Qaçqın və məcburi
köçkünlərin sosial problemləri dövlətimizin
diqqət mərkəzindədir
Bu gün bütün
dünyanı qaçqın və məcburi
köçkünlərin sayının getdikcə artması
problemi daha çox narahat edir. Bu ağrılı məsələ,
ilk növbədə, davam edən müharibələrlə,
nizamlanmayan münaqişələrlə bağlıdır.
Problemin aktuallığını və təxirəsalınmaz
tədbirlər görülməsinin zəruriliyini nəzərə
alan BMT-nin Baş Məclisi tərəfindən 2000-ci ildə
müvafiq qətnamə ilə 20 iyun tarixinin Ümumdünya
Qaçqınlar Günü kimi qeyd edilməsi qərara
alınıb. Şübhəsiz ki, bu sənədin qəbulunda
əsas məqsəd doğma Vətəndən didərgin
düşən qaçqın və məcburi
köçkünlərin acınacaqlı həyat şəraitini
diqqətdə saxlamaq, onların sayının
artmasının qarşısını almaq olub. Təəssüf
ki, həmin vaxtdan 20 ilə yaxın bir müddət ötsə
də, hələlik problemin həllində elə bir müsbət
nəticə müşahidə olunmayıb.
Dünyanı
narahat edən ən ağrılı problem
BMT-nin Qaçqınlar üzrə
Ali Komissarlığının 20 İyun Ümumdünya
Qaçqınlar Günü münasibətilə
yaydığı hesabatında bildirilir ki, hazırda
dünyada öz yaşayış yerlərindən didərgin
düşən insanların sayı rekord həddə çatıb.
Belə ki, son 20 ildə dünyada qaçqın və məcburi
köçkünlərin sayı iki dəfə artaraq 70,8
milyon nəfərə yüksəlib. Hesabatda qeyd edilir ki, cəmi
bir il ərzində dünya üzrə qaçqınların
sayı 2,3 milyon nəfər artıb.
Bu gün respublikamız da
sözügedən problemlə üz-üzə qalıb.
İyirminci əsrin sonlarında Ermənistanın
torpaqlarımızın 20 faizdən çox hissəsini
işğal etməsi Azərbaycanı dünyanın ən
çox qaçqın və məcburi
köçkünü olan ölkələrindən birinə
çevirib. Xalqımız bir əsrdə dörd dəfə
ermənilər tərəfindən soyqırımına məruz
qalıb. Sonuncu dəfə isə 1988-ci ildə 250 min etnik azərbaycanlı
Ermənistandakı tarixi torpaqlarından qovulub,
respublikamıza pənah gətirib. Eyni zamanda, 1990-cı ildə
Orta Asiyadan didərgin salınan 50 min nəfərədək
Ahıska türkü də respublikamızda
sığınacaq tapıb.
Xatırladaq ki, Ermənistan
silahlı birləşmələrinin işğalı nəticəsində
Dağlıq Qarabağın azərbaycanlılar yaşayan 126
yaşayış məntəqəsi zorla
boşaldılıb, Dağlıq Qarabağdan, ətraf
rayonlardan, həmçinin Ermənistanla və ya Dağlıq
Qarabağla həmsərhəd olan yaşayış məntəqələrindən
700 min nəfərədək soydaşımız öz daimi
yaşayış yerindən məhrum olunaraq respublikanın 62
şəhər və rayonunda məskunlaşıb. Ermənistan--Azərbaycan,
Dağlıq Qarabağ münaqişəsi nəticəsində
20 min azərbaycanlı həlak olub, 100 min nəfər
yaralanıb, 50 min insan isə müxtəlif dərəcəli
xəsarət alıb.
Hazırda Azərbaycanda 1 milyon 200
mindən çox qaçqın və məcburi
köçkün var. Problemin ciddiliyini diqqətə
çatdıran Baş Nazirin müavini Əli Əhmədov
cari il iyunun 20-də Ümumdünya Qaçqınlar
Günü ilə bağlı keçirilən tədbirdə
qeyd edib ki, Azərbaycanda 10 milyon əhalinin bir milyondan
çoxu qaçqın və məcburi köçkün vəziyyətindədir.
Yəni ölkədə hər 10 nəfərdən biri
qaçqındır: “Halbuki dünyada olan əhali ilə
qaçqınların sayını müqayisə etdikdə,
yüzlərlə insana bir qaçqın düşür. Bu,
qaçqın və məcburi köçkün probleminin Azərbaycanda
nə qədər ciddi olduğunu göstərir.
Görünür, dünyada ədalətsizlik baş alıb
gedir ki, qaçqın və məcburi köçkün
problemi yaranıb. Dünyada separatizm, başqa ərazilərə
göz dikmək olmasaydı, qaçqın problemi də bu qədər
ağır məhrumiyyətlərə səbəb olmazdı”,
--deyə Baş Nazirin müavini bildirib.
Ulu öndər Heydər Əliyev
prezidentlik fəaliyyəti dövründə yurdlarından didərgin
düşən soydaşlarımızın problemlərinin həllini
daim diqqətdə saxlayıb, bununla bağlı irimiqyaslı
tədbirlər həyata keçirib. Ümummilli liderin
1993-2003-cü illərdə münaqişənin aradan
qaldırılması istiqamətindəki fəaliyyəti,
qaçqın və məcburi köçkünlərə
xüsusi qayğısı, çadır düşərgələrinin
ləğvi ilə əlaqədar verdiyi qərarlar sonrakı
işlər üçün təməl olub. Dahi şəxsiyyətin
17 sentyabr 1998-ci il tarixli sərəncamı ilə təsdiqlənən
“Qaçqınların və məcburi köçkünlərin
problemlərinin həlli üzrə” Dövlət Proqramına
əsasən, soydaşlarımız üçün yeni qəsəbələr
salınmağa başlanıb. Məcburi köçkünlərin
mənzil-məişət məsələlərinin həlli,
onların məşğulluğunun təmin edilməsi istiqamətində
önəmli addımlar atılıb.
Dövlət
vətəndaşına arxa-dayaq oldu
Dövlətimizin
qayğısı ilə bu gün məcburi
köçkünlərin sosial problemləri uğurla həll
olunur. Azərbaycan Respublikasının iqtisadi-siyasi qüdrəti
artdıqca, Prezident İlham Əliyev qaçqın və məcburi
köçkünləri narahat edən problemlərlə daha
yüksək səviyyədə məşğul olmağa
başlayıb. Azərbaycanda davamlı iqtisadi inkişafın
təmin olunması, dünya iqtisadiyyatına sıx inteqrasiya,
sosial-iqtisadi sahələrdə həyata keçirilən genişmiqyaslı
islahatlar xalqımızın ildən-ilə maddi
rifahının yüksəlməsinə gətirib
çıxarıb. Əldə edilən iqtisadi nailiyyətlər
ölkəmizin davamlı inkişafına şərait
yaradıb, sosial problemlərin aradan qaldırılması
üçün yeni imkanlar açıb. Belə ki, əvvəllər
bu məsələdə xarici ölkələrin, müxtəlif
humanitar təşkilatların köməyinə daha çox
ehtiyac duyulurdusa, Azərbaycan artıq qaçqın və məcburi
köçkünlərin bütün problemlərini
özü müstəqil şəkildə həll etmək
gücünə malikdir.
Prezident İlham Əliyev
2003-cü ilin oktyabrından başlayaraq bu istiqamətdə
işləri ardıcıl və məqsədyönlü
şəkildə davam etdirir. Ötən müddətdə Azərbaycanın
dinamik sosial-iqtisadi inkişafı qaçqın və məcburi
köçkünlərin sosial problemlərinin həllinə əlverişli
şərait yaradıb, onların mənzil-məişət
şəraitinin yaxşılaşdırılması, məşğulluğunun
artırılması istiqamətində görülən
işlərin miqyası daha da genişlənib. Dövlətimizin
başçısının 2004-cü il 1 iyul tarixli sərəncamı
ilə təsdiq edilən “Qaçqınların və məcburi
köçkünlərin yaşayış şəraitinin
yaxşılaşdırılması və məşğulluğunun
artırılması üzrə Dövlət
Proqramı”nın və sonradan həmin sənədə
2007-ci il 31 oktyabr, 2011-ci il 21 fevral tarixli sərəncamlarla təsdiqlənən
əlavələrin icrası uğurla
reallaşdırılıb. Azərbaycan bu gün
dünyadakı qaçqın probleminin həlli ilə
bağlı görülən işlərə töhfə
vermək, müxtəlif ölkələrdən
respublikamıza gələn qaçqınları himayə etmək
imkanına malikdir və bundan geniş istifadə edir.
Fəaliyyətə
başladığı ilk gündən etibarən Heydər
Əliyev Fondu da qaçqın və məcburi
köçkünlərin üzləşdikləri
çoxsaylı problemlərin dünya ictimaiyyətinə
çatdırılmasına və onların həllinə
diqqətlə yanaşır. Fondun prezidenti Mehriban xanım
Əliyevanın təşəbbüsü ilə yaradılan
“Azərbaycan” portalı bu baxımdan mühüm önəm
daşıyır. Portalda Ermənistan–Azərbaycan, Dağlıq
Qarabağ münaqişəsindən, Xocalı
soyqırımından bəhs edən məlumatların yerləşdirilməsi
dünya ictimaiyyətinin erməni vəhşilikləri ilə
yaxından tanış olmasına şərait yaradır.
Neçə ildir ki, Ermənistan-Azərbaycan,
Dağlıq Qarabağ münaqişəsinin beynəlxalq
hüququn norma və prinsiplərinə və bu sahədə
qəbul edilən sənədlərə əsaslanaraq, ölkəmizin
ərazi bütövlüyü çərçivəsində
həlli üzrə danışıqlar aparılır.
Dövlət orqanlarından, beynəlxalq təşkilatlardan
alınan müvafiq təkliflərlə bağlı
“Böyük Qayıdış” proqramının layihəsinin
hazırlanması işləri davam etdirilir. Bu layihə həm
işğal olunan ərazilərə dəyən ziyanın dəqiq
hesablanmasına, həm də torpaqlar işğaldan azad ediləndən
dərhal sonra bərpa və yenidənqurma işlərinə
başlamağa imkan verəcək.
Qeyd edək ki, 2007-ci ildə Azərbaycanda
12 çadır düşərgəsinin ləğv edilməsi
ilə başlanan proses nəticəsində qaçqın və
məcburi köçkünlər üçün bugünə
kimi 3,5 milyon kvadratmetr yaşayış sahəsi olan müasir
qəsəbələr və çoxmərtəbəli
binalardan ibarət yaşayış kompleksləri
salınıb. İndiyədək 58 min 203 ailə və ya 300
min qaçqın və məcburi köçkünün mənzil
şəraiti yaxşılaşdırılıb ki, ondan da 54
min 203 ailə, yaxud 272 min nəfər son 15 ilin payına
düşür. Təkcə ötən il ərzində 5 min
903 məcburi köçkün ailəsi yeni mənzillərə
köçürülüb. Ümumilikdə, bu kateqoriyadan
olan insanların sosial problemlərinin həlli
üçün indiyədək 7,1 milyard manat vəsait xərclənib.
Açılan yeni iş yerləri nəticəsində məcburi
köçkünlər arasında yoxsulluq həddi son 15 ildə
75 faizdən 12 faizədək azalıb.
Cari il aprelin 5-də Bakının
Kürdəxanı qəsəbəsində məcburi
köçkün ailələri üçün salınan
yaşayış kompleksinin istifadəyə verilməsi mərasimində
çıxış edən dövlətimizin
başçısı bildirib ki, paytaxt ərazisindəki
yataqxanalarda və digər inzibati binalarda müvəqqəti məskunlaşan
810 məcburi köçkün ailəsi üçün
Prezidentin 2011-ci ildə imzaladığı sərəncama əsasən,
çoxmərtəbəli binalardan ibarət yeni
yaşayış məhəlləsinin tikilməsi nəzərdə
tutulub. Məhəllənin salınması üçün 15
hektar torpaq sahəsi ayrılıb. Keçən ilin mart
ayında başlanan tikinti işləri yüksək keyfiyyətlə
sona çatdırılıb. Layihə üzrə doqquzmərtəbəli
15 bina tikilib. Bu, ölkə üzrə məcburi
köçkünlər üçün salınan sayca
103-cü müasir yaşayış kompleksidir.
Xatırladaq ki, təkcə ötən
il məcburi köçkünlər üçün 5 mindən
çox mənzil inşa edilib. Cari ildə isə 6 min mənzilin
istifadəyə verilməsi nəzərdə tutulub.
Ümumilikdə, iki il ərzində təqribən 11 min məcburi
köçkün ailəsi yeni mənzillərlə təmin
olunacaq. Həmin mənzillərdə, təqribən, 50 minə
yaxın Vətəndən didərgin düşən soydaşlarımız
yaşayacaq.
Məcburi köçkünlərə
göstərilən dövlət qayğısından
danışarkən, Birinci vitse-prezident Mehriban
Əliyevanın rəhbərliyi ilə həyata keçirilən
tədbirləri də vurğulamaq istərdik. Mehriban xanım
2017-ci ilin martında məcburi köçkünlərin sosial
problemlərinə həsr edilən müşavirədə
müvafiq qurumlar qarşısında konkret vəzifələr
qoyub, bu kateqoriyadan olan insanların çətinliklərinin
aradan qaldırılmasına prioritet vəzifə kimi
yanaşıb.
Qaradağ rayonunda 1026 məcburi
köçkün ailəsi üçün
yaşayış kompleksinin inşası, Abşeronun
Masazır, Mehdiabad, Sabunçunun Ramana qəsəbələrində
470 mənzilin məcburi köçkünlərə təqdim
edilməsi, Heydər Əliyev Fondu tərəfindən
alınan 465 mənzilə Binəqədi rayonunda yerləşən
Təcili Tibbi Yardım Stansiyasının yarımçıq
binasından məcburi köçkün ailələrinin
köçürülməsi, habelə Sumqayıtdakı 1005
məcburi köçkün ailəsinin yeni tikilən
yaşayış binalarından mənzillə təmin
olunması onlara göstərilən qayğı və diqqətin
bariz ifadəsidir.
2019-cu il aprelin 26-da Azərbaycan
Respublikasının Birinci vitse-prezidenti Mehriban Əliyeva Nəsimi
rayonunda Tibb Universitetinin 4 saylı yataqxanasında və
Qaradağ rayonunda salınan “Qobu Park” yaşayış
kompleksində məskunlaşan məcburi köçkünlərlə
görüşüb, onların problemləri,
yaşayış şəraiti ilə tanış olub.
Görüş zamanı sakinlərin arzu və istəklərini
dinləyən Birinci vitse-prezident onları narahat edən məsələlərin
qısa zamanda həll olunması üçün müvafiq
tapşırıqlar verdi .
Yurd yerlərinin
işğaldan azad ediləcəyi gün uzaq deyil
Bu gün məcburi
köçkünlər yaşayan elə qəsəbələr
var ki, onlar işğaldan azad edilən ərazilərdə
salınıb. Məsələn, Horadiz şəhəri, demək
olar ki, yenidən qurulub və bu gün ən gözəl
yaşayış yerlərindən biridir. Şıxarx qəsəbəsində
mindən çox köçkün ailəsi məskunlaşıb.
Yüz əlli evlik Cocuq Mərcanlıda müasir infrastruktur,
iş yerləri, kommunikasiyalar yaradılıb.
Məcburi köçkünlərin
sosial şəraiti ildən-ilə yaxşılaşır,
üzləşdikləri problemlərin həllinə həssaslıqla
yanaşılır. Bir müddət bundan əvvəl Prezident
İlham Əliyev əhalinin sosial vəziyyətinin
yaxşılaşdırılması ilə bağlı bir
sıra sərəncamlar imzaladı. Həmin sərəncamlar
sırasında məcburi köçkünlərin müavinətlərinin
50 faiz artırılmasını ifadə edən sənəd
dövlətimizin onlara diqqətinin əyani ifadəsidir.
Azərbaycan dövlətinin bu
gün qarşısında duran əsas vəzifə
torpaqlarımızın erməni
işğalçılarından azad edilməsi, məcburi
köçkünlərin dədə-baba torpaqlarına
qaytarılmasıdır. Bu baxımdan Prezident İlham
Əliyevin tez-tez söylədiyi - “Bizim əsas məqsədimiz
məcburi köçkün soydaşlarımızı
doğma yurd-yuvalarına qaytarmaq və orada onların əvvəlkindən
də yaxşı şəraitini təmin etməkdir”- fikri
inanırıq ki, tezliklə gerçəkləşəcək.
Ürəyi doğma yurd həsrəti
ilə döyünən insanlara dövlət nə qədər
yaxşı şərait yaratsa da, onların doğma
yurd-yuvalarına dönmək istəyini heç nə ilə
əvəz etmək mümkün deyil. Qəribsəyən
torpaqlara ayaq basmaq, erməni tapdağında qalan
doğmaların məzarlarını ziyarət etmək
qaçqın və məcburi köçkünlərin
müqəddəs arzusudur. Ona görə də o yurd yerlərinin
yağılardan xilas olunması fikri bir an da olsa, onları
rahat buraxmır. Əlbəttə, aparılan siyasi
danışıqlar bir nəticə verməzsə, rəşadətli
Azərbaycan Ordusu Ali Baş Komandanın əmri ilə
işğal altındakı torpaqlarımızı
düşməndən azad edəcək,
soydaşlarımız öz əzəli el-obasına
qayıdacaq.
* * *
Rəsmi məlumata əsasən,
hazırda dünyanın bütün münaqişə
zonalarında 1 qaçqına bir ildə sərf olunan ən
yüksək vəsait Azərbaycandadır. Elə buna görədir
ki, BMT-nin Qaçqınlar üzrə Ali
Komissarlığı 2012-ci ildə Azərbaycanı
özünün İcraiyyə Komitəsinə üzv
seçib. İndi beynəlxalq təşkilatlar tərəfindən
dinamik sosial-iqtisadi inkişaf yolunda davamlı uğurların
müəllifi olan Azərbaycanın qaçqın və məcburi
köçkünlərin sosial problemlərinin həlli istiqamətində
gördüyü irimiqyaslı işləri dünyanın
oxşar problemlə qarşılaşan əksər ölkələri
üçün nümunə hesab edilir. Bu isə ulu öndər
Heydər Əliyevin siyasi, sosial-iqtisadi strategiyasını
uğurla həyata keçirən Prezident İlham Əliyevin
sözügedən istiqamətdə tədbirlərin
ardıcıl və məqsədyönlü şəkildə
davam etdirməsinin, doğma ocaqlarından didərgin
salınan soydaşlarımızın bütün problemlərinin
Azərbaycan dövlətinin gündəlik
qayğısına çevrilməsinin bariz ifadəsidir.
Qabil Yusifoğlu.
Xalq qəzeti.-
2019.- 2 iyul. S. 9.