Azərbaycan – Avropa İttifaqı münasibətləri yeni mərhələyə qədəm qoyur

Məlum olduğu kimi, iki il bundan əvvəl Azərbaycanla Avropa İttifaqı arasında hər iki tərəfin müstəqillik, suverenlik, ərazi bütövlüyü və beynəlxalq səviyyədə tanınmış sərhədlərin toxunulmazlığı prinsiplərinə sadiqliyi əks olunan “Tərəfdaşlıq prioritetləri” sənədi paraflanıb. Ermənistan – Azərbaycan, Dağlıq Qarabağ münaqişəsinin eyni prinsiplər əsasında həllinin həmin sənəddə əks olunması Ermənistana daha bir zərbədir”. Bu fikirləri Milli Məclisin deputatı, Yeni Azərbaycan Partiyası Nizami rayon təşkilatının sədri Sədaqət Vəliyeva bildirdi.

Prezident İlham Əliyevin Şərq Tərəfdaşlığı ölkələrinin videokonfrans formatında Sammitindəki çıxışına münasibət bildirən deputat dedi ki, dövlətimizin başçısı Ermənistanın işğalçı siyasətini bu gün də davam etdirdiyini diqqətə çatdırdı. Bildirdi ki, Dağlıq Qarabağ və Azərbaycanın daha 7 rayonu 30 ilə yaxındır ki, Ermənistanın işğalı altındadır. Ermənistanın etnik təmizləmə siyasəti nəticəsində 1 milyondan artıq azərbaycanlı qaçqın və məcburi köçkünə çevrilmişdir.

S.Vəliyeva, həmçinin qeyd etdi ki, möhtərəm Prezidentimiz, həmişə olduğu kimi, bu dəfə də mötəbər beynəlxalq qurumların Ermənistanın işğalçı siyasətini pisləyən qətnamələri qəbul etdikləri diqqətə çatdırdı: “BMT Təhlükəsizlik Şurasının 4 qətnaməsi Ermənistan qoşunlarının Azərbaycanın işğal edilmiş bütün ərazilərindən qeyd-şərtsiz və tam çıxarılmasını tələb edir. Ermənistan bu qətnamələrə, habelə, ATƏT, Qoşulmama Hərəkatı, NATO, Avropa Parlamenti və digər beynəlxalq təşkilatlar tərəfindən qəbul edilmiş müvafiq sənədlərə əməl etmək əvəzinə, işğal olunmuş ərazilərdə qeyri-qanuni məskunlaşma siyasəti həyata keçirir”.

Ermənistanın baş nazirinin populist çıxışları, məntiqsiz fikirləri və beynəlxalq hüququn norma və prinsiplərinə zidd olan arqumentləri, o cümlədən, danışıqların mahiyyət və formatını məhv etməyə çalışması da kəskin pislənildi. Dövlətimizin başçısı bir daha diqqətə çatdırdı ki, Ermənistanın baş nazirinin dediyinin əksi olaraq, Dağlıq Qarabağ Ermənistan deyil, Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa olunmalıdır.

S.Vəliyeva Azərbaycanın Şərq Tərəfdaşlığı çərçivəsində də Avropa İttifaqı ilə əməkdaşlıq etdiyini də diqqətə çatdırdı: Ölkəmiz 2009-cu ildə əsası qoyulan Şərq Tərəfdaşlığı proqramı çərçivəsində müxtəlif sahələrdə qurulan əməkdaşlıqda əhəmiyyətli nəticələrə imza atıb. Ötən 11 il ərzində təşkilat Azərbaycan iqtisadiyyatına böyük sərmayələr qoyub və ölkənin əsas ticarət tərəfdaşı olub. Eyni zamanda, Azərbaycan Şərq Tərəfdaşlığının altı üzv ölkəsinin içərisində Avropa İttifaqı ilə həyata keçirilən tvinninq layihələrinin sayına görə lider mövqeyində dayanır. Bu da onu göstərir ki, Avropa İttifaqı ilə Azərbaycan arasında sıx münasibətlər qurulub, hətta Şərq Tərəfdaşlığı çərçivəsində ölkəmiz qurumla əməkdaşlıqda lider mövqeyə yüksəlib. Elə bu səbəbdəndir ki, Şərq Tərəfdaşlığı sammitlərində də Azərbaycanın mövqeyi qəti olur və müdafiə edilir. Bu mənada, Şərq Tərəfdaşlığının son sammiti də istisna təşkil etmədi və Azərbaycanın Ermənistan üzərində növbəti siyasi qələbəsi kimi tarixə düşdü”.

Söhbəti qələmə aldı:

Əliqismət BƏDƏLOV,

Xalq qəzeti. - 2020.- 20 iyun.- S.3.