Ümummilli
lider Heydər Əliyevin 1969-cu il iyulun 14-də ölkəmizdə
siyasi hakimiyyətə gəlməsi mühüm tarixi hadisədir
İyulun 11-də Azərbaycan Milli
Elmlər Akademiyasının (AMEA) Rəyasət Heyətində
ümummilli lider Heydər Əliyevin ölkəmizdə siyasi
fəaliyyətə başlamasının 50 illiyinə həsr
olunmuş “Azərbaycan tarixində Heydər Əliyev
epoxası: tarix və müasirlik” mövzusunda elmi konfrans
keçirilib.
AZƏRTAC xəbər verir ki, tədbiri
giriş sözü ilə açan AMEA-nın prezidenti,
akademik Akif Əlizadə ümummilli lider Heydər Əliyevin
1969-cu il iyulun 14-də ölkəmizdə siyasi hakimiyyətə
gəlməsini mühüm tarixi hadisə kimi dəyərləndirib:
”O vaxtdan yarım əsr keçir. Ancaq zaman keçdikcə
dünya şöhrətli siyasətçi Heydər
Əliyevin dahiliyi daha qabarıq şəkildə
özünü göstərir”, - deyə AMEA-nın prezidenti
bildirib. Akif Əlizadə bu tarixi hadisə ilə bağlı
respublikamızın müxtəlif qurumlarında, ölkə
hüdudlarından kənarda silsilə tədbirlərin
keçirildiyini, eləcə də AMEA-da Ulu Öndərin həyat
və fəaliyyətindən bəhs edən nəşrlərin
işıq üzü gördüyünü söyləyib.
Bildirib ki, ömrünü dövlətinin, xalqının
inkişafına, çiçəklənməsinə və
rifahına həsr edən Ulu Öndərin adı Azərbaycanın
tarixinə qızıl hərflərlə yazılıb.
Akademik Akif Əlizadə diqqətə
çatdırıb ki, ümummilli lider Heydər Əliyev Azərbaycana
rəhbərlik etdiyi dövrdə ölkəmizdə elmin, o
cümlədən AMEA-nın inkişafına böyük diqqət
və qayğı ilə yanaşıb. Ulu Öndərin
ikinci dəfə hakimiyyətə gəlişindən sonra Azərbaycan
elminin yeni inkişaf mərhələsi başlanıb.
Daha sonra AMEA-nın vitse-prezidenti,
akademik İsa Həbibbəyli “Azərbaycanın müstəqillik
dərsləri: Heydər Əliyevdən İlham Əliyevə”
mövzusunda məruzə ilə çıxış edib.
Alim xalqımızın ümummilli lideri, görkəmli
dövlət xadimi Heydər Əliyevi dünya miqyaslı
böyük siyasətçi, mənsub olduğu xalqın
xilaskarı və qüdrətli rəhbəri, müstəqil
Azərbaycanın banisi kimi xarakterizə edib. Akademik bildirib ki,
ümummilli lider Heydər Əliyevin 1969-cu il iyulun 14-də
ölkəmizdə siyasi hakimiyyətə gəlməsi
böyük tarixi dönüşün möhtəşəm
başlanğıcı kimi tarixə yazıldı. 1969-cu ildə
keçirilən məşhur avqust plenumuna toxunan akademik
İsa Həbibbəyli deyib: “14 iyul Azərbaycanda böyük
dönüşün möhtəşəm
başlanğıcıdırsa, avqust plenumu Heydər
Əliyevin dövlətçilik modeli və dövlətçilik
təliminin uzunmüddətli strategiyasıdır. Heydər
Əliyevin avqust plenumunda qaldırdığı məsələlər
sovet Azərbaycanının proqramına çevrildi. Bu məsələlər
müstəqil Azərbaycanda da dövlət müstəqilliyinin
möhkəmləndirilməsi və inkişaf etdirilməsinə
işıq salan qərarlardır”.
İsa Həbibbəyli qeyd edib ki,
Heydər Əliyev epoxasından İlham Əliyev erası
doğmuşdur. Son 16 il ərzində Azərbaycan dünya tərəfindən
qəbul edilib. Bu, Heydər Əliyev epoxasının və
İlham Əliyev erasının böyük təntənəsidir.
Akademik, həmçinin Ulu Öndərin elm, təhsil və mədəniyyət
xadimlərinə yüksək diqqət və
qayğısından da bəhs edib.
Milli Məclisin deputatı, Xalq
yazıçısı Elmira Axundova “1969-cu ilin 6 avqust plenumu:
Böyük dönüşün möhtəşəm
başlanğıcı” mövzusunda məruzəsində ulu
öndər Heydər Əliyevin hakimiyyətə gəlişindən
danışıb, şahidlərin bu dönəmlə
bağlı söylədikləri xatirələri
bölüşüb. O, Ümummilli Liderin avqust plenumundakı
çıxışı zamanı korrupsiya, rüşvətxorluq
və s. kimi problemlər barədə səsləndirdiyi fikirlərdən
də söz açıb.
Tədbirdə AMEA-nın
A.Bakıxanov adına Tarix İnstitutunun direktoru, akademik Yaqub
Mahmudovun “Heydər Əliyev – dünya şöhrətli,
görkəmli dövlət xadimi” mövzusunda məruzəsi
dinlənilib. Akademik Yaqub Mahmudov avqust plenumunda Ulu Öndərin
sovetlər sistemində heç kəsin cəsarət etmədiyi
fikirləri gündəmə gətirməsi ilə onun siyasi
xəttinin müəyyənləşdiyini, ağır sovet
rejimindəki fəaliyyəti ilə gələcək Azərbaycan
modelinin hazırlandığını bildirib.
Vurğulayıb ki, Heydər Əliyevin hər zaman axına
qarşı gedərək tarixin gedişini dəyişən
şəxsiyyətlər sırasında yer alıb və
bütün çətinliklərə rəğmən
hazırkı Azərbaycanı yaradıb.
AMEA-nın Ə.M.Quliyev adına
Aşqarlar Kimyası İnstitutunun direktoru, akademik Vaqif Fərzəliyev
isə “Azərbaycan elmi Heydər Əliyev epoxasında”
mövzusunda məruzə ilə çıxış edib.
Akademik çıxışında Heydər Əliyevin 1969-cu
ildə siyasi fəaliyyətə başlaması və
1993-cü ildə yenidən hakimiyyətə
qayıdışından sonra respublikada elmi sahələrin
inkişafı istiqamətində görülən işlərdən
danışıb. Akademiyanın ikinci - 1970-1980-ci illərdəki
çiçəklənmə dövrünün Ulu Öndərin
adı ilə bağlı olduğunu deyən Vaqif Fərzəliyev
həmin dövrdə alimlərin əməyinin qiymətləndirilməsində
də Heydər Əliyevin böyük rolu olduğunu söyləyib.
Xalq qəzeti.- 2019.-12 iyul.- S.4.