azərbaycan
Respublikasının Prezidenti
Son zamanlar elə bir gün
olmur ki, ölkənin və regionun kütləvi informasiya
vasitələri onun ictimai-siyasi fəaliyyətinin hansısa
sahəsi ilə bağlı məlumat verməsin. Gah onu mükafatlandırırlar, gah o kimlərəsə
qayğı və ya himayədarlıq göstərir, gah beynəlxalq
tədbirlərdə iştirak edir, gah da sadə insanların,
qayğıya möhtac olan uşaqların arasında olur. Elə yola saldığımız bayram günləri
kütləvi informasiya vasitələri onunla bağlı bir
neçə mühüm xəbər yaydı.
Avqustun 11-də mətbuatda oxuduq ki, Birinci vitse-prezident
Mehriban Əliyeva rəsmi “Instagram” səhifəsində Qurban
bayramı münasibətilə Azərbaycan xalqını təbrik
edib.
Elə həmin gün məlumat verildi ki, Azərbaycan
Respublikasının Birinci vitse-prezidenti, Heydər Əliyev
Fondunun prezidenti Mehriban Əliyevanın təşəbbüsü
ilə Qurban bayramı münasibətilə aztəminatlı
ailələrə qurban paylarının
çatdırılmasına başlanılıb. Bakının
rayonları, eləcə də respublikanın bütün
regionlarını əhatə edən layihə zamanı 70 minə
yaxın aztəminatlı ailənin bayramı təbrik edilib,
onlara qurban payları verilib. Heydər Əliyev Fondunun əməkdaşları
və fondun “Regional İnkişaf” İctimai Birliyinin
könüllüləri bütün rayonlarda ünvanlı
sosial yardım alan növbəti ailələrə
baş çəkib və qurban payları
çatdırıblar.
Avqustun 13-də bildirildi ki, Rusiya Federasiyasının
Prezidenti Vladimir Putinin fərmanı ilə Azərbaycan
Respublikasının Birinci vitse-prezidenti Mehriban Əliyeva Rusiya
Federasiyasının “Dostluq” ordeni ilə təltif olunub.
Avqustun
14-də kütləvi informasiya vasitələri yazdılar ki,
Azərbaycan Respublikasının Birinci vitse-prezidenti Mehriban
Əliyevanın rəsmi "Instagram" səhifəsindəki
paylaşımda xalqımızın ümummilli lideri
haqqında dəyərli fikirlər vardır: “Heydər
Əliyev bütün ömrü boyu xalqına, Vətəninə
sədaqətlə xidmət etmişdir. Müasir Azərbaycan
tarixinin bütün səhifələrində, istər
iqtisadiyyat, istər xarici siyasət, istər elm və mədəniyyətdə
onun silinməz izlərini görürük… Heydər
Əliyevin nailiyyətləri və qələbələri Azərbaycan
tarixində və Azərbaycan xalqının ürəyində
əbədi yaşayacaq və gələcək nəsillər
üçün mərdlik, müdriklik və vətənpərvərlik
nümunəsi olacaqdır”.
Bəs bu qəbildən olan xəbərlərin ildən-ilə
və ya aydan- aya deyil, hər gün artmasının səbəbi
nədir? Bu
sualın cavabını Azərbaycan Respublikasının
Prezidenti İlham Əliyev Təhlükəsizlik
Şurasının 21 fevral 2017-ci il tarixli
iclasında ətraflı şəkildə vermişdi. Xatırladaq ki, dövlət başçımız
həmin iclasda yeni təyin edilmiş Birinci vitse - prezident
Mehriban xanım Əliyevanı təqdim edərək
demişdi ki, Mehriban Əliyeva uzun illərdir ölkəmizin
ictimai-siyasi həyatında, mədəni həyatımızda
mühüm və fəal rol oynayır. O, Yeni Azərbaycan
Partiyasının sədr müavinidir. Yeni Azərbaycan
Partiyası ölkəmizin aparıcı siyasi qüvvəsidir,
Cənubi Qafqazın ən böyük partiyasıdır.
O zaman
vurğulanmışdı ki, Mehriban Əliyeva 2004-cü ildən
ulu öndərin adını daşıyan Heydər Əliyev
Fondunun prezidentidir. Heydər Əliyev Fondu onun rəhbərliyi
ilə nəinki Azərbaycanın, həm də regionun ən
böyük və nüfuzlu ictimai təşkilatına
çevrilmişdir. Bu fondun çoxşaxəli
fəaliyyəti Azərbaycan xalqı tərəfindən
yüksək qiymətləndirilir. Fondun təşəbbüsü
ilə bir çox önəmli layihələrə, proqramlara
start verilmişdir. Onların arasında
“Yeniləşən Azərbaycana yeni məktəb” proqramı
xüsusi qeyd edilməlidir. Məhz bu
proqramın başlanması nəticəsində ölkəmizdə
üç mindən çox məktəb əsaslı təmir
olunub və ya yenidən tikilmişdir.
Heydər Əliyev Fondunun bilavasitə Mehriban
xanımın təşəbbüsü ilə
reallaşdırılan layihələrinin hər biri ayrılıqda
bir yazının mövzusudur. Məsələn, onun
mədəniyyətlə, incəsənətlə
bağlı layihələri xalqımızın mənəvi,
tarixi, mədəni irsimizin qorunması işində əvəzolunmaz
rol oynamışdır. Dəyərli və
misilsiz sərvətimiz olan muğam sənətinin yenidən
inkişafı və beynəlxalq arenaya
çıxarılması məhz Heydər Əliyev Fondunun və
Mehriban Əliyevanın şəxsi təşəbbüsü
nəticəsində mümkün olmuşdur. Dövlət başçımızın da qeyd
etdiyi kimi, Azərbaycanda keçirilən muğam müsabiqələri
artıq həyatımızın ayrılmaz hissəsinə
çevrilmişdir. Bu baxımdan belə təşəbbüslər
çox böyük ictimai məna daşıyır. Eyni zamanda, dünya miqyasında muğamın məhz
Azərbaycan sənəti kimi təqdim olunmasında Heydər
Əliyev Fondunun çox böyük rolu olmuşdur.
Ancaq Mehriban Əliyevanın ictimai-siyasi həyatdakı fəaliyyəti
daha böyük rezonans yaradır. Belə ki, o, Milli
Olimpiya Komitəsinin və İcraiyyə Komitəsinin
üzvüdür və onun bu fəaliyyəti dünyanın
idman ictimaiyyətinin gözü qabağındadır. 2012-ci ildə keçirilən “Eurovision” mahnı
müsabiqəsinin yüksək səviyyədə
keçirilməsi məhz onun təşkilatçılığı
ilə mümkün olmuşdur. 2015-ci ildə
birinci Avropa Oyunlarının yüksək səviyyədə
alınması da Təşkilat Komitəsinin və onun rəhbəri
Mehriban Əliyevanın fəaliyyəti nəticəsində
olmuşdur. İki il yarım ərzində
bu yarışları Yay Olimpiya Oyunları səviyyəsində
keçirmək, əlbəttə ki, böyük nailiyyət
idi. Birinci Avropa Oyunları tarixdə ən
yüksək səviyyədə keçirilmiş mötəbər
idman tədbiri kimi qalacaqdır. Bütün bunları nəzərə
alan dövlət başçımız
IV İslam Həmrəyliyi Oyunlarının təşkilini də
Mehriban Əliyevaya həvalə etmişdi və nəticələr
hamıya məlumdur.
Mehriban Əliyeva UNESKO-nun və İSESKO-nun xoşməramlı
səfiri kimi də ölkəmizin beynəlxalq aləmdəki
nüfuzunun artmasına önəmli töhfələr verir. 2015-ci ildə birinci Avropa
Oyunlarının keçirilməsində göstərdiyi xidmətlərə
görə Mehriban Əliyeva Azərbaycan dövlətinin ən
ali mükafatı olan “Heydər Əliyev”
ordeni ilə təltif edilmişdir. Bu gün istənilən
soydaşımız ona böyük rəğbət və
sevgi ilə yanaşır.
15 il əvvəl
– avqustun bu günlərində Mehriban xanım Əliyeva Azərbaycanın
şifahi xalq ədəbiyyatının və musiqi irsinin
qorunub saxlanılması və inkişaf etdirilməsi sahəsindəki
fəaliyyətinə görə UNESKO-nun xoşməramlı
səfiri adına, 2005-ci il iyunun 9-da ictimai, mesenatlıq və
xeyriyyəçilik fəaliyyətinə, həmçinin təhsil
və mədəniyyət müəssisələrinin dəstəklənməsinə,
Rusiya və Azərbaycan xalqları arasında dostluğun
möhkəmlənməsinə sanballı töhfələrinə
görə Rusiyanın “Yüzilliyin mesenatları” Beynəlxalq
Xeyriyyə Fondunun “Yaqut Xaç” ordeninə,
sivilizasiyalararası dialoq daxil olmaqla, müxtəlif sahələrdə
genişmiqyaslı və fədakar fəaliyyətinə,
qayğıya ehtiyacı olan uşaqlara diqqətinə,
onların yaşayış şəraitinin
yaxşılaşmasına, təhsilə, həmçinin
İslam aləmində görülən işlərə
böyük dəstəyinə görə 2006-cı il
noyabrın 24-də İSESKO-nun xoşməramlı səfiri
adına, 2007-ci ildə bəşəriyyətin ali
ideyalarına xidmətdə qazandığı görkəmli
nailiyyətlərə görə “Qızıl ürək”
beynəlxalq mükafatına, 2009-cu ildə Azərbaycanın
ictimai-siyasi və mədəni həyatında səmərəli
fəaliyyətinə görə “Heydər Əliyev
Mükafatı”na, həmçinin, iki mötəbər
mükafata -- Fransa dövlətinin “Şərəf Legionu”
ordeninə və UNESKO-nun “Qızıl Motsart” medalına, eyni
zamanda, Krans Montana Forumunun Qızıl medalına, Polşa
Respublikasının “Xidmətlərə görə”
Böyük Komandor Xaçı ordeninə, İslam mədəni
irsinin dünyada geniş təbliği, Azərbaycanda və
ölkə hüdudları xaricində nəcib xeyriyyəçilik
fəaliyyətinə, təhsilə, tibbə verdiyi
böyük töhfələrə görə Küveyt
Dövlətinin Fəxri diplomuna, Rusiyada “Müqəddəs Mələksima
Knyaginya Olqa” ordeninə, İtaliyanın “Xidmətlərinə
görə” Böyük Xaç Kavaleri ordeninə layiq
görülüb.
Heydər Əliyev Fondu məhz Mehriban Əliyevanın təşəbbüsü
ilə xarici ölkələrdəki unikal mədəniyyət
abidələrinin bərpası prosesində də yaxından
iştirak edir.
Fond Fransada Dünya Mədəni İrs Siyahısına daxil
edilmiş Versal Sarayını, Parisdə XIV əsrə aid
Notr-Dam, Strasburq Kafedral kilsələrinin, İkinci dünya
müharibəsində dağılmış Berlin Şəhər
Sarayının, həmçinin Vatikan arxivlərində
saxlanılan Azərbaycan orta əsrlər əlyazmalarının
bərpa olunmasına kömək edib. Heydər
Əliyev Fondu ilə Müqəddəs Arxeologiya üzrə
Papa komissiyası arasında imzalanmış Anlaşma
Memorandumuna əsasən, fond Romanın Kapitoli Muzeyində bərpa
işlərinin həyata keçirilməsinə də dəstək
verib.
Mehriban
xanım Əliyevanın rəhbərlik etdiyi Heydər
Əliyev Fondu Ermənistan--Azərbaycan, Dağlıq
Qarabağ münaqişəsi ilə bağlı həqiqətlərin
də beynəlxalq aləmə çatdırılması
üçün bütün mövcud imkanlardan istifadə
edir, mədəniyyət, təhsil, səhiyyə və digər
sahələrdə həyata keçirilən layihələrin
məhz bu məqsədə yönəlməsinə
çalışır. Moskva, Berlin, Strasburq, Buxarest, Cenevrə,
Ankara, İstanbul, Paris, Vaşinqton, Nyu York, Varşava, London,
Dubay, Haaqa, Kiyev və Tbilisidə Xocalı
soyqırımının ildönümünə həsr
olunmuş aksiyaların keçirilməsi, xarici ölkələrdə
fondun hazırladığı “Xocalı soyqırımı”
filmi ilə yanaşı, insanlığa qarşı törədilən
cinayəti əks etdirən müxtəlif ekspozisiyaların
nümayiş olunması, fondun dəstəyi və təşkilatçılığı
ilə məktəblilər arasında keçirilən
“Xocalı uşaqların gözü ilə” rəsm müsabiqəsinin,
əl işlərinin, fotoşəkillərin dünyanın
qabaqcıl ölkələrində keçirilən sərgilərdə
nümayiş etdirilməsi, fondun nəşr etdirdiyi
“Qarabağ həqiqətləri” toplusu və “Azərbaycana
qarşı müharibə: Mədəni irsin hədəfə
alınması” kitablarının dünya ölkələrində
paylanması beynəlxalq ictimaiyyətdə Azərbaycan həqiqətləri
barədə dolğun təsəvvürün
formalaşdırılması işinə xidmət edir,
töhfələrini verir.
Bu gün
istənilən soydaşımız onun ictimai-siyasi fəaliyyəti
barədə söz açarkən fəxrlə deyə bilir
ki, Mehriban Əliyeva Azərbaycan qadınının həqiqi
obrazını bütün dünyaya tanıtmış, Şərq
xanımlığının ən ali
nümunəsini yaratmışdır.
İttifaq
MİRZƏBƏYLİ
Xalq qəzeti.- 2019.- 15 avqust.- S.1; 3.