Böyük istiqlal mücahidinin

amalı milli ideallarda yaşayır

Əhməd bəy Ağaoğlu – 150

Böyük türkoloq və istiqlal mücahidi Əhməd bəy Ağaoğlunun anadan olmasının 150 illiyi münasibətilə Şuşa Rayon İcra Hakimiyyətinin, Azərbaycan Mətbuat Şurasının və Bakı Dövlət Universiteti jurnalistika fakültəsinin birgə təşkilatçılığı ilə ölməz məfkurə sahibinin yetirməsi olduğu təhsil ocağının varisi Şuşa şəhər 1 nömrəli tam orta məktəbdə təntənəli yubiley mərasimi keçirilib.

Köçkünlük illərində Bakının Yasamal rayonu ərazisində fəaliyyətini davam etdirən məktəbin dəhlizlərində rayon musiqiçilərinin təşkil etdiyi çal-çağır, Rəsm Qalereyasının təqdim etdiyi ekspozisiya Milli Məclisin deputatlarında, jurnalistika alimlərində, media təmsilçilərində və digər qonaqlarda şuşalıların bu gün də Azərbaycan mədəniyyətini zənginləşdirən sənətçilər yetirdiyi barədə yetərli təəssürat yaradıb. Şuşa Dövlət Musiqili Dram Teatrının aktyorlarının ifasında ədəbi-bədii kompozisiya və Emin Məmmədlinin ifasında “Ey Vətən” mahnısı böyük maraqla qarşılanıb.

Yubiley məclisini giriş sözü ilə açan Şuşa Rayon İcra Hakimiyyəti başçısının müavini Vüsalə Fətəliyeva Əhməd bəy Ağaoğlunun Şuşanın çoxsaylı dahi yetirmələri arasında öncül şəxsiyyətlərdən olduğunu vurğulayıb, şuşalıların görkəmli hüquqşünas, publisist, tənqidçi və şərqşünas alim olmuş həmyerliləri ilə həmişə öyündüklərini vurğulayıb.

BDU mətbuat tarixi kafedrasının professoru Nəsiman Yaqublu ölməz yubilyarın şanlı ömür yolu və mübarizə hədəfləri barədə məruzə ilə çıxış edərək bildirib ki, böyük türkoloq və istiqlal mücahidi olmuş Əhməd bəy Ağaoğlunun ölməz amalı və nurlu əməlləri milli ideallarda yaşayır.

Dövlət İdarəçilik Akademiyasının professoru Elçin Əhmədov, Azərbaycan Mətbuat Şurasının sədri Əflatun Amaşov, Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev, BDU-nun jurnalistika fakültəsinin kafedra müdirləri – professorlar Cahangir Məmmədli və Allahverdi Məmmədli, professorları Qulu Məhərrəmli və Alxan Məmmədli, dosenti Aygün Əzimova, doktorantı Ruxsarə Məmmədova Əhməd bəy Ağaoğlunun dövlətçilik və jurnalistika tariximizdə sanballı xidmətlərindən söz açıb, onun zəngin və dəyərli irsinin layiqincə araşdırılması və çağdaş nəsillərə çatdırılması ilə bağlı zəruri işlərdən danışıblar.

Şuşa Rayon İcra Hakimiyyətinin başçısı Bayram Səfərov görkəmli həmyerlilərinin ömür və mübarizə yollarının rayonda yeni nəsillərin təlim-tərbiyəsi üçün örnək olduğunu vurğulayıb, məcburi köçkünlük şəraitində rayonun mövcudluğunu davam etdirən şuşalıların yurd həsrətindən və doğma yerlərə qayıtmaq arzularının bir an da azalmadığından danışıb.

Əhməd bəy Ağaoğlu nəslinin nümayəndəsi, Təhsil Nazirliyinin əməkdaşı Rövşən Ağayev amal və əməlləri ilə təkcə bir ailəni, şəhəri, ölkəni deyil, bütün Türk dünyasını şərəfləndirmiş nəsildaşının xatirəsinə göstərilən yüksək ehtirama görə minnətdarlığını bildirib.

Mərasim Bülbülcan adına Şuşa musiqi məktəbinin müəllimləri Siyavuş Mehdiyev və Xəyalə Əliyevanın ifasında yanıqlı “Qarabağ şikəstəsi”nın sədaları altında sona yetib.

Tahir AYDINOĞLU

Xalq qəzeti.- 2019.- 9 iyun.- S.6.