Azərbaycanın zəngin mədəni irsinin qorunması dövlət siyasətinin əsas istiqamətlərindən biridir

 

“Heydər Əliyev Mərkəzində keçirilən UNESCO-nun Ümumdünya İrs Komitəsinin 43-cü sessiyasının açılış mərasimi çox yüksək səviyyədə təşkil olunub. Mərasimdə Azərbaycan Respublikasının Birinci vitse-prezidenti, UNESCO-nun xoşməramlı səfiri Mehriban Əliyevanın iştirak etməsi Azərbaycanın milli-mənəvi dəyərlərinin, tarixi-mədəni irsin qorunması və təbliğinə, eləcə də beynəlxalq səviyyədə dünya irsinin mühafizəsinə dəstəyin dövlət siyasətinin əsas istiqamətlərindən biri olduğunu sübut edir.”

Bunu Ümumdünya İrs Komitəsinin 43-cü sessiyasının iştirakçısı, Mərkəzi Amerikanın Karib hövzəsində yerləşən Sent KitsNevis dövlətinin UNESCO-dakı səfiri Devid Doyl deyib.

O bildirib  ki, gözəl Bakı şəhərini gəzdim, onun zəngin tarixi və mədəni abidələri ilə tanış oldum. Bura, həqiqətən,  əsrarəngiz bir məkandır. Bakıya  gələn hər kəsdə  yenidən   bu şəhərə qayıtmaq arzusu yaranır.

D.Doyl  əlavə edib  ki, beynəlxalq əhəmiyyətli belə bir tədbirin  Azərbaycanda  keçirilməsi təsadüfi deyil. Azərbaycanın belə tədbirləri keçirməkdə zəngin təcrübəsi var. Sessiya  yüksək səviyyədə keçirilir. Burada dünyadakı  mədəni irsin  qorunmasının yolları axtarılır, maraqlı təkliflər irəli sürülür. Sessiyada qəbul edimiş Bakı Bəyannaməsinin mədəni irsin qorunmasında  əhəmiyyətli  rol oynayacağına əminəm.

 

 Hazırladı:

 M.Mükərrəmoğlu

 

Xalq qəzeti.- 2019.- 3 iyul.- S. 2.