Soltan və İsmayıl Hacıbəyovların

yubileylərinə həsr olunmuş elmi konfrans 

 

XI Beynəlxalq Üzeyir Hacıbəyli Musiqi Festivalı dünən də öz işini davam etdirmişdir. Azərbaycan Bəstəkarlar İttifaqında görkəmli bəstəkar, SSRİ Xalq artisti Soltan Hacıbəyovun 100 və onun oğlu, tanınmış bəstəkar İsmayıl Hacıbəyovun 70 illiyinə həsr olunmuş elmi konfrans keçirilmişdir.

 

Konfransda bildirilmişdir ki, bu il görkəmli Azərbaycan bəstəkarı, SSRİ Xalq artisti, SSRİ Dövlət mükafatı laureatı, Üzeyir Hacıbəyli adına Respublika Dövlət mükafatı laureatı, professor Soltan İsmayıl oğlu Hacıbəyovun anadan olmasının 100 illik yubileyidir. Soltan Hacıbəyov Qarabağın musiqi beşiyi sayılan Şuşada anadan olmuşdur. Azərbaycan simfonizminin təməlini qoymuş ilk bəstəkarlardan biri olan Soltan Hacıbəyov iki simfoniyanın, “Gülşən” baletinin, “İskəndər və çoban” uşaq operasının, simfonik, xalq çalğı alətləri orkestri, kvartet üçün müxtəlif janrlı əsərlərin, musiqili komediyaların, dram tamaşalarına musiqilərin, “Karvan” simfonik lövhəsinin müəllifidir.

 Bəstəkarın oğlu İsmayıl Hacıbəyov haqqında bəhs edən natiqlər bildirmişlər ki, o, 1949-cu il sentyabrın 2-də anadan olub. Onun piano üçün “Albomdan səhifələr” süitası, “Üç İdilliya”, fleyta və simli orkestr üçün “Konsertştük”, “Divertisment”, “Füruzə” operası, “İstəklər” triosu və başqa əsərləri musiqi sənətimizin dəyərli nümunələridir. Tədbirdə bəstəkarın kamera əsərləri səsləndirilmişdir.

Dünən, həmçinin festival çərçivəsində Azərbaycan Dövlət Akademik Filarmoniyasında Əməkdar artist, dirijor Əyyub Quliyevin rəhbərliyi ilə Çin Xalq Respublikasının “Silk Road” Filarmonik Orkestri və solistlər Rusiyanın Xalq artisti, violonçel ifaçısı Sergey Roldugin, P.İ.Çaykovski adına XIII beynəlxalq müsabiqəsinin II yerin mükafatçısı, pianoçu Miroslav Kultışev və beynəlxalq müsabiqələr laureatı, truba ifaçısı İsrafil Rəsulov çıxış etmişlər. Proqrama D.Şostakoviç, Y.Haydn, R.Ştraus və başqa bəstəkarların əsərləri daxil idi.

 

M. MÜKƏRRƏMOĞLU

 

Xalq qəzeti.- 2019.- 25 sentyabr.- S.7.