Azərbaycan filmləri

beynəlxalq kinofestivalda

İran İslam Respublikasının Babol şəhərində 9-cu Vareş Beynəlxalq kino festivalı keçirilmişdir. Festivalda ölkəmizi Əməkdar incəsənət xadimi, kinorejissor və operator Nizami Abbas, Mədəniyyət Nazirliyinin əməkdaşı Elşad Əliyev, gənc rejissor Zəhra Mirrza və prodüser Elşən Əliyev təmsil etmişlər.

Azərbaycanın “Qanadsız möcüzə” qısametrajlı bədii və “Azərbaycan xalçası”, “Azərbaycan muğamı”, “Azərbaycan mətbəxi” sənədli filmləri festivalın müsabiqə proqramında iştirak etmiş və kinosevərlər tərəfindən maraqla qarşılanmışdır.

Bundan əlavə, “Çovqan”, “İz...Qala”, “Miras”, “Şəki”, “O kimdir”, “Sovqat”, “Bakı əsrlərin aynasında”, “Azərbaycan mətbəxinin rəngləri” sənədli filmlərimiz “Azərbaycan proqramı” çərçivəsində İran tamaşaçılarına təqdim olunmuşdur.

Festivalda həmçinin Azərbaycan kinosuna həsr olunan tədbir keçirilmiş, milli kinomuzun tarixi və bugünü haqqında iştirakçılara, eləcə də İran televiziya kanallarına məlumat verilmişdir.

M. MÜKƏRRƏMOĞLU

Xalq qəzeti.- 2019.- 8 may.- S.13.