20 Yanvarın kino salnaməsini

yaradanlar haqqında yeni film

Mədəniyyət Nazirliyinin sifarişi ilə “Salnaməfilm studiyası” MMC-də istehsala buraxılan, şərti adı “20 Yanvar” (“Unutma”) olan sənədli filmin çəkilişləri başa çatmışdır.

Bununla bağlı filmin prodüseri Kamil Məmmədovla əlaqə saxladıq. O bildirdi ki, film hazırda montaj mərhələsindədir. Filmin ssenari müəllifi Ramiz Fətəliyev, rejissoru Nizami Abbasovdur.

Müsahibim qeyd etdi ki, filmdə 1990-cı il yanvarın 19-dan 20-nə keçən gecə sovet ordusunun xüsusi təyinatlı dəstələrinin və daxili qoşunların iri kontingentinin ağır texnikadan və müxtəlif tipli silahlardan istifadə edərək Bakıda və Azərbaycanın bir neçə rayonunda dinc əhalini atəşə tutaraq xüsusi qəddarlıq və misli görünməmiş vəhşiliklər törətməsini lentə alan, kinokameranın yaddaşlarına köçürən fədakar kino işçilərinin rolundan bəhs edilir.

K.Məmmədov dedi ki, həmin günlərdə “Azərbaycanfilm” və “Salnaməfilm” studiyasının operatorları başda olmaqla çəkiliş qrupları yaradılmışdır. Onlar “Salyan kazarması”nın, Filarmoniyanın, Prezident Adminstrasiyasının qarşısına, Biləcəri dairəsinə, indiki “20 Yanvar” metrostansiyası istiqamətinə, xəstəxanalara, meyitxanalara və şəhərin müxtəlif yerlərində baş verən hadisələri lentə almaq üçün yollanıblar. Filmdə “Azərbaycanfilm” və “Salnaməfilm” sənədli filmlər studiyasınin işçilərinin həmin müdhiş gecədə və sonra Azərbaycanın müxtəlif rayonlarında törədilən faciələr haqqında xatirələri və kadrarxası hadisələr barədə fikirlərinə geniş yer verilmişdir.

Filmin tam istehsalı yaxın vaxtlarda başa çatacaq və

20 Yanvar – Matəm günü ərəfəsində tamaşaçılara təqdim olunacaqdır.

M. MÜKƏRRƏMOĞLU

Xalq qəzeti.- 2019.- 8 yanvar.- S.3.