İstiqlal
mübarizəmizin şanlı nişanəsi
Bizim bayrağımız qürur mənbəyimizdir.
Bizim bayrağımız canımızdır, ürəyimizdir.
İlham ƏLİYEV
Azərbaycan Respublikasının
Prezidenti
Bayraq
istənilən ölkənin dəyər verdiyi ən
mühüm atributlardan biridir. Buna görə də, Azərbaycan
bayrağı hər bir azərbaycanlı üçün
şərəfli və dəyərlidir. Qürur mənbəyimiz
olan üçrəngli bayrağımız bu gün yüksəklərdə
dalğalanır, hər bir vətəndaşı Vətənimiz
üçün daha böyük qələbələrə
ruhlandırır.
Bayraq
hər bir millətin mövcudluğunun təsdiqi, müstəqil
dövlət qurmaq qabiliyyətinin başlıca göstəricisidir.
Buna görə də, özünütəsdiq simvolu olan
bayraq bütün dünyada qürur mənbəyi hesab edilir.
Bayraq həm də xalqın apardığı azadlıq
mübarizəsinin ən real ifadəsidir. Məhz bu
baxımdan Azərbaycan xalqının
azadlığını, dövlətimizin suverenliyini, öz
istiqlalı uğrunda apardığı mübarizəsini tərənnüm
edən üçrəngli bayrağımız milli
qürurumuzdur.
Fərəhləndirici
faktdır ki, qədim tarixə malik Azərbaycan Dövlət
bayrağının yüksəklərdə
dalğalanması üçün xalqımız çox
çətin, eyni zamanda, şanlı mübarizə
yollarından keçmişdir. Böyük qan bahasına
başa gəlmiş bayrağımızın dövlət
atributuna çevrilməsi və dünya birliyi tərəfindən
tanınması Azərbaycan xalqının uzun əsrlər
boyu apardığı mücadilənin nəticəsidir.
Əlbəttə, əbədi müstəqilliyimizin ən ali
simvolu olan üçrəngli bayrağımızın zirvələrdə
əbədi dalğalanması hər bir azərbaycanlını
qürurlandırır. Buna görə də, milli
düşüncəmizdə bayrağa xüsusi münasibət
tarix boyu özünü qabarıq göstərmiş, bu
bayraq xalqımızın milli mövcudluq nişanəsi
sayılmışdır.
Üçrəngli
bayrağımız milli dəyərlərimizi
daşımaqla yanaşı, istiqlal mübarizəmizin
şanlı nişanəsidir. O həm də Şərqdə
qurulan demokratik cümhuriyyətin – Azərbaycan
Respublikasının dövlət rəmzidir.
Xatırladaq
ki, görkəmli dövlət xadimi Fətəli xan Xoyskinin rəhbərlik
etdiyi Azərbaycan Müvəqqəti Hökumətinin 1918-ci
il 24 iyun tarixli qərarı ilə üzərində ağ
aypara və səkkizguşəli ulduz təsviri olan
qırmızı rəngli bayraq Azərbaycan Xalq Cümhuriyyətinin
Dövlət bayrağı kimi qəbul olunmuşdu.
1918-ci
il noyabrın 9-da isə Nazirlər Kabinetinin Bakıda
keçirilən iclasında Fətəli xan Xoyski milli bayraq
haqqında məruzə ilə çıxış etmiş,
müzakirələrdən sonra yaşıl,
qırmızı və mavi rənglərdən, ağ aypara və
səkkizguşəli ulduzdan ibarət olan bayraq Dövlət
bayrağı kimi qəbul edilmişdi. Qeyd etmək yerinə
düşər ki, bayrağımızın üçrəngli
olması ideyasının müəllifi görkəmli Azərbaycan
ziyalısı, türk dünyasının böyük şəxsiyyətlərindən
olan Əli bəy Hüseynzadədir. Ay-ulduzlu və
üçrəngli bayraq onun düşüncələrini əks
etdirirdi. Mavi rəng türklüyü, qırmızı rəng
müasirliyi, yaşıl rəng isə dinimizə
bağlılığın nişanəsi idi. Türk milli
şüurunun təkamülü və onun orta əsrlərin
ümmət fəlsəfəsindən milliyyət müstəvisinə
çevrilməsi də Əli bəy Hüseynzadənin həmin
üç düsturu ilə bağlıdır. O düstur bu
gün milli ideologiyamızın əsas prinsipləri kimi
bayrağımızın rəngində də əksini
tapır.
Bayrağımız
həm də Vətənimizin keçmişini, bu
gününü və gələcəyini özündə tərənnüm
edən müstəqilliyimizin simvoludur. Ulu öndər Heydər
Əliyevin “Azərbaycanın bayrağı sadəcə bayraq
deyil, o bizim dövlətçiliyimizin, müstəqilliyimizin
rəmzidir. Gərək hər bir evdə Azərbaycan dövlətinin
bayrağı olsun, hər bir ailə Azərbaycan
bayrağına itaət etsin. Bu bayraq gərək hər bir
ailənin həyatının əziz bir hissəsi olsun” kəlamı
bayrağımıza verilən yüksək qiyməti göstərir,
müasir dövlət qurucumuzun vacib dövlət atributuna olan
ehtiramını bir daha göz önünə gətirir.
Xatırladaq
ki, Azərbaycan Respublikasının Dövlət
bayrağı 1918-ci il noyabrın 9-da Azərbaycan Xalq
Cümhuriyyəti Hökumətinin iclasında qəbul
edilmiş və 1920-ci ilin aprel ayınadək dövlət
statusuna malik olmuşdu. Həmin bayraq 1990-cı il noyabrın
17-də Naxçıvan Muxtar Respublikası Ali Məclisinin sədri
Heydər Əliyevin təşəbbüsü və rəhbərliyi
ilə keçirilən sessiyada Naxçıvan Muxtar
Respublikasının dövlət bayrağı olaraq təsdiq
edilmişdi. 1991-ci il fevralın 5-də Azərbaycan
Respublikasının Ali Soveti “Azərbaycan Respublikasının
Dövlət bayrağı haqqında” Qanun qəbul edərək
onu Dövlət bayrağı elan etmişdi. Qeyd etmək
lazımdır ki, ulu öndərin 1998-ci il martın 13-də
“Azərbaycan Respublikasının dövlət
atributlarının təbliği işinin gücləndirilməsi
haqqında” sərəncamı mühüm əhəmiyyət
daşımışdır.
Dövlət bayrağı Azərbaycan vətəndaşlarının milli həmrəyliyinin, vahid məfkurə ətrafında sıx birləşmələrinin başlıca amillərindən biridir. Məhz bu amili nəzərə alaraq və onun təbliğinin daim diqqət mərkəzində saxlanılmasını təmin etmək məqsədilə Bakı şəhərində, Xəzərin sahilində Dövlət Bayrağı Meydanının yaradılması da Prezident İlham Əliyevin dövlət atributlarına olan yüksək ehtiramının ən gözəl nümunəsidir. Bununla bağlı sərəncam ölkə başçısı tərəfindən 2007-ci il noyabrın 17-də imzalanmışdı. 2007-ci il dekabrın 30-da Bakının Bayıl qəsəbəsində – Hərbi Dəniz Qüvvələrinin bazası yaxınlığında Prezident İlham Əliyevin iştirakı ilə Dövlət Bayrağı Meydanının təməli qoyulmuşdu. Bayraq Meydanının açılış mərasimində “Bayraq Meydanı Bakının bir mədəniyyət mərkəzinə, Azərbaycanın bir siyasi mərkəzinə çevriləcəkdir. Ölkəmizin mərkəzi olan Bakı şəhərində belə möhtəşəm meydanın yaradılması, doğrudan da, böyük hadisədir. Bizim bayrağımız qürur mənbəyimizdir. Bizim bayrağımız canımızdır, ürəyimizdir”,– deyən dövlət başçısı əlavə etmişdi ki, Azərbaycan ərazi bütövlüyünü bərpa edəndən sonra milli dövlət bayrağımız bu gün hələ də işğal altında olan torpaqlarda qaldırılacaqdır.
Xüsusi qeyd edilməlidir ki, dövlət başçısının 2009-cu il noyabrın 17-də imzaladığı sərəncamla Azərbaycanda Dövlət Bayrağı Günü təsis edilmişdir və hər il bu günün təntənəli şəkildə qeyd olunması keçmişimizə, milli dəyərlərimizə yüksək ehtiramın təzahürüdür. Ölkə vətəndaşlarının həmrəyliyini, vahid azərbaycançılıq məfkurəsi ətrafında sıx birliyini təmin edən Bayraq Gününün qeyd olunması, həmçinin gənc nəslin vətənpərvərlik ruhunda tərbiyə edilməsi prosesinə də güclü təsir göstərir. Bu gün Dövlət Bayrağı meydanının əhəmiyyətini artıran digər mühüm amil bu monumental kompleksin dövlət rəmzlərini özündə birləşdirən məkana çevrilməsidir. Bakı şəhərinin əsas simvollarından biri olan Dövlət Bayrağı meydanı dövlətimizin gücünü və qüdrətini təcəssüm etdirməklə yanaşı, gələcək nəsillər üçün də tarixi əhəmiyyətə malikdir. Bundan başqa, Bakı şəhəri ilə yanaşı, ölkəmizin bir çox bölgələrində də yaradılan bayraq meydanları dövlət atributlarımıza olan sevgi və hörmətin göstəricisidir.
Bu gün bayrağımız Azərbaycanın qüdrətini nümayiş etdirən yüksəklikdə dalğalanır. Azərbaycan bu gün üçrəngli dövlət bayrağımızla müstəqillik yolları ilə inamla irəliləyir. Ən əsası, hər bir vətəndaşımız, soydaşımız bayrağımıza sarılaraq Azərbaycan həqiqətlərinin beynəlxalq ictimaiyyətin diqqətinə çatdırılmasında yaxından iştirak edir. Dövlətinə, bayrağına böyük önəm verən Azərbaycan xalqı üçün belə bir günü yaşaması, çox yüksəklərə ucalan bayrağını hər an görməsi ona qürur verir. Son illər Azərbaycanın beynəlxalq müstəvidə nüfuzunun əhəmiyyətli dərəcədə artdığını nəzərə alsaq, bayrağımızın bütün səviyyələrdə yüksəldiyini əminliklə deyə bilərik. Təkcə dövlət tədbirlərində deyil, mötəbər idman yarışlarında da, humanitar, mədəni tədbirlərdə də dövlət bayrağımız zirvələrə yüksəldilir, himnimiz səslənir. Azadlıq uğrunda minlərlə şəhid verən Azərbaycan xalqı üçün də bundan böyük qürur mənbəyi ola bilməz!
Səbuhi
MƏMMƏDOV
Xalq qəzeti.- 2019.- 9
noyabr. S. 1;2.