"100 il şərəfli ömür” beynəlxalq film festivalında

“100 il şərəfli ömür” sənədli filmi Los-Ancelesdə “FLICKFAIR” film festivalında ilkin mərhələləri keçərək finala vəsiqə qazanıb.

Filmin ssenari müəllifi, quruluşçu rejissoru və baş prodüseri Cəlaləddin Qasımov bildirib ki, ekran əsərinin posteri festivalın əsas səhifəsində yerləşdirilib. Onun sözlərinə görə, filmin çəkilməsində əsas məqsəd Hacı Zeynalabdin Tağıyevi geniş coğrafiyada tanıtmaq, həm də onun timsalında ölkəmiz haqqında insanlara geniş məlumat verməkdir.

"Hacı Zeynalabdin Tağıyev harada yaşamasından asılı olmayaraq, soydaşlarımızdan köməyini əsirgəməyib, Azərbaycan xalqının maariflənməsi, istedadlı insanların yüksək təhsil alması, kütləvi savadsızlığın aradan qaldırılması, ölkədə iqtisadiyyatın hərtərəfli inkişafının təmin olunması, habelə milli kadrların hazırlanması üçün zəruri tarixi missiyanı həyata keçirib. Hələ Bakı Dövlət Universitetində oxuduğum illərdən başlayaraq, bu görkəmli sahibkar və xeyriyyəçi haqqında çoxlu məlumat əldə etmişdim, bir sözlə, onunla bağlı çap olunan bütün materialları yığmışdım. Amma ağlıma da gəlməzdi ki, nə vaxtsa bu sənədlər, kitablar və fotoşəkillərdən mənim sənədli filmimdə istifadə olunacaq”,--deyə Cəlaləddin Qasımov bildirib.

O, XX əsrin əvvəllərində baş vermiş tarixi, siyasi proseslərə, eləcə də böyük xeyriyyəçinin həyatının müxtəlif məqamlarına güzgü tutan kadrların Almaniya arxivlərindən əldə edilməsinə böyük zaman sərf etdiyini söyləyib.

C.Qasımov deyib ki, ekran əsərinin gələcəkdə müxtəlif beynəlxalq festivallarda nümayişi haqqında da düşünür.

Ssenarisi üzərində üç ildən çox işlədiyini deyən C.Qasımov, həm tələbəlik illərində, həm də sonradan əldə etdiyi məlumatların onda əminlik yaratdığını vurğulayıb: "Elə bu məqsədlə 36 dəqiqəlik bədii-sənədli filmdə əsas kadrların 30 faizini o dövrdəki köhnə kadrlar təşkil edir. Bu kadrlar Almaniyadan əldə olunub və Rusiyanın Sankt-Peterburq şəhərində yenidən canlandırılıb. Bütün bunlar əsasən beynəlxalq festivallar üçün nəzərdə tutulub”.

Filmin redaktoru Əkbər Qoşalıdır. Mətni Xalq artisti Eldost Bayram səsləndirir.

M.MÜKƏRRƏMOĞLU

Xalq qəzeti 2020.- 3 iyul.- S.7.